Friday, January 18, 2008

നാനോ പ്രിന്റര്‍

2008 മിക്കവാറും ചരിത്രത്തില്‍ രേഖപ്പെടുത്തുന്നത്‌ നാനോവര്‍ഷം എന്നാകും. പുതുവര്‍ഷത്തിന്റെ ആദ്യ ആഴ്‌ചകളില്‍ തന്നെ പുറത്ത്‌ വന്ന ടാറ്റാ മോട്ടോഴ്‌സിന്റെ നാനോകാര്‍ വാഹനപ്രേമികളുടെ ആവേശമായി. എന്തിന്‌ ഓട്ടോ എക്‌സ്‌പോ പോലും നാനോ ഓട്ടോ എക്‌സ്‌പോ എന്നറിയാന്‍ തുടങ്ങി. തുടര്‍ന്ന്‌ എച്ച്‌.സി.എല്‍ ന്റെ നാനോ ലാപ്‌ടോപ്പ്‌ കംപ്യൂട്ടര്‍ വിപണിയിലെത്തുന്നതിനും 2008 ന്റെ ആദ്യ ആഴ്‌ചകള്‍ തന്നെ സാക്ഷ്യം വഹിച്ചു. നാനോ ലാപ്‌ടോപ്പിന്റെ വലിപ്പവും വിലയും നാനോ പോലെ കുഞ്ഞനാണ്‌. എന്നാല്‍ പ്രിന്റര്‍ രംഗത്തെ ഇത്തിരിക്കുഞ്ഞനും ലാസ്‌വാഗസില്‍ നടന്ന കണ്‍സ്യൂമര്‍ ഇലക്‌ട്രോണിക്‌സ്‌ ഷോയില്‍ അവതരിപ്പിച്ചുകഴിഞ്ഞു. രണ്ടു മൂന്ന്‌ മാസങ്ങള്‍ക്കകം ഇത്‌ വിപണിയിലെത്താന്‍ തയ്യാറെടുത്തുകഴിഞ്ഞു. കൈയ്യിലോ പോക്കറ്റിലോ കൊണ്ടുനടക്കാവുന്ന ഈ നാനോ പ്രിന്റര്‍ ഫോട്ടോഗ്രാഫിക്‌ രംഗത്തെ അതികായരായ പോളറോയ്‌ഡ്‌ ആണ്‌ നിര്‍മ്മിച്ചിരിക്കുന്നത്‌. വില നൂറ്റമ്പത്‌ ഡോളര്‍ മാത്രം, വലിപ്പമോ ഒരു ചീട്ടുകെട്ടിന്റെയത്രയും. കൂടുതല്‍ കൃത്യമായി പറഞ്ഞാല്‍ 120 മി.മി നീളം, 72 മി.മി വീതി, 23.5 മി.മീ കനം ഉള്ള നാനോ പ്രിന്റര്‍ 7.2 വോള്‍ട്ട്‌ ലിഥിയം ബാറ്ററിയില്‍ പ്രവര്‍ത്തിക്കും. മൊബൈല്‍ ഫോണില്‍ നിന്നോ, ഡിജിറ്റല്‍ കാമറയില്‍ നിന്നോ ബ്ലൂടൂത്ത്‌, പിക്‌ബ്രിഡ്‌ജ്‌ തുടങ്ങിയവയില്‍ ഏതെങ്കിലും ഒന്നുപയോഗിച്ച്‌ വയര്‍ലെസ്‌ ആയോ അല്ലെങ്കില്‍ ഡാറ്റാ കേബിള്‍ ഉപയോഗിച്ച്‌ നാനോയിലേക്ക്‌ ചിത്രങ്ങള്‍ പകര്‍ത്തിയെടുത്ത്‌ പ്രിന്റ്‌ ചെയ്യാന്‍ കേവലം 60 സെക്കന്റ്‌ മതിയാകും.

തെര്‍മര്‍ പ്രിന്റിംഗ്‌ സാങ്കേതിക വിദ്യ ഉപയോഗിച്ചാണ്‌ ഈ ഡിജിറ്റല്‍ ഇന്‍സ്റ്റന്റ ്‌ മൊബൈല്‍ ഫോട്ടോപ്രിന്റര്‍ പ്രവര്‍ത്തിക്കുന്നത്‌. സാധാരണ പ്രിന്ററില്‍ ടോണര്‍, കാറ്റ്‌റിഡ്‌ജ്‌ എന്നിവ ഉപയോഗിച്ചാണ്‌ അച്ചടിക്കുള്ള മഷി ശേഖരിച്ചിരിക്കുന്നത്‌. ഇതും ഇവിടെ അപ്രത്യക്ഷമായിരിക്കുന്നു. സിങ്ക്‌ (ZINK-Zero INK) സാങ്കേതികവിദ്യയാണ്‌ നാനോപ്രിന്റര്‍ സ്വന്തമാക്കിയിരിക്കുന്നത്‌. അതായത്‌ അച്ചടിക്കാന്‍ മഷി വേണ്ട പകരം മഷിപോലെ ഉള്ള പദാര്‍ത്ഥം പുരട്ടിയ 2x3 ഇഞ്ച്‌ വലിപ്പമുള്ള ഫോട്ടോ പേപ്പര്‍ ആണ്‌ നാനോപ്രിന്റര്‍ ഉപയോഗിക്കുന്നത്‌.


ഡൈ തന്മാത്രകളുടെ മൂന്ന്‌ നേര്‍ത്ത പാളി (മഞ്ഞ, മജന്ത, സിയാന്‍) ചേര്‍ത്ത്‌ അടുക്കിയ ഒരു വെള്ള പ്ലാസ്‌റ്റിക്‌ ഷീറ്റ്‌ ആണ്‌ പ്രിന്റ്‌ പേപ്പര്‍, ഒരിഞ്ച്‌ വിസ്‌തീര്‍ണ്ണത്തില്‍ 300 കൂര്‍ത്ത്‌, നേര്‍ത്ത ഹീറ്റര്‍ മുനകളിലേക്ക്‌ ചിത്രത്തിന്റെ ഇലക്‌ട്രിക്‌ സിഗ്‌നല്‍ പ്രവഹിക്കുന്നതോടെ ഓരോ മുനയിലും വ്യത്യസ്‌ത തോതില്‍ താപം അനുഭവപ്പെടും. ഈ താപ വ്യത്യാസത്തിനനുസരിച്ച്‌ സിങ്ക്‌ പേപ്പറില്‍ വര്‍ണ വിന്യാസം രേഖപ്പെടുത്തും. താപം പ്രവഹിക്കുന്നതോടെ ഡൈ തന്മാത്രകളുടെ അടുക്കല്‍ പ്രത്യേക രീതിയില്‍ ക്രമീകരിക്കും. താപത്തിന്റെയും സമയത്തിന്റെയും ദൈര്‍ഘ്യമനുസരിച്ചാണ്‌ പ്രിന്റിംഗ്‌. നമ്മുടെ കെ.എസ്‌.ആര്‍.ടി.സി ബസ്‌ ടിക്കറ്റ്‌ മെഷീനിലും സമാന സാങ്കേതിക സംവിധാനമാണ്‌ പ്രയോഗിച്ചിരിക്കുന്നത്‌.താമസിയാതെ ഇത്തരം മൊബൈല്‍ പ്രിന്റര്‍ ഉള്ള സെല്‍ഫോണ്‍, ഡിജിറ്റല്‍ കാമറ എന്നിവ വിപണിയിലെത്തും എന്ന്‌ കരുതാം. ഫോട്ടോ എടുക്കണമെങ്കില്‍ പോളറോയ്‌ഡ്‌ 2 x 3 ഇഞ്ച്‌ പേപ്പര്‍ കൂടി പോക്കറ്റില്‍ കരുതണമെന്ന്‌ മാത്രം, പേപ്പറിന്റെ മറുവശം ഒട്ടിപ്പോ സ്റ്റൈലില്‍ ആയതിനാല്‍ പ്രിന്റ്‌ എടുത്ത്‌ ഉടനെ ഇഷ്‌ടപ്പെട്ട സ്ഥലത്ത്‌ ഒട്ടിച്ച്‌ വയ്‌ക്കുകയുമാകാം.


www.polaroid.com/onthego യില്‍ നാനോ പ്രിന്റര്‍ കാണാം. അഴുക്ക്‌, കറ എന്നിവ പിടിക്കാത്തതും, ചുളുക്ക്‌ വീഴാത്തതുമായ തെര്‍മോ ക്രോമാറ്റിക്‌ പേപ്പര്‍ വാട്ടര്‍ റെസിസ്റ്റന്റ്‌ കൂടിയാണ്‌. ഒറ്റത്തുള്ളി മഷിയും വേണ്ടാത്ത സിങ്ക്‌ സാങ്കേതിക വിദ്യ തന്നെയാണിതിന്റെ ഹൃദയം.

Wednesday, January 09, 2008

വായിക്കാനുള്ള അവകാശം: റിച്ചാര്‍ഡ്‌ മാത്യൂ സ്റ്റാള്‍മാന്‍

വായിക്കാനുള്ള അവകാശം
(The Right to Read)
റിച്ചാര്‍ഡ്‌ മാത്യൂ സ്റ്റാള്‍മാന്‍

പരിഭാഷ: വി.കെ.ആദര്‍ശ്‌ / adarshpillai@gmail.com

(ACM കമ്യൂണിക്കേഷന്‍സിന്റെ 1997 ഫെബ്രുവരി ലക്കം പ്രസിദ്ധീകരിച്ച ഇതൊരു ശാസ്‌ത്ര കല്‌പിത കഥയാണ്‌. സാങ്കേതി വിദ്യയുടെ കടന്നുകയറ്റവും, ഇത്‌ മനുഷ്യസ്വാതന്ത്ര്യത്തിലേര്‍പ്പെടുത്തുന്ന നിയന്ത്രണങ്ങളുമാണ്‌ ഈ കഥയുടെ പൊരുള്‍)

ഡോണ്‍ ഹാല്‍ബെര്‍ട്ടിന്റെ ടൈക്കോയിലേക്കുള്ള യാത്ര (Road to Tycho) തുടങ്ങിയത്‌ കോളേജില്‍ വച്ച്‌ ലിസ കംപ്യൂട്ടര്‍ കടം ചോദിച്ചതു മുതലാണ്‌. കംപ്യൂട്ടര്‍ കേടായതിനാല്‍ അവള്‍ക്ക്‌ മറ്റൊരു കംപ്യൂട്ടര്‍ ഉപയോഗിക്കേണ്ടത്‌ അനിവാര്യമായി. മാത്രവുമല്ല തന്റെ മധ്യകാല പ്രോജക്‌ട്‌ പരാജയപ്പെടുമെന്ന്‌ പേടിച്ചാണ്‌ അവള്‍ ഡാണ്‍ ഹാല്‍ബെര്‍ട്ടിനോട്‌ കംപ്യൂട്ടര്‍ ചോദിച്ചത്‌. അവള്‍ക്ക്‌ മറ്റാരോടും ചോദിക്കാന്‍ പറ്റില്ലായിരുന്നു.

ഇതോടെ ഡാണ്‍ വല്ലാത്തൊരു പ്രതിസന്ധിയിലായി. സഹായിക്കണമെന്ന്‌ അവന്‌ ആഗ്രഹമുണ്ടെങ്കില്‍ പോലും അവള്‍ തന്റെ പുസ്‌തകങ്ങള്‍ വായിക്കുമോ എന്ന്‌ അവന്‍ ഭയന്നു. മറ്റൊരാള്‍ക്ക്‌ മുന്‍കൂര്‍ അനുമതി വാങ്ങാതെ തന്റെ പുസ്‌തകങ്ങള്‍ വായിക്കാന്‍ കൊടുക്കുക എന്നത്‌ തടവ്‌ ശിക്ഷവരെ ലഭിക്കാവുന്ന കുറ്റമാണെന്ന വസ്‌തുത അവനെ വലച്ചു. പുസ്‌തകങ്ങള്‍ മറ്റുള്ളവരുമായി പങ്കുവയ്‌ക്കുന്നത്‌ കുറ്റകരമാണെന്നത്‌ മറ്റെല്ലാവരെയും പോലെ ഡോണും പ്രൈമറി ക്ലാസുകള്‍ മുതലേ പഠിച്ചിട്ടുണ്ടായിരുന്നു. ഇത്തരം പണി കള്ളക്കോപ്പി ചെയ്യുന്നവര്‍ മാത്രം പിന്തുടരുന്നതാണ്‌, അവന്‍ കരുതി.

