Tuesday, December 29, 2009

ഐ.ടി @ 2009

പോയ വര്‍ഷം വിവരസാങ്കേതികവിദ്യാ രംഗത്തെ കണക്കെടുപ്പിന് മുതിരുകയാണങ്കില്‍ എന്തൊക്കെയാകും നമ്മെ ഓര്‍മ്മപ്പെടുത്തുന്നത്. രണ്ടാം തലമുറ വെബ് സേവനങ്ങള്‍ കൂടുതല്‍ ജനകീയമായത് ഈ വര്‍ഷം തന്നെയാകണം. ഓപ്പറേറ്റിംഗ് സിസ്റ്റം വിപണിക്കും ചെറുതല്ലാത്ത ചരിത്രമെഴുതാന്‍ 2009 നായി, മൈക്രോസോഫ്ടില്‍ നിന്നുള്ള വിന്‍ഡോസ് ഏഴിന് ഉബുണ്ടു 09.10 വ്യക്തമായ മറുപടിയായെത്തിയത് സ്വതന്ത്രസോഫ്ട്‌വെയര്‍ പ്രേമികളെ ഉത്സാഹിതരാക്കി മാത്രമല്ല ഇന്റര്‍നെറ്റ് രംഗത്തെ വിസ്മയ സാന്നിദ്ധ്യമായ ഗൂഗിള്‍ അവരുടെ ക്രോം വെബ്രൌസറിനെ ഒരു സമ്പൂര്‍ണ ഓ.എസ് ആക്കിമാറ്റുമെന്ന് പ്രഖ്യാപിച്ചതും ഇതേ കാലത്തായിരുന്നു. ഇതു മാത്രമല്ല ചെറുതും വലുതുമായ സേവനങ്ങളിലൂടെ വിവരസാങ്കേതികവിദ്യ സാധാരണകാരിലേക്ക് കൂടുതല്‍ ചങ്ങാത്തം കൂടുന്നതിനാണ് പോയ വര്‍ഷം സാക്ഷിയായത്.

1. കൂട്ടത്തില്‍ എറ്റവും കൂടുതല്‍ കേട്ടത് ട്വിറ്റര്‍ എന്ന മൈക്രോ ബ്ലോഗിംഗ് സൌകര്യം തന്നെയാണ്. ശശി തരൂരിന്റെ വിവാദപരമായ കുഞ്ഞുകുറിപ്പുകള്‍ ഇതിനെ ഇന്ത്യയില്‍ പെട്ടെന്ന് ജനകീയമാക്കി. 140 അക്ഷര-അക്ക കൂട്ടുകെട്ടിലൂടെ നമുക്ക് പുറം‌ലോകത്തോട് പറയാനുള്ള വേദിയാണ് ട്വിറ്റര്‍‌ . ഒരു പക്ഷെ ഗൂഗിളിന് ശേഷം ലോകം കണ്ട എറ്റവും മികച്ച ഐ.ടി സ്ഥാപനവും ട്വിറ്റര്‍ തന്നെയാകണം. ഇന്ന് രാഷ്‌ട്രീയപ്രവര്‍ത്തകര്‍ ,സിനിമാതാരങ്ങള്‍ , വ്യവസായ സംരഭകര്‍ തുടങ്ങി വിദ്യാര്‍ത്ഥികളും സാധാരണക്കാരും വരെ ട്വിറ്ററില്‍ വിശ്വാസമര്‍പ്പിച്ചിരിക്കുന്നു. കേവലം വ്യക്തിഗത സന്ദേശം വിനിമയം ചെയ്യാനുള്ള ഇടം മാത്രമല്ല ഒപ്പം വാര്‍ത്താലോകത്തെ പുതുമാറ്റങ്ങള്‍ അറിയാനും ഓഹരിച്ചന്തയിലെ കയറ്റിറക്കങ്ങള്‍ ചൂടോടെ അറിയാനും ട്വിറ്റര്‍ തന്നെ ആശ്രയം എന്ന നിലയ്ക്കെത്തിയിരിക്കുന്നു കാര്യങ്ങള്‍ .

2. വീഡിയോ പങ്കിടല്‍ ശ്രദ്ധേയമായ ഇടമാണെന്ന് വ്യക്തമായി ഓര്‍മപ്പെടുത്തിയത് ഒരു പക്ഷെ പോയവര്‍ഷത്തിന്റെ അവസാന ദിനങ്ങളായിരുന്നു. ആന്ധ്രാ ഗവര്‍ണര്‍ ലൈംഗികപവാദത്തില്‍പ്പെട്ട വാര്‍ത്ത രാജിയില്‍ കലാശിക്കുന്നതിന് മുന്നെ തന്നെ പൊതുതാത്പര്യ ഹര്‍ജിയുമായി ബന്ധപ്പെട്ട് പ്രസ്തുത ദൃശ്യം പ്രക്ഷേപണം ചെയ്യുന്നതില്‍ നിന്ന് ടി.വി ചാനലുകളെ കോടതി വിലക്കിയിരുന്നു. എന്നാല്‍ യൂടൂബിലൂടെ ഇതേ സംഭവം വീക്ഷിക്കാനെത്തിയവരുടെ എണ്ണം ഇതിനു ശേഷം ക്രമാതീതമായി വര്‍ധിച്ചു, ഇതാകട്ടെ ഒരു ബദല്‍ മാധ്യമം എന്നനിലയില്‍ വീഡിയോ ഷെയറിംഗ് സൈറ്റുകളുടെ സാധ്യതയിലേക്ക് വിരല്‍ ചൂണ്ടുന്നുവെങ്കില്‍ ഈ വര്‍ഷത്തെ നൊബെല്‍ പുരസ്‌കാര പ്രഖ്യാപനം തന്നെ നേരിട്ട് സം‌പ്രേഷണം ചെയ്ത് ലക്ഷണമൊത്ത പുത്തന്‍ തലമുറ ദൃശ്യമാധ്യമമാണ് യുട്യൂബെന്ന് ഓര്‍മിപ്പിച്ചു. 2005 ഡിസംബറില്‍ തുടങ്ങിയ യൂടൂബ് എന്ന ചെറുസാന്നിദ്ധ്യത്തിന്റെ വന്‍‌സാദ്ധ്യത തിരിച്ചറിഞ്ഞ ഗൂഗിള്‍ ഇത് തൊട്ടടുത്ത വര്‍ഷം തന്നെ സ്വന്തമാക്കിയത് തികച്ചും കൃത്യമായ വിപണിനീക്കമായിരുന്നു എന്ന് അടയാളപ്പെടുത്തിയത് 2009 ല്‍ ദിനം‌പ്രതി നൂറുകോടി മൌസ് ക്ലിക്ക് എന്ന നാഴികക്കല്ല് പിന്നിട്ടപ്പോഴായിരുന്നു. വെബ് നിരീക്ഷകരായ അലക്സാ ഡോട്ട് കോമിന്റെ കണക്ക് പ്രകാരം ലോകത്തെ എറ്റവും കൂടുതല്‍ പേരെത്തുന്ന നാലാമത്തെ വെബ്‌ഇടമാണ് യൂടൂബ്. വാര്‍ത്താചിത്രം മാത്രമല്ല ഇഷ്‌ടഗാനങ്ങള്‍ , സിനിമാ ശകലങ്ങള്‍ ,സ്വകാര്യ വീഡിയോ, സിറ്റിസണ്‍ ജേണലിസം ഇടപെടലുകള്‍ ,ക്ലാ‍സ് റൂം പാഠങ്ങള്‍ എന്നിവയാലും യൂടൂബ് ദൃശ്യസമ്പന്നമായിക്കൊണ്ടിരിക്കുന്നു എന്നത് വരും വര്‍ഷവും ഈ സൈറ്റിനെ ശ്രദ്ധേയമാക്കും എന്നതില്‍ തര്‍ക്കമുണ്ടാകില്ല.

3. ഇന്റര്‍നെറ്റിന് നാല്പത് വര്‍ഷം തികഞ്ഞത് സെപ്റ്റംബര്‍ രണ്ടിനായിരുന്നു. സാധാരണക്കാരന്റെ നിത്യവ്യവഹാരത്തിലേക്ക് വരെ ഇന്റര്‍നെറ്റ് പദങ്ങള്‍ എത്തി എന്നുപറയുമ്പോള്‍ ജനകീയ ഭാവം മനസിലാക്കാവുന്നതേയുള്ളൂ. ഇന്ന് കേരളത്തിലെ വിവിധ പരീക്ഷാഫലങ്ങള്‍ എത്തുന്നത് വെബ്‌സൈറ്റിലോ അല്ലെങ്കില്‍ വെബ്‌വിവരസഞ്ചയം ആശ്രയിക്കുന്ന മൊബൈല്‍ സന്ദേശങ്ങളായോ ആണ്. എതാനും വര്‍ഷം മുന്‍‌പ് വരെ എസ്.എസ്.എല്‍ .സി ഫലം പത്രത്താളുകളുടെ പേജുകള്‍ നിറച്ചിരുന്നു എന്നാല്‍ ഇന്നോ ഫലം അറിയുന്ന മാത്രയില്‍ തന്നെ എതുദിക്കിലും വിവരം എത്തും. ഒപ്പം തന്നെ സര്‍ക്കാരുകളുടെ ഇ-ഗവണന്‍‌സ് പദ്ധതികളും കൂടുതല്‍ ജനപ്രീയമാകുന്നു. സംസ്ഥാന സര്‍ക്കാര്‍ വാണിജ്യ നികുതി പിരിവിനായി തുടങ്ങിയ ഇ-പേയ്‌മെന്റ് സംവിധാനവും വിദ്യാര്‍ത്ഥികള്‍ക്ക് ഫീസാനുകൂല്യവും സാമ്പത്തികാനുകൂല്യവും കാര്യക്ഷമമായി വിതരണം ചെയ്യാനാരംഭിച്ച ഇ-ഗ്രാന്റ്സും കേരളത്തില്‍ നിന്നുള്ള ശ്രദ്ധേയ ഇ-മാറ്റങ്ങള്‍ . കേരള സര്‍വകലാശാല കമ്പ്യൂട്ടര്‍ കേന്ദ്രത്തിന്റെ സംഘാടനത്തില്‍ പരീക്ഷാ പ്രവര്‍ത്തനങ്ങള്‍ സമ്പൂര്‍ണമായി ഇ-ഗവണന്‍സ് ശൈലിയിലാക്കി, പരീക്ഷാ രജിസ്‌ട്രേഷന്‍ , ഫലപ്രഖ്യാപനം, മാര്‍ക്ക് ലിസ്റ്റും തുടങ്ങി എല്ലാ സൌകര്യങ്ങളും വിദ്യാര്‍ത്ഥികള്‍ക്ക് സൌകര്യപ്രദമായ രീതിയില്‍ വിന്യസിച്ചത് മറ്റോരു ഉദാഹരണം, ഇതിന് സര്‍വകലാശാലയ്‌ക്ക് സംസ്ഥാന സര്‍ക്കാരിന്റെ ഐ.ടി പുരസ്‌കാരവും ലഭിച്ചു..

4. .ടി അധിഷ്ഠിത ഇലക്ട്രോണിക് ഉത്പന്നങ്ങളുടെ ശ്രേണി പരിശോധിക്കുകയാണങ്കില്‍ ഐ.ഫോണും ഐ.പോഡും മേധാവിത്വം നിലനിര്‍ത്തുന്ന ലോകകാഴ്ചയ്ക്കൊപ്പം ബ്ലാക്ക്ബെറി സേവനങ്ങള്‍ ഇന്ത്യയില്‍ കൂടുതല്‍ സജീവമായി. ത്രീ ജി ലേലം പൂര്‍ത്തിയാകുന്നതോടെ സ്വകാര്യ സേവന ദാതാക്കള്‍ വിപണി മത്സരത്തിന്റെ മേഖലയിലേക്ക് ഡാറ്റാ അധിഷ്ഠിത ഫോണുകളുമായെത്തുന്നതിന് വരും വര്‍ഷം സാക്ഷിയാകും.15,000 രൂപയ്ക്കുള്ള ബ്ലാക്ക്ബെറി തന്നെയാകും ഇതിനുള്ള പരീക്ഷണപ്രതലം!

5. മറ്റൊരു ഉപകരണം ഇ-ബുക്ക് റീഡറുകളാണ്. ആമസോണ്‍ കിന്‍ഡില്‍ (kindle) ന്റെ രണ്ടാം തലമുറ 2009 ഫെബ്രുവരി തന്നെ അവതരിപ്പിച്ചു എന്നാല്‍ ഭാവി വിപണി മുന്നില്‍ക്കണ്ട് ഫ്യൂജിറ്റ്സു വില്‍ നിന്ന് ഫ്ലെപ്പിയ, ബാര്‍‌നെസ് ആന്റ് നോബിളിന്റെ നൂക്ക്, സോണിയുടെ ഇ-ബുക്ക് റീഡര്‍ എന്നിവയും സാന്നിദ്ധ്യമറിയിച്ചു. സാധാരണ ബുക്കിന്റെ പകരക്കാരനായാണ് ഈ ഉപകരണം പ്രചാരത്തിലെത്തുന്നത്. 2012 എന്ന അഗോളഹിറ്റ് ചലച്ചിത്രത്തില്‍ ഒരു അറബ് ഭരണാധികാരി രേഖകള്‍ വായിക്കുന്നത് കാണിക്കുന്നത് കടലാസിലല്ല മറിച്ച് ഇ-ബുക്ക് റീഡറിലാണ് എന്നത് ഓര്‍ക്കുക. നിലവില്‍ 12,500 രൂപ വിലയുള്ള ഇത്തരം ഉപകരണത്തിന് ഒരു പുസ്തകത്തിന്റെ ഭാരവും വലിപ്പവുമേ ഉള്ളൂ, എന്നാല്‍ 1500 ഓളം പുസ്തകങ്ങള്‍ ഉള്‍ക്കൊള്ളാന്‍ ഇതിനാകും. സഞ്ചരിക്കുന്ന വ്യക്തിഗത ഗ്രന്ഥശാല !

6. മാസം തോറും എകദേശം 250 ലേഖനങ്ങള്‍ പുതുതായി കൂട്ടിച്ചേര്‍ക്കപ്പെടുന്നു എന്നത് മാത്രമല്ല 2009 ല്‍ മലയാളം വിക്കിപീഡിയയുടെ സവിശേഷത, ഇന്ന് ലോകത്തില്‍ എറ്റവും കൂടുതല്‍ പേജ് ഡെപ്ത് ഉള്ള രണ്ടാമത്തെ വിക്കിപീഡിയ സംരംഭം നമ്മുടെ ഭാഷയിലാണ്. ഡിസംബര്‍ മാസം അവസാനിക്കുമ്പോള്‍ മലയാളം വിക്കിപീഡിയയില്‍ 11,608 ലേഖനങ്ങള്‍ ഉണ്ട്. പേജ് ഡെപ്ത് 212ല്‍ നിന്നു് 219 ആയി ഉയര്‍‌ന്നു. ഇംഗ്ലീഷിനു് ശേഷം ഏറ്റവും കൂടുതല്‍ പേജ് ഡെപ്ത്തുള്ള വിക്കിപീഡിയ ആയി നമ്മുടെ വിക്കിപീഡിയ തുടരുന്നു. മലയാളം വിക്കിപീഡിയയില്‍ ഇതു വരെ നടന്ന തിരുത്തലുകളുടെ എണ്ണം: 5,33,391. നവംബര്‍ മാസം മലയാളം വിക്കിപീഡിയയില്‍ 16,500 തിരുത്തലുകളാണ് നടന്നത്. മലയാളം വിക്കിപീഡിയയില്‍ ഇതു വരെ അം‌ഗത്വമെടുത്ത ഉപയോക്താക്കളുടെ എണ്ണം: 14,196. നവംബര്‍ മാസത്തില്‍ ഏതാണ്ട് 4000 പേരാണു പുതുതായി അംഗത്വമെടുത്തത്.

7. ആംഗലേയ ഭാഷയിലെ പദസമ്പത്ത് ഒരു ദശലക്ഷം പിന്നിട്ട വര്‍ഷമായിരുന്നു വിടപറഞ്ഞത്, എന്നാല്‍ ഇത് ഭാഷാസ്നേഹികളെക്കാള്‍ സന്തോഷിപ്പിച്ചത് ഐ.ടി തത്പരരെയായിരുന്നു. വെബ് 2.0 (web 2.0) എന്ന വാക്കിനെ ഭാഷയിലേക്ക് സ്വരുക്കൂട്ടികൊണ്ടായിരുന്നു ആംഗലേയ വാണി ഈ നാഴികക്കല്ല് പിന്നിട്ടത് എന്നത് മാത്രമല്ല, ഈയടുത്ത കാലത്ത് ഭാഷയിലേക്ക് എത്തുന്ന പദങ്ങള്‍ക്ക് മിക്കതിനും ഐ.ടി രുചിയുമുണ്ട്. ഗൂഗ്ലിംഗ്, വിക്കി കള്‍ച്ചര്‍ , നൂബ് (n00b), സെക്സ്ടിംഗ് (sexting), ക്ലൌഡ് കമ്പ്യൂട്ടിംഗ്, നെറ്റിസണ്‍ (netizen) എന്നിവ ഉദാഹരണം.

8. കമ്പ്യൂട്ടറിന്റെ അവിഭാജ്യഘടകമാണല്ലോ ഓ.എസ് എന്ന ചുരുക്കരൂപത്തില്‍ അറിയപ്പെടുന്ന ഓപ്പറേറ്റിംഗ് സിസ്റ്റം അഥവാ പ്രവര്‍ത്തക സംവിധാനം. കുത്തക വിപണിയും സ്വതന്ത്ര സോ‌ഫ്ട്‌വെയറുമായുള്ള താരതമ്യവും പഠനവും രാഷ്‌ട്രീയ സാമൂഹികരംഗത്തുള്ളവരുടെയും ശ്രദ്ധപതിയുന്ന രംഗമാണ്. 2009 ല്‍ മൈക്രോസോഫ്‌ടില്‍ നിന്ന് എറ്റവും പുതിയ പതിപ്പായ വിന്‍ഡോസ് 7 വിപണിയിലെത്തി, ഗ്നു/ലിനക്സ് ശ്രേണിയില്‍ നിന്ന് ഉബുണ്ടു 09.10 ഉം. സഹസ്രാബ്‌ദ പതിപ്പും വിസ്തയും നല്‍കിയ കയ്പ്പില്‍ നിന്ന് പാഠമുള്‍ക്കൊണ്ടാണ് മൈക്രോസോഫ്‌ട് പുതിയ താരത്തെ അണിയിച്ചൊരുക്കിയതെങ്കിലും, മലയാളം പോലുള്ള ചെറു പ്രാദേശിക ഭാഷകളെ മികവാര്‍ന്ന രീതിയില്‍ പിന്തുണയ്ക്കുന്നുവെന്നത് ഗ്നു/ലിനക്സ് അധിഷ്ഠിത സംവിധാനങ്ങളുടെ മേല്‍കൈയണന്നതിന് വര്‍ധിച്ച പ്രാദേശിക ഭാഷാ ഉപയോക്താക്കള്‍ തന്നെ സാക്ഷി. ഇതു കൂടാതെ മോസില്ല ഫയര്‍ഫോക്‍സ് വെബ്‌ബ്രൌസറിന്റെയും മലയാളം പതിപ്പ് 2009 ന്റെ പ്രിയപ്പെട്ട കരുതിവയ്പ്പായി. സ്വതന്ത്ര മലയാളം കമ്പ്യൂട്ടിംഗ് പ്രവര്‍ത്തകര്‍ക്ക് നന്ദി.

9. റെയില്‍‌വേ ടിക്കറ്റ് ബുക്കിംഗിനും അനുബന്ധ സേവനങ്ങള്‍ക്കുമായുള്ള ഐ.ആര്‍‌ .സി.ടി.സി (irctc) യുടെ വെബ്‌സൈറ്റ് മുന്‍‌വര്‍ഷങ്ങളിലില്ലാത്ത തിരക്കിന് വേദിയായി. അഞ്ച് കോടിരൂപയുടെ ഇടപാടാണ് ദിനം പ്രതി ഇന്ത്യന്‍ റെയില്‍‌വേയുടെ ഈ ഉപസ്ഥാപനം നടത്തുന്നത്. 15 ശതമാനം റെയില്‍ ടിക്കറ്റുകള്‍ വെബ്‌സൈറ്റ് വഴി ഉപയോക്താക്കള്‍ എടുക്കുന്നു എന്നത് എടുത്തുപറയേണ്ട നേട്ടമാണ്. 2002 ല്‍ തുടങ്ങിയ ഈ സേവനം പെട്ടെന്നാണ് ജനപ്രീയമായത് ഇന്ന് ടിക്കറ്റ് എടുക്കലിന് പുറമെ പാക്കേജ് ടൂര്‍ , ഹോട്ടല്‍ ബുക്കിംഗ് തുടങ്ങിയ സൌകര്യങ്ങളും എര്‍പ്പാടാക്കുന്നു. നാഷണല്‍ കോണ്‍ഫറന്‍സ് ഓണ്‍ ഇ-ഗവണന്‍സില്‍ ശ്രദ്ധേയ പ്രകടനത്തിനുള്ള പുരസ്‌കാരം ഈ വെബ്‌ അധിഷ്ഠിത സേവനത്തിനായിരുന്നു. ഉപയോക്താക്കള്‍ക്ക് വീട്ടിലിരുന്നോ അല്ലെങ്കില്‍ അക്ഷയ കേന്ദ്രം‌/ഇന്റര്‍നെറ്റ് കഫെ എന്നിവടങ്ങളില്‍ നിന്നോ നിമിഷങ്ങള്‍ കൊണ്ട് എതു സ്ഥലത്തു നിന്നും എതു സ്ഥലത്തേക്കുമുള്ള എത് ക്ലാസ് റെയില്‍ ടിക്കറ്റും കരസ്ഥമാക്കാം എന്നതാണ് ഈ വെബ്‌സൈറ്റിന്റെ പ്രത്യേകത.

