Saturday, November 10, 2007

യൂണികോഡ്‌

കംപ്യൂട്ടര്‍ സാങ്കേതിക വിദ്യയേയും പ്രാദേശിക ഭാഷകളെയും കോര്‍ത്തിണക്കുന്ന ലിപി വിന്യാസമാണ്‌ യൂണികോഡ്‌ ഫോണ്ടുകള്‍. ഇംഗ്ലീഷ്‌ മാത്രമാണ്‌ ഇന്റര്‍നെറ്റിന്റെ ഭാഷയെന്ന്‌ ധാരണയെ സാങ്കേതികപരമായി വരെ തിരുത്താന്‍ ശേഷിയുള്ളതാണ്‌ യൂണികോഡ്‌ ഫോണ്ടുകള്‍. പ്രാദേശിക ഭാഷകളില്‍ അനായാസമായി ഉപയോഗിക്കാന്‍ സാധിക്കുന്ന യൂണികോഡ്‌ ഫോണ്ടുകള്‍ ലോകത്തിലെ എല്ലാ ഭാഷകള്‍ക്കും പര്യാപ്‌തമായ അക്ഷരക്കൂട്ടമാണ്‌.പണ്ട്‌ മലയാളഭാഷയുടെ ഭാഗമായി ഉപയോഗിച്ചുവന്നിരുന്ന അക്കങ്ങള്‍ വരെ ഇന്ന്‌ യൂണികോഡ്‌ മലയാളത്തില്‍ ഇണക്കി ചേര്‍ത്തു കഴിഞ്ഞു. മീര എന്ന പേരില്‍ തനത്‌ മലയാളലിപിയിലുള്ള അക്ഷര രൂപം കെ.എച്‌.ഹുസൈന്‍,പി.സുരേഷ്‌ എന്നിവര്‍ ചേര്‍ന്ന്‌ വികസിപ്പിച്ചിട്ടുണ്ട്‌. പ്രാദേശിക ഭാഷകള്‍ ടൈപ്പ്‌ ചെയ്യാനുപയോഗിക്കുന്ന ട്രാന്‍സ്‌ലിറ്ററേഷന്‍ (ലിപ്യന്തരണം) വ്യാപകമായതോടെ ഇംഗ്ലീഷ്‌ കീബോര്‍ഡ്‌ ഉപയോഗിച്ച്‌ തന്നെ മലയാളം ടൈപ്പ്‌ ചെയ്യാമെന്ന സ്ഥിതി വന്നു.
'കേരളത്തിന്റെ' എന്നു സ്‌ക്രീനില്‍ കാണണമെങ്കില്‍ kEraLathinte എന്ന്‌ ടൈപ്പ്‌ ചെയ്‌താല്‍ മതിയാകും. മലയാളം ടൈപ്പിംഗ്‌ വശമില്ലാത്തവര്‍ക്കും എളുപ്പത്തില്‍ ടൈപ്പ്‌ ചെയ്യാമെന്നത്‌ ബ്ലോഗിംഗ്‌, ഓര്‍ക്കൂട്ട്‌ സ്‌ക്രാപ്‌ ബുക്ക്‌, വിക്കീപീഡിയ മലയാളം പതിപ്പ്‌, വെബ്‌ മാഗസിനുകള്‍ എന്നിവയില്‍ യൂണികോഡിനെ ജനകീയമാക്കുന്നു. യൂണികോഡ്‌ ഫോണ്ടുപയോഗിച്ച്‌ സര്‍ച്ച്‌ ചെയ്യാവുന്ന സങ്കേതം ഗൂഗിള്‍ വികസിപ്പിച്ചെടുത്ത്‌ വിന്യസിച്ചിട്ടുണ്ട്‌.