മാത്രമല്ല, ഇങ്ങന ചെയ്‌താല്‍ സോഫ്‌ട്‌വെയര്‍ പ്രൊട്ടക്ഷന്‍ അതോറിറ്റി ഇവനെ പിടിക്കാതിരിക്കാനുള്ള സാധ്യതയും കുറവായിരുന്നു. എല്ലാ പുസ്‌തകങ്ങളിലും പകര്‍പ്പവകാശ പിടികൂടല്‍ യന്ത്രങ്ങള്‍ (Copyright Monitor) പിടിപ്പിച്ചിട്ടുണ്ടെന്ന്‌ ഡോണ്‍ തന്റെ സോഫ്‌ട്‌വെയര്‍ എന്‍ജിനീയറിംഗ്‌ ക്ലാസില്‍ പഠിച്ചിട്ടുണ്ടായിരുന്നു. എവിടെ വച്ച്‌, എപ്പോള്‍, ആരാണ്‌ വായിക്കുന്നതെന്ന്‌ കേന്ദ്ര ലൈസന്‍സിംഗിന്‌ ഈ ഉപകരണം റിപ്പോര്‍ട്ട്‌ ചെയ്യും. അനധികൃത (Pirates) ഇ-പുസ്‌തകത്തെ കണ്ടെത്താനായി ഇത്തരം വിവരം ഉപയോഗിക്കുന്നതിനൊപ്പം തന്നെ, വായനക്കാരെക്കുറിച്ചുള്ള വിവരം വാണിജ്യ സ്ഥാപനങ്ങള്‍ക്ക്‌ പകര്‍ത്തി കൊടുക്കുകയും ഇവര്‍ ചെയ്യുന്നു. ഈ വിവരം വാണിജ്യ സ്ഥാപനങ്ങള്‍ക്ക്‌ തങ്ങളുടെ പുതിയ ഉത്‌പന്നം മാര്‍ക്കറ്റ്‌ ചെയ്യാനും പരസ്യം ചെയ്യാനും ഉപയോഗിക്കാം. തന്റെ സ്വന്തം ആവശ്യത്തിന്‌ ശേഖരിച്ചിട്ടുള്ള ഇ-പുസ്‌തകം ഇങ്ങനെ ആരെങ്കിലും അനധികൃതമായി വായിച്ചാല്‍ അടുത്ത തവണ നെറ്റ്‌വര്‍ക്കിലേക്ക്‌ സിസ്റ്റം കണക്‌ട്‌ ചെയ്യുമ്പോള്‍ കേന്ദ്ര ലൈസന്‍സിംഗ്‌ സംവിധാനം കംപ്യൂട്ടറിന്റെ ഉമെയെ കണ്ടെത്തും, കടുത്ത ശിക്ഷ ലഭിക്കുകയും ചെയ്യും.

എന്തായാലും, ലിസയ്‌ക്ക്‌ തന്റെ ഇ-പുസ്‌തകങ്ങള്‍ വേണ്ടെന്ന്‌ അവനറിയാമായിരുന്നു. അര്‍ധവാര്‍ഷിക പരീക്ഷയുമായി ബന്ധപ്പെട്ട പ്രോജക്‌ട്‌ പൂര്‍ത്തിയാക്കാന്‍ മാത്രമായിരുന്നു അവള്‍ക്ക്‌ തന്റെ കംപ്യൂട്ടര്‍ ഉപയോഗിക്കേണ്ടിയിരുന്നത്‌.മധ്യവര്‍ഗ കുടുംബത്തില്‍ നിന്നാണ്‌ ലിസ വരുന്നതെന്ന്‌ ഡോണിന്‌ അറിയാമായിരുന്നു, അതുകൊണ്ട്‌ തന്നെ തന്റെ പുസ്‌തകങ്ങള്‍ അവള്‍ക്ക്‌ ഏറെ ഉപയോഗപ്രദമാകും. ഡോണ്‍ പോലും റിസര്‍ച്ച്‌ പേപ്പര്‍ വായിക്കാന്‍ പുസ്‌തകങ്ങളും ജേണലുകകളും കടം വാങ്ങിയിട്ടുണ്ടായിരുന്നു. (മാത്രമല്ല ഇ-പുസ്‌തകങ്ങളുടെ വരിസംഖ്യയുടെ പത്ത്‌ ശതമാനം എഴുത്തുകാരനുള്ള റോയല്‍റ്റിയാണ്‌, ഡോണ്‍ ഒരു അക്കാദമിക്‌ കരിയര്‍ സ്വപ്‌നം കാണുന്നതിനാല്‍ ഭാവിയില്‍ ഇങ്ങനെ ലഭിക്കുന്ന പണം, തന്റെ ലോണ്‍ തിരിച്ചടയ്‌ക്കാന്‍ ധാരാളം).

ഒരു പൈസയും കൊടുക്കാതെ ആര്‍ക്കും എപ്പോഴും കയറി ചെല്ലാവുന്ന, ഏതു പുസ്‌തകവും വായാക്കാനാകുന്ന പഴയകാല ലൈബ്രറികളെ കുറിച്ച്‌ പിന്നീടാണ്‌ ഡോണ്‍ അറിഞ്ഞത്‌. അക്കാലത്ത്‌ സര്‍ക്കാര്‍ സാമ്പത്തിക സഹായം ഇല്ലാതെ തന്നെ ഒട്ടേറെ സ്വതന്ത്ര ഗവേഷകര്‍ ആയിരക്കണക്കിന്‌ പുസ്‌തക പേജുകള്‍ വായിച്ചിരുന്നു. പക്ഷേ, 1990 ആയപ്പോഴേക്കും ലാഭേച്ഛയില്ലാത്ത സംഘങ്ങള്‍ക്കൊപ്പം തന്നെ വാണിജ്യ താത്‌പര്യമുള്ള സ്ഥാപനങ്ങളും പുസ്‌തകങ്ങള്‍ ഓരോ പ്രാവശ്യം വായിക്കുന്നതിനും തുക ഈടാക്കാന്‍ തുടങ്ങി.

2047 ആയതോടുകൂടി സൗജന്യമായ ഗ്രന്ഥശാല എന്ന സങ്കല്‌പം തന്നെ മങ്ങിയ ഓര്‍മ്മ മാത്രമായി തീര്‍ന്നു.സോഫ്‌ട്‌വെയര്‍ പ്രൊട്ടക്ഷന്‍ അതോറിറ്റിയെയും സെന്‍ട്രല്‍ ലൈസന്‍സിംഗിനെയും കടത്തിവെട്ടാന്‍ ഒരുപാട്‌ മാര്‍ഗങ്ങളുണ്ട്‌. ഇവയെല്ലാം തന്നെ നിയമവിരുദ്ധവുമാണ്‌. ഡോണിന്റെ സോഫ്‌ട്‌വെയര്‍ ക്ലാസ്സിലെ ചങ്ങാതിയായിരുന്ന ഫ്രാങ്കിന്റെ കൈവശം ഒരു വ്യാജ ഡീബഗ്ഗിംഗ്‌ സോഫ്‌ട്‌വെയര്‍ ഉണ്ടായിരുന്നു. ഇതുപയോഗിച്ച്‌ നേരത്തെ സൂചിപ്പിച്ച കോപ്പി റൈറ്റ്‌ മോണിട്ടര്‍ എന്ന ഉപകരണത്തെ ഭേദിച്ച്‌ പുസ്‌തകം വായിക്കാന്‍ കഴിഞ്ഞിരുന്നു. ഫ്രാങ്ക്‌ ഈ വിദ്യ എല്ലാ കൂട്ടുകാരോടും പറഞ്ഞുനടന്നു. അവരിലൊരാള്‍ SPA യ്‌ക്ക്‌ ഫ്രാങ്കിനെ ഒറ്റിക്കൊടുത്തു. അതും SPA വച്ച്‌ നീട്ടിയ നിസാര തുകയ്‌ക്കാണ്‌ ഒറ്റുകാരനായത്‌. 2047 ല്‍ ഫ്രാങ്ക്‌ ജയലഴികള്‍ക്കുള്ളിലായിരുന്നു, അനധികൃത മാര്‍ഗത്തിലൂടെ ഇ-പുസ്‌തകം വായിച്ചതിനല്ല മറിച്ച്‌ ഡീബഗ്ഗിംഗ്‌ സോഫ്‌ട്‌വെയര്‍ കൈവശം സൂക്ഷിച്ചതായിരുന്നു ഫ്രാങ്കിന്‌ മേല്‍ ചുമത്തിയ കുറ്റം.

ആര്‍ക്കും ഡീബഗ്ഗിംഗ്‌ സോഫ്‌ട്‌വെയര്‍ കയ്യില്‍ വയ്‌ക്കാന്‍ സാധിച്ചിരുന്ന ഒരു നല്ല കാലം പണ്ടുണ്ടായിരുന്നു എന്ന്‌ ഡോണ്‍ മനസ്സിലാക്കി. സി.ഡി. യിലും ഡൗണ്‍ലോഡ്‌ ചെയ്യാവുന്ന രീതിയിലും സൗജന്യ ഡീബഗ്ഗിംഗ്‌്‌ ടൂളുകള്‍ ലഭ്യമായിരുന്നു ഇതുപയോഗിച്ച്‌ ഒട്ടേറെ ആളുകള്‍ ഇ-പുസ്‌തകത്തില്‍ അനധികൃതമായി കടന്നുകയറി വായന തുടങ്ങി. ഇതിന്റെ ഫലമായി ഇത്തരം പ്രവര്‍ത്തനങ്ങള്‍ നിയമവിരുദ്ധമാണെന്ന്‌ ജഡ്‌ജ്‌ പ്രഖ്യാപിക്കുന്നിടത്തു വരെ കാര്യങ്ങള്‍ എത്തിച്ചേര്‍ന്നു. ഇതിനര്‍ത്ഥം ഡീബഗ്ഗിംഗ്‌ സോഫ്‌ട്‌ വെയര്‍ എല്ലാം നിയമ വിരുദ്ധമെന്നും ഒപ്പം ഇതുപയോഗിച്ചാലോ ഡീബഗ്ഗിംഗ്‌ സോഫ്‌ട്‌വെയറുകള്‍ വികസിപ്പിച്ചെടുത്താലോ തടവുശിക്ഷ വരെ ലഭിക്കുകയും ചെയ്യും എന്നതാണ്‌.