10. സംസ്ഥാന സര്‍ക്കാരിന്റെ ഐ.ടി അറ്റ് സ്കൂള്‍ പദ്ധതിയായ സ്‌കൂള്‍ വിക്കി തുടങ്ങിയ വര്‍ഷം 2009 ആണ്. എല്ലാ വിദ്യാലയങ്ങളുടെയും സഹകരണത്തോടെ സൃഷ്ടിക്കുന്ന ഒരു വിദ്യാലായാധിഷ്ഠിതമായ വിജ്ഞാനകോശമാണ് സ്‌കൂള്‍ വിക്കി. സ്‌കൂളുകളുടെ ചരിത്രം, സ്ഥല പരിചയം, പൂര്‍വ വിദ്യാര്‍ത്ഥികള്‍, കായിക-കലാ നേട്ടങ്ങള്‍ തുടങ്ങിയ വിവരങ്ങള്‍ ഈ വെബ് സൈറ്റിലേക്ക് എല്ലാ സ്കൂളുകളും ഉള്‍പ്പെടുത്തും. ഈ വിവരശേഖരത്തിലേക്ക് ലേഖനങ്ങള്‍ എഴുതുവാനും, മിക്കവാറും എല്ലാ ലേഖനങ്ങളും തിരുത്തി എഴുതുവാനും ഏവര്‍ക്കും സ്വാതന്ത്ര്യവും സൗകര്യവും അനുവദിക്കുന്നുണ്ട്. ഒരു പക്ഷെ ലോകത്തിലെ തന്നെ എറ്റവും വലിയ വിദ്യാലയ വിക്കിയായി 2010 ല്‍ ഇത് മാറാന്‍ സാധ്യതയുണ്ട്. .ടി അറ്റ് സ്‌കൂള്‍ നിലവില്‍ കേരളത്തിലെ മുപ്പത് ലക്ഷം കൂട്ടികള്‍ക്ക് വിവരസാങ്കേതിക വിദ്യ പരിചയപ്പെടുത്തുകയും, അതോടൊപ്പം ഐ.സി.ടി ഉപയോഗിച്ചുള്ള പഠനം സാധ്യമാക്കുകയും ചെയ്യുന്നു. ബി.എസ്.എന്‍ .എല്‍ മായി സഹകരിച്ച് എല്ലാ ഹൈസ്കൂളുകളിലും ബ്രോഡ്ബാന്റ് ഇന്റര്‍നെറ്റ് സൗകര്യം നടപ്പിലായിട്ടുമുണ്ട്. ഈ വര്‍ഷം മുതല്‍ അഞ്ചാം ക്ലാസ് മുതല്‍ ഐ.ടി പഠനം ആരംഭിക്കുകയും ചെയ്തു. സമ്പൂര്‍ണമായി ഗ്നു/ലിനക്‍സ് അധിഷ്ഠിതമാണ് കേരള സര്‍ക്കാരിന്റെ ഈ സംരംഭം, ലോകത്തിലെ എറ്റവും വലിയ ഗ്നു/ലിനക്‍സ് അധിഷ്ഠിത വിദ്യാ‍ഭ്യാസ സൌകര്യവും ഇതാണന്നത് പദ്ധതിയുടെ തിളക്കം കൂട്ടുന്നു.

Saturday, November 07, 2009

ഉബുണ്ടു വിശേഷങ്ങള്‍

കംപ്യൂട്ടര്‍ പ്രവര്‍ത്തക സംവിധാന വിപണിയില്‍ ഇതുവരെ ഉണ്ടായിരുന്നത്‌ എറെക്കുറെ ആശയപരമായ മത്സരമായിരുന്നു. ഉബുണ്ടു ലിനക്‌സിന്റെ പുതിയ പതിപ്പിന്റെ വരവോടെ ആശയതലത്തിനൊപ്പംതന്നെ പ്രയോഗതലത്തിലും മറ്റേതു കുത്തക പ്രവര്‍ത്തക സംവിധാന (ഓപറേറ്റിങ്‌ സിസ്‌റ്റം) ത്തിനും ഒപ്പമോ അതിനു മേലെയോ സ്വതന്ത്രസോഫ്‌റ്റ്‌വെയറായ ലിനക്‌സ്‌ അധിഷ്‌ഠിത പ്രവര്‍ത്തകസംവിധാനങ്ങളെ പ്രതിഷ്‌ഠിക്കാമെന്നത്‌ കേവലം കൗതുകംമാത്രമല്ല, സ്ഥായിയായ മറുപടികൂടിയാണ്‌.
ഒട്ടനവധി ഗ്‌നു/ലിനക്‌സ്‌ സംവിധാനങ്ങള്‍ ഉണ്ടെങ്കിലും നിര്‍മിതിയുടെയും വിതരണത്തിന്റെയും പുതുക്കലിന്റെയും കാര്യത്തില്‍ ഉബുണ്ടു ഒരുപടി മുന്നിലാണെന്ന്‌ അനുഭവത്തിന്റെ വെളിച്ചത്തില്‍ വിദഗ്‌ധരെന്ന പോലെ സാധാരണക്കാരും പറയുന്നു. ഡെബിയന്‍ ഗ്നു/ലിനക്‌സിനെ അടിസ്ഥാനമാക്കിയാണ്‌ ഉബുണ്ടു നിര്‍മിച്ചിരിക്കുന്നത്‌. തുടര്‍ച്ചയായ നവീകരണവും സ്ഥിരതയുള്ള ഓപ്പറേറ്റിങ്‌ സിസ്‌റ്റവുമെന്ന ഖ്യാതി ഉബുണ്ടുവിനുണ്ട്‌. ഏറ്റവും പുതിയ പതിപ്പ്‌ ഈ വര്‍ഷം ഒക്ടോബര്‍ 29ന്‌ ഡൗണ്‍ലോഡിന്‌ സജ്ജമായി. ദക്ഷിണാഫ്രിക്കന്‍ സംരംഭകനായ മാര്‍ക്ക്‌ ഷട്ടില്‍വര്‍ത്തിന്റെ നേതൃത്വത്തിലുള്ള കനോനിക്കല്‍ ലിമിറ്റഡ്‌ എന്ന സ്ഥാപനമാണ്‌ ഉബുണ്ടുവിന്റെ പിന്നണിപ്രവര്‍ത്തനം നടത്തുന്ന്‌.

രണ്ടുതരത്തില്‍ ഈ നവീന ഓപ്പറേറ്റിങ്‌ സിസ്‌റ്റം കരസ്ഥമാക്കാം. ഒന്നാമത്തേതും ഏറ്റവും ഉചിതവുമായ മാര്‍ഗം http://ubuntu.com ല്‍നിന്ന്‌ ഡൗണ്‍ലോഡ്‌ ചെയ്‌തെടുക്കുക എന്നതാണ്‌. രണ്ടാമത്തെ മാര്‍ഗം http://shipit.ubuntu.com ല്‍ചെന്ന്‌ രജിസ്‌റ്റര്‍ചെയ്യുകയാണെങ്കില്‍ തപാല്‍മാര്‍ഗം സിഡി റോം കൈകളിലെത്തും.
ഉബുണ്ടു 9.10 ആണ്‌ നിലവിലുള്ള ഏറ്റവും പുതിയ പതിപ്പ്‌. ഇതിന്റെ പേര്‌ കാര്‍മിക്‌കോല എന്നറിയപ്പെടുന്നു. അടുത്ത പതിപ്പായ ലൂസിഡ്‌ ലിന്‍ക്‌സ്‌ (Lucid Lynx) 2010 ഏപ്രിലില്‍ പ്രവര്‍ത്തനത്തിനെത്തും. കനോനിക്കല്‍ ലിമിറ്റഡ്‌ എന്ന സ്ഥാപനം ലാഭേഛയില്ലാതെയാണ്‌ ഉബുണ്ടു വിതരണംചെയ്യുന്നത്‌. തുടര്‍സേവനവും സാങ്കേതികസഹായവും വന്‍കിട/വാണിജ്യ ഉപയോക്താക്കള്‍ക്കു നല്‍കി വരുമാനം ലക്ഷ്യമിടുന്നുണ്ട്‌. ഓരോ പതിപ്പിനും ഒന്നരവര്‍ഷത്തേക്ക്‌ പിന്തുണയും നല്‍കുന്നുണ്ട്‌.
ഉബുണ്ടു തത്ത്വചിന്ത എന്ന ദക്ഷിണാഫ്രിക്കന്‍ ശൈലിയില്‍നിന്നാണ്‌ ആശയം ഉരുത്തിരിഞ്ഞുവന്നത്‌. പരസ്‌പരബന്ധവും അന്യോന്യസ്‌നേഹവും സേവനസന്നദ്ധതയുമാണ്‌ ഇതിന്റെ മുഖമുദ്ര. `മറ്റുള്ളവരോടു കാട്ടേണ്ട മനുഷ്യത്വം' എന്നാണ്‌ ഉബുണ്ടു എന്ന വാക്കിന്റെ അകംപൊരുള്‍.

ഉബുണ്ടു 9.10ന്റെ എടുത്തുപറയേണ്ട പ്രത്യേകത അത്‌ കംപ്യൂട്ടറില്‍ ഇന്‍സ്‌റ്റാള്‍ചെയ്യാനുള്ള എളുപ്പമാണ്‌. ലിനക്‌സ്‌ അധിഷ്‌ഠിത ഓപ്പറേറ്റിങ്‌ സിസ്‌റ്റം നേരിട്ടിരുന്ന ഏറ്റവും വലിയ വെല്ലുവിളി ഇതായിരുന്നു. കംപ്യൂട്ടര്‍ നിരീക്ഷകരുടെ അഭിപ്രായം വിന്‍ഡോസ്‌ 7 നേക്കാള്‍ കുറഞ്ഞ മൗസ്‌ ക്ലിക്ക്‌ കൊണ്ട്‌ ഉബുണ്ടു 9.10 ഇന്‍സ്‌റ്റാള്‍ ചെയ്യാമെന്നാണ്‌. ആദ്യം ലൈവ്‌ സിഡി ഇട്ട്‌ പ്രവര്‍ത്തിപ്പിച്ചാല്‍ ഒരു ഫയലും സിസ്‌റ്റത്തിലേക്കു പകര്‍ത്താതെതന്നെ പുതിയ ഓപ്പറേറ്റിങ്‌ സിസ്‌റ്റം എങ്ങനെയുണ്ടെന്നു നോക്കാം. ഒപ്പം പുതിയ സംവിധാനത്തിനുവേണ്ട ഹാര്‍ഡ്‌വെയര്‍ശേഷി, മറ്റു ഹാര്‍ഡ്‌വെയറുകള്‍ക്ക്‌ ആവശ്യമായ ഡ്രൈവര്‍ ഫയല്‍ എന്നിവയും ഉണ്ടോയെന്ന്‌ പരിശോധിക്കുകയും ആകാം. പുതിയ പതിപ്പിന്റെ അടുത്ത പ്രത്യേകത ഇന്റല്‍ ആറ്റം ശ്രേണിയിലുള്ള ചെറു കംപ്യൂട്ടറുകള്‍ക്കുവേണ്ടിയുള്ള സവിശേഷ പതിപ്പാണ്‌. UNR അഥവാ ഉബുണ്ടു നെറ്റ്‌ബുക്ക്‌ റീമിക്‌സ്‌ എന്നാണ്‌ ഈ പ്രത്യേക ഓപ്പറേറ്റിങ്‌ സിസ്‌റ്റം അറിയപ്പെടുന്നത്‌. പുതിയ പതിപ്പിനൊപ്പമുള്ള `ഉബുണ്ടു സോഫ്‌റ്റ്‌വെയര്‍ സെന്റര്‍' പലവിധ അപ്ലിക്കേഷന്‍ സോഫ്‌റ്റ്‌വെയറുകളെ എളുപ്പത്തില്‍ കൈകാര്യംചെയ്യാന്‍ അനുവദിക്കുന്നു. ഇതുവഴി ലിനക്‌സ്‌ അധിഷ്‌ഠിതരീതിയില്‍ പരിചയമില്ലാത്തവര്‍ക്കും എളുപ്പത്തില്‍ ഓപ്പറേറ്റിങ്‌ സിസ്‌റ്റം നടപടികളുമായി ഇണങ്ങാനാകും.

കഴിഞ്ഞവര്‍ഷം നടത്തിയ ഒരു പഠനത്തില്‍ ഉബുണ്ടു സെര്‍വറും പിസി എഡിഷനും ഏറ്റവും കൂടുതല്‍ വ്യാപകമാകുന്നത്‌ ഇന്ത്യയിലെന്നായിരുന്നു റിപ്പോര്‍ട്ട്‌. ഇത്‌ പുതിയ പതിപ്പിന്റെ കാര്യത്തിലും കൂടുതല്‍ ശരിയാകാനാണ്‌ സാധ്യത. പദ്‌മ പോലുള്ള ആഡ്‌ഓണുകള്‍ മലയാളം വിനിമയത്തെയും സുഗമമാക്കും. ഇന്റര്‍നെറ്റ്‌ ബ്രൗസിങ്ങിന്റെ കാര്യത്തില്‍ മോസില്ല ഫയര്‍ഫോക്‌സ്‌ ഇതിനോടകം വിന്‍ഡോസില്‍ അടക്കം വിജയമായത്‌ ഉബുണ്ടുവിലേക്ക്‌ എത്തുന്ന ഇന്റര്‍നെറ്റ്‌ ഉപയോക്താക്കള്‍ക്ക്‌ എളുപ്പമാണ്‌. ഓഫീസ്‌ കാര്യത്തിനായി ഓപ്പണ്‍ ഓഫീസ്‌ ഡോട്ട്‌ ഒര്‍ഗും ലഭ്യമാക്കിയിട്ടുണ്ട്‌.

സാധാരണയായി ഉബുണ്ടുവില്‍ ജിനോം ഡെസ്‌ക്‌ ടോപ്‌ ആണുള്ളത്‌. ഇതിനുപകരം KDE ഉപയോഗിക്കുന്ന Kubuntu, വിദ്യാഭ്യസ അപ്ലിക്കേഷനുകളുള്ള എഡ്യുഉബുണ്ടു (Eduubuntu), മള്‍ട്ടിമീഡിയ എഡിറ്റിങ്ങും നിര്‍മാണവും സാധ്യമാക്കുന്ന ഉബുണ്ടു സ്‌റ്റുഡിയോ എന്നിവയും ഇതിന്റെ ഭാഗമാണ്‌.

Saturday, October 31, 2009

വിന്‍ഡോസ്‌ ഏഴും ഉബുണ്ടു ലിനക്‌സും

2009 ഒക്ടോബര്‍ ഓപ്പറേറ്റിങ്‌ സിസ്‌റ്റം വിപണിയില്‍ കാര്യമായ ചലനമുണ്ടാക്കിയ മാസമായാണ്‌ രേഖപ്പെടുത്താന്‍ പോകുന്നത്‌. കുത്തക(പ്രൊപ്രൈറ്ററി) സോഫ്‌റ്റ്‌വെയര്‍ രംഗത്തെ വമ്പന്‍മാരായ മൈക്രോസോഫ്‌റ്റ്‌ കുടുംബത്തില്‍നിന്നുള്ള ഏറ്റവും പുതിയ പ്രവര്‍ത്തക സംവിധാനം (Operating System) ഇക്കഴിഞ്ഞ വാരമാണ്‌ വിപണിയിലെത്തിയതെങ്കില്‍ സ്വതന്ത്ര സോഫ്‌റ്റ്‌വെയര്‍ കൂട്ടായ്‌മയില്‍നിന്നുള്ള മറുപടി ഉബുണ്ടു (Ubuntu 9.10) ഇക്കഴിഞ്ഞ ദിവസം(ഒക്ടോബര്‍ 22ന്) ഔദ്യോഗികമായി ഇന്റര്‍നെറ്റില്‍ എത്തി‌.

ഇത്തരത്തിലൊരു വലിയമാറ്റം കംപ്യൂട്ടര്‍ വിപണിയില്‍ സംഭവിക്കുമ്പോള്‍ സാധാരണ ഉപയോക്താക്കളും വാണിജ്യ-സര്‍ക്കാര്‍ ഉപയോക്താക്കളും പുതിയ പതിപ്പിലേക്ക്‌ മാറുന്നതിനെപ്പറ്റി ചിന്തിക്കാതിരിക്കില്ല. സാങ്കേതികവിദ്യയുടെ പുതുമയും ചിലപ്പോള്‍ നമുക്കാവശ്യമില്ലാത്ത ആപ്ലിക്കേഷ
നുകളുടെ ബാഹുല്യവും ആകും കൗതുകത്തിന്റെ പേരിലെങ്കിലും ഒരു മാറ്റത്തിന്‌ നമ്മെ പ്രേരിപ്പിക്കുന്നത്‌. ഓരോ പുതിയ പതിപ്പും ഒട്ടേറെ സവിശേഷതകളും മേന്മകളുടെ വാര്‍ത്തയും പേറിയാകും കടന്നുവരുന്നത്‌. മാറ്റം എന്നു പറയുമ്പോള്‍ വിന്‍ഡോസ്‌ 7 പോലുള്ളവയെ സംബന്ധിച്ചിടത്തോളം സാമ്പത്തിക മുതല്‍മുടക്കുകൂടിയാണ്‌. ഇത്‌ സോഫ്‌റ്റ്‌വെയര്‍ വാങ്ങാനുള്ള ധനവ്യയം മാത്രമല്ല, ചില അവസരങ്ങളില്‍ ഹാര്‍ഡ്‌വെയര്‍ശേഷി ഉയര്‍ത്താനുള്ള പണച്ചെലവുകൂടിയാകും.

ഏതായാലും ഓപ്പറേറ്റിങ്‌ സിസ്‌റ്റമോ അല്ലെങ്കില്‍ ഏതെങ്കിലും ആപ്ലിക്കേഷനോ പുതുതായി വാങ്ങുന്നതിനുമുമ്പ്‌ മൂന്നു കാര്യങ്ങള്‍ വിലയിരുത്തുക.
1. ഒരു അപ്‌ഗ്രേഡിങ്ങിന്‌ നിര്‍ബന്ധിക്കുന്ന ഗുണഗണങ്ങള്‍ നിര്‍ദിഷ്ട സോഫ്‌റ്റ്‌വെയറിന്‌ ഉണ്ടോ?
2. നിലവിലെ പ്രവര്‍ത്തനത്തിന്റെ കാര്യക്ഷമത ഉയര്‍ത്താന്‍ ഇതിനാകുമോ?
3. പുതിയതിന്റെ ചെലവ്‌ സ്ഥാപനത്തിനോ അല്ലെങ്കില്‍ വീട്ടാവശ്യത്തിനോ താങ്ങാനാവുന്നതാണോ?
4. ഹാര്‍ഡ്‌വെയര്‍ശേഷി ഇ
പ്പോഴുള്ളത്‌ പുതിയ സോഫ്‌റ്റ്‌വെയറിന്‌ പര്യാപ്‌തമാണോ?
5. അവസാനമായി ഈ പുതിയ അപ്‌ഗ്രേഡിങ്‌/വാങ്ങല്‍ നടത്തിയവരുടെ അഭിപ്രായം ശേഖരിക്കുക.
മിക്കയിടങ്ങളിലും ഇന്റര്‍നെറ്റ്‌ ഉപയോഗം, ഓഫീസ്‌ പാക്കേജ്‌ ഉപയോഗം എന്നിവ മാത്രമാണ്‌ കംപ്യൂട്ടര്‍കൊണ്ട്‌ ചെയ്യുന്ന ജോലി. ഇതിനു മാത്രമായി ഒരു അപ്‌ഗ്രേഡിങ്‌ വേണമോ എന്ന്‌ ചിന്തിക്കുക. ഉദാ: മൈക്രോസോഫ്‌റ്റ്‌ ഓഫീസിന്റെ ഏറ്റവും പുതിയ പതിപ്പ്‌ (.docx, .xlsx) പഴയ എംഎസ്‌ ഓഫീസ്‌ പാക്കേജില്‍പ്പോ
ലും തുറക്കാനാകുന്നില്ല. ഇത്‌ പലയിടങ്ങളിലും നിലവില്‍ പ്രായോഗിക പ്രശ്‌നങ്ങള്‍ സൃഷ്ടിക്കുന്നുണ്ട്‌. .doc, .xls
ആയി സേവ്‌ ചെയ്‌ത്‌ പ്രശ്‌നം പരിഹരിക്കാമെങ്കിലും ഇത്‌ സാധാരണക്കാര്‍ക്കെങ്കിലും പ്രായോഗിക ന്യൂനതയായി കടന്നുവരുന്നുണ്ട്‌.