ന്റര്‍നെറ്റ്‌, ഡിജിറ്റല്‍ കണ്ടന്റുകള്‍ എന്നിവയുടെ വ്യാപകമായ ഉപയോഗത്തോടുകൂടി വിവരവിനിമയ രംഗത്ത്‌ ഒരു വലിയ കുതിച്ചാട്ടത്തിന്‌ ലോകം സാക്ഷ്യം വഹിക്കുകയാണ്‌. ഡിജിറ്റല്‍ വിദ്യ പ്രാപ്യമായവരും അല്ലാത്തവരും തമ്മിലുള്ള അന്തരം (ഡിജിറ്റല്‍ ഡിവൈഡ്‌) കുറയ്‌ക്കാന്‍ പ്രാദേശിക ഭാഷയിലുള്ള വിവരശേഖരം ഏറെ ഉപകരിക്കും.ഇന്റര്‍നെറ്റ്‌ ഉള്ളടക്കത്തിന്റെ കാര്യത്തില്‍ ഒരോ സേവനദാതാക്കളും അവരവരുടെ ഫോണ്ടാണ്‌ ഉപയോഗിച്ചുവരുന്നത്‌. ഓരോ സൈറ്റും വായിക്കണമെങ്കില്‍ അതാത്‌ ഫോണ്ടുകള്‍ ഡൗണ്‍ലോഡ്‌ ചെയ്യുകയും വേണം.പ്രാദേശിക ഭാഷയില്‍ മാറ്റര്‍ തയാറാക്കി മറ്റൊരു കംപ്യൂട്ടറിലേക്ക്‌ മാറ്റുമ്പോള്‍ ഫോണ്ട്‌ കൂടി പകര്‍ത്തി കൊടുക്കേണ്ട അവസ്ഥ.അക്ഷരങ്ങള്‍,അക്കങ്ങള്‍,ചിഹ്നങ്ങള്‍ എന്നിവ ഒന്നിന്റെയും പൂജ്യത്തിന്റെയും (ബൈനറി ഡിജിറ്റ്‌) ശ്രേണിയായി ആണ്‌ കംപ്യൂട്ടര്‍ ഓര്‍മ്മയിലേക്ക്‌ സൂക്ഷിക്കുന്നത്‌. ഇങ്ങനെ സൂക്ഷിക്കുമ്പോള്‍ ഓരോ അക്ഷരത്തിനും ഒന്നിനൊന്ന്‌ വ്യത്യസ്‌തമായ ബൈനറി ഡിജിറ്റ്‌ ശ്രേണി ഉണ്ടാകണം. നേരത്തേ ഇത്‌ ആസ്‌കി (ASCII- അമേരിക്കന്‍ സ്റ്റാന്‍ഡേഡ്‌ കോഡ്‌ ഫോര്‍ ഇന്‍ഫര്‍മേഷന്‍ ഇന്റര്‍ചേഞ്ച്‌) കോഡ്‌ ആയിരുന്നു. അക്ഷരങ്ങള്‍, അക്കങ്ങള്‍, ചിഹ്നങ്ങള്‍ എന്നിവയെ ഒന്നും പൂജ്യവും ഉപയോഗിച്ച്‌ കോഡ്‌ ചെയ്യുന്ന സമ്പ്രദായത്തെ കാരക്‌ടര്‍ എന്‍കോഡിംഗ്‌ എന്നാണ്‌ പറയുന്നത്‌. 256 അക്ഷര-അക്ക-ചിഹ്നങ്ങള്‍ മാത്രമേ ഉള്‍പ്പെടുത്താവുകയുള്ളൂ എന്നതാണ്‌ ആസ്‌കികോഡിന്റെ മുഖ്യപരിമിതി. 128 എണ്ണം ഇംഗ്ലീഷിനുപയോഗിക്കുന്ന ലാറ്റിന്‍ അക്ഷരങ്ങള്‍ക്കും ശേഷം 128 ഇംഗ്ലീഷിനുപയോഗിക്കാത്ത മറ്റ്‌ ലാറ്റിന്‍ ഭാഷക്കും ഉപയോഗിക്കാവുന്ന രീതിയാണ്‌ ഇതില്‍ പിന്തുടരുന്നത്‌. എന്നാല്‍ ഇന്റര്‍നെറ്റിന്റെ വ്യാപകമായ ഉപയോഗത്തോടെ ഒന്നിലധികം ഭാഷകള്‍ ഒരു സമയം തന്നെ ഒരു മാറ്ററില്‍ വായിക്കേണ്ട അവസരങ്ങളില്‍ ആസ്‌കീ ഫോണ്ടുകള്‍ ഉപയോഗിക്കാന്‍ തടസങ്ങളുണ്ട്‌. 256 ലൊക്കേഷനില്‍ ആദ്യത്തെ 128 ഇംഗ്ലീഷ്‌ ഭാഷയിലെ സ്‌മാള്‍കേയ്‌സ്‌, അപ്പര്‍ കേയ്‌സ്‌, അക്കങ്ങള്‍, ചിഹ്നങ്ങള്‍ എന്നിവ കോഡ്‌ ചെയ്യാന്‍ ഉപയോഗിക്കുന്നു. ഫ്രഞ്ച്‌, സ്‌പാനീഷ്‌, ജര്‍മ്മന്‍ ഭാഷകളിലെ ചില അക്ഷരങ്ങള്‍ കോഡ്‌ ചെയ്യാന്‍ ആദ്യ 128 ലൊക്കേഷനുകള്‍ മതിയാകില്ല. അപ്പോള്‍ അടുത്ത 128 ലൊക്കേഷനുകള്‍ ഇതിനായി ഉപയോഗപ്പെടുത്താം. ലാറ്റിന്‍ 1 എന്ന്‌ പേരിട്ട്‌ ഇതിനെ വിളിക്കുന്നു.

പക്ഷേ, മുഖ്യ പരിമിതി രണ്ടു ലാറ്റിന്‍ ലിപികള്‍ മാത്രമേ ഉപയോഗിക്കാന്‍ സാധിക്കൂ എന്നത്‌ തന്നെയാണ്‌. ചൈനീസ്‌, ജപ്പാനീസ്‌ പോലുള്ള അക്ഷരവൈവിധ്യം ഏറെയുള്ള ഭാഷകള്‍ 256 ല്‍ ഒതുങ്ങുകയുമില്ല എന്ന പ്രതിസന്ധിയും വന്നു. ഇത്‌ മറികടക്കാന്‍ ഫോണ്ട്‌ എന്‍കോഡിംഗ്‌ എന്ന സംവിധാനം ഉപയോഗിച്ചു. അക്ഷരങ്ങള്‍ കംപ്യൂട്ടറിലേക്ക്‌ സ്വീകരിക്കുന്നത്‌ ഇംഗ്ലീഷിലും ദൃശ്യമാക്കുന്നത്‌ മലയാളം പൊലെയുള്ള പ്രാദേശിക ഭാഷയിലും. ഇംഗ്ലീഷ്‌ അക്ഷരത്തിനുമേല്‍ മലയാള അക്ഷരം ചേര്‍ത്ത്‌ വയ്‌ക്കുന്ന രീതി. ഇന്റര്‍നെറ്റ്‌ സര്‍ച്ചിംഗ്‌ പൊലെയുള്ള സന്ദര്‍ഭങ്ങളില്‍ ഇത്‌ ഏറെ പ്രശ്‌നങ്ങള്‍ സൃഷ്‌ടിക്കും. കംപ്യൂട്ടറിനറിയില്ല ഇത്‌ മലയാളമാണന്ന്‌.!!ഏക പോംവഴി എല്ലാവര്‍ക്കും സ്വീകാര്യമായതും സാങ്കേതികപരമായി കുറ്റമറ്റതുമായ ഒരു ലിപി വ്യവസ്ഥ ഉണ്ടാക്കിയെടുക്കുക എന്നുള്ളതായി. ഇതിന്റെ ഫലമായി യൂണികോഡ്‌ കണ്‍സോര്‍ഷ്യം (www.unicode.org) എന്ന ലാഭേച്ഛയില്ലാത്ത സ്വതന്ത്ര സംഘടനനിലവില്‍ വന്നു. ലോകത്തിലെ മിക്ക കംപ്യൂട്ടര്‍, ഐ.ടി സ്ഥാപനങ്ങള്‍ യൂണികോഡ്‌ സംഘടനയിലെ അംഗങ്ങളാണ്‌. ഭാരതസര്‍ക്കാരും പ്രാദേശിക ഭാഷാ സംവിധാനം പരിപോഷിപ്പിക്കാനായി യൂണികോഡില്‍ ഇന്‍സ്റ്റിറ്റിയൂഷണല്‍ അംഗമാണ്‌. 1992 ല്‍ തന്നെ യൂണികോഡ്‌ 1.0 എന്ന പതിപ്പ്‌ പുറത്തുവന്നു ഇപ്പോള്‍ യൂണികോഡ്‌ 5.0 ആണ്‌ ഏറ്റവും പുതിയ അവതാരം. 16 ബിറ്റു മാത്രം ഉപയോഗിച്ച്‌ പൂജ്യവും ഒന്നും ശാസ്‌ത്രീയമായി വിന്യസിച്ച്‌ 500 ഓളം ഭാഷകളെ യൂണികോഡില്‍ എത്തിച്ചു കഴിഞ്ഞു. ഇപ്പോഴും കൂടുതല്‍ അക്ഷരശൈലികളും ഭാഷകളും യൂണികോഡിലേക്ക്‌ എത്തിക്കൊണ്ടിരിക്കുന്നു. ഒന്‍പത്‌ ഭാരതീയ ഭാഷകള്‍ക്കായി 1152 (9 X 128 = 1152) കോഡുകള്‍ അനുവദിച്ചിട്ടുണ്ട്‌. 3328 മുതല്‍ 3455(0D00 - 0D7F) വരെയുള്ള കോഡുകള്‍ മലയാള ലിപി ഫോണ്ടുകള്‍ക്കായി നീക്കി വച്ചിരിക്കുന്നു. പക്ഷെ, ഈ അക്ഷരങ്ങള്‍ എങ്ങനെ സ്‌ക്രീനിലും അച്ചടിയിലും ദൃശ്യമാകണമെന്ന്‌ തീരുമാനിക്കേണ്ടത്‌ കംപ്യൂട്ടര്‍ ഹാര്‍ഡ്‌വെയര്‍ സോഫ്‌ട്‌വെയര്‍ രംഗത്ത്‌ പ്രവര്‍ത്തിക്കുന്ന സാങ്കേതിക വിദഗ്‌ധരും സ്ഥാപനങ്ങളുമാണ്‌. യൂണികോഡ്‌ വഴി 65536 അക്ഷരങ്ങള്‍ ഉള്‍ക്കൊള്ളിക്കാനാകും. ലോകത്തില്‍ ഇന്ന്‌ പ്രചാരത്തിലിരിക്കുന്ന ഭാഷകള്‍ക്കിതു മതിയാകും. ഇതിലൂടെ ഓരോ പ്രാദേശിക ഭാഷക്കും അതിന്റെ ഇടം കംപ്യൂട്ടറില്‍ ലഭിക്കും. യൂണികോഡ്‌ മലയാളം, മലയാള ലിപിയായി തന്നെ കംപ്യൂട്ടര്‍ മനസിലാക്കുന്നു. സിസ്റ്റത്തില്‍ എതെങ്കിലും ഒരു യൂണികോഡ്‌ ഫോണ്ട്‌ (രചന,അഞ്‌ജലി) ഉണ്ടായാല്‍ മതിയാകും.ആ ഫോണ്ടിന്റെ അക്ഷര ഭംഗിയില്‍ മാറ്റര്‍ വായിക്കാം. പക്ഷെ മലയാളത്തില്‍ 900 ലധികം (വിവിധ കൂട്ടക്ഷരങ്ങളടക്കം) അക്ഷരങ്ങളുള്ളപ്പോള്‍ 256 ഉപയോഗിച്ച്‌ എങ്ങനെ ഇതെല്ലാം ദൃശ്യമാക്കാനാകും.