പ്രോഗ്രാമര്‍ക്ക്‌ പക്ഷെ ഇപ്പോഴും ഡീബഗ്ഗിംഗ്‌ ടൂളുകള്‍ അനിവാര്യമായി വന്നു, 2047 ല്‍ ഡീബഗ്ഗിംഗ്‌ വിതരണക്കാര്‍ ഔദ്യോഗിക അംഗീകാരമുള്ള സോഫ്‌ട്‌വെയര്‍ വിദഗ്‌ധര്‍ക്കായി കുറച്ച്‌ കോപ്പികള്‍ വില്‍ക്കാന്‍ തുടങ്ങി. ഡോണ്‍ തന്റെ സോഫ്‌ട്‌വെയര്‍ ക്ലാസ്സില്‍ ഉപയോഗിച്ചിരുന്ന ഡീബഗ്ഗിങ്ങ്‌ ടൂള്‍ ഒരു പ്രത്യേക ഫയര്‍വാളിനൊപ്പമാണ്‌ കൈകാര്യം ചെയ്‌തുവന്നിരുന്നത്‌, അതുകൊണ്ട്‌ തന്നെ ഇതിന്റെ ഉപയോഗം ക്ലാസ്സ്‌ അന്തരീക്ഷത്തിനുള്ളില്‍ പരിമിതപ്പെടുത്തിയിരുന്നു.ഇതുകൂടാതെ പരിഷ്‌കരിച്ച ഒരു സിസ്റ്റം കെര്‍ണല്‍ ഇന്‍സ്റ്റാള്‍ ചെയ്‌താല്‍ പകര്‍പ്പവകാശ പിടികൂടല്‍ യന്ത്രങ്ങളെ (Copyright Monitor) മറികടക്കാന്‍ കഴിയും.

ഈ നൂറ്റാണ്ടിന്‌ മുന്‍പുണ്ടായിരുന്ന സൗജന്യവും സ്വതന്ത്രവുമായ കെര്‍ണലുകളെ കുറിച്ചും ഓപ്പറേറ്റിംഗ്‌ സിസ്റ്റത്തെ കുറിച്ചും ഡോണ്‍ മനസ്സിലാക്കി. ഡീബഗേഴ്‌സിനെ പോലെ ഇവയും നിയമവിരുദ്ധമാണെന്ന്‌ മാത്രമല്ല ഇവ ഇന്‍സ്റ്റാള്‍ ചെയ്യാന്‍ കംപ്യൂട്ടറിന്റെ റൂട്ട്‌ പാസ്‌വേഡ്‌ (Root Password) അറിയേണ്ടതും ഒരു അനിവാര്യതയായിരുന്നു. എഫ്‌.ബി.ഐ യോ മൈക്രോസോഫ്‌ടോ ഈ രഹസ്യ പാസ്‌വേഡ്‌ നമുക്ക്‌ പറഞ്ഞുതരികയുമില്ല.ഇക്കാരണങ്ങളെല്ലാം കൊണ്ടുതന്നെ ലിസയ്‌ക്ക്‌ തന്റെ കംപ്യൂട്ടര്‍ കൊടുക്കാനാകില്ലെന്ന്‌ ഡോണ്‍ ഉറപ്പിച്ചു.

അത്രമേല്‍ സ്‌നേഹിച്ചിരുന്നതിനാല്‍ അവളെ സഹായിക്കാതിരിക്കാനും അവന്‌ പറ്റില്ല. അവളോട്‌ സംസാരിക്കുന്ന ഓരോ തവണയും അവന്‍ അത്രയ്‌ക്കധികം സന്തുഷ്‌ടനായിരുന്നു. സഹായ അഭ്യര്‍ത്ഥന നടത്തിയതു തന്നെ അവനെ അത്രയ്‌ക്ക്‌ ഇഷ്‌ടമാണെന്നതിന്റെ തെളിവ്‌ കൂടിയായിരുന്നു.

ഒരിക്കലും ചിന്തിക്കാന്‍ പറ്റാന്‍ സാധിക്കാത്തതായ ഒരു കാര്യം ചെയ്‌ത്‌ ഡോണ്‍ തന്റെ ധര്‍മ്മസങ്കടം തീര്‍ത്തു. അവള്‍ക്ക്‌ തന്റെ കംപ്യൂട്ടര്‍ കൊടുത്തെന്ന്‌ മാത്രമല്ല അതിന്റെ രഹസ്യ പാസ്‌വേഡും പറഞ്ഞുകൊടുത്തു. ഇതുപയോഗിച്ച്‌ ഡോണിന്റെ പുസ്‌തകം ലിസ വായിച്ചാല്‍ സെന്‍ട്രല്‍ ലൈസന്‍സിംഗ്‌ സംഘം ഡോണ്‍ ആണ്‌ വായിക്കുന്നതെന്ന്‌ കരുതിക്കോളും. കുറ്റകരമായ സംഗതി ആണെങ്കിലും SPA സ്വമേധയാ ഇത്‌ കണ്ടെത്തില്ല. ലിസ റിപ്പോര്‍ട്ട്‌ ചെയ്‌താല്‍ മാത്രമേ അവനെ പിടികൂടാനോ കേസ്‌ എടുക്കാനോ അവര്‍ക്ക്‌ കഴിയൂ.

പക്ഷേ, പഠനസ്ഥലത്ത്‌ ഇതറിഞ്ഞാല്‍ രണ്ടുപേരും പുറത്താകും. എന്തിനാണ്‌ ലിസ ഇതുപയോഗിച്ചത്‌ എന്നതിന്‌ കോളജ്‌ അധികൃതര്‍ ഒരു വിലയും കല്‌പിക്കില്ല. വിദ്യാര്‍ത്ഥികളുടെ കംപ്യൂട്ടര്‍ ഉപയോഗം കോളജിന്റെ പ്രാമുഖ്യമുള്ള ഡിസിപ്ലിനറി ആക്ഷന്‍ ഘടകമായിരുന്നു. ആപ്‌തകരമോ ഹാനികരമോ ആയ എന്തെങ്കിലും പ്രവര്‍ത്തി ചെയ്‌തോ എന്നത്‌ ഒട്ടും പ്രാധാന്യം അര്‍ഹിക്കുന്നില്ല. അവരുടെ അഭിപ്രായത്തില്‍ ഇത്തരം പ്രവര്‍ത്തികളെല്ലാം വിലക്കപ്പെട്ടവയുടെ പട്ടികയിലുള്ളതായിരുന്നു.

കോളജില്‍ നിന്നും പുറത്താക്കുകയൊന്നുമില്ല. പക്ഷെ, ഔദ്യോഗിക കംപ്യൂട്ടറിലോ കംപ്യൂട്ടര്‍ ശൃംഖലയോ ഉപയോഗിക്കാന്‍ അനുവദിക്കില്ല. ഫലത്തില്‍ ഇങ്ങനെ പുറത്താക്കപ്പെടുന്നവര്‍ എല്ലാ ക്ലാസ്സിലും പരാജയപ്പെടും.1980 മുതലാണ്‌ സര്‍വകലാശാലകള്‍ ഇത്തരത്തിലുള്ള നയം കൈക്കൊണ്ടതെന്ന്‌ ഡോണ്‍ പിന്നീട്‌ മനസ്സിലാക്കി. അതിനുമുന്നെ സര്‍വകലാശാലകള്‍ മറിച്ചായിരുന്നു ഡിസിപ്ലിന്‍ നിലനിര്‍ത്തിക്കൊണ്ടിരുന്നത്‌. ആപത്‌കരമായ എന്തും അവര്‍ ശിക്ഷിക്കുമായിരുന്നു. അല്ലാതെ സംശയത്തിന്റെ പേരില്‍ ഒന്നും ചെയ്യില്ലായിരുന്നു.

ഡോണിന്റെ കംപ്യൂട്ടര്‍ ഉപയോഗിച്ച വിവരം ലിസ SPA യില്‍ റിപ്പോര്‍ട്ട്‌ ചെയ്‌തില്ല. അവളെ സഹായിക്കാന്‍ അവനെടുത്ത തീരുമാനം അവരുടെ വിവാഹത്തിലേക്ക്‌ എത്തിക്കുകയും ഒപ്പം കുട്ടിക്കാലം മുതല്‍ക്കു തന്നെ സോഫ്‌ട്‌വെയര്‍ പൈറസിയെക്കുറിച്ച്‌ അവരെ പഠിപ്പിച്ചു വന്നിരുന്ന വിവരങ്ങളെ ചോദ്യം ചെയ്യാനും ഇടവരുത്തി. ഈ ദമ്പതികള്‍ പിന്നീട്‌ പകര്‍പ്പവകാശ ചരിത്രം, സോവിയറ്റ്‌ യൂണിയന്‍, അവിടുത്തെ പകര്‍പ്പവകാശ നിയന്ത്രണം എന്നിവയെ വിശദമായി മനസ്സിലാക്കി ഒപ്പം അമേരിക്കന്‍ ഐക്യനാടുകളുടെ ഭരണഘടനയും പഠിച്ചു. അവര്‍ ലൂണയിലേക്ക്‌ താമസം മാറി, അവിടെ അവര്‍ SPA യില്‍ നിന്നും അകലം പാലിച്ച്‌ മുന്നേറിക്കൊണ്ടിരുന്ന കുറച്ചുപേരെ കണ്ടുമുട്ടി. 2062 ല്‍ Tycho uprising തുടങ്ങിയപ്പോള്‍ 'സാര്‍വലൗകിക വായനാവകാശം' (universal right to read) കേന്ദ്രലക്ഷ്യങ്ങളിലൊന്നായി തീര്‍ന്നു.

(ഈ ലേഖനം ഏതു മാധ്യമത്തിലും ആര്‍ക്കും പ്രസിദ്ധീകരിക്കാവുന്നതാണ്‌, ഈ കുറിപ്പു കൂടി ഉണ്ടായിരിക്കണമെന്ന നിബന്ധന മാത്രമേയുള്ളൂ)

*****

റിച്ചാര്‍ഡ്‌ മാത്യൂ സ്റ്റാള്‍മാന്‍ തന്നെ 2007 ല്‍ കൂട്ടിചേര്‍ത്ത അനുബന്ധംഇത്‌ ഉടനെ പരിഭാഷപ്പെടുത്തി ഇവിടെ ചേര്‍ക്കുന്നതാണ്‌.

ഇത്‌ ഇ-നിഘണ്ടുവിന്റെ കാലം

ഇലക്‌ട്രോണിക്‌ ഫോര്‍മാറ്റില്‍ ലഭ്യമാകുന്ന നിഘണ്ടു ഇന്ന്‌ വര്‍ധിച്ച സ്വീകാര്യത നേടുന്നതിന്‌ ഒട്ടേറെ കാരണങ്ങളുണ്ട്‌. വലുപ്പം, ലഭ്യത, ബഹുഭാഷാസൗകര്യം, വിലക്കുറവ്‌, സെര്‍ച്ചിങ്‌, ചിത്ര-ശബ്‌ദ-വീഡിയോ ഉള്ളടക്കം എന്നിവ ഇ-നിഘണ്ടുവിന്റെ എടുത്തുപറയാവുന്ന സവിശേഷതകളാണ്‌. ഒരു ഭാഷയില്‍ത്തന്നെ (ഉദാ. ഇംഗ്ലീഷ്‌ - ഇംഗ്ലീഷ്‌) രൂപകല്‍പ്പന ചെയ്‌തിരിക്കുന്ന നിഘണ്ടുവിനെക്കാളും ഏറെപ്പേരും ആശ്രയിക്കുന്നത്‌ ദ്വിഭാഷാ, ബഹുഭാഷാ നിഘണ്ടുവിനെയാണ്‌. മാതൃഭാഷയിലേക്ക്‌ നിഘണ്ടുവിനെ കൊണ്ടുവരുന്നതുവഴി ലഭിക്കുന്ന മേന്മയേക്കാളും എത്രയോ അധികമാണ്‌ പല ഭാഷകളിലൂടെ ഒരു നിഘണ്ടു സഞ്ചരിക്കുമ്പോള്‍ ലഭിക്കുന്നത്‌..