വിന്‍ഡോസ്‌ 7: മൈക്രോസോഫ്‌റ്റില്‍നിന്നുള്ള ഏഴാംനമ്പര്‍ അവതാരത്തെ കൂടുതല്‍ പ്രതീക്ഷകളോടാണ്‌ ആരാധകര്‍ നോക്കുന്നത്‌. ആറാം തമ്പുരാന്‍ (വിസ്‌ത) ദയനീയമായി തകര്‍ന്നടിഞ്ഞതിന്റെ കാരണം അതിന്റെ സാങ്കേതിക പോരായ്‌മയായിരുന്നു. ഒപ്പം സാമ്പത്തിക മാന്ദ്യം വിപണിയെ പിടിച്ചുലച്ചതും മൈ
ക്രോസോഫ്‌റ്റ്‌ മോഹങ്ങള്‍ക്ക്‌ തിരിച്ചടിയായത്രേ. അതുകൊണ്ട്‌ വിന്‍ഡോസ്‌ Xp യില്‍ത്തന്നെ പറ്റിച്ചേര്‍ന്നു നില്‍ക്കാനായിരുന്നു സ്ഥാപനങ്ങള്‍ക്ക്‌ താല്‍പ്പര്യം. അതിനാല്‍ മിക്കയിടങ്ങളും വിന്‍ഡോസ്‌ ഏഴിലേക്ക്‌ കൂടുമാറും എന്നാണ്‌ അനുമാനിക്കാവുന്നത്‌. ലോകത്തിലെ ഏറ്റവും വലിയ ഓണ്‍ലൈന്‍ പുസ്‌തക-സോഫറ്റ്‌വെയര്‍ വില്‍പ്പനശാലയായ ആമസോണ്‍ ഡോട്ട് കോമില്‍ വിന്‍ഡോസ്‌ 7 ബുക്ക്‌ ചെയ്‌തവരുടെ എണ്ണം സര്‍വകാല റെക്കോഡാണ്‌. ആമസോണിന്റെ വില്‍പ്പന ചരിത്രത്തിലെ ഏറ്റവും വലിയ ഇടപാട്‌ ഹാരിപോട്ടര്‍ ആന്‍ഡ്‌ ദ ഡെത്തി ഹാലോസ്‌ (Harrypotter and the deathy hallows by J K Rowling) എന്ന ബെസ്‌റ്റ്‌ സെല്ലര്‍ പുസ്‌തകമായിരുന്നു. ഇതാണ്‌ വിന്‍ഡോസ്‌ ഏഴ്‌ തിരുത്തിയെഴുതിയത്‌. വിസ്‌തയുടെ അതേ അകക്കാമ്പ്‌ (Kernal) ഉപയോഗിച്ചാണ്‌ വിന്‍ഡോസ്‌ ഏഴും തയ്യാറാക്കിയിരിക്കുന്നത്‌. കാല്‍കുലേറ്റര്‍, പെയിന്റ്‌ തുടങ്ങിയ ജനപ്രിയ ആപ്ലിക്കേഷനുകളില്‍ മൈക്രോസോഫറ്റ്‌ ഇതുവരെ ശ്രദ്ധവെച്ചിട്ടില്ലായിരുന്നു. എന്നാല്‍ ഏഴില്‍ തോല്‍ക്കാതിരിക്കാന്‍ ഇത്തരം ചെറുകാര്യങ്ങളില്‍പ്പോലും സൂക്ഷ്‌മത പുലര്‍ത്തിയിട്ടുണ്ട്‌ എന്നത്‌ ശ്രദ്ധേയമാണ്‌. വിന്‍ഡോസ്‌ സഹസ്രാബ്ദ (Me) പതിപ്പും വിസ്‌തയും പരാജയപ്പെട്ടതുപോലെയായിരിക്കില്ല അഥവാ വിന്‍ഡോസ്‌ ഏഴ്‌ പരാജയപ്പെട്ടാല്‍ സംഭവിക്കുന്നതെന്ന്‌ മൈക്രോസോഫ്‌റ്റിന്‌ നല്ല നിശ്‌ചയമുണ്ട്‌, പ്രത്യേകിച്ചും ഗൂഗിള്‍ക്രോമും വിവിധ ലിനക്‌സ്‌ അധിഷ്‌ഠിത പ്രവര്‍ത്തക സംവിധാനങ്ങളും ഒരു നല്ല യുദ്ധത്തിന്‌ പോര്‍മുന മിനുക്കുന്ന പശ്‌ചാത്തലത്തില്‍.

ഉബുണ്ടു 9.10 എത്തിപ്പോയ്
വിന്‍ഡോസ്‌ ഏഴിന്റെ വരവ്‌ ഉബുണ്ടുവിന്‌ പരസ്യമായോ? എന്ന്‌ ചോദിച്ചാല്‍ അതെ ഉത്തരം പറയാമെന്ന്‌ സെര്‍ച്ച്‌ എന്‍ജിന്‍ വാക്കുകളുടെ വിശകലനം സൂചിപ്പിക്കുന്നു. ഇക്കഴിഞ്ഞയാഴ്‌ച വിന്‍ഡോസിനൊപ്പം ഉപയോക്താക്കള്‍ ഗൂഗിളില്‍ തെരഞ്ഞ വാക്കുകൂട്ടങ്ങള്‍ ഇതൊക്കെയാണ്‌. 'Linux Vs Windows7', 'Ubuntu Vs Windows7'. ഇതുമാത്രമല്ല, വിന്‍ഡോസ്‌ 7 പുറത്തിറങ്ങി മണിക്കൂറുകള്‍ക്കുള്ളില്‍ത്തന്നെ ചില ലിനക്‌സ്‌-വിന്‍ഡോസ്‌ താരതമ്യപഠനങ്ങളിലേക്കുള്ള ട്രാഫിക്‌ 400 ശതമാനം വര്‍ധിച്ചുവെന്നതും എടുത്തുപറയേണ്ട വസ്‌തുതയാണ്‌. ഒരുപക്ഷേ, വിസ്‌തയില്‍ കൈപൊള്ളിയ അനുഭവമാകാം ഒ
രു തീരുമാനമെടുക്കുന്നതിനുമുമ്പ്‌ വിശദമായ പഠനത്തിനും മനനത്തിനും ഉപയോക്താക്കളെ പ്രേരിപ്പിക്കുന്നത്‌.
ലിനക്‌സ്‌ അധിഷ്‌ഠിത ജനപ്രിയ ഓപ്പറേറ്റിങ്‌ സിസ്‌റ്റത്തിന്റെ ഏറ്റവും പുതിയ പതിപ്പ്‌ ഉബുണ്ടു 9.10 (രണ്ടായിരത്തി ഒമ്പത്‌ പത്താംമാസം! എന്ന്‌ പൂര്‍ണരൂപം) വ്യാഴാഴ്‌ച മുതല്‍ സൗജന്യമായി ഉപയോഗത്തിന്‌ തയ്യാര്‍ എന്നത്‌ പലതുകൊണ്ടും ശ്രദ്ധേയമാണ്‌.
ഒരു താരതമ്യപഠനത്തിന്‌ മുതിരുകയാണെങ്കില്‍ ഉബുണ്ടുവിന്റെ പഴയപതിപ്പ്‌ (9.04) പോലും വിന്‍ഡോസ്‌ 7നേക്കാള്‍ മേലെയാണെന്ന്‌ കാണാം. https://shipit.ubuntu.com/ ചെന്ന്‌ രജിസ്‌റ്റര്‍ ചെയ്‌താല്‍ സൗജന്യമായി നമ്മുടെ വീട്ടില്‍ തപാല്‍മാര്‍ഗം ഉബുണ്ടു എത്തുകയും ചെയ്യും. ഉബുണ്ടുവിന്റെ 11-മത് പതിപ്പാണ്‌ ഇപ്പോള്‍ വിപണിയിലെത്തുന്നത്‌. സാധാരണയായി എ
ല്ലാ ഏപ്രില്‍, ഒക്ടോബര്‍ മാസമാണ്‌ പുതിയ അവതാരങ്ങള്‍ ഉബുണ്ടുവില്‍ ജന്മമെടുക്കുന്നതെന്നു പറയാം. അടുത്ത പതിപ്പ്‌ (10.4). 2010 ഏപ്രില്‍ അവസാനം ഇന്റനെറ്റില്‍ എത്തും. വിന്‍ഡോസ്‌ ഏഴ്‌ ഇന്‍സ്‌റ്റാള്‍ ചെയ്യാന്‍ കംപ്യൂട്ടര്‍ ഹാര്‍ഡ്‌ഡിസ്‌ക്കില്‍ ഏഴുമുതല്‍ 11 ജിബിവരെ ഓര്‍മ്മപ്പുര (മെമ്മറി സ്ഥലം) ആവശ്യമാണെങ്കില്‍ ഉബുണ്ടുവിന്‌ ഇരുപ്പുറപ്പിക്കാനായി കേവലം മൂന്നു ജിബിയില്‍ താഴെമതി. ചെറിയ സ്‌ക്രീന്‍ വലുപ്പമുള്ള, നെറ്റ്‌ ബുക്‌ ശ്രേണിക്കു വേണ്ടിയുള്ള പരിഷ്‌കരിച്ച നെറ്റ്‌ ബുക റീമിക്‍സും ഉബുണ്ടു 9.10ന്റെ പ്രത്യേകതയാണ്‌. മലയാളം അടക്കമുള്ള പ്രാദേശികഭാഷകളെ നിലവില്‍ത്തന്നെ മികച്ചരീതിയില്‍ ഉബുണ്ടുപതിപ്പുകള്‍ പിന്തുണയ്‌ക്കുന്നുണ്ട്‌.

ഒരു താരതമ്യ പട്ടിക ഇതാ. വ്യക്തമായി കാണാന്‍ ചിത്രത്തില്‍ ക്ലിക്ക് ചെയ്തോളൂ

















*****

ചില വിവരങ്ങള്‍ക്കും ചിത്രത്തിനും പിസി ക്വസ്‌റ്റ്‌ കമ്പ്യൂട്ടര്‍ മാസികയോട്‌ കടപ്പാട്‌

വന്‍‌മരങ്ങള്‍ വീഴുമ്പോള്‍: ഇന്ദിരാജിയില്ലാത്ത കാല്‍‌നൂറ്റാണ്ട്

മുന്‍ പ്രധാനമന്ത്രി ഇന്ദിരാഗാന്ധി കൊല്ലപ്പെട്ടിട്ട് ഇരുപത്തിയഞ്ചാണ്ട് തികയുന്ന വേളയില്‍ ഇന്ദിരയില്ലാത്ത കാല്‍നൂറ്റാണ്ട് എങ്ങനെയായിരുന്നു എന്ന് നോക്കുന്നത് കൌതുകരമെങ്കിലും ആകാതിരിക്കില്ല.
ഒന്നില്‍ പഠിക്കുമ്പോള്‍ ഒരു ദിവസം ക്ലാസില്‍ പതിവില്ലാത്ത ഒരു മാറ്റം അനുഭവപ്പെട്ടത് ഓര്‍മ്മയുണ്ട്, ട്യൂഷന്‍ ക്ലാസിലെ ടീച്ചര്‍മാരെല്ലാം കൂട്ടം കൂടി നിന്ന് എന്തോ അടക്കം പറയുന്നു. പുറത്തെ നിരത്തുകളില്‍ ഒരു തരം ശൂന്യത. പിന്നെ ഞങ്ങളോടെല്ലാം വീട്ടിലേക്ക് പൊയ്ക്കോളാന്‍ പറഞ്ഞു, സാധാരണ നേരത്തേ ക്ലാസ് അവസാനിപ്പിച്ചാല്‍ സന്തോഷത്തൊടെ കൂട്ടുകാരെല്ലാം പുറത്തേക്ക് ഓടുന്നത് . എന്നാല്‍ ആരാണ് മരിച്ചതെന്നോ അല്ലെങ്കില്‍ പ്രധാനമന്ത്രിയെന്നാല്‍ എന്താണന്ന് പോലും അറിയാത്ത ഞങ്ങളെ പുറത്തെ ഒരു തരം സ്മശാനമൂകത ബാധിച്ചിരുന്നു. വീട്ടിലെത്തിയ ഉടനെ എല്ലാരും റേഡിയോയ്ക്ക് കാതുകൂര്‍പ്പിച്ചിരിക്കുന്നതും പിന്നെ പിറ്റേന്നത്തെ പത്രത്തില്‍ പതിവില്‍ കൂടുതല്‍ കറുപ്പുനിറത്തില്‍ വാക്കുകള്‍ നിറച്ചതും ഒപ്പമുള്ള ഫോട്ടോയും ചെറിയ ഓര്‍മ്മയുണ്ട്. രണ്ട് അംഗരക്ഷകര്‍ വെടിവെച്ചതാണന്നും അത് സിഖ് കാരെന്നും പിന്നീടറിഞ്ഞു.
ഹൈസ്കൂള്‍ ക്ലാസില്‍ ഹിസ്റ്ററി പഠിപ്പിച്ച അധ്യാപകന്‍ അല്പസ്വല്പം കെ എസ് യു ടച്ച് ഉള്ള ആളായതിനാല്‍ ഇന്ദിരയുടെ ഭരണനേട്ടങ്ങള്‍(പ്രിവി പഴ്സ് നിര്‍ത്തലാക്കിയത്, ബാങ്ക് ദേശസാല്‍ക്കരണം,ബംഗ്ലാദേശ് രൂപികരണം, ഗരീബി ഹഠാവോ...) പൊലിപ്പിച്ചു തന്നെ അവതരിപ്പിച്ചപ്പോള്‍ ഇത്ര നല്ല അമ്മൂമ്മയെ ആണല്ലോ കൊന്നത് എന്ന് സംശയിക്കാതിരുന്നില്ല.
പിന്നീട് പതിയെ അടിയന്തിരാവസ്ഥ, കോടതി വിധികള്‍, ജയ്പ്രകാശ് നാരായണന്‍ ഒക്കെ വായിച്ചപ്പോള്‍ ഇന്ദിരാ അമ്മൂമ്മയെ ചെറുതായി ഇഷ്ടപ്പെടാതിരിക്കാനും തുടങ്ങി.
1977 മാര്‍ച്ചിന് ശേഷം മൂന്ന് വര്‍ഷം ജനതാ പരിവാര്‍ പരീക്ഷണത്തിന് ജനം നിന്നുകൊടുത്ത സമയം ഞങ്ങളൊക്കെ അറിയാനും പഠിക്കാനും തുടങ്ങിയ സമയത്ത് വി.പി സിംഗ്,ചന്ദ്രശേഖര്‍, ഉപന്‍ ദേവിലാല്‍ എന്നിവര്‍ ഭാരതദേശത്തിന്റെ നിര്‍ണായക സ്ഥാനത്ത് ഇരിക്കുന്നതും വര്‍ധിച്ച സന്തോഷത്തോടെയാണ് കണ്ടത്. വടകരയില്‍ നിന്നുള്ള കെ.പി ഉണ്ണികൃഷ്‌ണന്‍ ഉപരിതല ഗതാഗതമന്ത്രിയായത് ഒരു നേട്ടമായി കണ്ട നാളുകള്‍, എം ജി കെ മേനോന്‍ എന്ന ശാസ്ത്രജ്ഞന്‍ വരെ മന്ത്രിപദത്തില്‍. ആകെ ഒരു മാറ്റത്തിന്റെ ദിശ.
പക്ഷെ വഴക്കും വക്കാണവും അധികാരത്തെ പഴയ ഇടത്തേക്ക് തന്നെ സഞ്ചരിപ്പിച്ച് തുടങ്ങിയ സമയത്താണ് രാജീവ് ഗാന്ധിയും രാഷ്‌ട്രീയക്കളത്തില്‍ കൊല്ലപ്പെടുന്ന വാര്‍ത്തയെത്തുന്നത്. ശ്രീപെരും‌പുത്തൂര്‍ എന്ന സ്ഥലം ഓര്‍മ്മയില്‍ ഇടം നേടിയത് ഒരു പക്ഷെ ഇതു കൊണ്ടായിരിക്കണം.
*****
എന്‍ എസ് മാധവന്റെ രണ്ട് കഥകള്‍ കോണ്‍ഗ്രസ് പാര്‍ട്ടിയുടെ രണ്ട് വീഴ്ചകളുമായി(വന്‍‌മരങ്ങള്‍ വീഴുമ്പോള്‍, തിരുത്ത്) ബന്ധമുണ്ടായത് രസകരമാണ്.
വന്‍ മരങ്ങള്‍ വീഴുമ്പോള്‍ എന്ന കഥയില്‍ നിന്ന് “കാവല്‍ക്കാരന്‍ ഗൂര്‍ഖ മഠത്തിന്റെ ഇരുമ്പുഗേറ്റുകള്‍ ചങ്ങലയിട്ട് പൂട്ടി അകത്തിരുന്നു. .....ക്ലോക്ക് ടവര്‍ ചൌക്കിലെ സര്‍ദാര്‍ ജി ക്കടകള്‍ അപ്പാടെ നശിച്ചു. മെയിന്‍ റോഡില്‍ സര്‍ദാര്‍ജിമാരുടെ ടാക്സികള്‍ ബഹളക്കാര്‍ മറിച്ചിട്ട് തീവച്ചു. സദര്‍ ബസാറിലേക്ക് പോകുന്ന വഴിയില്‍ സര്‍ദാര്‍ജിമാരുടെ ശവശരീരങ്ങള്‍ കാണാം....രാത്രി മുഴുവന്‍ വെടിയൊച്ച കേള്‍ക്കാമായിരുന്നു.”


*****
ഇന്ദിര ഉണ്ടായിരുന്നുവെങ്കില്‍ എങ്ങെനെയാകുമായിരുന്നു കോണ്‍ഗ്രസും ഇന്ത്യാചരിത്രവും.

സാം‌പത്രോദ സി.ഡോട്ട് എക്സേഞ്ചുമായി ഇത്ര വ്യാപകമായി എത്തുമായിരുന്നോ. ബോബോഴ്സ് അഴിമതി ഉണ്ടാകുമായിരുന്നോ (ഇപ്പോഴും പ്രതിരോധ അഴിമതി സാര്‍വത്രികമാണല്ലോ അറയ്ക്കപറമ്പില്‍ കുര്യന്‍ ആന്റണി അറിയുന്നില്ല അല്ലെങ്കില്‍ ആന്റണിയുടെ ശുഭ്രവസ്ത്രത്തിന്റെ മറയില്‍ നമ്മള്‍ കാണുന്നില്ല! ). ബോബോഴ്സ് വള്ളിയില്‍ പിടിച്ച് വി.പി സിംഗും സംഘവും ശക്തിയാര്‍ജിക്കുന്നത് എത് തരത്തിലാകും ഇന്ദിരാജി കാണുകയും കൈകാര്യം ചെയ്യുന്നതും.
ഭാ.ജ.പയും വാജ്പെയ് അദ്വാനിമാരും ഇങ്ങനെയെത്തുമായിരുന്നോ. ഇന്ദിരയുടെ മരണത്തിന് എതാനും വര്‍ഷം മുന്നെ ഭാ ജ പാ പിച്ച വെയ്ക്കാന്‍ തുടങ്ങിയിരുന്നല്ലോ.
മകന്‍ രാജീവിന് ശ്രീലങ്കന്‍ പട്ടാളത്തിന്റെ തോക്ക് തോണ്ടല്‍ കിട്ടിയ സ്ഥാനത്ത് അമ്മയായിരുന്നെങ്കിലോ.
ബാബറി മസ്ജിദ് പ്രദേശം എങ്ങനെ കൈകാര്യം ചെയ്യുമായിരുന്നു. പഞ്ചാബിലെ ഇന്ദിരയുടെ അടുത്തനീക്കം എന്താകുമായിരിക്കും.
ഒരു പക്ഷെ ബി.ജെ.പി എന്‍‌ട്രി പഞ്ചാബ് വഴിയാകുമായിരുന്നു അല്ലേ.
പുത്തന്‍ തലമുറ സ്വകാര്യ ബാങ്കുകള്‍ ഭാരതത്തിന്റെ മണ്ണിലെത്തുമായിരുന്നോ. കാര്‍ഗില്‍ യുദ്ധം എങ്ങനെയാകും അവസാകിക്കുക.

ജവര്‍ഹര്‍ ലാല്‍ നെഹ്‌റുവില്‍ നിന്ന് ഇന്ദിരയിലേക്ക് ഉള്ള ദൂരമായിരുന്നോ ഇന്ദിരയില്‍ നിന്ന് രാജീവിലേക്ക്.....

Monday, October 12, 2009

വീഡിയോ പങ്കുവയ്ക്കല്‍ ആവേശത്തോടെ മുന്നോട്ട്

ന്റര്‍നെറ്റിലൂടെ വീഡിയോ പങ്കുവയ്ക്കുന്നത് ഇന്ന് ഓണ്‍ലൈന്‍ ഇടം എന്നതിലുപരിയായി ഒരു ബദല്‍ ടി.വി ചാനലായോ അല്ലെങ്കില്‍ എണ്ണമറ്റ ചെറു വീഡിയോ ചിത്രങ്ങള്‍ സൂക്ഷിച്ചിരിക്കുന്ന മെഗാ സിനിമാപ്പുരയോ ആയി മാറിക്കഴിഞ്ഞു. വീഡിയോ സൂക്ഷിക്കുകയും പങ്കുവയ്ക്കുകയും ചെയ്യുന്നത് ജനകീയമാക്കിയത് ഗൂഗിളിള്‍ കുടുംബാഗമായ യൂടൂബാണ്. യഥാര്‍ത്ഥത്തില്‍ ഗൂഗിള്‍ വീഡിയോ എന്ന സേവനം നേരത്തേ തന്നെ ഗൂഗിള്‍ തുടങ്ങിയിരുന്നു പക്ഷെ ഇത് അത്ര ജനപ്രീതി നേടാന്‍ സാധ്യതയില്ലന്ന തിരിച്ചറിവാകണം എറ്റെടുക്കല്‍ കാര്‍ഡ് ഇറക്കാന്‍ ഗൂഗിള്‍ തീരുമാനിച്ചത്. ഇതിന്റെ ഫലമായി യൂട്യൂബ് എന്ന സേവനത്തെ തൊട്ടടുത്ത വര്‍ഷം നവംബറില്‍ മോഹവില നല്‍കി ഗൂഗിള്‍ സ്വന്തമാക്കി.