വിടെയാണ്‌ ഓപ്പണ്‍ ടൈപ്പ്‌ ഫോണ്ട്‌ സാങ്കേതികവിദ്യ സഹായത്തിനെത്തുന്നത്‌. യൂണികോഡും ഓപ്പണ്‍ ടൈപ്പ്‌ കൂടിയായാല്‍ എല്ലാ അക്ഷരങ്ങളെയും അക്ഷരക്കൂട്ടങ്ങളെയും അതേ രീതിയില്‍ തന്നെ ദൃശ്യമാക്കാം. പ #്‌ ര എന്നതിന്‌ പകരം പ്ര എന്നു തന്നെ കാണിക്കാം. സ്വതന്ത്ര സോഫ്‌ട്‌വെയര്‍ സംരഭങ്ങള്‍ യൂണികോഡ്‌ ഫോണ്ടുകള്‍ വ്യാപകമായി ഉപയോഗിച്ച്‌ വരുന്നുണ്ട്‌. ഏത്‌ പ്ലാറ്റ്‌ഫോമിലും, ഏത്‌ ആപ്ലിക്കേഷനിലും ഉപയോഗിക്കാമെന്നത്‌ യൂണികോഡിനെ ജനകീയമാക്കുന്നു. നിലവില്‍ യൂണികോഡ്‌ അധിഷ്‌ഠിത ഫോണ്ടുകള്‍ മലയാളത്തില്‍ കുറവാണെങ്കിലും കൂടുതല്‍ വ്യാപകമാകുന്നതോടെ ഒട്ടേറെ അക്ഷരരൂപങ്ങള്‍ വികസിപ്പിച്ചെടുക്കുമെന്ന്‌ പ്രതീക്ഷിക്കാം. പ്രാദേശിക ഭാഷാ കംപ്യൂട്ടിംഗിന്‌ യൂണികോഡ്‌ ഒരു അനിവാര്യതയായി കഴിഞ്ഞു. ഇ-ഗവേണന്‍സ്‌, ഇ-വായന പോലുള്ള പദ്ധതികള്‍ കൂടുതല്‍ ഫലപ്രദമാക്കാന്‍ മലയാളം യൂണികോഡിലുള്ള അക്ഷരശൈലി ഉപകരിക്കുമെന്നത്‌ മേന്മയാണ്‌.
( വിവരങ്ങള്‍ക്ക്‌ സ്വതന്ത്ര മലയാളം കമ്പ്യൂട്ടിംഗ്‌ സംഘത്തോട്‌ കടപ്പാട്‌ )

16 comments:

v k adarsh said...

(ഡിജിറ്റല്‍ ഡിവൈഡ്‌) കുറയ്‌ക്കാന്‍ പ്രാദേശിക ഭാഷയിലുള്ള വിവരശേഖരം ഏറെ ഉപകരിക്കും

v k adarsh said...

(ഡിജിറ്റല്‍ ഡിവൈഡ്‌) കുറയ്‌ക്കാന്‍ പ്രാദേശിക ഭാഷയിലുള്ള വിവരശേഖരം ഏറെ ഉപകരിക്കും

വിശ്വനാഥന്‍| said...

1. 256 അക്ഷര-അക്ക-ചിഹ്നങ്ങള്‍ മാത്രമേ ഉള്‍പ്പെടുത്താവുകയുള്ളൂ എന്നതാണ്‌ ആസ്‌കികോഡിന്റെ മുഖ്യപരിമിതി. 128 എണ്ണം ഇംഗ്ലീഷിനും ശേഷം 128 മറ്റൊരു ഭാഷക്കും ഉപയോഗിക്കാവുന്ന രീതിയാണ്‌ ഇതില്‍ പിന്തുടരുന്നത്‌.