മൂന്ന്‌ ഭാഷയില്‍ ലഭ്യമാകുന്ന നിഘണ്ടുവിന്റെ വലുപ്പം ഒന്നാലോചിച്ചു നോക്കൂ. അച്ചടിനിഘണ്ടുവിന്റെ ക്രമാതീതമായ വലുപ്പം വിലകൂട്ടുകയും ഉപയോഗലാളിത്യം കുറയ്‌ക്കുകയുംചെയ്യും. 2000 പേജുള്ള ഒരു നിഘണ്ടുവിനെ ഒരു ഇ-മെയില്‍ അറ്റാച്ച്‌മെന്റായോ അല്ലെങ്കില്‍ സിഡി റോമിന്റെ ഒരു മൂലയിലോ ഒതുക്കാം. അതായത്‌ വലുപ്പം ഇ-നിഘണ്ടുവില്‍ ഒരു പ്രശ്‌നമേയല്ല. സാധാരണ നിഘണ്ടുവിന്റെ ഏറ്റവും വലിയ പ്രശ്‌നം ഏതെങ്കിലും ഒരു ഭാഷയിലാണ്‌ എല്ലാ പ്രവര്‍ത്തനങ്ങളും സജ്ജീകരിക്കേണ്ടിവരുമെന്നുള്ളതാണ്‌. ഇംഗ്ലീഷ്‌-ഹിന്ദി-മലയാളം നിഘണ്ടുവില്‍ സര്‍ച്ച്‌വേഡായി ഉപയോഗിക്കാന്‍ കഴിയുന്നത്‌ ഇംഗ്ലീഷ്‌ ഭാഷയിലെ വാക്കുകള്‍ മാത്രമാണല്ലോ. അതുപോലെ മലയാളം-ഇംഗ്ലീഷ്‌-ഹിന്ദി നിഘണ്ടുവില്‍ മലയാളമാകും താക്കോല്‍വാക്ക്‌. അതായത്‌ ബഹുഭാഷാ നിഘണ്ടു ആണെങ്കിലും ഉപയോഗത്തിന്റെ കാര്യത്തില്‍ അടയാളവാക്യഭാഷയെമാത്രം അടിസ്ഥാനമാക്കിയേ മുന്നേറാനാകൂ. അച്ചടിരീതിയില്‍ ബഹുഭാഷാ നിഘണ്ടു മൂന്ന്‌ ഭാഷയ്‌ക്ക്‌ അപ്പുറം പോകാത്തതിന്റെ മുഖ്യകാരണമിതാണ്‌. എന്നാല്‍, ഇ-ഡിക്‌ഷണറിയില്‍ 50 ഭാഷയിലെ നിഘണ്ടുപോലും ഒരു സിഡി റോമില്‍ ഒതുങ്ങും. മാത്രമല്ല, ഏതു ഭാഷയിലെ വാക്കുപയോഗിച്ചും പദാര്‍ഥശേഖരണവും സംശയനിവാരണവും നടത്താം. ഇന്റര്‍നെറ്റ്‌ സെര്‍ച്ച്‌ അല്‍ഗോരിതത്തിന്റെ സഹായമാണ്‌ ഇത്തരത്തില്‍ ബഹുഭാഷാനിഘണ്ടുവിനെ ഏതു ഭാഷയിലും ക്രമീകരിക്കാന്‍ നവമാധ്യമങ്ങളെ സഹായിക്കുന്നത്‌.

ഇലക്‌ട്രോണിക്‌ നിഘണ്ടുവെന്നാല്‍, സി.ഡി റോം രൂപത്തില്‍ മാത്രമല്ല, ഇന്റര്‍നെറ്റില്‍ ലഭ്യമാകുന്ന ഓണ്‍ലൈന്‍ നിഘണ്ടു, മൊബൈല്‍ ഫോണ്‍, ഐ പോഡ്‌, ഇ-ബുക്ക്‌ എന്നിവയിലേക്ക്‌ കൂട്ടിയിണക്കാന്‍ സാധിക്കുന്ന തരത്തിലും ഉണ്ട്‌. ചെറു എം.പി ത്രീ പ്ലെയര്‍പോലെ ഇ-ഡിക്‌ഷണറികള്‍ക്കുമാത്രമായുള്ള ഉപകരണവും ഡിക്‌ഷണറിയുടെ ഇ-സാധ്യതകളാണ.്‌ ഇത്തരത്തില്‍ കൈയില്‍ കൊണ്ടുനടക്കാവുന്ന നിഘണ്ടു (Hand Hold Dictionary) വിന്‌ ചെറു കീബോര്‍ഡ്‌ (ചിലപ്പോള്‍ ടച്ച്‌സ്‌ക്രീന്‍), ശബ്ദാനുവര്‍ത്തി സംവിധാനം (Voice Recognition), വിവരങ്ങള്‍ ഒപ്പിയെടുക്കാനുള്ള (scanning) ഭാഗം എന്നിവ ഉണ്ടാകും.
അച്ചടിനിഘണ്ടുവിനില്ലാത്ത ഏറ്റവും പ്രധാന കുറവ്‌ പദത്തിന്റെ ഉച്ചാരണവുമായി ബന്ധപ്പെട്ടതാണ്‌. വാക്കുകള്‍ക്കുമുകളില്‍ മൗസ്‌ക്ലിക്ക്‌ നടത്തിയാല്‍ ടെക്‌സ്‌റ്റ്‌ ടു സ്‌പീച്ച്‌ രീതിയിലൂടെ ഇ-നിഘണ്ടുവില്‍ വാക്കുകളുടെ ഉച്ചാരണം ശ്രവിക്കാം. ഈ രീതി ഭാഷാപഠനത്തിന്‌ ഏറെ ഉപകാരമാവുമെന്നതിനൊപ്പംതന്നെ കാഴ്‌ചാവൈകല്യം ഉള്ളവര്‍ക്കും നിഘണ്ടു അനായാസം ഉപയോഗിക്കാം. വിവിധ സാങ്കേതികവിദ്യയുടെ കൂടിച്ചേരല്‍ (Convergence) ആണ്‌ ഇ-മാധ്യമത്തിന്റെ മുഖമുദ്ര.

1857ല്‍ പ്രവര്‍ത്തനം തുടങ്ങിയ ഓക്‌സ്‌ഫ്‌ഡ്‌ ഇംഗ്ലീഷ്‌ ഡിക്‌ഷണറി ഇന്ന്‌ ഇന്റര്‍നെറ്റില്‍ ലഭ്യമാണ്‌. ഇംഗ്ലീഷ്‌ ഭാഷയിലെ സമഗ്രഹവും അമൂല്യവുമായ പദാര്‍ഥശേഖരം, അച്ചടിരീതിയില്‍ ഇരുപതിലേറെ വാള്യം 21,730 പേജുകളിലായി പരന്നുകിടക്കുന്നു. 2000 മാര്‍ച്ചില്‍ ഓണ്‍ലൈന്‍ (www.oed.com) പതിപ്പ്‌ ആരംഭിച്ചു. ഓരോ മൂന്നുമാസംകൂടുന്തോറും 1800 ഓളം വാക്കുകള്‍ പദശേഖരത്തിലേക്ക്‌ കൂട്ടിച്ചേര്‍ക്കുന്നുണ്ട്‌.
ഓക്‌സ്‌ഫഡ്‌ നിഘണ്ടുവിന്‌ പണം ചെലവാക്കേണ്ടതുണ്ടെങ്കില്‍ ഒട്ടും പണച്ചെലവില്ലാതെ ഒരു സ്വതന്ത്ര ബഹുഭാഷാനിഘണ്ടു വിക്കിപീഡിയയുടെ സഹയാത്രികനായുണ്ട്‌-വിക്ഷണറി . 151 ഭാഷകളിലായി എണ്ണമറ്റ പദസമ്പത്തുമുണ്ട്‌.

ഇതിന്റെ മലയാളം അനുബന്ധം ചെറിയ നിലയില്‍ തുടക്കംകുറിച്ചുകഴിഞ്ഞു. വിക്കിസോഫ്‌ട്‌ വെയറിന്റെ സഹായത്തൊടെ വോളണ്ടിയര്‍മാരാണ്‌ സഹകരണത്തിലൂടെ നിഘണ്ടു നിര്‍മ്മിക്കുന്നത്‌.ഇംഗ്ലീഷില്‍ 5,32,611 എന്‍ട്രിയും 29,90,719 എഡിറ്റിംഗും 2008 ജനുവരി 1 വരെ നടന്നു കഴിഞ്ഞു. 57 അഡ്‌മിനസ്‌ട്രേറ്റര്‍മാരും 45,444 ഉപയോക്താക്കളും ഇംഗ്ലീഷ്‌ വിക്കി നിഘണ്ടുവിനുണ്ട്‌.

നിങ്ങള്‍ക്ക്‌ റൊമേനിയന്‍ ഭാഷയിലെ ഒരു നിഘണ്ടു വേണമെന്നിരിക്കട്ടെ. കേരളത്തിലെയോ ഒരു പക്ഷെ ഇന്ത്യയിലെ മറ്റു സംസ്ഥാനങ്ങളിലേയോ ഗ്രന്ഥശാലകളിലോ ബുക്‌ ഷോപ്പിലോ ഇത്തരം ചെറു വിദേശ ഭാഷകളിലെ നിഘണ്ടു ലഭിക്കണമെന്നില്ല, എന്നാല്‍ വിഷമിക്കേണ്ട. വിക്കിനിഘണ്ടുവിലേക്കെത്തൂ.യൂണികോഡിലുളള റൊമേനിയ ഫോണ്ട്‌ ഇന്‍സ്റ്റാള്‍ ചെയ്യുന്നതൊടെ നിങ്ങളുടെ കംപ്യൂട്ടറില്‍ റൊമേനിയന്‍ ഭാഷയിലെ നിഘണ്ടു വായന തുടങ്ങാം.