2005 ഡിസംബറിലാണ് യൂട്യൂബ് സ്ഥാപിതമായത്. എറ്റെടുത്തശേഷം ഒരു ഗൂഗിള്‍ ഉപകമ്പനി (സബ്സിഡയറി) ആയി തുടരാനനുവദിച്ചത് ഒരു പക്ഷെ കൂടുതല്‍ വളര്‍ച്ചയ്ക്ക് കാരണമായി എന്ന് പിന്നീടുള്ള ചരിത്രം തന്നെ സാക്ഷി. ഇന്ന് ദിനം തോറും ശതകോടി മൌസ് ക്ലിക്കുകളാണ് യൂട്യൂബിനെ തേടിയെത്തുന്നത്. വെബ്‌സൈറ്റ് നിരീക്ഷകരായ അലക്‍സാ ഡോട്ട് കോമിന്റെ പുതിയ റാങ്കിങ്ങില്‍ നാലാം സ്ഥാനമാണ് ഈ വീഡിയോപ്പുരയ്ക്ക്, മാത്രമോ ദിനം തോറും മൊത്തം ഇന്റര്‍നെറ്റ് ഉപയോക്താക്കളുടെ ഇരുപത് ശതമാനത്തോളം യൂ ട്യൂബ് വഴി വരാറുണ്ടത്രേ. ഗൂഗിള്‍, യാഹൂ, ഫേസ് ബുക്ക് എന്നിവയാണ് ആദ്യ മൂന്ന് സ്ഥാനങ്ങളില്‍.

12 ദശലക്ഷം ഡോളറിന്റെ പ്രാരംഭമുതല്‍ മുടക്കുമായി സ്റ്റീവ് ചിന്‍, ചഡ് ഹര്‍ലി, ജാവേദ് കരീം എന്നീ മൂന്ന് ചെറുപ്പക്കാര്‍ തുടങ്ങിയ ഈ സ്ഥാപനം ഇങ്ങനെ സംഭവബഹുലമാകുമെന്ന് അവര്‍പോലും കരുതിയിട്ടുണ്ടാകില്ല. 2006 ഒക്ടോബര്‍ ഒന്‍പതാം തീയതി 1.65 ശതകോടി (1650ദശലക്ഷം) യു.എസ് ഡോളറിന്റെ ഓഹരി വിനിമയത്തിലൂടെയാണ് ഗൂഗിള്‍, യൂട്യൂബിനെ സ്വന്തമാക്കാന്‍ തീരുമാനിച്ചത്. നവംബറില്‍ ഔദ്യോഗികമായ എറ്റെടുക്കല്‍ ചട്ടങ്ങള്‍ പൂര്‍ത്തിയാല്ക്കി. മൂന്ന് വര്‍ഷം തികയുന്നവേളയില്‍ ഗൂഗിളിന്റെ വിപണി നീക്കം നൂറ് ശതമാനം ശരിയാണന്നതിന് വര്‍ധിച്ച ജനപ്രീതി തന്നെ സാക്ഷ്യം. ഇടയ്ക്ക് യുട്യൂബ് ഗൂഗിളിന് നഷ്‌ടം വരുത്തി വയ്ക്കുന്നു എന്ന വര്‍ത്തമാനം ഉണ്ടായിരുന്നു. എന്നാല്‍ ഭാവി ഇന്റര്‍നെറ്റ് ഉപയോക്താക്കള്‍ കൂടുതലും വീഡിയോ ചിത്രങ്ങള്‍ ഇഷ്ടപ്പെട്ട് എത്താന സാധ്യതയുണ്ടെന്ന തന്ത്രപരമായ കണക്കുകൂട്ടലാണ് ഗൂഗിള്‍ നടത്തിയത്. ബ്ലോഗര്‍, ഓര്‍ക്കുട്ട് പോലുള്ള സോഷ്യല്‍ നെറ്റ്‌വര്‍ക്കിംഗ് ഇടങ്ങള്‍ക്ക് ആവശ്യമായി വരുന്നതിലേറെ സെര്‍വര്‍ ഇടവും സമാന സൌകര്യങ്ങളും യുട്യൂബിന് ആവശ്യമായി വരുന്നതാണ് ചിലവ് കൂടാന്‍ കാരണം. ആഡ്‌സെന്‍സ് എന്ന സാന്ദര്‍ഭികപരസ്യവിഭാഗത്തില്‍ നിന്നുള്ള വരുമാനവും വീഡിയോക്ക് ഒപ്പം നല്‍കുന്ന ചെറുപരസ്യവുമാണ് വരുമാന സ്രോതസ്. ഇതു കൂടാതെ ചില സ്ഥാപനങ്ങളുമായി സഹകരിച്ചുള്ള വീഡിയോ വിതരണ സമ്പ്രദായവും യൂട്യൂബിന്റെ സാമ്പത്തിക സ്ഥിതി ഭദ്രമാക്കാന്‍ സഹായിക്കുന്നു.
ഇഷ്‌ടഗാനരംഗങ്ങളുടെയും ചലച്ചിത്രശകലങ്ങളുടെയും കലവറ എന്നതിലുപരിയായി നിത്യസംഭവങ്ങള്‍ സിറ്റിസണ്‍ ജേണലിസ്റ്റിന്റെ സ്വഭാവത്തോടെ ചിത്രീകരിച്ച് ഈ ചാനലിലൂടെ പൊതുജനസമക്ഷം എത്തിക്കുന്നവരും കുറവല്ല. കേം‌ബ്രിജ്,ഹര്‍വാഡ്,സ്റ്റാന്‍
ഫഡ്,എം ഐ ടി, ഇന്ത്യയിലെ ഐ.ഐ.ടി പോലെയുള്ള അക്കാദമിക് പെരുമയുള്ള സ്ഥാപനങ്ങളിലെ വീഡിയോയും ഒപ്പം പഠനാവശ്യത്തിനായുള്ള മറ്റ് വിഭവചിത്രീകരണങ്ങളാലും(youtube.com/edu) സമ്പന്നമാണ് ഇന്ന് യുട്യൂബ്.

ഒപ്പം തന്നെ അശ്ലീലവും പകര്‍പ്പവകാശം ലംഘിക്കുന്നതുമായ വീഡിയോപ്പെരുക്കം, ഇതിന്റെ മുന്നോട്ടുള്ള ഒഴുക്കിനെ തടസപ്പെടുത്തുന്നുണ്ട് എന്നത് വസ്തുതയാണ്. ചില രാജ്യങ്ങള്‍ ഇക്കാരണത്താല്‍ നിരോധനം എന്ന വജ്രായുധം പ്രയോഗിക്കുകയും ചെയ്തിട്ടുമുണ്ട്. എന്നാല്‍ സമൂഹത്തിന്റെ വളര്‍ച്ചയ്ക്ക് ഹാനികരമാകുന്ന വീഡിയോ എടുത്തുമാറ്റാന്‍ തങ്ങള്‍ പ്രതിജ്ഞാബദ്ധരാണന്നതാണ് ഗൂഗിള്‍ നയം. കൂടുതല്‍ വിവരവിനിമയ ശേഷിയുള്ള ബ്രോഡ്‌ബാന്‍ഡ് ഇന്റര്‍നെറ്റിന്റെ വരവാണ് യൂട്യൂബിന്റെ വളര്‍ച്ചയുടെ കാതല്‍ എന്ന് പറയാം. ഇന്ന് മലയാളത്തിലെ ടി.വി ചാനലുകളുടേതടക്കം ആയിരക്കണക്കിന് ക്ലിപ്പിംഗുകളാണ് ഒരോ മണിക്കൂറിലും ഇന്ത്യയില്‍ നിന്ന് മാത്രം യുട്യൂബ് ശേഖരത്തിലേക്ക് എത്തുന്നത്. അമേരിക്കന്‍ പ്രസിഡന്റ് തിരഞ്ഞെടുപ്പില്‍ ഒരു പ്രത്യേക യുട്യൂബ് ചാനല്‍ തന്നെ തുറന്നാണ് ബരാക്ക് ഒബാമ പ്രചരണതന്ത്രങ്ങള്‍ രൂപപ്പെടുത്തിയത്. ട്വിറ്റര്‍, ഓര്‍ക്കുട്ട് തുടങ്ങിയവയിലൂടെയും ആരാധകര്‍ വീഡിയോ കൈമാറുന്നുണ്ട്. ഈ വര്‍ഷത്തെ നോബെല്‍ പുരസ്കാര പ്രഖ്യാപനം ലൈവ് ആയി തന്നെ യുട്യൂബില്‍ സം‌പ്രേഷണം ചെയ്തു എന്ന വസ്തുത കൂടി കണക്കിലെടുക്കുമ്പോള്‍ ശേഖരത്തിലുള്ള വീഡിയോ മാത്രമല്ല നേരിട്ടുള്ള വീഡിയോ പങ്കിടല്‍ കൂടി ഉള്‍പ്പെടുത്തി വളര്‍ച്ചയുടെ പുതിയ പടവുകളിലൂടെ കുതിക്കുകയാണ് യുട്യൂബ്.

കുറിഞ്ഞി ഓണ്‍ലൈനില്‍ ശ്രീ ജോസഫ് ആന്റണി എഴുതിയ ‘യൂട്യൂബ് നൂറുകോടിയുടെ നിറവില്‍ എന്ന ലേഖനം വായിക്കാനായി ഇവിടെ ക്ലിക്കുക

ബ്ലോഗ് ഭൂമിയില്‍ നേരത്തെ വന്നതും മാതൃഭൂമി ആഴ്ചപ്പതിപ്പില്‍ 2008 ജൂണ്‍ ആദ്യവാരം പ്രസിദ്ധീകരിച്ചതുമായ ‘വീഡിയോ ക്ലിപ്പിംഗുകള്‍: ദൃശ്യശേഖരണത്തിന്റെ തലം ഏറെ ജനകീയം’ എന്ന ലേഖനം വായിക്കാനായി ഇവിടെ ക്ലിക്കുക

Wednesday, September 30, 2009

മലമ്പുഴയിലെ ഈ ബോട്ട് നോക്കുക


പാലക്കാട് ഐ.ആര്‍.ടി.സി യില്‍ ഒരു ആവശ്യത്തിന് പോയിട്ട് വരുന്ന വഴിയില്‍ മലമ്പുഴ സന്ദര്‍ശിക്കാന്‍ പോയി. ഭാര്യയുടെ നിര്‍ബന്ധം മൂലമാണ് ബോട്ടില്‍ കയറിയത്. അടുത്ത് ചെന്ന് കണ്ടപ്പോള്‍ തന്നെ എനിക്ക് പേടിയായി. ആ യാത്ര തീരുന്നതിനിടെ കുറെ ചിത്രങ്ങള്‍ പകര്‍ത്താമെന്ന് തോന്നി (പേടി മാറാനുള്ള ഒരു ഉപായം എന്ന് വച്ചോ!!) . അണക്കെട്ടില്‍ വര്‍ഷങ്ങളായി അടിഞ്ഞുകൂടിയ മണലും ചെളിയും ഒക്കെ മാറ്റാന്‍ കഴിഞ്ഞ വര്‍ഷത്തെ ബഡ്ജറ്റില്‍ ഡോ. തോമസ് ഐസക്ക് ഒരു നിര്‍ദ്ദേശം മുന്നോട്ട് വച്ചിരുന്നല്ലോ. അതിനു മുന്നെ മലമ്പുഴയെ ഒന്നു കാണാമെന്നും കരുതാതിരുന്നില്ല.

മലമ്പുഴയില്‍ ഇപ്പോള്‍ ഓടുന്ന ബോട്ടുകളില്‍ ഒന്നിന്റെ ചിത്രമാണ് മുകളില്‍. ഇതിന്റെ ഉള്‍ച്ചിത്രമാണ് രണ്ടാമത്തേത് .ഈ ചിത്രത്തില്‍ എന്നുവരെ യാണ് ലൈസന്‍സ് എന്ന് വ്യക്തമല്ല. മാത്രമോ ഈ വിവര പ്ലേറ്റില്‍ അപ്പടി അക്ഷരപിശാചും !!!! .ഇപ്പോഴും ഒരു കുഴപ്പവുമില്ലാതെ ഓടുന്നു. രണ്ടുമാസത്തെ പഴക്കം പോലുമില്ല ചിത്രങ്ങള്‍ക്ക്. ഇലക്ട്രിക്ക് വയറുകളും മറ്റ് നിയന്ത്രണ ഉപാധികളും ഒരു ശ്രദ്ധയുമില്ലാതെയാണ് ഉപയോഗിക്കുന്നത്. ഇതെങ്ങാനും അപകടത്തില്‍ പെട്ടാല്‍(അങ്ങനെ ഒരിക്കലും സംഭവിക്കാതിരിക്കട്ടെ) അന്വേഷണമായി ,അനുശോചനമായി, ഒരു ലക്ഷമോ അതില്‍ കൂടുതലോ സഹായധനം പ്രഖ്യാപിക്കലായി, അന്വേഷണ കമ്മീഷനും അവരുടെ റിപ്പോര്‍ട്ടിന് പൊടിപിടിക്കാതെ വിശ്രമിക്കാന്‍ അലമാര ഒരുക്കലുമായി.
ഇതില്‍ കേവലം പതിനായിരം മാത്രം ചിലവാക്കിയാല്‍ മികച്ച സുരക്ഷാ വിവരമോ അല്ലെങ്കില്‍ സൌകര്യമോ (ലൈഫ് ജാക്കറ്റ്, എത്ര പേര്‍ പോകുന്നു, ആരോക്കെ, പരമാവധി യാത്രക്കാരിലധികം കയറുന്നതെങ്ങനെ നിരോധിക്കാം... ) ഒരുക്കാവുന്നതല്ലേ ഉള്ളൂ. തട്ടേക്കാട് ദുരന്തം കഴിഞ്ഞപ്പോള്‍ ഇനി ഇത്തരം അശ്രദ്ധ വരില്ല എന്ന് ഉറപ്പുതന്നവരെ ഓര്‍ത്ത് ലജ്ജിക്കുന്നു.

ഇന്ന് മാധ്യമങ്ങളില്‍ തേക്കടി ബോട്ടപകട വാര്‍ത്തയും അതിന്റെ വിശകലനവുമാണല്ലോ.
പണ്ട് റെഡിമീര്‍ ബോട്ട് അപകടത്തിലാണ് മഹാകവി കുമാരനാശാന്‍ കൊല്ലപ്പെട്ടത്. ആ വാര്‍ത്ത ഒരാഴ്ചക്ക് ശേഷമാണ് ദിനപത്രങ്ങളിലെത്തിയത് എന്നത് പഴയകാല ചരിത്രം. ഇന്ന് വാര്‍ത്താ ചാനലുകളുടെ പെരുക്കത്തില്‍ വിവരം ഞൊടിയിടയില്‍ എത്തി എന്ന് മാത്രമല്ല കുറെ സമീപവാസികള്‍ രക്ഷാപ്രവര്‍ത്തകരായെത്താനും ഇതുപകരിച്ചു.

തേക്കടി ബോട്ടപകടത്തിന്റെ
തിരുവനന്തപുരം കണ്‍‌ട്രോള്‍ റൂം നമ്പര്‍ # 0471 2333198 കുമിളി ഹെല്‍പ്പ് ലൈന്‍ 0489 6222620, 94460 52361

Tuesday, September 22, 2009

ഗ്രാമീണ എ‌ടി‌എം

നഗരപ്രദേശങ്ങളില്‍ ഇന്ന് എ‌ടി‌എം അത്ഭുതവസ്തു അല്ലെങ്കിലും വിദൂരദേശങ്ങളിലും ഗ്രാമങ്ങളിലും ഇന്നും ഇതൊരു കൌതുകക്കാഴ്‌ച തന്നെയാണന്നതില്‍ തര്‍ക്കമില്ല. കേരളത്തില്‍ നഗര ഗ്രാമ വേര്‍തിരിവ് അത്ര പ്രകടമല്ലെങ്കിലും ഉത്തരേന്ത്യന്‍ സംസ്ഥാനങ്ങളില്‍ എ‌ടി‌എം പോയിട്ട് ബാങ്ക് ശാഖകള്‍ പോലും വിരളമാണന്നത് മറക്കരുത്. ബീഹാറിലെ 22 ശതമാനം (ഏകദേശം അഞ്ച് വിടുകളില്‍ ഒന്ന്) വീടുകള്‍ മാത്രമാണ് വൈദ്യൂതികരിച്ചിട്ടുള്ളത് എന്ന് കൂടി ചേര്‍ത്ത് വായിക്കുക.വാണിജ്യ ബാങ്കുകള്‍ അടക്കം ധനകാര്യ സ്ഥാപനങ്ങള്‍ വിദൂരപ്രദേശങ്ങളില്‍ എ‌ടി‌എം സേവനം എര്‍പ്പെടുത്താത്തതിന്റെ മുഖ്യകാരണം അതിന്റെ വര്‍ധിച്ച പ്രാരംഭ മുതല്‍മുടക്കും പിന്നീടുള്ള പരിപാലനച്ചിലവുമാണ്, ഇതു കൂടാതെ ചെറുതല്ലാത്ത തുക അറ്റകുറ്റപ്പണിക്കും കരുതണം. ഇപ്പോള്‍ ലഭ്യമാകുന്ന എ‌ടി‌എം ന് പ്രതിമാസം 20,000 രൂപയോളം വൈദ്യുതചാര്‍ജ് തന്നെയാകും, വില എകദേശം 10 ലക്ഷവും. മൊത്തത്തില്‍ കണക്കുക്കൂട്ടിയാല്‍ ലാഭ-നഷ്‌ടമില്ലാതെ പ്രവര്‍ത്തിപ്പിക്കാന്‍ 200 ഇടപാടെങ്കിലും ദിനം‌പ്രതി നടക്കണം. കേവലം 2000-3000 മാത്രം ജനസംഖ്യയുള്ള വിദൂര ഗ്രാമങ്ങളില്‍ എല്ലാവരും ബാങ്ക് അക്കൌണ്ട് എടുത്താല്‍ പോലും ഈ ലക്ഷ്യത്തിനടുത്തെത്താനാകില്ല.