2. ഒന്‍പത്‌ ഭാരതീയ ഭാഷകള്‍ക്കായി 1152 (9 X 128 = 1152) കോഡുകള്‍ അനുവദിച്ചിട്ടുണ്ട്‌. 3328 മുതല്‍ 3455 വരെയുള്ള കോഡുകള്‍ മലയാള ഭാഷാ ഫോണ്ടുകള്‍ക്കായി നീതി വച്ചിരിക്കുന്നു.


ആദ്യകേസില്‍ ആസ്കിയില്‍ ഇംഗ്ഷീന് 128 എണ്ണം റിസര്‍വ് ചെയ്തശേഷമുള്ള 128 മലയാളത്തിന് (ഉദാഹരണത്തിന് ) ഉപയോഗിക്കുന്നുവെന്ന് സമ്മതിക്കുന്നു, യൂണികോഡ് ആയപ്പോഴും, (2 പ്രകാരം) ഒരോ ഭാരതീയ ഭാഷയ്ക്കും 128 കോഡുകള്‍ മാത്രമല്ലേ അനുവദിച്ചിട്ടുള്ളു. ....
കണ്‍ഫ്യൂഷനായല്ലോ ആദര്‍ശേ?

പ്രവീണ്‍|Praveen aka j4v4m4n said...

ഇതു് കൂടി കാണൂ.

വിശ്വനാഥന്‍, 128 വ്യത്യസ്ത കോഡുകളാണു്. ആസ്കിയില്‍ എല്ലാ ഇന്ത്യന്‍ ഭാഷകള്‍ക്കും 128-255 എന്ന സ്ഥാനത്തേ കൊടുക്കാന്‍ പറ്റൂ, അതു കൊണ്ടു് തന്നെ ഒന്നിലധികം ഭാഷകള്‍ ഒന്നിച്ചെഴുതാന്‍ സാധ്യമല്ല. എന്നാല്‍ യൂണികോഡില്‍ ഒരോ ഭാഷയ്ക്കു് വ്യത്യസ്ഥമായ സ്ഥാനങ്ങള്‍ കൊടുത്തിട്ടുണ്ടു്.

സിബു::cibu said...

ലേഖനത്തില്‍ പൊതുവേ ഭാഷാ അടിസ്ഥാനത്തിലാണ് എന്‍‌കോഡിംഗ് എന്നൊരു വിവക്ഷയുണ്ട്. ലിപി അടിസ്ഥാനത്തിലാണ് അത്. മലയാളിക്ക്‌ ഭാഷയും ലിപിയും പരസ്പരം തെറ്റാന്‍ സാധ്യതയുണ്ടെങ്കിലും, ലിപി എന്നുപയോഗിച്ചാലേ സംഗതി ശരിയാവൂ. അതുതിരുത്തിയാല്‍ താഴെ പറയുന്ന തെറ്റായ സ്റ്റേറ്റ്മെന്റുകള്‍ ശരിയാവും:

“128 എണ്ണം ഇംഗ്ലീഷിനും ശേഷം 128 മറ്റൊരു ഭാഷക്കും ഉപയോഗിക്കാവുന്ന രീതിയാണ്‌ ഇതില്‍ പിന്തുടരുന്നത്‌.“ > 128 എണ്ണം ഇംഗ്ലീഷിനുപയോഗിക്കുന്ന ലാറ്റിന്‍ അക്ഷരങ്ങള്‍ക്കും, ബാക്കി ഇംഗ്ലീഷിനുവേണ്ടാത്ത മറ്റു ലാറ്റിന്‍ അക്ഷരങ്ങള്‍ക്കും.

“പക്ഷേ, മുഖ്യ പരിമിതി രണ്ടു ഭാഷകള്‍ മാത്രമേ ഉപയോഗിക്കാന്‍ സാധിക്കൂ എന്നത്‌ തന്നെയാണ്‌.“ > ലാറ്റിന്‍ ലിപി മാത്രമേ പറ്റൂ എന്നതാ‍ണ്..

3328 മുതല്‍ 3455 വരെയുള്ള കോഡുകള്‍ മലയാള ഭാഷാ ഫോണ്ടുകള്‍ക്കായി നീതി വച്ചിരിക്കുന്നു. > ... കോഡുകള്‍ മലയാളലിപിയ്ക്കായി നീക്കി...

“യൂണികോഡ്‌ ഫോണ്ടുപയോഗിച്ച്‌ സര്‍ച്ച്‌ ചെയ്യാവുന്ന സങ്കേതം ഗൂഗിള്‍ വികസിപ്പിച്ചെടുത്ത്‌ വിന്യസിച്ചിട്ടുണ്ട്‌.“ > ഈ വാചകം ശരിയല്ല.. എങ്ങനെ ശരിയാക്കണമെന്നറിയില്ല :(

“സജീവമായ ഇന്റര്‍നെറ്റ്‌ ബന്ധവും ഓഫ്‌ലൈനായി മാറ്റര്‍ സേവ്‌ ചെയ്യുമ്പോഴുള്ള സാങ്കേതിക തടസങ്ങളും തിരിച്ചടിയായി.“ - മനസ്സിലായില്ല :(

ഈ ലേഖനത്തില്‍ ചേര്‍ക്കാവുന്ന രസമുള്ള വിവരങ്ങളാണ്:

100, 000-മതായി ചേര്‍ക്കപ്പെട്ട യുണീക്കോഡ് അക്ഷരം മലയാളം പ്രശ്ലേഷമാണ്
മലയാളം ‘അ’ യുടെ യുണീക്കോഡ് സംഖ്യ 3333 ആണ്
മലയാളം ചില്ലുകള്‍ക്ക്‌ പുതിയ വെര്‍ഷനില്‍ പ്രത്യേകം യുണീക്കോഡ് സംഖ്യകള്‍ ലഭിക്കുന്നു..
പണ്ടുപയോഗിച്ചിരുന്ന അക്കങ്ങള്‍ വരെ ഇന്ന്‌ യുണീക്കോഡിലുണ്ട്.
വിന്‍ഡോസ് xp sp2, വിസ്ത എന്നിവയില്‍ മലയാളം സപ്പോര്‍ട്ടുണ്ട്.