Friday, January 04, 2008

ഇനി വായന ഇ-വായന

ഡിജിറ്റല്‍ സാങ്കേതിക വിദ്യ ഉപയോഗിച്ച്‌ പുസ്‌തകത്തിന്റെ ഉള്ളടക്കത്തെ ഇലക്‌ട്രോണിക്‌ കോപ്പിയായി സൂക്ഷിച്ച്‌ വച്ച്‌, കംപ്യൂട്ടര്‍, മൊബൈല്‍ ഫോണ്‍ പോലെയുള്ള സൈബര്‍ ഉപകരണങ്ങളിലൂടെ വായിക്കുന്ന രീതിയെയാണ്‌ ഇ-വായന എന്നു പറയുന്നത്‌. സാധാരണ പുസ്‌തകത്തന്റെ ഒട്ടേറെ പരിമിതികള്‍ ഇ-വായനയില്‍ ഇല്ലാതാകും. കടലാസില്‍ അച്ചടിച്ചവ/എഴുതിവ മാത്രമാണ്‌ ചിന്തക്കും വിശകലനത്തിനും കാരണമാകുന്നത്‌ എന്ന കാഴ്‌ചപ്പാടും മാറുകയാണ്‌. പ്രസാധകന്റെയോ രൂപകല്‌പന ചെയ്യുന്നയാളിന്റെയോ അഭിരുചിക്കനുസരിച്ച്‌ കടലാസില്‍ അച്ചടിച്ച്‌ വായനക്കാര്‍ക്ക്‌ മുന്നിലെത്തിക്കുന്ന രീതിയാണല്ലോ പുസ്‌തകവിപണയില്‍ അന്‍വര്‍ത്തിച്ചുവരുന്നത്‌. ഇലക്‌ട്രോണിക്‌ വായനയില്‍ പ്രസാധകന്റെ അഭിരുചിയെന്നത്‌ പൂര്‍ണമായും ഒഴിവാകുന്നു, പകരം വായനക്കാരന്‍ ആ ജോലി രസകരമായി ഏറ്റെടുക്കുന്നു.
ഇ-വായനയില്‍ പുസ്‌തകം ലഭ്യമാകുന്നത്‌ ഇലക്‌ട്രോണിക്‌ ഫോര്‍ മാറ്റിലായതിനാല്‍ വായനക്കാരന്റെ ഇഷ്‌ടാനുസരണം വായനയുടെ രീതി ക്രമീകരിക്കാം. അക്ഷരത്തിന്റെ നിറം, വലിപ്പം, പശ്ചാത്തല നിറം, ചിത്രം എന്നിവ യുക്തമായ രീതിയില്‍ മാറ്റാം. വെളുത്ത കടലാസില്‍ കറുത്തമഷിയില്‍ അച്ചടിച്ചിറങ്ങുന്നത്‌ പുസ്‌തകത്തിന്റെ സ്ഥിരം ശൈലിയാണങ്കില്‍ ഇ- പുസ്‌തകത്തില്‍ ഇങ്ങനെ ഏകീകൃതമായ ഒരു സംവിധാനം ഇല്ല. അക്ഷരശൈലി ക്രമീകരക്കാനുള്ള സംവിധാനങ്ങള്‍ ഉപകരണത്തില്‍ ഉണ്ടാകും ഇതനുസരച്ച്‌ വളരെയെളുപ്പത്തില്‍ പുസ്‌തകം നമ്മുടെ ഇഷ്‌ടത്തിന്‌ രൂപഘടന നല്‍കിയ ശേഷം വായന തുടങ്ങാം. ഇതേ പുസ്‌തകം അടുത്ത പ്രാവശ്യം വായനക്കായി എടുക്കുമ്പോള്‍ ഒട്ടും അധിക പണച്ചിലവില്ലാതെ മറ്റൊരു പേജ്‌ രൂപകല്‍പനയിലേക്ക്‌ മാറി പുതിയൊരു പുസ്‌തകാന്തരീക്ഷത്തിലും വായിക്കാം. ഇവിടെ വായനക്കാരന്‍ വിപണിയിലെ രാജാവാകുന്നു.
സാധാരണ പുസ്‌തകം അടുത്ത പതിപ്പ്‌ ഇറങ്ങുമ്പോഴാണ്‌ അക്ഷരതെറ്റുകള്‍ നീക്കം ചെയ്യുന്നതും കാലികമായ കൂട്ടിചേര്‍ക്കലുകള്‍ നടത്തുന്നതും. കാരണം ഇത്‌ ഏറെ പണച്ചിലവുള്ള ഏര്‍പ്പാട്‌ തന്നെയെന്നുള്ളതാണ്‌. അച്ചടിച്ചുപോയ പുസ്‌തകത്തില്‍ കൂട്ടിചേര്‍ക്കലുകള്‍ നടത്തുന്നതിന്‌ ബുദ്ധിമുട്ട്‌ ഏറെയാണ്‌. എന്നാല്‍ ഇ-പുസ്‌തകത്തില്‍ നിമിഷനേരം കൊണ്ട്‌ ഇത്തരത്തിലെ കൂട്ടിച്ചേര്‍ക്കലും ഇളക്കിയെടുക്കലും നടത്താമെന്ന്‌ മാത്രമല്ല, ഇത്‌ പണച്ചിലവും സമയനഷ്‌ടവും വിഭവനഷ്‌ടവും ഉണ്ടാക്കുന്ന ഏര്‍പ്പാടും അല്ല. കാരണം ഇ-പുസ്‌തകം എന്നതിന്‌ അച്ചടിക്കുന്ന ഭൗതികമായ ഒരു സംവിധാനമല്ല, മറിച്ച്‌ ഭൗതികമായ ഒരു ഉപകരണത്തിലൂടെ (ഹാര്‍ഡ്‌ വെയര്‍) ഇ-പുസ്‌തക(സോഫ്‌ട്‌വെയര്‍) വായന സാധ്യമാക്കുകയാണ്‌.

പ്രായമേറിയവര്‍ക്കും കാഴ്‌ചാ വൈകല്യമുള്ളവര്‍ക്കും സാധാരണ പുസ്‌തകം വായിക്കാനായി കണ്ണടയുടെ സഹായം വേണ്ടിവരും. വായനക്കാരന്റെ പ്രായം, കാഴ്‌ച എന്നിവ മുന്‍കൂട്ടി അറിഞ്ഞിട്ടില്ലല്ലോ പുസ്‌തകം കൈകളിലേക്കെത്തുന്നത്‌. എന്നാല്‍ ഇ-വായനയില്‍ അക്ഷരത്തിന്റെ വലിപ്പം വായനക്കാരന്‌ ക്രമീകരിക്കാം. അതായത്‌ പതിവായി കണ്ണട ഉപയോഗിക്കുന്നവരാണെങ്കില്‍ പോലും ഇ വായനയില്‍ വലിയ അക്ഷര ടൈപ്പിലേക്ക്‌ മാറിയാല്‍ ആയാസ രഹിതമായി വായന തുടരാം.

ഭാഷ ഒരു പ്രദേശത്ത്‌ തന്നെ വിവിധ തരത്തിലാകും ഉപയോഗിക്കുന്നത്‌ ഉദാഹരണത്തിന്‌ കേരളത്തില്‍ തെക്കന്‍ പ്രദേശത്തെ മലയാളവും വടക്കന്‍ ജില്ലകളിലെ മലയാളവും തമ്മില്‍ പ്രത്യക്ഷത്തില്‍ തന്നെ ശൈലി വ്യത്യാസമുണ്ട്‌. ഇ-പുസ്‌തകം പല വേര്‍ഷനുകളില്‍ ഒരു സമയം തന്നെ ലഭ്യമാക്കാം. വായനക്കാരന്റെ ഇഷ്‌ടാനുസരണം തിരഞ്ഞെടുക്കുകയും ചെയ്യാം. ഇങ്ങനെ പരമ്പരാഗതമായ അച്ചടി പുസ്‌തകവും അനുബന്ധവായനയും സൃഷ്‌ടിച്ച വേലിക്കെട്ടുകളെ തകര്‍ത്തെറിയാന്‍ ഇ-വായനക്ക്‌ സാധിക്കുന്നു.
ഒ.വി. വിജയന്റെ തലമുറകള്‍ ഒരു എഡിഷന്‍, രണ്ടായിരം കവര്‍ പേജുമായി പുറത്തിറങ്ങിയത്‌ അച്ചടി പുസ്‌തകലോകത്തെ കൗതുകമായിരുന്നെങ്കില്‍ ഇ-പുസ്‌തകത്തില്‍ ഇത്തരം കൗതുകങ്ങള്‍ ക്കൊന്നും സ്ഥാനമില്ല.

പുസ്‌തക വായന തുടങ്ങുന്നതിനു മുന്‍പ്‌ തന്നെ വായനക്കാരന്റെ പേര്‌ ശേഖരിച്ചശേഷം, വായനയ്‌ക്കിടയ്‌ക്ക്‌ സന്ദര്‍ഭാനുസരണം ആശയത്തിന്റെ, കഥ പറച്ചിലിന്റെ ഒഴുക്കിനൊപ്പം വായനക്കാരന്റെ പേരില്‍ തന്നെ പ്രസ്‌തുത പുസ്‌തകത്തില്‍ കഥാപാത്രത്തെ കഥക്കൊപ്പം പ്രത്യക്ഷപ്പെടുത്താന്‍ സാധിക്കും. വായനക്കാരന്റെ സ്ഥലമാണ്‌ ആദ്യം ആവശ്യപ്പെട്ടതെങ്കില്‍ പ്രസ്‌തുത കഥ/നോവല്‍ നടക്കുന്നത്‌ നിങ്ങളുടെ പ്രദേശത്താകാം. ഇനി കടുകട്ടി ലേഖനമാണെങ്കില്‍ വായനക്കിടയില്‍, ഹേ! വായനക്കാരാ (പേര്‌ പറഞ്ഞശേഷം) എന്നൊക്കെ ഉള്‍പ്പെടുത്തി വായനയെ കൂടുതല്‍ ഇന്ററാക്‌ടീവ്‌ ആക്കാം. ഇത്തരം ഇന്ററാക്‌ടീവ്‌്‌ ഇടപാടുകളെ ഇമ്മേഴ്‌സിറ്റിവിറ്റി (Immersitivity) എന്നു പറയുന്നു. വായനക്കാരനുമായി അത്രയടുത്ത്‌ നിന്ന്‌ സംവേദനം ചെയ്യുന്ന രീതി.

സാധാരണ പുസ്‌തകം നേര്‍ വായന (linear reading) ആണ്‌ സാധ്യമാക്കുന്നത്‌. ഒരു പേജില്‍ നിന്ന്‌ അടുത്ത പേജിലേക്ക്‌ അങ്ങനെ. കൂടുതല്‍ വ്യക്തമാക്കേണ്ടി വരുന്ന അഥവാ സൂചിക ആവശ്യമുള്ള വാക്കുള്‍ക്കോ വാചകത്തിനോ മുകളില്‍ ചിഹ്നമോ അക്കമോ നല്‍കിയശേഷം, ഈ സൂചിക ഉപയോഗിച്ച്‌ വായനക്കാരന്‍ അതേ പേജിന്റെ താഴത്തെ വരിയിലോ ഗ്രന്ഥത്തിന്റെ അവസാന പേജുകളില്‍ നിന്നോ കൂടുതല്‍ വിവരം ഗ്രഹിക്കുന്ന രീതിയും ലേഖനങ്ങളിലും പ്രബന്ധങ്ങളിലും പിന്തുടരാറണ്ട്‌. എന്നാല്‍ ഇ-വായനയില്‍ സൂചികയ്‌ക്ക്‌ പകരം ഹൈപ്പര്‍ ലിങ്കുകളാണ്‌ കൂടുല്‍ വിവരഖനനത്തിനായി ലഭ്യമാക്കുന്നത്‌. കൂടുതല്‍ വ്യക്തമാക്കേണ്ട വാക്കുകള്‍ക്കോ വാചകത്തിനോ മുകളില്‍ മൗസ്‌/പോയിന്റര്‍ ഉപയോഗിച്ച്‌ അമര്‍ത്തുമ്പോള്‍ അതുമായി ബന്ധപ്പെട്ട കൂടുതല്‍ വിവരങ്ങള്‍ ഉള്ള പുതിയ പേജ്‌ ദൃശ്യമാകും. സമാധാനത്തിനുള്ള നോബെല്‍ പുരസ്‌കാരത്തിന്റെ ലേഖനം വായിക്കുന്നയാളിന്‌ അല്‍ഗോറിന്റെ പേരില്‍ ക്ലിക്ക്‌ ചെയ്‌താല്‍, അല്‍ഗോറിന്റെ സ്വന്തം വെബ്‌ സൈറ്റിലേക്കെത്താം. ഇപ്പോള്‍ വായിച്ചുക്കൊണ്ടിരുന്ന പുസ്‌തകത്തില്‍ നിന്നും അല്‍ഗോറിന്റെ വ്യക്തിഗത വെബ്‌ സൈറ്റിലേക്ക്‌ ഒട്ടും ആയാസമില്ലാതെ നിങ്ങളുടെ വായന നീങ്ങിയെത്തി. സാധാരണ വായനയില്‍ പുസ്‌തകത്തിനകത്ത്‌ മാത്രം വായന പരിമിതപ്പെടുത്തിയെങ്കില്‍ ഇ-വായനയില്‍ ഹൈപ്പര്‍ ലിങ്കുകളിലൂടെ വായനക്കാരനെപ്പോലും അറിയിക്കാതെ ഒരു പുസ്‌തകത്തില്‍ നിന്നും അടുത്ത പുസ്‌തകത്തിലേക്ക്‌ വായന മാറിയെത്തുകയാണ്‌. സാധാരണ പുസ്‌തകം ഉപയോഗിച്ച്‌ നടത്തുന്ന വായനയെ ലീനിയര്‍ വായന എന്നാണ്‌ വിളിക്കുന്നത്‌. ഹൈപ്പര്‍ ലിങ്കുകള്‍ ഉപയോഗിച്ചുള്ള വായനാനുഭവത്തെ നോണ്‍ ലീനിയര്‍ വായന എന്നും വിളിക്കുന്നു.