ഇങ്ങനെയുള്ള സന്നിഗ്ദ ഘട്ടത്തിലാണ് അനുയോജ്യ സാങ്കേതികവിദ്യയുടെ(Appropriate Technology) പ്രസക്തിയും സാന്നിദ്ധ്യവും ഉറപ്പാക്കേണ്ടത്. എ‌ടി‌എം,മൊബൈല്‍ ഫോണ്‍ ടവര്‍, അടിസ്ഥാന ടെലഫോണ്‍ എക്‍സേഞ്ചുകള്‍ തുടങ്ങിയവയില്‍
വിദേശ രാജ്യങ്ങളില്‍ നിന്ന് ഇറക്കുമതി ചെയ്യുന്ന ഉപകരണവും രീതിയും അതേപടി ഉപയോഗിക്കുകയാണ് പതിവ്, എളുപ്പവും അതാണല്ലോ!! .ഇതിനെ ടെക്നോളജി പകര്‍ത്തല്‍(Adopting Technology) എന്ന് പറയാം. ഒരു പക്ഷെ പ്രാദേശികമായ രീതി മുന്നില്‍ക്കണ്ട് ഒരു പൊളിച്ചെഴുത്ത് നടത്താന്‍ (Technological Adaptation) ആരും ശ്രമിക്കാറില്ല. ഈ സാഹചര്യത്തില്‍ ഗ്രാമീണ ഇന്ത്യയെ മുന്നില്‍ക്കണ്ട് വികസിപ്പിച്ചെടുത്ത ഗ്രാംടെല്ലര്‍ പഠനാര്‍ഹമായ ഇടപെടലാണ്. ചെന്നൈ ആസ്ഥാനമായ വോര്‍ട്ടക്‍സ് എന്ന സ്ഥാപനം മദ്രാസ് ഐ.ഐ.ടി യുടെ സാങ്കേതിക സഹകരണത്തോടെയാണ് ഗ്രാംടെല്ലര്‍ രൂപസംവിധാനം ചെയ്തിരിക്കുന്നത്.
സഹകരണബാങ്കുകള്‍ക്ക് ഉത്തമം:
പരമ്പരാഗത എ‌ടി‌എം ന്റെ അഞ്ചിലൊന്ന് മുതല്‍മുടക്ക് മാത്രമേ ഇതിനുണ്ടാകുന്നുള്ളൂ ഒപ്പം വൈദ്യുതചിലവ് പ്രതിമാസം ആയിരം രൂപയില്‍ താഴെയും. പണകൈമാറ്റച്ചിലവ് നാല്പത് ശതമാനം കുറവും. വിസാറ്റ്, വൈ മാക്‍സ്, ഡബ്ല്യൂ എല്‍ എല്‍, സി ഡി എം എ എന്നീ വിവരവിനിമയ രീതികളിലേത് വേണമെങ്കിലും തിരഞ്ഞെടുത്ത് മുഖ്യശാഖയുമായി ബന്ധിപ്പിക്കാം. വളര്‍ച്ചയെത്തിയ സമ്പദ് വ്യവസ്ഥയില്‍ ഓരോ ആയിരം പേര്‍ക്കും ഒരോ എ‌ടി‌എം എന്നതാണ് കണക്ക്.നിലവില്‍ ഇന്ത്യയില്‍ 20,000-25,000 എ‌ടി‌എം മാത്രമേ ഉള്ളൂ, ഇതാകട്ടെ നഗരകേന്ദ്രീകൃതവും ഇതനുസരിച്ച് നോക്കുകയാണങ്കില്‍ ഒരു ദശലക്ഷം യന്ത്രങ്ങള്‍ രാജ്യത്തുടനീളം സ്ഥാപിക്കേണ്ടതിന്റെ സാധ്യത ഉണ്ട്. പക്ഷെ നിലവിലുള്ള എ‌ടി‌എം അതേപടി ഉപയോഗിച്ചാല്‍ ഈ ലക്ഷ്യം പൂര്‍ത്തീകരിക്കാനാകില്ല. മാത്രമല്ല ഒരു ശാഖമാത്രമോ അല്ലെങ്കില്‍ വിരലിലെണ്ണാവുന്ന ശാഖാസംവിധാനങ്ങള്‍ മാത്രമുള്ള സഹകരണ ബാങ്കുകള്‍ പോലെയുള്ളവയ്‌ക്ക് സാങ്കേതികപരമായോ മുതല്‍മുടക്ക് അടിസ്ഥാനത്തിലോ പരമ്പരാഗത എ‌ടി‌എം ഒരു പരിഹാരമാകുന്നില്ല.
തമിഴ്നാട്ടിലെയും ആന്ധ്രാ‌പ്രദേശിലേയും 15 സ്ഥലങ്ങളില്‍ ഗ്രാം ടെല്ലര്‍ ഉറപ്പിച്ചുകഴിഞ്ഞു. കൂടല്ലൂര്‍ ജില്ലയിലെ ഗ്രാമീണ തൊഴിലുറപ്പ് പദ്ധതിയുടെ ഗുണപഭോക്താക്കള്‍ ഇതിന്റെ സേവനം ഉപയോഗിക്കാനും തുടങ്ങിക്കഴിഞ്ഞു. ഈ വര്‍ഷം 50 ഉം അടുത്ത വര്‍ഷം 500 ഉം ഇന്‍‌സ്റ്റലേഷനാണ് പദ്ധതിയിടുന്നത്. ഉത്പാദനം പുരോഗമിക്കുന്നമുറയ്‌ക്ക് വില ഒരു ലക്ഷമാക്കാമെന്ന് നിര്‍മ്മാതാക്കള്‍ കണക്കുക്കൂട്ടുന്നു, ഒപ്പം പുതിയ ദേശങ്ങളിലേക്കും ഗ്രാം ടെല്ലറിന്റെ മണിക്കിലുക്കം അറിയിക്കാനും.

മറ്റ് പ്രത്യേകതകള്‍:
പരമ്പരാഗത എ‌ടി‌എം ല്‍ പണം വച്ചിരിക്കുന്ന സ്ഥലം(cassette) ഉപകരണത്തിന്റെ താഴ്‌വശത്തായി തിരശ്ചീനമായാണ് സംവിധാനം ചെയ്തിരിക്കുന്നത്. ഒരു നാടയുടെ(conveyer belt) സഹായത്താല്‍ എകദേശം ഒരു മീറ്റര്‍ ദൂരം സഞ്ചരിച്ചാണ് പണം നമ്മുടെ കയ്യിലെത്തുന്നത്. ഇതാകട്ടെ സമയ നഷ്‌ടത്തിലുപരിയായി മോട്ടോര്‍ ചലിപ്പിക്കാനും മറ്റും വൈദ്യുതച്ചിലവും ഉണ്ടാക്കുന്നു. ഉള്ളില്‍ നിന്ന് ചില്ലറ അപശബ്ദങ്ങളും കേള്‍ക്കാം അല്ലേ? ഗ്രാം ടെല്ലറില്‍ പണസഞ്ചാരദൂരം 15 ഓ 20 ഓ സെന്റീമീറ്റര്‍ മാത്രമാണ്, മുകളില്‍ കുത്തനെ ക്രമീകരിച്ചിരിക്കുന്ന കാസറ്റാണ് ഈ ചെറുതല്ലാത്ത ലാഭം ഉണ്ടാക്കിത്തരുന്നത്. ഡിസ്‌പ്ലേ സ്ക്രീന്‍ ആയി ആറ് ഇഞ്ച്(പതിനഞ്ച് സെന്റീമീറ്റര്‍) വലിപ്പമുള്ള എല്‍ സി ഡി ആണ് ഉള്‍പ്പെടുത്തിയിരിക്കുന്നത്. ലിനക്‍സ് അധിഷ്‌ഠിത പ്രവര്‍ത്തക സംവിധാനമാണ് ഈ നൂതന യന്ത്രത്തിന്റെ കാതല്‍. പ്രവര്‍ത്തന സമയത്തും പുറത്തും സാധാരണ താപനില ആണ്. ഇതിനായി പ്രത്യേകിച്ച് എയര്‍ കണ്ടീഷണര്‍ മുറിക്കുള്ളില്‍ പിടിപ്പിക്കേണ്ടതില്ല. 50 ഡിഗ്രി സെഷ്യല്‍‌സ് വരെ സുഗമമായി പ്രവര്‍ത്തിക്കും. എ.സി ക്കുള്ള ചിലവും മാസാമാസം ഉള്ള വൈദ്യുതബില്ലിലെ തുകയും ലാഭിക്കാം. യന്ത്രത്തിന്റെ ശേഷി 100 വാട്സ് മാത്രവും. സോളാര്‍ പാനല്‍ ഉപയോഗിച്ചുള്ള പ്രവര്‍ത്തനവും ഇതുകൊണ്ട് തന്നെ സാധ്യവുമാണ്. വിദൂര ഗ്രാമങ്ങളില്‍ ചിലപ്പോള്‍ സൌരവൈദ്യുതി മാ‍ത്രമാകും ആശ്രയം എന്നത് ഓര്‍ക്കുക. ഒതുക്കമുള്ള രൂപല്‍കല്പനയായതിനാല്‍ സ്ഥലലാഭവും കാഴ്ചഭംഗിയും ഉണ്ട്.
നോട്ടുകള്‍ വേര്‍പെടുത്തുന്ന വിദ്യ (Sheet Separation Apparatus) യും പഴകി മുഷിഞ്ഞ നോട്ട് കൈകാര്യം ചെയ്യുന്നരീതി (Gravity assisted friction pick)യും പേറ്റന്റിന് കാത്തു നില്‍ക്കുകയാണ്. കേരളത്തിലെ സാഹചര്യത്തില്‍ സഹകരണ ബാങ്കുകള്‍ക്കും വാണിജ്യ-സ്വകാര്യ ബാങ്കുകളുടെ വിദൂരഗ്രാമങ്ങളിലെ എ‌ടി‌എം സേവനത്തിനും ഗ്രാം ടെല്ലര്‍ പ്രയോജനപ്പെടുത്താം.

സാങ്കേതിക വിവരങ്ങള്‍
ടൈപ്പ് : ഫ്രീ സ്റ്റാന്‍ഡിംഗ്, റിയര്‍ മൌണ്ടിംഗ്
നോട്ട് കൈകാര്യം ചെയ്യല്‍ : മുന്‍‌വശത്തുകൂടി
യന്ത്രാനുമതി/പ്രവേശനം : വിരലടയാളം ബയോമെട്രിക്ക് രീതിയില്‍ പരിശോധിക്കുന്നു/ പിന്‍ സംഖ്യ
കാര്‍ഡിലെ വിവരം ശേഖരിക്കല്‍ : നീക്കുന്നതോ ഉള്ളിലേക്ക് കടത്തിവിടുന്ന രീതിയിലോ (swipe or dip type) കാര്‍ഡില്‍ നിന്ന് കാന്തികവിവരങ്ങള്‍ പരിശോധിക്കുന്നു
ഡിസ്‌പ്ലെ സ്ക്രീന്‍: ആറ് ഇഞ്ച് വലിപ്പം, ഒറ്റ വര്‍ണ എല്‍ സി ഡി
ഭാഷ: മൂന്ന് ഭാഷാകളില്‍ ഒന്ന് ഉപഭോക്താവിന്റെ ഇഷ്‌ടാനുസരണം
സുരക്ഷ: സെര്‍വറുമായി കൂട്ടിയിണക്കിയ ഇലക്‍ട്രോണിക്ക് ലോക്ക് കൂടാതെ മെക്കാനിക്കല്‍ ലോക്കും
നോട്ട് ശേഖരണ ശേഷി: 2000
കുറഞ്ഞ തുക പിന്‍‌വലിക്കല്‍: 50 രൂപ
പ്രിന്റര്‍ : 40 കോളം തെര്‍മല്‍ പ്രിന്റര്‍
അളവ്: 1500 മില്ലീമീറ്റര്‍ പൊക്കം, 540 മി.മീ വീതി, 300 മിമീ കനം
ഭാരം: 200 കിലോ ഗ്രാം
ഊര്‍ജ‌ഉപഭോഗം: പീക്ക് ലോഡ് (പൂര്‍ണ ഉപയോഗാവസ്ഥയില്‍) 100 വാട്സ്. ഓഫ്പീക്ക് (ഉറക്കാ‍വസ്ഥയില്‍ !) 30 വാട്സ്
സാങ്കേതിക സഹകരണം: TeNeT ഐ.ഐ. ടി മദ്രാസ്
നിര്‍മ്മാതാക്കള്‍: Vortex എഞ്ചിനീയറിംഗ് ചെന്നൈ

Friday, September 18, 2009

ട്വീറ്റാം നമുക്കു ട്വീറ്റാം വീണ്ടുമൊരു ട്വീറ്റഗാനം

കേന്ദ്രമന്ത്രി ഡോ. ശശി തരൂരിന്റെ ട്വിറ്റര്‍ സന്ദേശം വന്‍ വാര്‍ത്തയാവുകയും അതുവഴി കോണ്‍ഗ്രസ് പാര്‍ട്ടിക്കും മന്ത്രിസഭയ്‌ക്കും അല്പം ഇടിവ് സംഭവിച്ചുവെന്നത് നേര്. പക്ഷെ ഈ സംഭവത്തോടെ ട്വിറ്റര്‍ എന്ന മൈക്രോ ബ്ലോഗിംഗ് സേവനം സൂപ്പര്‍ഹിറ്റായന്നെതനിന് ഒരോ ദിവസവും ഇതിലേക്ക് എത്തിക്കൊണ്ടിരിക്കുന്നവരുടെ എണ്ണത്തില്‍ ( ‘കന്നുകാലി-വിശുദ്ധപശു’ പ്രയോഗത്തിനും വാര്‍ത്താപ്രാധാന്യത്തിനും ശേഷം) ഉണ്ടാകുന്ന അവിശ്വസനീയമായ വര്‍ധനവ് തന്നെ സാക്ഷി.

ട്വീറ്റാം നമുക്കു ട്വീറ്റാം വീണ്ടുമൊരു ട്വീറ്റഗാനം (പാടാം
നമുക്ക് പാടാം വീണ്ടുമൊരു പ്രേമഗാനം)
ഇന്റര്‍നെറ്റിന്റെ ആവിര്‍ഭാവത്തോടെ ആശയവിനിമയം എന്ന ഉപാധി വിപ്ലവകരമായ മാറ്റത്തെ നേരിടുകയാണ്‌. ഒരുകാലത്ത്‌ ചിന്തയില്‍പ്പോലും വരാതിരുന്ന തരത്തിലുള്ള സന്ദേശവിനിമയങ്ങളാണ്‌ ഇന്നു നാം ഉപയോഗിക്കുന്നത്‌. ശാസ്‌ത്രകല്‍പ്പിത കഥകളെപ്പോലും നിഷ്‌പ്രഭമാക്കുന്ന രീതിയില്‍ നവംനവങ്ങളായ ആശയപ്രകാശന ഉപാധികള്‍ നമുക്കിടയിലേക്ക്‌ കടന്നുവരുന്നു.

ശബ്ദംകൊണ്ടോ കാഴ്‌ചകൊണ്ടോ വിനിമയംചെയ്‌തത്‌ 165 വര്‍ഷത്തിന് മുമ്പായിരുന്നുവെന്നു പറഞ്ഞാല്‍ ഒരുപക്ഷേ, ഇന്ന്‌ വിശ്വസിക്കാനാകില്ല. 1844ല്‍ സാമുവല്‍ മോഴ്‌സും കൂട്ടുകാരന്‍ ആല്‍ഫ്രഡ്‌ പെയിലും ചേര്‍ന്ന്‌ അകലങ്ങളിലിരുന്ന്‌ സന്ദേശം കൈമാറാനുള്ള സ്‌പന്ദനോപാധി രൂപപ്പെടുത്തുമ്പോള്‍ ഇത്ര വിപ്ലവകരമായ മാറ്റത്തിന്റെ ഡിട്ടും ഡോട്ടും ([ ദീര്‍ഘസ്‌പന്ദനം (-), ലഘുസ്‌പന്ദനം (.) ] ആകും തങ്ങള്‍ കുത്തിക്കുറിക്കുന്നതെന്ന്‌ ചിന്തിച്ചിട്ടുപോലുമുണ്ടാകുമായിരുന്നില്ല. മുതിര്‍ന്നവര്‍ ഇന്നും ഈ ചിഹ്നഭാഷ ഓര്‍ക്കുന്നുണ്ടാവും. എന്നാല്‍ , ഇന്നത്തെ തലമുറയുടെ ആശയവിനിമയചക്രവാളങ്ങളിലെങ്ങും മോഴ്‌സ്‌കോഡ്‌ ഉണ്ടാകില്ല. മൊബൈല്‍ ഹ്രസ്വസന്ദേശങ്ങളുടെയും എടുക്കാവിളി*കളുടെയും വിവരപ്പെരുക്കത്തില്‍ അവര്‍ കൈമാറുന്നത്‌ സന്ദേശങ്ങളുടെ ഒരു വസന്തകാലംതന്നെയാണ്‌. അതായത്‌, മുതിര്‍ന്നവര്‍ മോഴ്‌സ്‌കോഡ്‌ ലിപി മനഃപാഠമാക്കിയാണ്‌ വിവരങ്ങള്‍ കാതങ്ങള്‍ക്കപ്പുറം എത്തിച്ചതെങ്കില്‍ അവരുടെ പേരക്കുട്ടികള്‍ എസ്‌എംഎസിന്റെ കുറുക്കുഭാഷയും ഇമോറ്റികോണും (ചിഹ്നങ്ങള്‍ ) വിരല്‍ത്തുമ്പില്‍ പരിചിതമാക്കിക്കഴിഞ്ഞു.
മൊബൈല്‍ഫോണ്‍ , ഇ-മെയില്‍ , ഒര്‍ക്കുട്ട്‌-ഫേസ്‌ബുക്ക്‌ പോലുള്ള സോഷ്യല്‍ നെറ്റ്‌വര്‍ക്കിങ്‌ വെബ്‌സൈറ്റുകള്‍ ... ഇവയെല്ലാം ആശയവിനിമയത്തിന്റെ ഇടങ്ങളാണല്ലോ. കുറച്ചുകൂടി വിപുലമായ എഴുത്തും പ്രകാശനവുമാണ്‌ നാം ലക്ഷ്യമിടുന്നതെങ്കില്‍ ബ്ലോഗിങ്ങും സഹായത്തിനുണ്ട്‌. ഇതിനൊക്കെയുള്ള ചെലവോ താരതമ്യേന കുറവും.

എന്നാല്‍ , ഇന്ന്‌ ഇന്റര്‍നെറ്റ്‌ലോകം ഈ ഗണത്തിലെ മറ്റൊരു നവതരംഗത്തിന്റെ ചിറകിലാണ്‌. ട്വിറ്റര്‍ (http://twitter.com) എന്നറിയപ്പെടുന്ന ഇന്റര്‍നെറ്റ്‌ സന്ദേശ സേവനദാതാവ്‌ മൊബൈല്‍ സന്ദേശങ്ങളുടെ സൗകര്യത്തെ ഇന്റര്‍നെറ്റിന്റെ വിശാലതയിലേക്ക്‌ കൂട്ടിയിണക്കുകയാണ്‌.

എന്താണ്‌ ട്വിറ്റര്‍ ?
നിങ്ങള്‍ ഇപ്പോള്‍ എന്താണ്‌ ചെയ്യുന്നതെന്ന്‌ കൂട്ടുകാരെ തത്സമയം അറിയിക്കാനുള്ള വെബ്‌സൈറ്റാണ്‌ ട്വിറ്റര്‍ .
What are you doing? എന്നതാണ്‌ ട്വിറ്ററിന്‌ നിങ്ങളോടുള്ള ചോദ്യംതന്നെ. ഇതിനു മറുപടിയായി 140 അക്ഷരത്തിലോ അക്കത്തിലോ ഉള്ള സന്ദേശം ഇടാം. ഒര്‍ക്കുട്ട്‌/ഫേസ്‌ബുക്ക്‌ പോലെ നിങ്ങളുടെ പ്രൊഫൈല്‍ പേജുമായി കൂട്ടിയിണക്കപ്പെട്ടവര്‍ക്ക്‌ നിങ്ങള്‍ ഇപ്പോള്‍ ടൈപ്പ് ചെയ്‌ത ട്വിറ്റര്‍സന്ദേശം എത്തും. എന്നാല്‍, ഓര്‍ക്കുട്ടും ഫേസ്‌ബുക്കും പോലെ ഓരോരുത്തര്‍ക്കും അയക്കേണ്ടതില്ലെന്നര്‍ഥം. ചങ്ങാതി ഇട്ട ട്വിറ്റര്‍സന്ദേശം നിങ്ങള്‍ക്ക്‌ സുഹൃത്തുക്കളെ അറിയിക്കണമെങ്കില്‍ പുനഃപ്രക്ഷേപണം (RT- Re Tweet) ചെയ്യാം. എന്താണിതിന്റെ മെച്ചം? അറിയാം, അറിഞ്ഞുകൊണ്ടെയിരിക്കാം. ഇതുതന്നെയല്ലേ ഒര്‍ക്കൂട്ടിലും ഇ-മെയില്‍ ഗ്രൂപ്പുകളിലും നാം ചെയ്‌തുകൊണ്ടിരിക്കുന്നത്‌ എന്നാകും ഇപ്പോള്‍ മനസ്സിലുയരുന്ന ചോദ്യം അല്ലേ?
എന്നാല്‍ , ലാളിത്യമാണ്‌ ട്വിറ്ററിന്റെ മുഖമുദ്ര. സിനിമാതാരങ്ങള്‍ , രാഷ്‌ട്രീയപ്രവര്‍ത്തകര്‍ , സാമൂഹ്യസേവനപ്രവര്‍ത്തനങ്ങളില്‍ ഇടപെടുന്നവര്‍ , വിദ്യാര്‍ഥികള്‍ , എന്തിന്‌ ചെറുകിടകച്ചവടക്കാര്‍വരെ ഇന്ന്‌ `ട്വിറ്റ്‌' ചെയ്യുന്നവരാണ്‌.

ആരാധകരുമായി പുതിയ സംരംഭങ്ങളെക്കുറിച്ച്‌ അപ്പപ്പോള്‍ സംസാരിക്കാം; ഒരുസമയം ഒട്ടേറെപ്പേരുമായി. അവരുടെ അഭിപ്രായങ്ങള്‍ ശേഖരിക്കുകയും മറുപടി പറയുകയും ചെയ്യാം. സന്ദേശങ്ങളെല്ലാം 140 അക്ഷര-അക്കങ്ങളില്‍ പരിമിതപ്പെടുത്തണമെന്നതിനാല്‍ നീണ്ട അഭിപ്രായങ്ങള്‍ വായിച്ച്‌ സമയം കളയേണ്ട. എന്നാല്‍ , വിശദമായ ഒരു പോസ്‌റ്റ്‌ നിങ്ങളുടെ വെബ്‌സൈറ്റിലോ ബ്ലോഗിലോ നല്‍കിയശേഷം അതിന്റെ വെബ്‌വിലാസം ഹൈപ്പര്‍ലിങ്കായി നല്‍കി അനുവാചകരെ അങ്ങോട്ടേക്ക്‌ ആനയിക്കാം. ഇന്റര്‍നെറ്റിന്റെ എസ്‌എംഎസ്‌ ( SMS of Internet) എന്നാണ്‌ ട്വിറ്റര്‍ അറിയപ്പെടുന്നത്‌.