ബിനു പരവൂര്‍ said...

ഈ യൂണികോഡ് ഉപയോഗിച്ച് മങ്ഗ്ലീഷില്‍ മാത്രമേ ടൈപ്പ് ചെയ്യാന്‍ പറ്റുകയുള്ളോ? ഇവിടെ മലയാളം typewriting പഠിച്ചവര്‍ക്ക് യാതൊന്നും അതിലൂടെ നടത്താന്‍ കഴിയില്ലല്ലോ... മങ്ഗ്ലീഷില്‍ ടൈപ്പ് ചെയ്യുന്നതിനേക്കാള്‍ വേഗത്തില്‍ മലയാളം typewriting ലൂടെ ടൈപ്പ് ചെയ്യാന്‍ കഴിയും. ഇങ്ങനെ മലയാളം typewriting keyboard ലൂടെ യുണികോഡ് ഉപയോഗപ്പെടുത്തി ടൈപ്പ് ചെയ്യാന്‍ കഴിയുന്ന ഏതെങ്കിലും software ഉള്ളതായി അറിവുണ്ടോ? ഉണ്ടെങ്കില്‍ അതിന്റെ ലിങ്ക് തരണമെന്ന് അഭ്യര്‍ത്ഥിക്കുന്നു..

keralafarmer said...

:)

Sebin Abraham Jacob said...

ബിനു പരവൂരിന്‍റെ സംശയം യാദൃശ്ചികമായാണ് കണ്ടത്. മലയാളം ടൈപ്പ് ചെയ്യാന്‍ മംഗ്ലീഷ് മാത്രമല്ല ഉപയോഗിക്കാവുന്നത്. അതിന് യൂണിക്കോഡെന്നോ ആസ്കിയെന്നോ ഉള്ള വേര്‍തിരിവൊന്നുമില്ല. ഓരോ പ്രോഗ്രാമിനൊപ്പവും വരുന്ന കീബോര്‍ഡ് ലേ ഔട്ട് എങ്ങനെയാണോ, അതനുസരിച്ച് ഇന്‍പുട്ട് നടത്താം.

ഞാന്‍ മംഗ്ലീഷിലല്ല, ടൈപ്പ് ചെയ്യുന്നത്. ടാവുല്‍സോഫ്റ്റ് കീമാന്‍റെ ഒപ്പം മിന്‍ സ്ക്രിപ്റ്റ് കീമാപ്പ് കൂടി ഇന്‍സ്റ്റാള്‍ ചെയ്ത് നേരെ മലയാള ഭാഷയിലാണ് ടൈപ്പ് ചെയ്യുന്നത്. കീമാപ്പുകള്‍ പലത് ലഭ്യമാണ്. മൊഴി കീമാപ്പാണ് വ്യാപകമായി ഉപയോഗത്തിലിരിക്കുന്നത്. അതുപയോഗിക്കുമ്പോഴാണ് മംഗ്ലീഷില്‍ ടൈപ്പ് ചെയ്യുന്നത്.

ഞാന്‍ ഇന്‍പുട്ടിനുപയോഗിക്കുന്ന കീബോര്‍ഡ് ലേഔട്ട് മുമ്പ് ഇന്ത്യന്‍ ഭാഷകള്‍ക്കായി സിഡാക് വികസിപ്പിച്ച ഇന്‍സ്ക്രിപ്റ്റ് എന്ന രീതിയാണ്. പഴയ ജിഎസ്എം ലോക്ക് ഉപയോഗിച്ച് ടൈപ്പ് ചെയ്യുന്നിടത്തെല്ലാം സമാനമായ രീതിയാണ് ഉപയോഗിക്കുന്നത്. ഇതു പഠിച്ചാല്‍ ഇന്ത്യയിലെ എല്ലാ ഭാഷകളും ഒരേപോലെ ടൈപ്പ് ചെയ്യാനാവും എന്നതാണ് സവിശേഷത. വേഗതയൊക്കെ പരിശീലിക്കുന്ന രീതിയില്‍ താനെ ഡെവലപ് ചെയ്യുന്നതാണ്.

ഇതുകൂടാതെ തിരുവനന്തപുരത്തെ സി-ഡിറ്റ് വികസിപ്പിച്ച കാവേരി എന്ന സ്വതന്ത്രസോഫ്റ്റ്വെയറും ലഭ്യമാണ്. ഇതും ഞാനുപയോഗിക്കാറുണ്ട്. മിന്‍ സ്ക്രിപ്റ്റിലെയും കാവേരിയിലേയും ഇന്‍സ്ക്രിപ്റ്റ് കീബോര്‍ഡുകളില്‍ ചില അക്ഷരങ്ങളുടെ വിന്യാസം വേറെ വേറെ കീകളിലാണ്. ചെറിയ വ്യത്യാസം മാത്രമാണിത്. അത് തന്നെ മനസ്സിലാക്കി പഠിക്കാവുന്നതേയുള്ളൂ.

കാവേരി ഉപയോഗിച്ചാല്‍ തമിഴ്, തെലുങ്ക്, മലയാളം, കന്നഡ, ഇംഗ്ലീഷ് എന്നീ ഭാഷകള്‍ നേരിട്ട് ടൈപ്പ് ചെയ്യാനാവും. മലയാളം തന്നെ ഫണറ്റിക്, ഇന്‍ഡ്യ, ഇന്‍സ്ക്രിപ്റ്റ് എന്നീ മൂന്ന് കീബോര്‍ഡ് ലേഔട്ടുകള്‍ ഉപയോഗിച്ച് ടൈപ്പ് ചെയ്യാനാവും. ഒരു പ്രശ്നമുള്ളത്, ഇത് ഫ്രീ ഡൗണ്‍ലോഡ് ആയി ലഭ്യമാണെങ്കിലും സിഡിറ്റിന് വേഗതേറിയ സര്‍വ്വര്‍ സൗകര്യം ഇല്ലാത്തതിനാല്‍ ഡൗണ്‍ലോഡ് ചെയ്തുകിട്ടാന്‍ താമസം വരുമെന്നതാണ്. മറ്റൊന്ന് അനാവശ്യമായി മലയാളം ഓപ്പണ്‍ഓഫീസ് ഇതിനൊപ്പം ബണ്ടില്‍ഡ് ആയാണ് നല്‍കുന്നത്. അതുമൂലം ഫയല്‍ സൈസ് കൂടുന്നു. അതേസമയം മിന്‍സ്ക്രിപ്റ്റ് വെറുതെ ഒരു ഇ-മെയില്‍ അറ്റാച്ച്മെന്‍റ് ആയി അയക്കാവുന്ന വലിപ്പമേയുള്ളൂ.