ടൈറ്റാനിക്‌ കപ്പലിനെക്കുറിച്ചുള്ള ലേഖനം വായിക്കുമ്പോള്‍ കൂടുതല്‍ വിവരം ശേഖരിക്കാനായി ഹൈപ്പര്‍ ലിങ്കുവഴി ടൈറ്റാനിക്‌ എന്ന വന്‍ കപ്പലിന്റെ ചിത്ര ശേഖരത്തിലേക്കോ, അല്ലെങ്കില്‍ സമുദ്രാന്തര്‍ ഭാഗത്ത്‌ ഗവേഷകര്‍ കണ്ടെത്തിയ പൊളിഞ്ഞ കപ്പല്‍ ഭാഗത്തേക്കോ, അതുമല്ലെങ്കില്‍ വിഖ്യാതമായ ടൈറ്റാനിക്‌ എന്ന ചലചിത്രത്തിന്റെ വീഡിയോ ഭാഗത്തേക്കോ എത്താം. ചില അവസരത്തില്‍ കപ്പല്‍ അപകടത്തില്‍ പെടുന്നതിന്റെ ആനിമേഷനും ലഭിച്ചേക്കാം. അതായത്‌ ഹൈപ്പര്‍ ലിങ്കുവഴി വിവര സമ്പുഷ്‌ടതയും വായനക്കാരന്റെ ഇംഗിതം അനുസരിച്ചുള്ള മാധ്യമങ്ങളിലൂടെയുളള സഞ്ചാരവും ലഭിക്കും.

നോണ്‍ ലീനിയര്‍ വായന ഏകാഗ്രതയെ തകര്‍ക്കും എന്ന വാദഗതി നിലവിലുണ്ട്‌. മാത്രമല്ല. വായിച്ചു തുടങ്ങുന്ന പുസ്‌തകത്തിലായിരിക്കണമെന്നില്ല നിങ്ങള്‍ വായന അവസാനിപ്പിക്കുന്നത്‌. ചില അവസരങ്ങളില്‍ വിവര പെരുക്കത്തില്‍പ്പെട്ട്‌ വിവരത്തോടൊപ്പം വിവരാരജകത്വവും (Information Anarchy) സൃഷ്‌ടിക്കപ്പെട്ടേക്കാം എന്നീ വാദങ്ങള്‍ നിലവിലുണ്ട്‌. എന്നാല്‍ വായന വിവരം ഗ്രഹിക്കാനുള്ള ഉപാധിയാണെങ്കില്‍ കൂടുതല്‍ ആഴത്തില്‍ വിവരം അറിയുന്നതിലെന്താണ്‌ തെറ്റ്‌. ഇന്ററാക്ടിവിറ്റിയും ഹൈപ്പര്‍ ലിങ്കുമാണ്‌ നവമാധ്യമത്തിന്റെ സവിശേഷത, അതിനാല്‍ അസ്വാദകന്റെ അഭിരുചിക്കനുസരിച്ച്‌ ഇടപെടാന്‍ സാധിക്കുന്നു.

ച്ചടി യന്ത്രം വന്നതോടെ കൈകൊണ്ടുള്ള എഴുത്ത്‌ കൂടുതല്‍ ജനകീയമാവുകയും കൂടുതല്‍ പേരിലേക്ക്‌ വിവരം വളരെയെളുപ്പത്തില്‍ എത്തിച്ചേര്‍ക്കുകയും ചെയ്‌തു എന്നത്‌ വസ്‌തുതയാണ്‌. എന്നാല്‍ കൈയ്യെഴുത്തിനെ അച്ചടിയന്ത്രം മാറ്റിയതിനേക്കാള്‍ വിശാലമായ ഒരു തലത്തിലേക്കാണ്‌ ഇലക്‌ട്രോണിക്‌ മാധ്യമ സാധ്യതകള്‍ അച്ചടിയെ മാറ്റുന്നത്‌. സാങ്കേതികവിദ്യയുടെ പ്രയോഗം തന്നെ ഒരു മാധ്യമത്തെ അതേ പടി മറ്റോരു മാധ്യമതലത്തിലേക്ക്‌ മാറ്റാനുള്ളതല്ല. മറിച്ച്‌ ഒരു പുതു മാധ്യമത്തിന്റെ എല്ലാ സാധ്യതകളും പരമാവധി ഉള്‍ക്കൊണ്ട ശേഷം നിലവിലുള്ള സംവിധാനം പൊളിച്ചെഴുതുകയാണ്‌. Application of technology is to transform the existing system not to translate the existing system.

പുസ്‌തക വായനയുടെ മറ്റു ചില പരിമിതികളെയും ഇ-വായന മറികടക്കുന്നുവെന്ന്‌ പറയാം. ബീഥോവന്റെ സിംഫണിയെക്കുറച്ച്‌ എത്ര വായിച്ചാലും വര്‍ണിച്ചാലും അത്‌ അതു കേള്‍ക്കന്നതു പോലെയാവില്ലല്ലോ. സിംഫണി എത്ര കേട്ടാലും ബീഥോവന്‍ ജീവിച്ചിരുന്ന കാലഘട്ടത്തെക്കുറിച്ചോ ശാരീരികമായ അവശതകളെ മറികടന്ന്‌ സര്‍ഗപ്രക്രിയ നടത്തിയ വിവരമോ നിങ്ങള്‍ക്ക്‌ കിട്ടുകയുമില്ല!. ഇത്‌ രണ്ടും രണ്ടു വ്യത്യസ്ഥ സാങ്കേതിക വിദ്യയുടെ (അച്ചടി, ഓഡിയോ) പരിമിതിയാണ്‌. എന്നാല്‍ ഇവയുടെ ശരിയായ കൂടി ചേരലാണ്‌ ഇ-വായന. ബീഥോവന്റെ സിംഫണി, ബീഥോവന്റെ രചനാ പശ്ചാത്തലത്തെക്കുറിച്ചുള്ള ലേഖനം അഥവാ ഇവ ഒരുമിച്ചും. ഈ മൂന്ന്‌ സാധ്യതകളും വായനക്കാരന്റെ അഭിരൂചിക്കും സന്ദര്‍ഭത്തിനും അനുസരിച്ച്‌ ഇ-വായനയില്‍ ഉപയോഗിക്കാം.

ഹൈപ്പര്‍ ലിങ്ക്‌ വഴി വായന പല സാധ്യതകളിലൂടെ മുന്നേറുന്നതിനെ പല രീതിയില്‍ ഉപമിക്കാം. മുത്തശ്ശി കുഞ്ഞുങ്ങളോട്‌ കഥ പറയുന്നത്‌ കേട്ടിട്ടില്ലേ. കുട്ടികളുടെ താത്‌പര്യത്തിനനുസരുച്ച്‌ ഒരു കഥയില്‍ നിന്ന്‌ മറ്റൊന്നിലേക്ക്‌ കഥ പറഞ്ഞു പോകും, കഥയില്‍ നിന്ന്‌ ശ്രദ്ധ തിരിഞ്ഞാല്‍ പാട്ടുപാടി കൊടുക്കും. ചിലപ്പോള്‍ കുട്ടികള്‍ തന്നെ മുത്തശ്ശികഥയിലെ കഥാപാത്രമായെന്നുവാരാം. കഥകളില്‍ നിന്ന്‌ ഉപകഥകളിലൂടെ മുത്തശ്ശി വഴിമാറി സഞ്ചരിച്ചുകൊണ്ടിരിക്കും. മിക്കപ്പോഴും തുടങ്ങിയ കഥയില്‍ തന്നെയായിരിക്കില്ല കഥചൊല്ലല്‍ അവസാനിക്കുന്നത്‌. മഹാഭാരതവും പഞ്ചതന്ത്രം കഥകളും ഇത്തരത്തില്‍ വ്യത്യസ്‌തമായ ആഖ്യാന ശൈലിയിലൂടെ കഥയില്‍ നിന്ന്‌ ഉപകഥകളിലേക്ക്‌ കണക്‌ട്‌ ചെയ്‌തിരുന്നുവെങ്കിലും കഥാഗതി ഒരിക്കലും മുഖ്യചട്ടക്കൂടില്‍ നിന്ന്‌ വഴുതി മാറിയിരുന്നില്ല. പക്ഷെ ഇ-വായനയില്‍ ഒരു പുസ്‌തകത്തില്‍ നിന്ന്‌ ഹൈപ്പര്‍ ലിങ്കുവഴി മറ്റൊരു പുസ്‌തകത്തിലോ എഴുത്തുകാരനിലേക്കോ ആകാം എത്തുന്നത്‌.

ന്റര്‍നെറ്റുമായി ബന്ധിപ്പിച്ച ഒരു ഇ-പുസ്‌തകത്തിന്റെ സാധ്യത വിപുലമാണ്‌. എണ്ണമറ്റ വായനക്കാരെയും വിമര്‍ശകരെയും സൃഷ്‌ടിച്ച ഡാണ്‍ ബ്രൗണിന്റെ ഡാവിഞ്ചികോഡ്‌ എന്ന ജനപ്രീയ ഗ്രന്ഥം തന്നെയെടുക്കുക ലൂവ്‌ര്‍ മ്യൂസിയത്തില്‍ വച്ച്‌ നടക്കുന്ന സംഭവങ്ങള്‍ നാടകീയതയോടെ കഥാകാരന്‍ പുസ്‌തകത്തില്‍ വിശദീകരിക്കുമ്പോള്‍ ലൂവ്‌്‌ര്‍ മ്യൂസിയം എന്ന പേര്‌ മാത്രമേ വായനക്കാരന്‌ ലഭിക്കുകയുള്ളൂ. എന്നാല്‍ ഡാവിഞ്ചികോഡിന്റെ ഇന്ററാക്‌ടീവ്‌ ഇ-പുസ്‌തകമാണ്‌ വായിക്കുന്നതെങ്കില്‍ ലൂവ്‌ര്‍ എന്ന പേരില്‍ ക്ലിക്ക്‌ ചെയ്‌താല്‍ സ്ഥലത്തെ അതിപുരാതനമായ മ്യൂസിയം എന്നു മാത്രമല്ല ഇതിന്റെ ഇപ്പോഴത്തെ ക്യൂറേറ്ററുടെ വരെ വിശദമായ വിവരങ്ങള്‍ വായനക്കാരന്‌ ലഭിക്കും. വിവരശേഖരണത്തിന്‌ ശേഷം നോവലില്‍ തിരച്ചെത്തി വായന തുടരാം. ഇനി അച്ചടി പുസ്‌തകമാണ്‌ ഉപയോഗിക്കുന്നതെന്നിരിക്കട്ടെ. ലൂവ്‌ര്‍ മ്യൂസിയത്തെ ക്കുറിച്ച്‌ കൂടുതല്‍ അറിയാന്‍ തൊട്ടടുത്ത ഗ്രന്ഥശാലയിലോ പുസ്‌തകക്കടയിലോ എത്തി കാറ്റലോഗിന്റെ സഹായത്തോടെ ലൂവ്‌റുമായി ബന്ധപ്പെട്ട വിവരം/പുസ്‌തകം സംഘടിപ്പിക്കാം. ഇത്‌ ഏറെ സമയം അപഹരിക്കന്നതോടൊപ്പം പണച്ചിലവും ഉള്ള രീതിയാണ്‌. യഥാര്‍ത്ഥ വിവര ലഭ്യതക്കുള്ള സാധ്യത ഒരു വിജ്ഞാനകോശത്തിലേക്കോ ഇയര്‍ ബുക്കിലേക്കോ മാത്രമായി പരിമിതപ്പെടുത്തേണ്ടിവരും. റോണ്‍ ഹൊവാര്‍ഡ്‌ സംവിധാനം ചെയ്‌ത പ്രശസ്‌തമായ ഡാവിഞ്ചികോഡ്‌ സിനിമ, പുസ്‌തക വായന നടത്തിയ സ്‌ക്രീന്‍ ഉപയോഗിച്ച്‌ അവിടെയിരുന്നു തന്നെ കാണാം. അതുമല്ല ലൂവ്‌ര്‍ മ്യൂസിയം സ്ഥാപിച്ച സാഹചര്യത്തെ പറ്റിയോ അവിടെയുള്ള മറ്റ്‌ അമൂല്യവിവരങ്ങളെപ്പറ്റിയോ മനസ്സിലാക്കണമെങ്കില്‍ അതുമാകാം. മുന്‍പ്‌ വര്‍ഷങ്ങള്‍ കൊണ്ട്‌ മാത്രം ശേഖരിക്കാന്‍ സാധിച്ചിരുന്ന വിവരങ്ങള്‍ ഇന്ന്‌ ഞൊടിയിടയിലാണ്‌ കരഗതമാകുന്നത്‌. ഇന്റര്‍നെറ്റ്‌ എന്ന വിവര വിനിമയ ശൃംഖലയുടെ അവിഭാജ്യഭാഗമായി മാറുകയാണ്‌ ഓരോ പുസ്‌തകവും അതുവഴി വായനക്കാരനും. പ്രിന്റ്‌ എന്ന മാധ്യമത്തില്‍ നിന്ന്‌ സൈബര്‍ സ്‌പെയ്‌സി (അമൂര്‍ത്ത മാധ്യമം എന്നും പറയാം) ലേക്ക്‌ മാറുമ്പോള്‍ ഉണ്ടാകുന്ന നേട്ടങ്ങളാണിതെല്ലാം. മാനവ ചരിത്രത്തിലിന്നോളം വിജയമുഹൂര്‍ത്തങ്ങളിലും ദശാസന്ധികളിലും ചരിത്രത്തിന്റെ രേഖപ്പെടുത്തലായി നിന്ന നേരിട്ട്‌ കാണാനാകുന്ന കടലാസ്‌ എന്ന സ്‌പര്‍ശിച്ചറിയാവുന്ന വസ്‌തുവിനെ സ്‌ക്രീനുകള്‍ സൃഷ്‌ടിക്കുന്ന ടെലി പ്രസന്‍സ്‌ പകരം വയ്‌ക്കുന്നു.