ആരൊക്കെയാണ്‌ ട്വിറ്റര്‍മാര്‍
വ്യക്തികള്‍ മാത്രമല്ല, സ്ഥാപനങ്ങളും മാധ്യമ ഗ്രൂപ്പുകളും സന്നദ്ധസംഘടനകളും ഇന്ന്‌ ട്വിറ്ററില്‍ സക്രിയരാണ്‌. സിഎന്‍എന്‍ ടിവിയുടെ ബ്രേക്കിങ്‌ ന്യൂസ്‌ എന്ന പ്രൊൈഫല്‍ ട്വിറ്ററില്‍ 23 ലക്ഷം അനുയായികളെ സൃഷ്ടിച്ചുകഴിഞ്ഞു. അതായത്‌, ടിവി കാണാത്ത ഉപയോക്താക്കള്‍ക്കിടയിലേക്കും ട്വിറ്ററിലൂടെ സിഎന്‍എന്റെ ബ്രേക്കിങ്‌ ന്യൂസുകള്‍ തല്‍സമയം എത്തുകയായി. വെബ്‌നിരീക്ഷകരായ അലക്‌സാ ഡോട്ട്‌കോമിന്റെ കണക്കുപ്രകാരം ലോകത്തിലെ ആദ്യത്തെ എണ്ണപ്പെട്ട ജനപ്രിയ വെബ്‌സൈറ്റായി ട്വിറ്റര്‍ മാറിക്കഴിഞ്ഞു. അന്താരാഷ്‌ട്ര പ്രശസ്‌തമായ മിക്ക ദിനപത്രങ്ങള്‍ക്കും മാഗസിനുകള്‍ക്കും ട്വിറ്റര്‍ പേജ്‌ ഉണ്ട്‌. ചെറുകിട ബിസിനസ്‌ സംരംഭത്തെ പരിപോഷിപ്പിക്കാനും സാമ്പ്രദായിക മാധ്യമത്തിന്‌ പുതിയ കാലത്തിന്റെ വേഗത്തിനൊപ്പം നീങ്ങാനും ട്വിറ്ററിന്റെ 140 അക്ഷരക്കരുത്തില്‍ സാധിക്കും. ബരാക്‌ ഒബാമ തെരഞ്ഞെടുപ്പു പ്രചാരണസമയത്ത്‌ ട്വിറ്ററിനെ സമര്‍ഥമായി ഉപയോഗിച്ചു. 17 ലക്ഷംപേരാണ്‌ ബരാക്‌ ഒബാമയുടെ ട്വിറ്റര്‍ പേജിനെ പിന്തുടരുന്നത്‌. ബരാക്‌ ഒബാമയോ സിഎന്‍എന്‍ഒോ ഇട്ട ഒരു സന്ദേശം വായിക്കാന്‍ നമ്മള്‍ അവരുടെ പേജില്‍ പോകേണ്ട. അവരുടെ പ്രൊഫൈല്‍ പേജുമായി കൂട്ടിയിണക്കപ്പെട്ട എല്ലാ സുഹൃത്തുക്കള്‍ക്കും അപ്പപ്പോള്‍ത്തന്നെ സന്ദേശങ്ങള്‍ ലഭിക്കും.

ട്വിറ്ററില്‍ ഒരാളെ പരാമര്‍ശിക്കണമെങ്കിലോ മറ്റുള്ളവര്‍ക്ക് ഒപ്പം അയാളുടെ ശ്രദ്ധയിലേക്കും സന്ദേശം കൊണ്ടുവരാനായി പേരിന് മുന്നില്‍ അറ്റ് (@) അടയാളം ചേക്കുക.

ട്വിറ്ററിലെ പ്രമുഖര്‍ :


രാഷ്‌ട്രീയം:
ബരാക്ക് ഒബാമ http://twitter.com/BARACKOBAMA (@barackobama), ശശി തരൂര്‍ (@
ShashiTharoor ) , കെ സുധാകരന്‍ എം.പി (@ksudhakaranMP) , സിന്ധു ജോയ് ,(@Drsindhujoy)

പത്ര പ്രവര്‍ത്തനം : എന്‍ .റാം -ദി ഹിന്ദു( @nramind) , രാജ് ദീപ് സര്‍ദേശായ് (@sardesairajdeep-സി എന്‍ എന്‍ ഐബി‌എന്‍ , സാഗരികാ ഘോഷ് -സി എന്‍ എന്‍ ഐബി‌എന്‍ (@sagarikaghose) , ബര്‍ക്കാ ദത്ത- എന്‍ഡി‌ടി‌വി , പ്രഭു ചാവ്‌ല-ഇന്ത്യാ ടുഡേ ഗ്രൂപ്പ് (@PrabhuChawla), അനീഷാ നയ്യാര്‍ -എന്‍‌ഡിടിവി പ്രോഫിറ്റ്, (@AnishaNDhawan ) , ബി ആര്‍ പി ഭാസ്‌കര്‍ (@brpbhaskar )

മാധ്യമ സ്ഥാപനങ്ങള്‍
എന്‍‌ഡിടി‌വി (@ndtv ) , മനോരമ ടിവി (@manoramatv ), മാതൃഭൂമി ദിനപത്രം
(@mathrubhumi ), ടെക്‍നോളജി റിവ്യൂ, ബിബിസി ക്ലിക്ക് ഓണ്‍‌ലൈന്‍

സാമൂഹിക-സാഹിത്യ പ്രവര്‍ത്തനം:
ഡോ.ബി ഇക്‍ബാല്‍ (@
drbekbal ), കവി പിപി രാമചന്ദ്രന്‍ (@ppramachandran), സിനിമാ നിരൂപകന്‍ ജിപി.രാമചന്ദ്രന്‍ (@gpramachandran)

സ്റ്റോപ്പ് പ്രസ്:
ഫയര്‍ഫോക്സ് ഉപയോഗിക്കുന്നവര്‍ക്ക് എക്കോഫോണ്‍ ഇവിടെ നിന്ന് ഇന്‍സ്റ്റാള്‍ ചെയ്യാം. പതിയ ട്വീറ്റുകള്‍ ഇതിലൂടെ വളരെവേഗം ചെയ്യാം. ശശി തരൂരിന് കിട്ടുന്ന ട്വീറ്റുകള്‍ ഇവിടെ കാണാം. ഇവിടേ മുകളിലത്തെ ചതുരത്തില്‍ @shashitharoor എന്ന് കാണുന്ന സ്ഥലത്ത് നിങ്ങള്‍ക്ക് വായിക്കേണ്ടവരുടെ ട്വീറ്റ് നാമം(ട്വിറ്റര്‍ ഐഡി) ശരിയായി ടൈപ്പ് ചെയ്യുക. എക്കോഫോണ്‍(echofon) വിവരം പങ്കുവച്ച കേരളഫാര്‍മര്‍ക്ക് നന്ദി.

‌‌‌‌‌‌‌‌‌‌‌‌‌‌‌‌‌‌‌-------------------
ട്വിറ്ററിനെക്കുറിച്ച് ചിത്രവിശേഷം ഹരീയുടെ സാങ്കേതികം ബ്ലോഗിലും ഒരു ലേഖനം ഉണ്ട്. ഇവിടെ ക്ലിക്ക് ചെയ്യുക
ട്വിറ്ററിനെയും ഫയര്‍ഫോക്സില്‍ ഭംഗിയായി ട്വിറ്റര്‍ സന്ദേശങ്ങള്‍ കൂട്ടിയിണക്കുന്നതിനെ പറ്റി കേരള ഫാര്‍മര്‍ എഴുതിയ ലേഖനം ഇവിടെ ക്ലിക്കുക


* മിസ്‌ഡ് കോള്‍ ന് എടുക്കാവിളി എന്ന മധുരമലയാളവാക്ക് തന്ന കഥാകൃത്ത് സുഭാഷ്‌ ചന്ദ്രന് നന്ദി.

Thursday, September 17, 2009

ഐപിടിവി അവതരിക്കുന്നു

റേഡിയോ കഴിഞ്ഞാല്‍ ഇന്ന്‌ ഏറ്റവുമധികം ജനങ്ങളിലെത്തുന്ന വിനോദവിജ്ഞാന ഉപാധിയാണല്ലോ ടെലിവിഷന്‍ . ടെലിവിഷന്‍ പല രീതിയിലാണ്‌ നമ്മുടെ മുന്നില്‍ എത്തുന്നത്‌. ഭൂതല സംപ്രേഷണത്തിലൂടെ ഔദ്യോഗിക ടിവി ചാനലായ ദൂരദര്‍ശന്‍ ഭാരതം മുഴുവന്‍ ലഭ്യമാണ്‌. കേബിള്‍ ടിവി സങ്കേതത്തിലൂടെ അസംഖ്യം ചാനലുകള്‍ എത്തുന്നു. ഒപ്പം ഡയറക്ട്‌ ടു ഹോം (ഡിടിഎച്ച്‌) എന്ന നവീന സങ്കേതംവഴി കേബിള്‍ ശൃംഖല എത്താത്ത കുഗ്രാമങ്ങളില്‍വരെ ഒരു ചെറിയ ഡിഷ്‌ ആന്റിനയുടെയും സെറ്റ്‌ടോപ്‌ ബോക്‌സിന്റെയും സഹായത്തോടെ ഉപഗ്രഹചാനല്‍ പരിപാടികള്‍ ലഭ്യമാക്കുന്നു. എന്നാല്‍, ഈ ശ്രേണിയിലെ പുതിയ അവതാരം ഐപിടിവി എത്തുന്നത്‌ ബ്രോഡ്‌ബാന്‍ഡ്‌ ഇന്റര്‍നെറ്റിന്റെ ചിറകിലേറിയാണ്‌. നിലവിലുള്ള ചാനല്‍ഘടനയെ പൊളിച്ചെഴുതാന്‍തക്ക ശേഷിയുള്ളതാണ്‌ ഐപിടിവി എന്ന ഇന്റര്‍നെറ്റ്‌ പ്രോട്ടോകോള്‍ ടെലിവിഷന്‍ . ലോകത്തിലെ എല്ലാ മുഖ്യ അടിസ്ഥാന ടെലികോം സ്ഥാപനങ്ങളും ഐപിടിവിയെ മറ്റൊരു സാമ്പത്തികസ്രോതസ്സായി കാണുന്നതിനാല്‍ വളര്‍ച്ചസാധ്യത ഉറപ്പിക്കാം.

എന്താണ്‌ ഐപിടിവി
ഇന്റര്‍നെറ്റ്‌ പ്രോട്ടോകോളി (ഐപി)നെ അധികരിച്ചുള്ള സേവനകൈമാറ്റമാണ്‌ ഇതുകൊണ്ട്‌ ഉദ്ദേശിക്കുന്നത്‌. ടെലിവിഷന്‍ പരിപാടികള്‍ മാത്രമല്ല, പാട്ടുകള്‍ (audio), സിനിമ (video), വിവരകൈമാറ്റം (data), ടെലിഫോണ്‍സേവനം എന്നിവയും ഐപിടിവി കണക്‌ഷന്‍കൊണ്ട്‌ ഒറ്റയടിക്ക്‌ ഉപയോക്താക്കള്‍ക്ക്‌ കരഗതമാകും. ഇതിനെല്ലാം പുറമെ, സാധാരണ ചാനലുകള്‍പോലെ ഇത്‌ ഒരു ദിശയിലേക്കു (ചാനല്‍ ഓഫീസില്‍നിന്ന്‌ സ്വീകരണമുറിയിലേക്ക്‌) മാത്രമല്ല വിവര-വിജ്ഞാന-വിനോദ പരിപാടികള്‍ എത്തിക്കുന്നത്‌, ഇന്ററാക്ടീവായ രീതിയില്‍ (അങ്ങോട്ടും ഇങ്ങോട്ടും) നേരെ തിരിച്ചും സംവദിക്കാന്‍ ഇത്‌ അരങ്ങൊരുക്കും. ഇപ്പോള്‍ ചാനല്‍ ചര്‍ച്ചയില്‍ പ്രേക്ഷകര്‍ പങ്കെടുക്കുന്നത്‌ ടെലിഫോണ്‍വഴിയോ മൊബൈല്‍ സന്ദേശം/ഇ-മെയില്‍ വഴിയോ ആണല്ലോ. എന്നാല്‍, ഐപിടിവി പ്രദാനംചെയ്യുന്നത്‌ ദൃശ്യം എത്തുന്ന കമ്പികളിലൂടെതന്നെയുള്ള തിരിച്ചുമുള്ള വിവരകൈമാറ്റമാണ്‌. റിയാലിറ്റിഷോ ഭാവിയില്‍ കൂടുതല്‍ റിയല്‍ ‍! ആകുമെന്നു ചുരുക്കം.
ഐപിടിവിയുടെ എടുത്തുപറയേണ്ട വേറിട്ട സൗകര്യം `ഇഷ്ടാനുസരണമുള്ള വീഡിയോ' (video on demand) തന്നെയാണ്‌. നിങ്ങള്‍ക്ക്‌ കാണാന്‍ സാധിക്കാതെപോയ `ലൈവ്‌' ടെലികാസ്‌റ്റ്‌ വാര്‍ത്തയോ ഏഴുമണി സീരിയലോ പിന്നീട്‌ എപ്പോള്‍ വേണമെങ്കിലും കാണാം. ഐപിടിവി ഓഫീസിലേക്ക്‌ റിമോട്ട്‌വഴി ഇതിനുള്ള സന്ദേശം അയച്ചാല്‍മതി. അതായത്‌ രാത്രി പത്തിനുശേഷം മാത്രമേ സംപ്രേഷണംചെയ്യുകയുള്ളുവെന്ന്‌ ചാനല്‍ വാശിപിടിക്കുന്ന ഭൂത-പ്രേത-പിശാച്‌ പരമ്പര പിറ്റേ ദിവസമോ മറ്റേതെങ്കിലും ദിവസമോ നട്ടുച്ചയ്‌ക്കുവേണമെങ്കിലും കാണാം! ചാനല്‍ ഓഫീസിലോ ഐപിടിവി സേവനദാതാവിന്റെ സെര്‍വറിലോ സൂക്ഷിച്ചിട്ടുള്ള സിനിമ, ഡോക്യുമെന്ററി, മറ്റ്‌ വീഡിയോ ക്ലിപ്പിങ്ങുകള്‍ എന്നിവ റിമോട്ട്‌ നിര്‍ദേശാനുസരണം ഏതുസമയത്തും നിങ്ങളുടെ ടെലിവിഷനിലേക്കെത്തിക്കാം. ടിവി ട്യൂണര്‍ കാര്‍ഡ്‌ ഉപയോഗിച്ച്‌ പരിപാടികള്‍ പകര്‍ത്തി പിന്നീട്‌ കാണുന്ന രീതി ഇന്നുണ്ടെങ്കിലും അതിനായി കംപ്യൂട്ടര്‍, ആവശ്യത്തിന്‌ സംഭരണോപാധി (ഹാര്‍ഡ്‌ ഡിസ്‌ക്‌ സ്ഥലം), ഇത്‌ റെക്കോഡ്‌ചെയ്യാന്‍ അതേസമയം ഒരാളെ ചുമതലപ്പെടുത്തല്‍ എന്നിവ ആരെയും മടുപ്പിക്കും. എന്നാല്‍ , ഐപിടിവിയില്‍ ഇത്തരം ജോലികളെല്ലാം സേവനദാതാവിന്റെ ഉത്തരവാദിത്തമാണ്‌.

എങ്ങനെയാണ്‌ പ്രവര്‍ത്തനം

ഒരു ബ്രോഡ്‌ബാന്‍ഡ്‌ ഇന്റര്‍നെറ്റ്‌ ബന്ധം, സെറ്റ്‌ടോപ്‌ ബോക്‌സ്‌ എന്ന ഒരു ചെറിയ ഉപകരണം, ഐപിടിവി അംഗത്വം എന്നിവയാണ്‌ നമ്മുടെ വീട്ടിലോ ഓഫീസിലോ ഉണ്ടായിരിക്കേണ്ട മാറ്റം. ചെമ്പുകമ്പികള്‍വഴിയുള്ള (last mile: copper loop) ടെലിഫോണ്‍ കണക്‌ഷനാണ്‌ നിലവില്‍ ഐപിടിവി ഉപയോഗിക്കുന്നത്‌. അടിസ്ഥാന ടെലിഫോണ്‍ സേവനം ലഭ്യമാക്കുന്ന സ്ഥാപനങ്ങള്‍ക്കാകും ഈ മാര്‍ക്കറ്റില്‍ ശോഭിക്കാനാകുന്നത്‌. ടിവി ചാനലുകളില്‍നിന്നുള്ള ദൃശ്യശേഖരം ലൈവ്‌ ആയിത്തന്നെ ടെലികോം കമ്പനിയുടെ മുഖ്യ ഓഫീസില്‍ സ്വീകരിക്കുന്നു. ഇത്‌ അവിടെവച്ച്‌ വിവരപ്പൊതി (ഐപി പാക്കറ്റ്‌സ്‌) ആയി വിഭജിച്ച്‌ ടെലികോം കമ്പനിയുടെ മുഖ്യശൃംഖലയിലേക്ക്‌ അയക്കുന്നു. ഇവിടെനിന്ന്‌ പ്രാദേശിക ഐപിടിവി കേന്ദ്രത്തിലേക്കെത്തും. വരിക്കാരുടെ നിയന്ത്രണം, ബില്ലിങ്‌, വരിക്കാരില്‍നിന്നുള്ള സന്ദേശം കൈകാര്യംചെയ്യല്‍ എന്നിവ ഈ കേന്ദ്രത്തില്‍വച്ചാകും നടക്കുക. ഇവിടെനിന്നു നേരിട്ട്‌ നമ്മുടെ ടിവിയോടൊപ്പം ഘടിപ്പിച്ച സെറ്റ്‌ടോപ്‌ ബോക്‌സ്‌വഴി (എസ്‌ടിബി) ദൃശ്യങ്ങള്‍ സ്‌ക്രീനില്‍ എത്തും. സെറ്റ്‌ടോപ്‌ ബോക്‌സിനെ നിയന്ത്രിക്കാന്‍ ഒരു റിമോട്ടും ഉണ്ടാകും. ഇതുവഴിയാണ്‌ ചാനലുകള്‍ മാറ്റുന്നതും സന്ദേശമയക്കുന്നതുമെല്ലാം. ഒപ്പം ടിവിയുടെ റിമോട്ട്‌ ശബ്ദതീവ്രത ക്രമീകരിക്കാനും ദൃശ്യത്തിന്‌ നിറവ്യത്യാസം വരുത്താനുംമാത്രം ഉപയോഗിക്കാം!
ചാനല്‍ മാറ്റുമ്പോള്‍ സാധാരണ കേബിള്‍ ടിവിയില്‍ നടക്കുന്നത്‌ ടെലിവിഷന്‍ പ്രസ്‌തുത ചാനലിന്റെ തരംഗവിവരത്തിനനുസരിച്ച്‌ ട്യൂണ്‍ ആകുന്നതാണ്‌. നിങ്ങള്‍ ഏതു ചാനല്‍ എത്രനേരം ആസ്വദിച്ചുവെന്നൊന്നും പ്രാദേശിക കേബിള്‍ നെറ്റ്‌വര്‍ക്ക്‌ ഓഫീസില്‍പോലും അറിയാനാകില്ല. എന്തിന്‌, നിലവില്‍ പരസ്യദാതാക്കള്‍ ആശ്രയിക്കുന്നത്‌ TAM (ടാം) റേറ്റിങ്ങിന്‌ തെരഞ്ഞെടുക്കപ്പെട്ട ഭവനങ്ങളില്‍ സ്ഥാപിച്ച വിവരചോരണ ഉപകരണത്തിലെ വിവരമാണ്‌. ഇതാകട്ടെ മൊത്തം ടിവി പ്രേക്ഷകരുടെ ആകത്തുക എന്നു പറയാനുമാകില്ല. എന്നാല്‍, ഐപിടിവിയില്‍ നിങ്ങള്‍ ചാനല്‍ മാറ്റുമ്പോള്‍ സംഭവിക്കുന്നത്‌ നേരെ തിരിച്ചാണ്‌. ചാനല്‍മാറ്റ ബട്ടണ്‍ അമര്‍ത്തുമ്പോള്‍ ഉടനടി വിവരം പ്രാദേശിക ഐപിടിവി ഓഫീസില്‍ എത്തും. അവര്‍ ഇത്‌ ഐപി ഗ്രൂപ്പ്‌ മെമ്പര്‍ഷിപ്പ്‌ പ്രോട്ടോകോള്‍ (IGMP) പ്രകാരം മാറ്റിത്തരും. ഇതിനെ മള്‍ട്ടികാസ്‌റ്റ്‌ എന്നാണ്‌ പറയുന്നത്‌. ബ്രോഡ്‌കാസ്‌റ്റിങ്‌ അല്ല. റിമോട്ട്‌വഴിയുള്ള ചാനല്‍മാറ്റ സന്ദേശം ലഭിക്കുമ്പോള്‍ത്തന്നെ പ്രസ്‌തുത ചാനലിന്‌ നിങ്ങള്‍ വരിക്കാരനാണോയെന്നു പരിശോധിക്കും. ശേഷം ഉപയോക്താവിനെ ആവശ്യപ്പെട്ട ചാനലിന്റെ പട്ടികയില്‍പ്പെടുത്തും (distribution index). ഇതെല്ലാം ഞൊടിയിടയില്‍ സംഭവിക്കുന്നതിനാല്‍ സാങ്കേതികമായ മാറ്റം കാഴ്‌ചക്കാരന്‍ അറിയുന്നുപോലുമുണ്ടാകില്ല. ചാനല്‍ പ്രവര്‍ത്തകര്‍ക്കാകട്ടെ (പരസ്യദാതാക്കള്‍ക്കും) ഒരു പരിപാടിയുടെ യഥാര്‍ഥ ജനപ്രീതി കൃത്യമായ കണക്കുകളിലൂടെ അറിയുകയുംചെയ്യാം. സാധാരണ ടിവിയിലും നിലവിലുള്ള കംപ്യൂട്ടറിലും ഐപിടിവി പരിപാടികള്‍ ആസ്വദിക്കാം. ടിവിയോ കംപ്യൂട്ടറോ മാറ്റേണ്ടതില്ല.