കാവേരിയുടെ ഡൗണ്‍ലോഡ് ലിങ്ക് ഈ പേജില്‍.

റാല്‍മിനോവിന്‍റെ വേര്‍ഡ്പ്രസ് ബ്ലോഗില്‍ മലയാളം ഇന്‍സ്ക്രിപ്റ്റ് കീബോര്‍ഡുകളിലേക്കുള്ള ലിങ്ക് ഉള്ളതായാണ് എന്‍റെ ഓര്‍മ്മ. കീബോര്‍ഡ് ലേഔട്ടും നല്‍കിയിട്ടുണ്ട്.

Sebin Abraham Jacob said...

http://www.clickeralam.org/product.html

ഇനി ലിങ്കില്‍ ക്ലിക്കിയിട്ട് പേജ് വന്നില്ലെങ്കില്‍ മുകളിലത്തെ യു.ആര്‍.എല്‍ പുതിയ ടാബില്‍ പേസ്റ്റ് ചെയ്ത് എടുക്കുക.

Sebin Abraham Jacob said...
This comment has been removed by the author.
ബിനു പരവൂര്‍ said...

ഒരു സംശയം വീണ്ടും നില്‍ക്കുന്നു സെബിന്‍ മാഷേ... ഈ കാവേരി ഉപയോഗിച്ച് മലയാളം typewriter keyboard ഇല്‍ ടൈപ്പ് ചെയ്യാന്‍ കഴിയുമോ? ഞാന്‍ മലയാളം typewriting പഠിച്ചിട്ടുണ്ട്. ആ സ്ഥിതിക്ക് എനിക്ക് സി ഡാക്കിന്റെ ഇന്‍സ്ക്രിപ്റ്റ് കീബോര്‍ഡിനേക്കാള്‍ പ്രയോജനം typewriting keyboard ആണ്. കാവേരിയുടെ ഫൈല്‍ സൈസ് വളരെ വലുതായി കണ്ടു. അത് download ചെയ്താല്‍ എനിക്ക് മലയാളം typewriting keyboard പ്രയോജനപ്പെടുത്താന്‍ കഴിയുമോ?

keralafarmer said...

ഇപ്പോള് വന്ന് വന്ന് ടൈപ്പ് ചെയ്യാന് മൗസ് മാത്രം മതിയോ? ഈ ലിങ്ക് കാണുക. ക്ലിക്കുകള് കൊണ്ട് രചിക്കാം.

Sebin Abraham Jacob said...

മലയാളം ടൈപ്പ് റൈറ്റിംഗ് കീബോര്‍ഡ് എന്നു പറയുമ്പോള്‍ ഏതു കമ്പനിയുടെ കീബോര്‍ഡ് എന്നൊരു ചോദ്യം കൂട്ടത്തില്‍ വരും. കാരണം നമുക്ക് മാനകമായ ഒരു കീബോര്‍ഡ് ഉണ്ടായിരുന്നില്ല. റെമിങ്ടണ്‍, വെരിറ്റൈപ്പര്‍ എന്നീ കമ്പനികള്‍ നല്‍കിയ രണ്ടുതരം കീബോര്‍ഡുകള്‍ വ്യാപകമായി ഉപയോഗിച്ചിരുന്നു. വേറെയും ഉണ്ടായിരുന്നു. എനിക്കിത് രണ്ടും അറിയില്ല.

പിന്നീട് കമ്പ്യൂട്ടര്‍ അധിഷ്ഠിത ഡിടിപി വരുന്നതിന് തൊട്ടുമുമ്പ് ഫോട്ടോ കമ്പോസിംഗ് മെഷീന്‍ എന്നൊരു കുണ്ടാമണ്ടി വന്നു. അതിന് വേണ്ടിയാണ് വെരിറ്റ്ഫോണ്ട് എന്നൊരു സങ്കേതം ഇന്നത്തെ തൂലിക മലയാളം ടൈപ്പിംഗ് യൂട്ടിലിറ്റി നിര്‍മ്മാതാക്കളായ സൂപ്പര്‍സോഫ്റ്റ് നിര്‍മ്മിച്ചതെന്ന് കേട്ടിട്ടുണ്ട്. ശരിയാണോയെന്ന് ഉറപ്പില്ല. അത് വെരിറ്റൈപ്പറിന്‍റെയും ഫണറ്റിക് അധിഷ്ഠിത കീബോര്‍ഡിന്‍റെയും ഒരു കലര്‍പ്പായിരുന്നു. ഇത് പഠിച്ചവര്‍ ഇതിനാണ് ഏറ്റവും വേഗം എന്ന് അവകാശപ്പെട്ട് കണ്ടിട്ടുണ്ട്.

ഫോട്ടോകമ്പോസിംഗ് മെഷീന്‍ ടൈപ്പ് സെറ്റിംഗ് രംഗത്ത് അധികനാള്‍ വാണില്ല. ചെറിയ ഇടവേളയില്‍ ഡിടിപിയും ഓഫ്സെറ്റും കളംപിടിച്ചു. അതോടെ മലയാളം ഡിടിപി നല്‍കാനായി വിവിധ സോഫ്റ്റ്വെയര്‍ നിര്‍മ്മാതാക്കള്‍ വിവിധ കീബോര്‍ഡുകളുമായി രംഗത്തെത്തി ആകെ നാശമാക്കി. സി-ഡാക് ഇന്‍സ്ക്രിപ്റ്റ് വികസിപ്പിച്ചത് എല്ലാ ഇന്ത്യന്‍ ഭാഷകള്‍ക്കും വേണ്ടിയാണ്. മറ്റ് ഇന്ത്യന്‍ ഭാഷകള്‍ക്കില്ലാത്ത ചില്ലുകളും ചില കൂട്ടക്ഷരങ്ങളും മീത്തല്‍, ചന്ദ്രക്കല തുടങ്ങിയവയും മലയാളത്തിന്‍റെ പ്രത്യേകതയാണ്. ഇവകൂടി കണക്കിലെടുത്ത് രചന മിന്‍സ്ക്രിപ്റ്റ് വികസിപ്പിച്ചു. ഇതിനിടയില്‍ ഇന്‍സ്ക്രിപ്റ്റ് കീബോര്‍ഡില്‍ ചെറിയ ചെറിയ മാറ്റങ്ങള്‍ വരുത്തി മറ്റുപലരും പുതിയപുതിയ കീബോര്‍ഡ് ലേഔട്ടുകള്‍ ഇറക്കി. തൂലിക തന്നെ റെമിങ്ടണ്‍, വെറിറ്റൈപ്പര്‍, വെരിറ്റൈപ്പര്‍ ഫണറ്റിക്, ഫണറ്റിക്, സ്ക്രിപ്റ്റ് എന്നിങ്ങനെ അഞ്ച് കീബോര്‍ഡ് ലേഔട്ടുകളോടെയാണ് വിപണിയില്‍ വില്‍ക്കുന്നത്.