ഹൈപ്പര്‍ ലിങ്കുവഴി കണക്‌ട്‌ ചെയ്‌ത്‌ പുസ്‌തകത്തിന്റെ പുറത്തേക്ക്‌ പോയില്ല എന്നിരിക്കട്ടെ. പുസ്‌തകത്തിന്റെയുള്ളില്‍ തന്നെ സൃഷിടിക്കാനാകുന്ന ലിങ്ക്‌ സാധ്യതകളെപ്പറ്റിയൊന്ന്‌ ആലോചിച്ചുനോക്കൂ. സാമാന്യം വലിപ്പമുള്ള നോവലില്‍ അനേകം കഥാപാത്രങ്ങള്‍ ഉണ്ടാകുമല്ലോ. ഇവര്‍ തമ്മിലുള്ള ബന്ധം വായന പുരോഗമിക്കുന്തോറും ചിലരിലെങ്കിലും ആശയക്കുഴപ്പം സൃഷ്‌ടിച്ചേക്കാം. കേന്ദ്ര കഥാപാത്രത്തിന്റെ പേരിന്‌ മുകളില്‍ ക്ലിക്ക്‌ ചെയ്‌താല്‍ ആരാണ്‌ ഇവരുടെ അച്ഛന്‍, അമ്മ അല്ലെങ്കില്‍ സുഹൃത്തുക്കള്‍,ബന്ധുക്കള്‍ എന്നറിയാം. ഇതിനുശേഷം പഴയ പേജിലേക്കെത്താം. ഇതുപോലെ തന്നെ ഒരു കഥാസന്ദര്‍ഭത്തില്‍ നിന്ന്‌ പേജുകള്‍ അകലെയുള്ള മറ്റൊരു കഥാസന്ദര്‍ഭത്തിലേക്കെത്താം. ഇങ്ങനെ സംശയനിവാരണം നടത്തിയശേഷം വായിച്ചു നിര്‍ത്തിയ സ്ഥലത്തെത്തി വായന തുടരാം. കഥാപാത്രങ്ങളും കഥാസന്ദര്‍ഭങ്ങളും മാത്രമല്ല സ്ഥലങ്ങള്‍, വര്‍ഷം, മറ്റ്‌ സൂചകങ്ങള്‍ എന്നിവയും ഹൈപ്പര്‍ലിങ്കായി പുസ്‌തകത്തിനുള്ളില്‍ തന്നെ ലഭ്യമാക്കി വായനയുടെ ആഴം കൂട്ടാം. ഇതു കൊണ്ട്‌ തന്നെയാകണം ഇ-പുസ്‌തകങ്ങളെ ഹൈപ്പര്‍ പുസ്‌തകങ്ങള്‍ എന്നും വിളിക്കുന്നത്‌.

വായനയെ പ്രധാനമായും രണ്ടായിതിരിക്കാം ഗൗരവമായവായനയും അല്ലാത്തവയും. പത്രവായനയും മാസികവായനയും അത്രയ്‌ക്ക്‌ ബൗദ്ധികമായ അധ്വാനം ആവശ്യപ്പെടുന്നില്ല. വെറുമൊരു നേരം പോക്ക്‌ പോലെ മറ്റ്‌ പല പരിപാടികള്‍ക്കൊപ്പമാണ്‌ നാം ഇത്തരം വായന നടത്തുന്നത്‌. കൂടുതലും വിവരശേഖരണത്തിനാണ്‌ ഈ രീതി ഉപയുക്തമാകുന്നത്‌. എന്നാല്‍ ഗൗരവമായ വായന: വായിക്കുന്ന അന്തരീക്ഷം, മാധ്യമം, തുടങ്ങി ഒട്ടേറെ കാര്യങ്ങളെ ആശ്രയിച്ചിരിക്കുന്നു. ഒ.വി വിജയന്റെ 'ഖസാക്കിന്റെ ഇതിഹാസം' പത്രം വായിക്കുന്നത്‌ പോലെയല്ലല്ലോ നാം പരിഗണിക്കുക. ഇലക്‌ട്രോണിക്‌ വായനയുടെ കാര്യത്തില്‍ ഗൗരവമായ വായനയെ രണ്ടായി തിരിക്കാം. വൈജ്‌ഞാനിക ശാഖയിലെ വായനയും സര്‍ഗസാഹിത്യ വായനയും സര്‍ഗസാഹിത്യ വായനയ്‌ക്ക്‌ ഇതുവരെ ഇ-പുസ്‌തകങ്ങള്‍ കാര്യമായ വെല്ലുവിളിയായിട്ടില്ല. എന്നാല്‍ വൈജ്ഞാനിക ശാഖയില്‍ ഇ-വായന അപരിമിതമായ അവസരങ്ങളാണ്‌ തുറന്നിടുന്നത്‌. വൈജ്ഞാനികമായ വായനയ്‌ക്ക്‌ വസ്‌തുനിഷ്‌ടമായ സമീപനം ആവശ്യം. പലപ്പോഴും ശാസ്‌ത്ര തത്വങ്ങളും, വിവരാപഗ്രഥനവും, സ്ഥിതി വിവരക്കണക്കുകളും അഭിവാജ്യഘടകമാണ്‌. ഇവിടെയാണ്‌ ഇ-വായനയുടെ പ്രസക്തി. സാധാരണ വിവര സ്രോതസായി ഇയര്‍ ബുക്കിനെ നാം ആശ്രയിക്കാറുണ്ട്‌. എന്നാല്‍ ഇത്‌ എത്രമാത്രം അപ്‌ഡേറ്റാണ്‌. ഇന്ത്യയിലെ ടെലഫോണ്‍ സാന്ദ്രതയ്‌ക്ക്‌ ഇയര്‍ ബുക്ക്‌ നല്‍കുന്ന ഉത്തരം മിക്കവാറും തൊട്ട്‌ മുന്‍പവസാനിച്ച ഡിസംബര്‍ മാസത്തെ സ്ഥിതി വിവരക്കണക്കായിരിക്കും. ഓരോ മാസവും ലക്ഷക്കണക്കിന്‌ ടെലഫോണ്‍ കണക്ഷന്‍ പുതുതായി കൂട്ടി ചേര്‍ക്കപ്പെടുന്ന അവസ്ഥയില്‍ ഇയര്‍ ബുക്കുകളെ എത്ര മാത്രം ആശ്രയിക്കാനാകും.

ഇ-ബുക്കുകളുടെ അടുത്ത പ്രത്യേകത ഇതിന്റെ തിരച്ചില്‍ ശേഷിയാണ്‌. സര്‍ച്ച്‌ ബോക്‌സില്‍ ആവശ്യമുളള വാക്കോ വാചകമോ ടൈപ്പ്‌ ചെയ്‌താല്‍ ലേഖനത്തില്‍ എവിടെയൊക്കെ സര്‍ച്ച്‌ വാക്ക്‌ ആവര്‍ത്തിക്കപ്പെടുന്നുവെന്ന്‌ എളുപ്പത്തില്‍ അറിയുവാനും അവിടേക്ക്‌ എത്തുവാനും സാധിക്കും. സര്‍ച്ച്‌ ഏന്‍ജിനേയേയും ഇത്തരം സര്‍ച്ചിനേയും ഇ-വായനയില്‍ രണ്ട്‌ വീക്ഷണ കോണുകളില്‍ നിന്ന്‌ കാണേണ്ടതുണ്ട്‌. ഒരു ലേഖനത്തിലെ/ബുക്കിനുളളിലെ സര്‍ച്ച്‌ ക്ലിപ്‌തമായ വിവരം ലഭ്യമാക്കുമ്പോള്‍, സര്‍ച്ച്‌ എന്‍ജിനിലെ ഇതേ വാചകം ഉപയോഗിച്ചുളള പ്രയോഗം ഹൈപ്പര്‍ലിങ്കുകളുടെ ഒരു പെരുക്കമായിരിക്കും നിരത്തുക. ഈ ഇന്‍ഫര്‍മേഷന്‍ ഓവര്‍ ലോഡ്‌ പലപ്പോഴും ശരിയായ വിവരം കിട്ടാന്‍ ഉപകരിക്കണമെന്നില്ല. നിമിഷാര്‍ധത്തില്‍ ദശലക്ഷക്കണക്കിന്‌ വിവരസുചികകള്‍ ഡസ്‌ക്‌ ടോപ്പിലേക്കെത്തുമ്പോള്‍ വിവരപ്പെരുക്കത്തിന്റെ തലവേദന ശരിക്കും ബോധ്യമാകും.