ഇഷ്ടമുള്ള വീഡിയോ ഇഷ്ടമുള്ള സമയത്ത്‌ എന്നതിനൊപ്പം ഇത്‌ ഒരു ടെലിഫോണ്‍കൂടിയായി പ്രവര്‍ത്തിക്കുമെന്നത്‌ അടുത്ത നേട്ടമാണ്‌. VoIP (Voice over IP) അനുസരിച്ചു പ്രവര്‍ത്തിക്കുന്ന ഇത്‌ വ്യക്തിഗത ആശയവിനിമയത്തിന്‌ ഉപയോഗിക്കാം. സേവന ത്രികം (Triple Service) ആണ്‌ ഐപിടിവി. അതായത്‌ ടെലിഫോണ്‍ , ടെലിവിഷന്‍ , ഇന്റര്‍നെറ്റ്‌ എന്നീ മൂന്നു സേവനങ്ങള്‍ ഒരൊറ്റ ചെമ്പുകമ്പിയിലൂടെ.
ഇ-കൊമേഴസ്‌ ചാനലിലൂടെ വിമാന-തീവണ്ടി ടിക്കറ്റ്‌ ബുക്ക്‌ചെയ്യാനും ആമസോണ്‍ , ഇബേ പോലുള്ള പോര്‍ട്ടലുകളില്‍നിന്ന്‌ ക്രയവിക്രയം നടത്താനും സാധിക്കും. ഇ-ഗവേണന്‍സ്‌, ഇ-മെഡിസിന്‍ പോലുള്ള സേവനങ്ങളും കൂടുതല്‍ ജനകീയമാക്കാന്‍ ഐപി ടിവി കാലം ഉപകരിക്കും. വിദ്യാഭ്യാസ പരിപാടികളെയാണ്‌ ഈ നവീനസൗകര്യം ഏറെ ഉപകാരമുള്ളതാക്കാന്‍ പോകുന്നത്‌. കേരള സര്‍ക്കാരിന്റെ ഐടി@സ്‌കൂള്‍ നിയന്ത്രണത്തിലുള്ള വിക്‌ടേഴ്‌സ്‌, ഇഗ്‌നോയുടെ ജ്ഞാന്‍ദര്‍ശന്‍ എന്നിവയുടെ സമയക്രമമാണ്‌ ഇന്ന്‌ പഠിതാക്കളെ വലയ്‌ക്കുന്നത്‌. ഐപിടിവിയുടെ വീഡിയോ ഓണ്‍ ഡിമാന്‍ഡ്‌ വഴി ഇഷ്ടാനുസരണമുള്ള പാഠഭാഗം സൗകര്യപ്രദമായി വീട്ടിലോ പള്ളിക്കൂടത്തിലോവച്ച്‌ കാണാമല്ലോ. ഇതുകൂടാതെ കാര്‍ഷിക അനുബന്ധ പരിപാടികളും കാലാവസ്ഥാ പ്രവചനവും കൃത്യമായ സ്ഥലത്ത്‌ കൃത്യതയോടെ എത്തിക്കാനുമാകും. വിദ്യാര്‍ഥികള്‍ക്കും കര്‍ഷകര്‍ക്കും ഇന്ററാക്ടീവ്‌ സൗകര്യം പ്രയോജനപ്പെടുത്തി സംശയനിവാരണം വരുത്താനും സാധിക്കും.
ഐപിടിവി കാലത്ത്‌ തത്സമയ സംപ്രേഷണത്തിനെ ഇഷ്ടസമയക്കാഴ്‌ച (Live TV to Time shift TV) പകരം വയ്‌ക്കുന്നു.

ഉപയോക്താവിന്റെ ഓഫീസ്‌/വീട്ടുവളപ്പില്‍വരെ എത്തുന്ന ഭൗതികമായ ടെലിഫോണ്‍ബന്ധം (physical copper line loop) ആണ്‌ ഐപിടിവിയുടെ മുഖ്യ വാഹകസംവിധാനം എന്നതിനാല്‍ ആരംഭകാലത്ത്‌ ഇതു വിന്യസിക്കുന്നതിന്‌ തടസ്സങ്ങള്‍ നേരിടുന്നുണ്ട്‌. ഒപ്പം ടെലിഫോണ്‍ എക്‌സ്‌ചേഞ്ചില്‍നിന്ന്‌ ടെലിഫോണ്‍ ഉപകരണംവരെയുള്ള ബന്ധത്തില്‍ സാങ്കേതിക ഭൗതിക തടസ്സങ്ങളും ഏറെയാണ്‌. നിലവില്‍ 50,000 ഐപിടിവി വരിക്കാരെ മാത്രമേ ലഭിച്ചിട്ടുള്ളു. അതേസമയം, 65 ദശലക്ഷം കേബിള്‍ ടിവി വരിക്കാരും 15 ദശലക്ഷം ഡിടിഎച്ച്‌ വരിക്കാരും ഉണ്ടെന്നത്‌ ഐപിടിവി ഇനിയും മുന്നേറാനുള്ള പാത വ്യക്തമാക്കുന്നു. 2012 ഓടെ ഒരു ദശലക്ഷം വരിക്കാരെയാണ്‌ ഐപിടിവി സേവനദാതാക്കളെല്ലാംകൂടി ലക്ഷ്യമിടുന്നത്‌.
മൈ വേ (my Way) എന്ന വാണിജ്യനാമത്തില്‍ പ്രാരംഭഘട്ടത്തില്‍ 54 നഗരങ്ങളിലായി ബിഎസ്‌എന്‍എല്‍ സേവനം ആരംഭിച്ചുകഴിഞ്ഞു. തിരുവനന്തപുരം, കൊച്ചി എന്നിവിടങ്ങളിലാണ്‌ കേരളത്തിലെ നിലവിലെ സേവനലഭ്യത. കേരളത്തില്‍ 35 ലക്ഷം അടിസ്ഥാനഫോണ്‍ വരിക്കാരുള്ളതിനാല്‍ വളര്‍ച്ചനിരക്ക്‌ ശോഭനമാകുമെന്നു പ്രതീക്ഷിക്കാം. ആദ്യഘട്ടത്തില്‍ 150 ജനപ്രീയ ചാനലുകള്‍ , പ്രത്യേക ഓഹരിവിലനിലവാര സൗകര്യങ്ങള്‍, യാത്രാനുബന്ധ സൗകര്യങ്ങള്‍ എന്നിവയാണ്‌ മൈ വേയിലൂടെ ബിഎസ്‌എന്‍എല്‍ പദ്ധതിയിടുന്നത്‌. ഐപിടിവി വരിക്കാരിലൂടെ ബ്രോഡ്‌ബാന്‍ഡ്‌ ഇന്റര്‍നെറ്റിനും വര്‍ധിച്ച പ്രചാരം കിട്ടുമെന്നത്‌ എടുത്തുപറയേണ്ട ഗുണഫലമാണ്‌.

Wednesday, September 09, 2009

ഇന്റര്‍നെറ്റിന്‌ 40 വയസ്

ശാസ്‌ത്ര സാങ്കേതിക വിദ്യയുടെ ചരിത്രത്തിലെ നിര്‍ണായകമായ ഒരു കണ്ടെത്തലിന്‌ 40 വര്‍ഷം തികഞ്ഞു. 1969 സെപ്‌തംബര്‍ രണ്ടിനാണ്‌ ഇന്റര്‍നെറ്റിന്റെ ആദിമരൂപത്തിന്‌ നാന്ദികുറിച്ചത്‌. ഇന്ന്‌ ഇന്റര്‍നെറ്റിന്റെയും ഫൈബര്‍ ഒപ്‌ടിക്കല്‍ ശൃംഖലകളുടെയും സഹായത്താല്‍ ഒരു മുഴുനീള ഫീച്ചര്‍ ചലച്ചിത്രംപോലും മിനിറ്റുകള്‍കൊണ്ട്‌ ലോകത്തിന്റെ ഓരു കോണില്‍ നിന്ന്‌ മറ്റൊരു കോണിലെത്തിക്കാം എന്നാല്‍ ആദ്യകാലങ്ങളിലെ സ്ഥിതിയോ?.
1857ലെ ഒന്നാം സ്വാതന്ത്ര്യസമരവാര്‍ത്ത അങ്ങ്‌ ബ്രിട്ടനിലെത്തിയത്‌ ഒരു മാസത്തിനു ശേഷമായിരുന്നു. എന്തിന്‌ നമ്മുടെ മഹാകവി കുമാരനാശാന്‍ മരിച്ചവിവരം വര്‍ത്തമാനപത്രങ്ങളിലെത്തിയത്‌ ദിവസങ്ങള്‍ക്കു ശേഷമായിരുന്നു എന്നത്‌ സമീപകാല ചരിത്രം. 1865 ഏപ്രില്‍ 14ന്‌ വാഷിങ്‌ടണിലെ ഫോര്‍ഡ്‌ തിയറ്ററിനു മുന്നില്‍ എബ്രഹാം ലിങ്കണ്‍ കൊല്ലപ്പെട്ട വാര്‍ത്ത യൂറോപ്പിലെത്തിയത്‌ നാലുദിവസം കഴിഞ്ഞായിരുന്നെങ്കില്‍ 2009ല്‍ മൈക്കേല്‍ ജാക്‌സന്റെ മരണവിവരം കേവലം നാലുമിനിട്ടിനുള്ളില്‍ പുറംലോകത്തെത്തി. മൈക്രോ ബ്ലോഗിങ്‌ സേവനമായ ട്വിറ്ററിലൂടെയായിരുന്നു ഇതു സാധ്യമായത്‌. 1800കളുടെ രണ്ടാം പകുതിയില്‍ പത്ര ഓഫീസുകളിലേക്ക്‌ വാര്‍ത്ത എത്തിയിരുന്നത്‌ മണിക്കൂറുകളുടെ പ്രയത്‌നംകൊണ്ട്‌ ടെലഗ്രാഫ്‌ വഴിയാണ്‌. ലിങ്കന്റെ മരണം പിറ്റേന്ന്‌ പുലര്‍ച്ചെ രണ്ടിന്‌ ഇറങ്ങിയ ന്യൂയോര്‍ക്‌ ഹെറാള്‍ഡ്‌ റിപ്പോര്‍ട്ട്‌ ചെയ്‌തത്‌ 9.30ന്‌ വെടിയേറ്റു എന്നാണ്‌. യഥാര്‍ഥത്തില്‍ 10 കഴിഞ്ഞ്‌ മിനിറ്റുകള്‍ക്കുശേഷമായിരുന്നു ദാരുണസംഭവം. അമേരിക്കയുടെ ചരിത്രത്തിലെ ഏറ്റവും വലിയ `ബ്രേക്കിങ്‌ ന്യൂസ്‌' പോലും എത്തിയത്‌ തെറ്റിയാണെന്നത്‌ ഇന്ന്‌ ഒരുപക്ഷേ അതിശയോക്തിയോടെയേ കാണാനാകൂ. സ്ഥലകാല സീമകള്‍ ഇല്ലാതാക്കാനാണല്ലോ മനുഷ്യന്‍ വിവരസാങ്കേതിക വിദ്യയിലൂടെ അനുദിനം ഇടപെട്ടുകൊണ്ടിരിക്കുന്നത്‌.

ഇന്റര്‍നെറ്റിന്റെ തുടക്കം:
ഇന്റര്‍നെറ്റിന്റെ ചരിത്രത്തിന്‌ അമേരിക്കന്‍-റഷ്യന്‍ ശീതസമരവുമായും ബന്ധമുണ്ടെന്നത്‌ ഒരുപക്ഷേ കൗതുകമാകാം. 1957ല്‍ ലോകത്തിലെ ആദ്യ കൃത്രിമഉപഗ്രഹം റഷ്യ വിക്ഷേപിച്ചതുമുതല്‍ അമേരിക്കന്‍ പ്രതിരോധവിഭാഗം അക്ഷമരായിരുന്നു. അര്‍പ (ARPA - Advanced Research Project Agency) എന്ന വകുപ്പുതന്നെ അമേരിക്ക സജ്ജമാക്കിയത്‌ ഗവേഷണത്തിലൂന്നിയ യുദ്ധസാമഗ്രികളും തന്ത്രങ്ങളും രൂപപ്പെടുത്താനായിരുന്നു. ഇതിന്‌ കംപ്യൂട്ടര്‍ശൃംഖലയും അവര്‍ പദ്ധതിയിട്ടു. ആണവ ആക്രമണംപോലുള്ള ബാഹ്യ കടന്നുകയറ്റങ്ങള്‍ ചെറുത്ത്‌ തങ്ങളുടെ രഹസ്യങ്ങളും മറ്റ്‌ അത്യാവശ്യ വിവരങ്ങളും കൈമാറാനായിരുന്നു കംപ്യൂട്ടര്‍ നെറ്റ്‌വര്‍ക്കിന്റെ സാധ്യത ആലോചിച്ചത്‌. ഇതിന്റെ പരിസമാപ്‌തിയായി 1969 സെപ്‌തംബര്‍ രണ്ടിന്‌ (40-ാം ആണ്ട്‌ തികഞ്ഞ ഈ വര്‍ഷം ഇത്‌ തിരുവോണദിവസം) ലൊസാഞ്ചലസിലുള്ള കാലിഫോര്‍ണിയ സര്‍വകാലാശാല ആസ്ഥാനത്തെ പരീക്ഷണശാലയില്‍ ആദ്യ ഡാറ്റ വിനിമയംചെയ്‌തു. അര്‍പാനെറ്റ്‌ എന്നാണ്‌ ഈ കംപ്യൂട്ടര്‍ കൂട്ടുകെട്ടിന്റെ പേര്‌. ഒക്‌ടോബര്‍ 29ന്‌ പുറത്തേക്കുള്ള ആദ്യ സന്ദേശം അയച്ചു. മനുഷ്യരാശിയുടെ വാര്‍ത്താവിനിമയ ചരിത്രത്തിലെ തിളങ്ങുന്ന അധ്യായത്തിന്റെ തുടക്കംകുറിക്കാന്‍ 1969നായി. ഇതേവര്‍ഷംതന്നെയാണ്‌ മനുഷ്യന്‍ ചന്ദ്രനില്‍ കാലുകുത്തിയതെന്നത്‌ മറ്റൊരു യാദൃച്ഛികത. 1969ല്‍തന്നെ അമേരിക്കയിലെ സ്‌റ്റാന്‍ഫഡ്‌, ഉട്ടാ എന്നീ വിദ്യാഭ്യാസ സ്ഥാപനങ്ങളും ശൃംഖലയില്‍ കണ്ണിചേര്‍ന്നു. തൊട്ടടുത്തവര്‍ഷം രണ്ട്‌ അമേരിക്കന്‍തീര പട്ടണങ്ങള്‍വരെ ദൂരത്തില്‍ അര്‍പാനെറ്റ്‌ ശൃംഖല വ്യാപിച്ചു. പിന്നീടിങ്ങോട്ട്‌ ഇതൊരു മഹാശൃംഖലയായി പടര്‍ന്നു പന്തലിക്കുകയായിരുന്നു. ഇ-മെയില്‍ ടിസിപി/ഐപി പ്രോട്ടോകോള്‍ എന്നിവ തൊട്ടുപിന്നാലെയെത്തിയത്‌ ഒരു പുതിയ ആശയവിനിമയ ഉപാധിയെന്ന നിലയില്‍ ഇന്റര്‍നെറ്റിനെ കരുത്തുറ്റതാക്കി.
പക്ഷേ തൊണ്ണൂറുകളിലാണ്‌ വാണിജ്യപരമായും വിദ്യാഭ്യാസ ആവശ്യങ്ങള്‍ക്കുമായി ഇന്റര്‍നെറ്റ്‌ ജനകീയമായത്‌. ഇന്ന്‌ ഇ-മെയില്‍ വിലാസം ഇല്ലാത്തവരോ അല്ലെങ്കില്‍ വെബ്‌സൈറ്റ്‌ ഇല്ലാത്ത സ്ഥാപനങ്ങളോ പതിറ്റാണ്ടുകള്‍ക്കു പിന്നില്‍ നടക്കുന്നവരെന്നു കരുതുന്നവര്‍ ധാരാളം. 2008ലെ കണക്കനുസരിച്ച്‌ 150 കോടി ഇന്റര്‍നെറ്റ്‌ ഉപയോക്താക്കളുണ്ട്‌. ഇന്റര്‍നെറ്റ്‌ പൗരന്മാരുടെ എണ്ണത്തില ചൈന അമേരിക്കയെ മറികടന്നു എന്നതാണ്‌ ഏറ്റവും പുതിയ വര്‍ത്തമാനം.

ഇന്ത്യയും ഇന്റര്‍നെറ്റും:

1986ല്‍ ഭാരതസര്‍ക്കാരിന്റെ നേതൃത്വത്തില്‍ ബംഗളൂരു IISc, വിവിധ IITകള്‍ എന്നിവയുടെ സഹായത്തോടെ ഒരു ശൃംഖല തുടങ്ങാനുള്ള ശ്രമം തുടങ്ങിയിരുന്നു. 1987ല്‍ ഐബിഎം മെയിന്‍ ഫ്രെയിം കൂട്ടിയിണക്കാനായി കചഉഛചഋഠ നിലവില്‍വന്നിരുന്നു. എങ്കിലും 1995 ആഗസ്‌ത്‌ 15ന്‌ അന്ന്‌ പൊതുമേഖലാ സ്ഥാപനമായിരുന്ന VSNL (വിദേശ്‌ സഞ്ചാര്‍ നിഗം ലിമിറ്റഡ്‌- 2002ല്‍ ഇത്‌ വിറ്റഴിച്ചു. ഇപ്പോള്‍ ടാറ്റാ ഗ്രൂപ്പ്‌ നിയന്ത്രണത്തില്‍)മുംബൈയില്‍ വാണിജ്യരീതിയിലുള്ള സേവനം തുടങ്ങി. സേവനം നല്‍കുന്നത്‌ VSNL ആണെങ്കിലും BSNL, MTNL ലൈന്‍ വഴിയായിരുന്നു ബന്ധം സാധ്യമാക്കിയത്‌. ഡയല്‍ അപ്‌ ഇന്റര്‍നെറ്റിന്‌ ഫോണ്‍ ഉപയോഗത്തിനുള്ള തുക ടെലികോം സ്ഥാപനത്തിനും ഇന്റര്‍നെറ്റ്‌ ഉപയോഗ തുക ISP ക്കും കൊടുക്കണമായിരുന്നു. 1989ല്‍ ഇന്ത്യയില്‍നിന്ന്‌ ആദ്യ പരീക്ഷണ ഇന്റര്‍നെറ്റ്‌ ബന്ധം അമേരിക്കയിലേക്ക്‌ ആരംഭിക്കുമ്പോള്‍ കേവലം 9.6 കിലോ ബെറ്റ്‌സ്‌ പ്രതി സെക്കന്റ്‌ എന്നതായിരുന്നു വിവരവിനിമയ നിരക്ക്‌. ഇത്‌ 64 സയു െ ആകാന്‍ മൂന്നുവര്‍ഷമെടുത്തു. ഇന്ന്‌ ഒരു സാധാരണ ഉപയോക്താവിന്റെ വീട്ടിലേക്ക്‌ ബ്രോഡ്‌ബാന്‍ഡ്‌ സേവനം എത്തുന്നത്‌ 2 mbps നിരക്കിലാണ്‌.
ഇപ്പോള്‍ ബാങ്കിങ്‌, ഹോസ്‌പിറ്റല്‍ സേവനം (ടെലി മെഡിസിന്‍),വിദ്യാഭ്യാസ പദ്ധതികള്‍ എന്നിവ രൂപപ്പെടുന്നതും വിന്യസിക്കുന്നതും ഇന്റര്‍നെറ്റിനെക്കൂടി മുന്നില്‍ക്കണ്ടാണ്‌. ബ്ലോഗിങ്‌, യൂട്യൂബ്‌, വിക്കിപീഡിയ, ട്വിറ്റര്‍ എന്നിവ ഇ-മെയില്‍പോലെത്തന്നെ ജനകീയമായി.

ആദ്യ 50 ദശലക്ഷം ജനങ്ങളിലെത്താനെടുത്ത സമയം:
റേഡിയോ - 38 വര്‍ഷം
ടെലിവിഷന്‍ - 13 വര്‍ഷം
ഇന്റര്‍നെറ്റ്‌ - 4 വര്‍ഷം
ഐപോഡ്‌ - 3 വര്‍ഷം
ഫേസ്‌ & ഒര്‍ക്കുട്ട്‌ - 9 മാസമോ അതില്‍ കുറവോ!
ഫേസ്‌ബുക്ക്‌ അംഗങ്ങളെ ഒരു രാജ്യത്തെ ജനസംഖ്യയായെടുത്താല്‍ ലോകത്തിലെ ഏറ്റവും വലിയ നാലാമത്തെ ജനസംഖ്യ ഫേസ്‌ബുക്ക്‌ എന്ന സോഷ്യല്‍ നെറ്റ്‌വര്‍ക്കിങ്‌ വെബ്‌സൈറ്റാണ്‌.