ഇങ്ങനെ ചെയ്തതിന് പ്രധാന കാരണം തന്‍റെ സോഫ്റ്റ്വെയര്‍ കൂടുതല്‍ വില്‍ക്കപ്പെടുന്നതായിക്കഴിഞ്ഞാല്‍ മലയാളം ടൈപ്പ് ചെയ്യണമെങ്കില്‍ അത് തന്നെ പഠിക്കണം എന്ന നിര്‍ബന്ധാവസ്ഥ ഉണ്ടാക്കാന്‍ സോഫ്റ്റ്വെയര്‍ നിര്‍മ്മാതാക്കള്‍ കാലേക്കുട്ടി ചെയ്തതാണെന്ന് അനുമാനിക്കാം. അതുകൊണ്ട് തന്നെ മാനകമായ ഒരു മലയാളം കീബോര്‍ഡ് നമുക്കില്ലാതെ പോയി. അതേസമയം, മംഗ്ലീഷില്‍ ടൈപ്പ് ചെയ്യുന്ന വരമൊഴി, മൊഴി കീമാപ്പ്, ഇളമൊഴി തുടങ്ങിയവ വളരെ പ്രചാരത്തിലായി. ഇതാണ് കീബോര്‍ഡ് ലേഔട്ടുകളെ സംബന്ധിച്ച് എനിക്കുള്ള പ്രാഥമിക വിവരം.

കൂടുതലറിയണമെങ്കില്‍ ഇപ്പോഴത്തെ സാഹചര്യത്തില്‍ പ്രയാസമാണ്. കാരണം സാങ്കേതികവിദഗ്ദ്ധന്മാര്‍ ഭൂരിപക്ഷവും മംഗ്ലീഷ് രീതിയുടെ പ്രചാരകരാണ്. എങ്കിലും ഇതേ സംബന്ധിച്ച് കഴിയുന്ന വിവരങ്ങള്‍ ശേഖരിച്ച് എത്തിക്കാന്‍ ശ്രമിക്കാം.

പ്രവീണ്‍|Praveen aka j4v4m4n said...

ചന്ദ്രേട്ടാ, ഇതു് ഗ്നു/ലിനക്സില്‍ പണ്ടു് മുതലേ ഉള്ളതാണല്ലോ. ഇന്‍സ്ക്രിപ്റ്റ് പഠിയ്ക്കുന്നതിനു് മുമ്പു് ഞാനതാ ഉപയോഗിച്ചിരുന്നതു്. "കാരക്റ്റര്‍ മാപ്" എന്ന ഈ പ്രയോഗം "ഉപകരണങ്ങള്‍" എന്ന മെനുവിനടിയിലുണ്ടു്. gucharmap എന്ന ആജ്ഞ ഉപയോഗിച്ചും ഇതു് തുറക്കാം.

സെബിന്‍, ഞാന്‍ ഇന്‍സ്ക്രിപ്റ്റിന്റെ പ്രചാരകനാ. കീബോര്‍ഡ് വിന്യാസം പഠിയ്ക്കാനുള്ളൊരു മടിയാണു് മംഗ്ലീഷ് പ്രചരിയ്ക്കാന്‍ കാരണം. ഈ മടി കാരണം തന്നെയാണു് ഞാന്‍ പണ്ടു് കാരക്റ്റര്‍ മാപ് ഉപയോഗിച്ച് ടൈപ് ചെയ്തിരുന്നതു്.

റാല്‍മിനോവിന്റെ പോസ്റ്റ്

മലയാളം കീബോര്‍ഡ് വിന്യാസം

Sebin Abraham Jacob said...

പ്രവീണ്‍,കേരള ഫാര്‍മര്‍,

ഗ്നൂ ലിനക്സില്‍ മാത്രമല്ല, വിന്‍ഡോസിലും പണ്ടുമുതലേ ക്യാരക്ടര്‍ മാപ്പ് ഉപയോഗിക്കുന്നുണ്ട്.

മാഗസിനുകളുടെയും മറ്റും പേജ് ലേഔട്ട് നിര്‍വ്വഹിക്കുമ്പോള്‍ പലപ്പോഴും ഫോട്ടോഷോപ്പ് ഉപയോഗിക്കേണ്ടിവരാറുണ്ട്. ഇന്‍ഡിസൈനൊക്കെ വളരെയടുത്താണല്ലോ ഉപയോഗിച്ചുതുടങ്ങിയത്. മിക്ക ഡിടിപിക്കാരും ക്വാര്‍ക് എക്സ്പ്രസ് കണ്ടിട്ടുപോലുമുണ്ടാവില്ല. പരസ്യങ്ങളും മറ്റും ചെയ്യാനേ കോറല്‍ ഡ്രോ പോലുള്ളവ ഉപയോഗിച്ചിരുന്നുള്ളൂ. പലപ്പോഴും ഫോട്ടോഷോപ്പും പേജ് മേക്കറും ഉപയോഗിച്ചാണ് പേജ് നിര്‍മ്മിക്കുക.

ആസ്കിയുടെ കാലത്ത് പല മലയാളം ഫോണ്ടുകളുടെയും ഫോണ്ട്ഫേസ് ഫോട്ടോഷോപ്പിനുള്ളില്‍ ടൈപ്പ് ചെയ്യാന്‍ പറ്റാറില്ലായിരുന്നു. ഫോണ്ട് ഹൈജാക്കിംഗാണല്ലോ മലയാളത്തില്‍ നടന്നുകൊണ്ടിരുന്നത്. (യൂണിക്കോഡായപ്പോഴും മാറ്റമൊന്നുമില്ല, കാരണം അഡോബിയുടെ സോഫ്റ്റവെയറുകള്‍ക്കൊന്നും യൂണിക്കോഡ് സപ്പോര്‍ട്ട് ആയിട്ടില്ല.)