ന്ധരായ വായനക്കാര്‍ക്കായി പുസ്‌തകം ബ്രെയില്‍ ലിപിയിലേക്ക്‌ മാറ്റുന്നത്‌ എല്ലാ സന്ദര്‍ഭത്തിലും പ്രായോഗികമാകണമെന്നില്ല. എന്നാല്‍ ടെക്‌സ്റ്റ്‌ ടു സ്‌പീച്ച്‌ സൗകര്യത്തിലൂടെ ഇ-വായനയില്‍ പുസ്‌തകം കേട്ട്‌ ആസ്വദിക്കാനുമാകുമെന്നത്‌ അംഗവൈകല്യമുള്ളവരോടൊപ്പം മറ്റുള്ളവര്‍ക്കും പുതിയൊരു സൗകര്യമാണ്‌. ഇതിനാകട്ടെ പ്രത്യേകിച്ച്‌ ഒരു ഉപകരണവും കൂട്ടിയിണക്കേണ്ടതില്ല ഒരു സോഫ്‌ട്‌ വെയര്‍ മാത്രം അധികമായി ഉള്‍പ്പെടുത്തിയാല്‍ കൃതിയുടെ ശബ്‌ദാസ്വാദനമാകാം. ഇതു പോലെ തന്നെ നമ്മുടെ ശബ്‌ദം പിടിച്ചടുത്ത്‌ പ്രവര്‍ത്തിക്കുന്ന ശബ്‌ദാനുവര്‍ത്തി ഡിജിറ്റല്‍ ഉപകരണങ്ങളും ഇന്ന്‌ പ്രചാരം നേടിവരുന്നു.\

ഇ-വായനയെ പ്പറ്റി ഒരു ഏകദേശധാരണയുണ്ടാക്കാന്‍ ഒരു താരതമ്യം നടത്താം. സാധാരണ പുസ്‌തകവും ഇ-പുസ്‌തകവും തമ്മില്‍. ഇ-ബുക്ക്‌ റീഡര്‍ എന്ന സാമാന്യം പുസ്‌തകത്തിന്റെ വലിപ്പമുള്ള ഒരു ഉപകരണം ഉപയോഗിച്ചാണ്‌ ഇ-വായന നടത്തുന്നത്‌. സാധാരണ പുസ്‌തകം ഒരെണ്ണം വായിച്ച ശേഷമാണ്‌ അടുത്തത്‌ എടുത്ത്‌ വായന തുടരുന്നത്‌. ഉദാഹരണത്തിന്‌ ഒരു മാസത്തെ ദൂരയാത്രക്ക്‌ പോകുന്ന വായനാപ്രേമികൂടിയായ ഒരു യാത്രക്കാരന്റെ കയ്യില്‍ പതിനഞ്ച്‌ പുസ്‌തകം ഉണ്ടെന്നിരിക്കട്ടെ. യാത്രാ സാമഗ്രികളുടെ കൂട്ടത്തില്‍ നല്ലോരു ഭാരം 'പുസ്‌തക ഭാരം' തന്നെയായിരിക്കും. എന്നാല്‍ ഒരു ഇ-പുസ്‌തകത്തിനും ആയിരം ഇ-പുസ്‌തകത്തിനും ഒരേ ഭാരം തന്നെയായിരിക്കും. ഒരു ഇ-ബുക്ക്‌ റീഡറില്‍ ഡാറ്റാ സംഭരണശേഷിക്കനുസരിച്ച്‌ അന്‍പത്‌ മുതല്‍ ആയിരമോ അതിലേറെയോ പുസ്‌തകങ്ങള്‍ ശേഖരിക്കാം എന്നാല്‍ ഇതിനനുസരിച്ച്‌ ഭാരം വര്‍ദ്ധിക്കുകയില്ല. 80 ജി.ബി സംഭരണശേഷിയുണ്ടെങ്കില്‍ സാമാന്യം വലിപ്പമുള്ള ഒരു ലൈബ്രറി തന്നെ യാത്രാവേളയില്‍ കൂടെ കൊണ്ടുപോകാം! 2000 പേജുള്ള നിഘണ്ടുവിനെ സി.ഡി റോമിന്റെ ഒരു മൂലയിലേക്ക്‌ ഒതുക്കാം.

നി മൂന്ന്‌ ഭാഷയില്‍ ലഭ്യമാകുന്ന നിഘണ്ടുവിന്റെ വലിപ്പം ഒന്നാലോചിച്ച്‌ നോക്കൂ. ഒന്ന്‌ അതിന്റെ ക്രമാതീതമായ വലിപ്പം വിലയും കൂട്ടുകയും ഉപയോഗ ലാളിത്യം കുറക്കുകയും ചെയ്യും. രണ്ടാമതായി ബഹുഭാഷാ നിഘണ്ടു ഏതെങ്കിലും ഒരു ഭാഷയെ അടിസ്ഥാനമാക്കി സജ്ജീകരിക്കേണ്ടിവരും. ഉദാഹരണം ഇംഗ്ലീഷ്‌-ഹിന്ദി-മലയാളം നിഘണ്ടുവില്‍ സര്‍ച്ച്‌ വേഡായി ഉപയോഗിക്കുന്നത്‌ ഇംഗ്ലീഷ്‌ ഭാഷയിലെ വാക്കുകള്‍.. എന്നാല്‍ മലയാളം-ഇംഗ്ലീഷ്‌-ഹിന്ദി നിഘണ്ടുവില്‍ മലയാളമാകും അടയാളവാക്യം. അതായത്‌ ബഹുഭാഷാനിഘണ്ടു ആണെങ്കിലും ഉപയോഗത്തിന്റെ കാര്യത്തില്‍ അടയാളവാക്യ ഭാഷയെ മാത്രം ബന്ധപ്പെടുത്തിയെ മുന്നേറാനാകൂ. അച്ചടി രീതിയില്‍ ബഹുഭാഷാ നിഘണ്ടു എത്താതിന്റെ പ്രധാന കാരണങ്ങളാണ്‌ ഇത്‌. എന്നാല്‍ ഒരു ഇ-ഡിക്ഷണറിയുടെ കാര്യമെടുക്കുക 50 ഭാഷകള്‍ ഉള്‍ക്കൊള്ളുന്ന നിഘണ്ടു പോലും കേവലം ഒരു സി.ഡി റോമിലേക്ക്‌ ഉള്‍ക്കൊള്ളിക്കാം എന്ന്‌ മാത്രമല്ല, ഏത്‌ ഭാഷയിലെ വാക്കുപയോഗിച്ചും സംശയനിവാരണവും പദാര്‍ത്ഥ ശേഖരണവും നടത്താം. ഇന്റര്‍നെറ്റ്‌ സര്‍ച്ച്‌ അല്‍ഗോരിതത്തിന്റെ സാധ്യതകളാണ്‌ ഇത്തരം ബഹു ഭാഷാ നിഘണ്ടുവിന്റെ സഹായത്തിനെത്തുന്നത്‌. ഒപ്പം അച്ചടിനിഘണ്ടുവിലില്ലാത്ത മറ്റൊരു സവിശേഷത കൂടി ഇ-ഡിക്ഷണറിക്കുണ്ട്‌. യഥാര്‍ത്ഥ ഉച്ചാരണം ഒരു മൗസ്‌ ക്ലിക്ക്‌ കൊണ്ട്‌ കേള്‍വിയിലൂടെ ഗ്രഹിക്കുകയുമാകാം. ഇത്‌ വഴി പുതിയൊരു സൗകര്യം കൂടി സാങ്കേതികവിദ്യയുടെ സഹായത്തോടെ നിഘണ്ടുവിലേക്ക്‌ ഇണക്കിച്ചേര്‍ക്കുകയാണ്‌.

ഇ-വായന സമകാലീന സത്യമാണോ അല്ലെങ്കില്‍ സമീപഭാവിയിലെങ്കിലും ഇവിടെ ഇത്‌ സംഭവിക്കുമോ എന്ന്‌ ചിന്തിക്കുന്നവരുണ്ടാകും. ശരിയാണ്‌ കംപ്യൂട്ടറും ഇന്റര്‍നെറ്റും സമസ്‌ത ജീവിതത്തെയും സ്വാധീനിക്കുന്ന രീതിയില്‍ ഒരു സാമൂഹികാവസ്ഥ ഇനിയും രൂപപ്പെട്ടിട്ടില്ലെങ്കിലും കേരളത്തിന്റെ കാര്യത്തില്‍ ഇ-വായനക്ക്‌ സാധ്യതകള്‍ കല്‍പിക്കാം. ഇന്ത്യയില്‍ ടെലഫോണ്‍ സാന്ദ്രതയിലും ഇ-സാക്ഷരതയിലും ഏറ്റവും മുന്നില്‍ നില്‌ക്കുന്ന സംസ്ഥാനം എന്ന നിലയില്‍ ഒരു കാര്യം നിസംശയം പറയാം ഇന്ത്യയില്‍ പ്രാദേശിക ഭാഷയില്‍ ഇ-വായന ആദ്യമെത്തുന്നതും ഇവിടെ തന്നെയാകും. നിലവില്‍ ഭാരതീയ പ്രദേശികഭാഷകളിലുള്ള ബ്ലോഗ്‌, വിക്കിപീഡിയ ലേഖനങ്ങളില്‍ എണ്ണം, ഗുണനിലവാരം എന്നിവ കൊണ്ട്‌ മലയാളഭാഷ മുന്നേറിക്കഴിഞ്ഞു എന്നത്‌ വസ്‌തുതയാണ്‌.

ഇ-വായന സമകാലീന സത്യമാണോ അല്ലെങ്കില്‍ സമീപഭാവിയിലെങ്കിലും ഇവിടെ ഇത്‌ സംഭവിക്കുമോ എന്ന്‌ ചിന്തിക്കുന്നവരുണ്ടാകും. ശരിയാണ്‌ കംപ്യൂട്ടറും ഇന്റര്‍നെറ്റും സമസ്‌ത ജീവിതത്തെയും സ്വാധീനിക്കുന്ന രീതിയില്‍ ഒരു സാമൂഹികാവസ്ഥ ഇനിയും രൂപപ്പെട്ടിട്ടില്ലെങ്കിലും കേരളത്തിന്റെ കാര്യത്തില്‍ ഇ-വായനക്ക്‌ സാധ്യതകള്‍ കല്‍പിക്കാം. ഇന്ത്യയില്‍ ടെലഫോണ്‍ സാന്ദ്രതയിലും ഇ-സാക്ഷരതയിലും ഏറ്റവും മുന്നില്‍ നില്‌ക്കുന്ന സംസ്ഥാനം എന്ന നിലയില്‍ ഒരു കാര്യം നിസംശയം പറയാം ഇന്ത്യയില്‍ പ്രാദേശിക ഭാഷയില്‍ ഇ-വായന ആദ്യമെത്തുന്നതും ഇവിടെ തന്നെയാകും. നിലവില്‍ ഭാരതീയ പ്രദേശികഭാഷകളിലുള്ള ബ്ലോഗ്‌, വിക്കിപീഡിയ ലേഖനങ്ങളില്‍ എണ്ണം, ഗുണനിലവാരം എന്നിവ കൊണ്ട്‌ മലയാളഭാഷ മുന്നേറിക്കഴിഞ്ഞു എന്നത്‌ വസ്‌തുതയാണ്‌.

ന്ധമായ ഒരു കംപ്യൂട്ടര്‍വല്‍ക്കരണ ഭയം നിലനിന്നിരുന്ന എണ്‍പതുകളുടെ അനുഭവത്തിന്റെ തുടര്‍ച്ചയാകാം ടി.വി കൊച്ചു ബാവ 1992 ല്‍ എഴുതിയ 'കൊക്കരണി' എന്ന കഥ. ഇതില്‍ കംപ്യൂട്ടറിന്റെ ഇടപെടലിനെ ഭീതിയോടെ നോക്കി കാണുന്നു. എന്നാല്‍ 15 വര്‍ഷത്തിനിപ്പുറം കംപ്യൂട്ടറുകളും അനുബന്ധ ഡിജിറ്റല്‍ ഉപകരണങ്ങളും ഭീതിയുടെ തലത്തില്‍ നിന്നും ഉപയോഗ സൗഹൃദ തലത്തിലേക്കെത്തിക്കഴിഞ്ഞു. ചിലപ്പോള്‍ അടുത്ത അഞ്ചു വര്‍ഷത്തിനുള്ളില്‍ ടി.വി കൊച്ചു ബാവയുടേതടക്കമുള്ള നോവലുകളും കഥകളും ഇ-പുസ്‌തകമായി വിപണിയിലിറങ്ങി ദേശത്തിന്റെ അതിര്‍ത്തികള്‍ ഭേദിച്ച്‌ വിവിധ രാജ്യങ്ങളിലുള്ള മലയാളി വായനക്കാരുടെ കൈകളിലെത്തി പുതുവായന വിപ്ലവത്തിന്‌ തുടക്കമിടില്ല എന്ന്‌ എങ്ങനെ പറയാനാകും.