പേരിനു പിന്നില്‍
വളരെ കൗതുകകരമായാണ്‌ ഇന്റര്‍നെറ്റിന്‌ സൈബര്‍ സ്‌പെയ്‌സ്‌ (Cyber Space) എന്ന പേരു കിട്ടിയത്‌. കനേഡിയന്‍ ശാസ്‌ത്ര കല്‍പ്പിത കഥാകാരനായ വില്യംഗിബ്‌സണ്‍ 1980ന്റെ തുടക്കത്തില്‍ എഴുതിയ ഒരു കൃതിയിലെ ആശയത്തിനിട്ട പേരായിരുന്നു ഇത്‌. കനഡയിലെ വാന്‍കോവര്‍ നഗരത്തിലൂടെ നടക്കുമ്പോള്‍ വീഡിയോ ഗെയിം ശ്രദ്ധയില്‍പ്പെട്ടു. ഒരു കംപ്യൂട്ടറില്‍നിന്ന്‌ അടുത്തതോ വിദൂരസ്ഥമായതോ ആയ മറ്റൊരു കംപ്യൂട്ടറുമായോ ഊളിയിട്ട്‌ പോകാനാകുമെന്ന്‌ കണക്കുകൂട്ടുകയും ഒരു കൃതി എഴുതുകയും ചെയ്‌തു. കംപ്യൂട്ടര്‍ മോണിറ്ററിന്റെ പിന്നില്‍ അദൃശ്യമായ ഒരു മണ്ഡലം സ്ഥിതിചെയ്യുന്നുണ്ടെന്ന്‌ കണക്കുകൂട്ടിയാണ്‌ ഇദ്ദേഹം എഴുതിയത്‌. പിന്നീടിങ്ങോട്ട്‌ ഇന്റര്‍നെറ്റിന്റെ സൂപ്പര്‍ഹിറ്റ്‌ പേരുകളിലൊന്നായി മാറുകയായിരുന്നു സൈബര്‍ സ്‌പെയ്‌സ്‌ എന്ന പദം.

ഇന്റര്‍നെറ്റിന് 40 വര്‍ഷം ആയ വിവരം ശ്രീ.ജോസഫ് ആന്റണിയുടെ ബ്ലോഗ്: കുറിഞ്ഞിഓണ്‍ലൈനിലും ഉണ്ട്. അത് വായിക്കാന്‍ ഇവിടെ ക്ലിക്ക് ചെയ്യുക

Saturday, June 20, 2009

വെബ്‌ 2.0: ഇംഗ്ലീഷ്‌ ഭാഷയിലെയും നാഴികക്കല്ല്‌

ആംഗലേയ ഭാഷയിലെ പദസമ്പത്ത്‌ ഒരു ദശലക്ഷം പിന്നിട്ടത്‌ ഇന്റര്‍നെറ്റ്‌ വ്യവഹാരത്തിലെ `വെബ്‌ 2.0' എന്ന പദത്തെ ഭാഷയിലേക്കു മുതല്‍ക്കൂട്ടിക്കൊണ്ടായിരുന്നു. വെബ്‌ ടു പോയിന്റ്‌ സീറോ എന്ന പദത്തിന്‌ `The next generation of webproducts and services, comin soon to a browser near you' എന്നാണ്‌ നിഘണ്ടു നല്‍കിയിരിക്കുന്ന വിശദീകരണം. ഗ്ലോബല്‍ ലാംഗ്വേജ്‌ മോണിറ്റര്‍ എന്ന കൂട്ടായ്‌മയാണ്‌ പദങ്ങളെ ഭാഷയിലേക്ക്‌ സ്വാംശീകരിച്ച വിവരം പ്രസിദ്ധപ്പെടുത്തിയത്‌. ഇവരുടെ കണക്കുപ്രകാരം ഓരോ 98 മിനിറ്റിലും ഓരോ വാക്കുകള്‍ ആംഗലേയവാണിയിലേക്കെത്തുന്നു, അതായത്‌ ദിനംപ്രതി 14.7 വാക്കുകള്‍.

ദശലക്ഷം പദവിതൊടാന്‍ മത്സരിച്ച വാക്കുകള്‍ക്കും ഉണ്ട്‌ പ്രത്യേകത. ജയ്‌ഹോ, സ്ലംഡോഗ്‌ എന്നീ ഇന്ത്യന്‍ വാക്കുകളും അവസാനറൗണ്ടില്‍ ഉണ്ടായിരുന്നു. ഇംഗ്ലീഷ്‌ ഭാഷയ്‌ക്ക്‌ മറ്റു ഭാഷകളിലെ ജനകീയപദങ്ങളെ സ്വന്തമാക്കി ശക്തിയും പ്രൗഢിയും വര്‍ധിപ്പിക്കുന്ന രീതി വളരെ നേരത്തെ ഉണ്ടല്ലോ? നമ്മുടെ മലയാളത്തിലെ coir, copra എന്നിവ ഇംഗ്ലീഷ്‌ നേരത്തെ സ്വന്തമാക്കിയിരുന്നു. ahimsa, guru, avtar, thali തുടങ്ങി ഒട്ടേറെ ഇന്ത്യന്‍പദങ്ങള്‍ ഇത്തരത്തില്‍ ആംഗലേയം സ്വരുക്കൂട്ടിയിട്ടുമുണ്ട്‌. എന്നാല്‍, ഒരു ദശലക്ഷം തികയ്‌ക്കുന്ന വേളയില്‍ എത്തിയ വാക്കുകളിലും ഈ കഴിഞ്ഞ ദശകത്തില്‍ ഇംഗ്ലീഷിലേക്കെത്തുന്ന വാക്കുകളുടെ കാര്യത്തിലും ടെക്‌നോളജിക്ക്‌ പൊതുവിലും വിവരസാങ്കേതികവിദ്യയ്‌ക്ക്‌ പ്രത്യേകിച്ചും കാര്യമായ സംഭാവനയുണ്ട്‌. www, home page, googling, pull down menu തുടങ്ങിയ വാക്കുകള്‍ സാധാരണ ഉപയോഗത്തില്‍വരെ ഇന്ന്‌ പരിചിതമാണ്‌.

ഒരു ദശലക്ഷം പദവി സ്വന്തമാക്കാനിടയുള്ള വാക്കുകളെ `ഗ്ലോബല്‍ ലാംഗ്വേജ്‌ മോണിറ്റര്‍' ആദ്യം പരസ്യപ്പെടുത്തി. ഇവയില്‍നിന്ന്‌ ഒരോപദത്തിന്റെയും ആഴം, വൈപുല്യം എന്നിവ ശാസ്‌ത്രീയമായി കണക്കാക്കി. പദം എത്രമാത്രം ആഴത്തില്‍ വേരോടിയിട്ടുണ്ട്‌ എന്നറിയാന്‍ ആഗോളമാധ്യമങ്ങളില്‍ ഈ പദം എത്രപ്രാവശ്യം പ്രത്യക്ഷപ്പെട്ടുവെന്നത്‌ തിട്ടപ്പെടുത്തി, വിപുലത മനസ്സിലാക്കാന്‍ ഏതൊക്കെ ദേശങ്ങളില്‍ (geographic extent of word usage) ഈ വാക്ക്‌ പ്രചുരപ്രചാരം നേടിയെന്നും അളന്നു. ഇതിനുശേഷമാണ്‌ പട്ടികയിലേക്ക്‌ ഓരോ വാക്കിനേയും ചേര്‍ത്തത്‌. സ്ലംഡോഗ്‌ മില്ല്യനെയര്‍ എന്ന ഇന്ത്യന്‍ പശ്‌ചാത്തലമുള്ള സിനിമയിലൂടെ മത്സരാര്‍ഥിയാകാന്‍ ഭാഗ്യംലഭിച്ച ഇന്ത്യന്‍ വാക്കുകളായ Jaiho! യും slum Dog ഉം ഫോട്ടോ ഫിനിഷിലാണ്‌ ഒരു ദശലക്ഷം തൊടാതെ പോയത്‌.

ജയ്‌ഹോ രണ്ടാംസ്ഥാനവും (9,99,999-ാം വാക്ക്‌) സ്ലംഡോഗ്‌ നാലാംസ്ഥാനവും നേടിയെങ്കില്‍ അവസാനപട്ടികയിലിടംപിടിച്ച മറ്റുവാക്കുകള്‍ അറിയുന്നത്‌ രസകരമാണ്‌. N00b എന്ന വാക്ക്‌ (N നുശേഷം രണ്ട്‌ `ഒ' അല്ല മറിച്ച്‌, രണ്ട്‌ പൂജ്യ ആണ്‌!) അക്ഷരങ്ങളും അക്കങ്ങളും ചേര്‍ന്ന കൗതുകവാക്കായി. ഓണ്‍ലൈന്‍ കംപ്യൂട്ടര്‍ ഗെയിമിലേക്ക്‌ എത്തുന്ന പുതിയ ഉപയോക്താവിനെക്കുറിക്കുന്ന പദമാണ്‌ N00b. sexting എന്നതാണ്‌ മറ്റൊരു വാക്ക്‌. അശ്ലീലച്ചുവയുള്ള (sexual text) ഇമെയില്‍ സന്ദേശത്തെയാണ്‌ ഇത്‌ അര്‍ഥമാക്കുന്നത്‌.

വെബ്‌ 2.0ക്കുശേഷം പദകോശത്തിലേക്കു പടികടന്നെത്തിയത്‌ Financial Tsunami എന്ന വാക്കാണ്‌. ആഗോളസാമ്പത്തികമാന്ദ്യം പദസമ്പത്തിന്‌ ഒരു മാന്ദ്യവും വരുത്തിയില്ല എന്ന്‌ അനുമാനിക്കാം! ഇതുകൂടാതെ Cloud Computing എന്ന പദവും അവസാനമായി ചേര്‍ത്ത കംപ്യൂട്ടര്‍ സംബന്ധിയായ പദങ്ങളിലൊന്നാണ്‌. പരിസ്ഥിതി സാങ്കേതികപദങ്ങളും കടന്നുവന്നിട്ടുണ്ട്‌. Carbon neutral (an effort to stem climate change), Green washing (rebranding an old product as environment friendly) എന്നിവ സമീപകാല ഉദാഹരണങ്ങള്‍. Blog, byte, e-mail, wiki, spam, twitter, tweets, googlism എന്നിവ വളരെയടുത്തകാലത്ത്‌ എത്തിയ പദങ്ങളാണ്‌. ഇന്റര്‍നെറ്റിന്റെ വര്‍ധിച്ച സ്വീകാര്യതയാണ്‌ ഇത്തരം സാങ്കേതികവിദ്യാധിഷ്‌ഠിത പദത്തിന്റെ വന്നുചേരലില്‍ ഭവിക്കുന്നത്‌.

ഇന്റര്‍നെറ്റിന്റെ ഭാഷയായി ഇംഗ്ലീഷ്‌ വളര്‍ന്നുവന്ന്‌ സാംസ്‌കാരിക സാമ്രാജ്യത്വം (Cultural imperialism) ഉണ്ടാക്കുമെന്ന്‌ ഒരുകൂട്ടര്‍ വാദിക്കുമ്പോള്‍ നേരെമറിച്ച്‌, സാംസ്‌കാരിക നിര്‍മമത (cultural neutrality) ആണ്‌ സംഭവിക്കുകയെന്ന്‌ മറുകൂട്ടര്‍. ഇംഗ്ലീഷ്‌ (UK & USA) രണ്ടുതരത്തില്‍തന്നെയാണ്‌ ആഗോളതലത്തില്‍ ഉപയോഗിക്കുന്നത്‌. (എന്തിന്‌ കംപ്യൂട്ടറിലേക്ക്‌ ഓരോ ആപ്ലിക്കേഷന്‍ കൂട്ടിച്ചേര്‍ക്കുമ്പോഴും UK English വേണോ US English വേണോ!)

'England and America are two countries divided by a common language' എന്ന്‌ സാക്ഷാല്‍ ബര്‍ണാഡ്‌ ഷാ തട്ടിവിട്ടത്‌ ചുമ്മാതെയല്ല. യുകെ ഇംഗ്ലഷീഷ്‌ മാത്രമേ ഉപയോഗിക്കൂ എന്ന്‌ ശഠിക്കുന്നവരുടെ ഇടയിലേക്ക്‌ ഇന്റര്‍നെറ്റിന്റെ ചാരംപറ്റി യുഎസ്‌ ഇംഗ്ലീഷ്‌ മേല്‍ക്കോയ്‌മ നേടുന്നു എന്നത്‌ വിസ്‌മരിക്കരുത്‌. ഒരു ഉദാഹരണം ഇതാ! എഴുത്തിന്‌ Mail എന്ന്‌ US English, Post എന്ന്‌ സമാനമായ യുകെ ഇംഗ്ലീഷും. Mailbox എന്ന്‌ ഒരു കൂട്ടര്‍ Post box എന്ന്‌ മറുഭാഗം. ഇതില്‍നിന്നും Mail carrier ഉം Post Man ഉം എന്ന രണ്ടാളും വന്നു! എന്നാല്‍, ഇന്റര്‍നെറ്റ്‌ എഴുത്തിന്‌ e-mail എന്ന പേര്‌ യു.കെ യില്‍പോലും സാര്‍വത്രികാംഗീകാരം ലഭിച്ചത്‌ മുന്‍പിന്‍ നോക്കാതെയാണ്‌! നോക്കണേ ഇന്റര്‍നെറ്റുവഴി ഒരു ഭാഷാ നുഴഞ്ഞുകയറ്റം. ഇത്തരത്തില്‍ ഇന്റര്‍നെറ്റിന്റെ പിന്നാമ്പുറത്തുകൂടി ഇംഗ്ലീഷ്‌ ഭാഷയുടെ പൂമുഖത്ത്‌ കസേരവലിച്ചിട്ട്‌ ഗമയില്‍ ഇരിപ്പുറപ്പിക്കാനെത്തുന്ന പദങ്ങളുടെ എണ്ണം കൂടുമെന്ന കാര്യത്തില്‍ തര്‍ക്കമുണ്ടാകുമെന്ന്‌ തോന്നുന്നില്ല.

Thursday, March 26, 2009

സേവ് ഭൂമി

എര്‍‌ത്ത് അവര്‍ എന്ന പേരില്‍ ആഗോളതാപനത്തിനെതിരെ ബോധവല്‍ക്കരണം രാജ്യാന്തരതലത്തില്‍ തന്നെ നടക്കുകയാണ്. ഇതിന്റെ ഭാഗമായി മാര്‍ച്ച് 28ന് രാത്രി 8.30 മുതല്‍ ഒരു മണിക്കൂര്‍നേരം വൈദ്യുതി
വിളക്കുകളും ദീപാ‍ലങ്കാരങ്ങളും
ഒഴിവാക്കുന്നു.
ഭൂമിയ്‌ക്കായ് ഒരു മണിക്കൂര്‍എന്ന പ്രചരണം വേള്‍ഡ് വൈഡ്
ഫണ്ട് ഫോര്‍നേച്ചറിന്റെ(WWF) നേതൃത്വത്തില്‍ വ്യക്‍തികള്‍, വാണിജ്യസ്ഥാപനങ്ങള്‍, സര്‍ക്കാരുകള്‍, സര്‍ക്കാരിതര
സ്ഥാപനങ്ങള്‍
എന്നിവയുടെ സഹകരണത്തോടെയാണ് നടപ്പാക്കുന്നത്. ഇത്തവണ
നൂറ് കോടി പേരിലേക്ക് ആഗോളതാപനം
ചെറുക്കാനുള്ള
സന്ദേശം എത്തിക്കുന്നത്.
2007 ല്‍ സിഡ്‌നിയില്‍ സംരഭത്തിന് നാന്ദിക്കുറിക്കുമ്പോള്‍ ഇരുപത്തിരണ്ട് ലക്ഷം പേര്‍ പങ്കാളികളായി തൊട്ടടുത്ത വര്‍ഷം അന്‍പത് ലക്ഷം പേരും പങ്കെടുത്തതിന്റെ ആത്മവിശ്വാസത്തിലാണ് ഈ വര്‍ഷം ആഗോളതാപനത്തിന്റെ കെടുതികള്‍ ബോധ്യപ്പെടുത്തുന്ന പരിപാടി ഒരു ബില്യണ്‍ എന്ന് ലക്ഷ്യമിട്ടത്.

രാത്രി
സമയത്ത് മുപ്പത് മിനിട്ട് വൈദ്യുതി ക്രമീകരണം നടത്താനായി
കെ.എസ്.ഇ.ബി നിര്‍ബന്ധിതരായത് രൂക്ഷമായ വൈദ്യുതക്ഷാമത്തെത്തുടര്‍ന്നാണങ്കില്‍ ഇവിടെ ഒരു മണിക്കൂര്‍ വൈദ്യുതിവിളക്കുകള്‍ ഓഫാക്കി അഗോളതലത്തില്‍തന്നെ വ്യക്തികളും സ്ഥാപനങ്ങളും സഹകരിക്കുന്നത് സ്വമേധയാ ആണെന്ന പ്രത്യേകതയുണ്ട്.
ഇതാദ്യമായാണ് ഇന്ത്യ എര്‍ത്ത് അവറില്‍പങ്കാളിത്തം
പ്രഖ്യാപിക്കുന്നത്.
അമീര്‍ഖാനും സുരേഷ് ഗോപിയുമൊക്കെ അടങ്ങുന്ന
താരനിരയും സന്ദേശപ്രചാരണ
പ്രവര്‍ത്തനങ്ങളില്‍പങ്ക് ചേരുന്നുണ്ട്.
ഇതിനോടകം തന്നെ
81 രാജ്യങ്ങളിലെ 1850 ലേറെ നഗരങ്ങള്‍ വിളക്കണച്ച് ഭുമിയമ്മയ്‌ക്കായ് ഒരുമിക്കാന്‍മുന്നോട്ട് വന്നു
കഴിഞ്ഞു.
2008 ലെ എര്‍ത്ത് അവറിന്റെ വിശദാംശങ്ങളും പങ്കാളിത്ത രാജ്യങ്ങളുടെയും
വ്യക്തികളുടെയും രേഖ ഈ വര്‍ഷം
ഡിസംബറില്‍ കോപ്പന്‍‌ഗേഹനില്‍ വച്ച് നടക്കുന്ന ഗ്ലോബല്‍ ക്ലൈമറ്റ് ചെയ്‌ഞ്ച് കോണ്‍ഫറന്‍സില്‍ അവതരിപ്പിച്ച്
തുടര്‍പ്രവര്‍ത്തനങ്ങള്‍ക്ക്
ലോകനേതാക്കളുടെ
ശ്രദ്ധക്ഷണിക്കുകയും ചെയ്യും.

വൈദ്യുതിയും
ആഗോളതപനവുമായി അഗാധമായ ബന്ധമാണുള്ളത്. കേരളത്തില്‍
വൈദ്യുതിയ്‌ക്കായ് ജലവൈദ്യുതപദ്ധതികളെയാണ് ഇതു വരെ മുഖ്യമായും ആശ്രയിക്കുന്നതെങ്കില്‍ ദേശീയതലത്തിലും മറ്റ് രാജ്യങ്ങളിലും താപവൈദ്യുത നിലയങ്ങളെയാണ് പ്രയോജനപ്പെടുത്തുന്നത്. ഇതാകട്ടെ ആഗോളതാപനത്തിന് കാരണമാകുന്ന വാതകങ്ങളാണ് കനത്ത തോതില്‍പുറന്തള്ളുന്നത്. അതായത് ഒരു ലൈറ്റ് അണച്ചാല്‍അത്രയും
ഹരിതഗൃഹവാതകങ്ങള്‍ഭൂമിയിലേക്ക് ഭൌമാന്തരീക്ഷത്തിലേക്ക് വമിക്കുന്നത് കുറയ്‌ക്കാനായി
എന്ന് സാ‍രം
.

നമുക്ക് എന്തു ചെയ്യാനാകും:

·
ഊര്‍ജക്ഷമതകൂടിയ
സി.എഫ്.എല്‍
, എല്‍.ഇ.ഡി വിളക്കുകള്‍ എന്നിവ പ്രചരിപ്പിക്കുക, ഉപയോഗിക്കുക.

·
വീട്ടിലും അയല്‍ക്കാരോടും
ആഗോളതാപനത്തിന്റെ കെടുതികള്‍പറഞ്ഞുകൊടുക്കുക
, ‘എര്‍ത്ത്
അവറി
ല്‍പരമാവധി പേരെ പങ്കെടുപ്പിച്ച് ഒരു നല്ല അവധിക്കാലത്തിന് തുടക്കം കുറിക്കാമല്ലോ.

·
പകല്‍സമയം സ്വഭാവിക
വെളിച്ചവും കാറ്റും മുറികളില്‍കടക്കാനനുവദിച്ചാല്‍വലിയൊരളവ് വൈദ്യുതി ഈ വേനല്‍ക്കാലത്ത്
ലാഭിക്കാം.

·
പീക്ക് ലോഡ്
(
6 പി.എം മുതല്‍ 10 പി.എം
വരെ)

സമയത്ത് ഫ്രിഡ്‌ജ് ഓഫാക്കി ഇടുന്നത് കൊണ്ട്
അതിനുള്ളിലെ ആഹാരസാധനങ്ങള്‍ക്കും മറ്റും കേട്പാട്
സംഭവിക്കില്ല്ല. ഫ്രിഡ്‌ജിന്റെ
ആയുസ് കൂടുന്നത് മാത്രമല്ല വൈദ്യുത
ബില്ലിലും
കാര്യമായ കുറവുണ്ടാകും. ഈ സമയത്ത് എല്ലായ്‌പ്പോഴും ഫ്രിഡ്‌ജ്
ഡോര്‍തുറക്കുന്നതും അടയ്‌ക്കുന്നതു ഒഴിവാക്കിയാല്‍മതിയാകും.

·
.
എര്‍ത്ത് അവറിന്റെ ചിത്രങ്ങളും റിപ്പോര്‍ട്ടുകളും
തയാറാക്കുക