അപ്പോള്‍ പിന്നെ ഒരു വഴി ക്യാരക്ടര്‍ മാപ്പില്‍ നിന്ന് അക്ഷരങ്ങള്‍ പകര്‍ത്തുകയായിരുന്നു. ഇതു വളരെക്കാലമായി കണ്ടുകൊണ്ടിരിക്കുന്ന പരിപാടിയാണ്. ചന്ദ്രേട്ടന്‍ പറയുന്നതുപോലെ ഒരു മൗസ് ക്ലിക്ക്!

പിന്നെ പ്രവീണ്‍ തന്ന ലിങ്കിന്‍റെ ഒറിജിനല്‍ പേജ് ഞാന്‍ നേരത്തെ കണ്ടിരുന്നു. പക്ഷെ ഹിന്ദിയിലേക്ക് ട്രാന്‍സ്ലിറ്ററേഷന്‍ നടത്തി കാണുന്നത് ഇപ്പോഴാണ്. ഇന്‍സ്ക്രിപ്റ്റിന്‍റെ പ്രാധാന്യം മനസ്സിലാക്കാന്‍ അത് സഹായകമാകും എന്ന് പറയേണ്ടതില്ലല്ലോ.

ഇന്‍സ്ക്രിപ്റ്റ് കീബോര്‍ഡിനെ അല്‍പ്പം കൂടി വികസിപ്പിച്ച് എല്ലാ കൂട്ടക്ഷരങ്ങളും ചില്ലുകളും ഒറ്റ സ്ട്രോക്കില്‍ കിട്ടുന്ന ഒരു കീബോര്‍ഡ് റാല്‍മിനോവ് തന്നെ അവതരിപ്പിച്ചിരുന്നു. ദാ ഇവിടെ: വളരെ ഫലപ്രദമായ ഒരു ലേഔട്ടാണത്. എനിക്കത് ഉപയോഗിച്ചാല്‍ കൊള്ളാമെന്നുണ്ടായിരുന്നു. പക്ഷെ സംഗതി തന്ന ലിങ്കില്‍ നിന്ന് ഇന്‍സ്റ്റാള്‍ ചെയ്തെങ്കിലും അതെങ്ങനെ ആക്ടിവേറ്റാകുമെന്ന് എനിക്കിനിയും പിടികിട്ടിയിട്ടില്ല.

ടാവുല്‍സോഫ്റ്റ് കീമാന്‍റെ കൈറ്റ് ആകൃതിയിലുള്ള ചിഹ്നത്തില്‍ ക്ലിക്കുമ്പോള്‍ ക മൊഴി (മൊഴി കീമാപ്പ്) എടുത്താണല്ലോ മംഗ്ലീഷില്‍ ടൈപ്പ് ചെയ്യുക. മിന്‍സ്ക്രിപ്റ്റ് ഉപയോഗിക്കുന്നവരാണെങ്കില്‍ പകരം മ എന്ന ഐക്കണാവും തിരഞ്ഞെടുക്കുക എന്ന് മാത്രം. കാവേരിയാണെങ്കില്‍ ലാങ്വേജ് ടാബില്‍ നിന്ന് MYയും കീബോര്‍ഡ് ലേഔട്ടില്‍ നിന്ന് ഇന്‍സ്ക്രിപ്റ്റും തിരഞ്ഞെടുക്കണം. ഇതേ പോലേ റാല്‍മിനോവ് അവതരിപ്പിച്ച ഇന്‍സ്ക്രിപ്റ്റ് എക്സ്റ്റന്‍ഡഡ് കീബോര്‍ഡ് ലേഔട്ട് എങ്ങനെ ആക്ടിവേറ്റ് ചെയ്യാമെന്നതാണ് എന്‍റെ കണ്‍ഫ്യൂഷന്‍.

നിലവില്‍ മിന്‍സ്ക്രിപ്റ്റും കാവേരിയും ഞാനുപയോഗിക്കുന്നുണ്ട്. ഇതില്‍ രണ്ടിലും ഇന്‍സ്ക്രിപ്റ്റ് ലേഔട്ടുതന്നെയാണെങ്കിലും അക്ഷര വിന്യാസത്തില്‍ വ്യത്യാസമുണ്ട്. ഇന്‍സ്ക്രിപ്റ്റിനോട് സമാനമായ തൂലികയുടെ ഫണറ്റിക് കീബോര്‍ഡും ഞാന്‍ ഉപയോഗിച്ചിട്ടുണ്ട്. അവിടെയും ചില കീകള്‍ വ്യത്യസ്ത സ്ഥാനത്താണ്. മാറിമാറി ഉപയോഗിക്കുമ്പോള്‍ ഇവ തികച്ചും കണ്‍ഫ്യൂഷനുണ്ടാക്കാം. മാനകമായ ഒരു കീബോര്‍ഡ് ലേഔട്ടാണ് പോംവഴി. മലയാളത്തിന് വേണ്ടിമാത്രമുള്ള ഒരു മലയാളം കീബോര്‍ഡ്. അത് എത്രവേഗം ഉണ്ടാകുന്നുവോ, അത്രയും നല്ലത്. അല്ലെങ്കില്‍ നമ്മള്‍ മലയാളമെഴുതാന്‍ ഗോസായിയുടെ ആല്‍ഫബെറ്റ് തുടര്‍ന്നും ഉപയോഗിക്കേണ്ടി വരും.

Sebin Abraham Jacob said...

ബിനൂ,

റാല്‍മിനോവ് അവതരിപ്പിച്ച മലയാളം കീബോര്‍ഡ് വിത്ത് ആള്‍ട്ട് മോഡിഫയേഴ്സ് ഒന്നാന്തരം കീബോര്‍ഡ് ലേഔട്ടാണെന്ന് തോന്നുന്നു. ഞാന്‍ ഇന്‍സ്റ്റാള്‍ ചെയ്ത് പരീക്ഷിച്ചു നോക്കി. വളരെ ഫലപ്രദം. കൂട്ടക്ഷരങ്ങള്‍ ഒറ്റ സ്ട്രോക്കില്‍ ലഭിക്കും. കമ്പൈന്‍ഡ് കീസ് ഉപയോഗിക്കേണ്ടിവരും. എന്തായാലും മലയാളം മലയാളത്തില്‍ തന്നെ ടൈപ്പ് ചെയ്യാം. മംഗ്ലീഷ് ഉപയോഗിക്കുകയേ, വേണ്ട.