Thursday, March 25, 2010

ഒരു മണിക്കൂര്‍ വിളക്കുകള്‍ കെടുത്തി ഭൌമ മണിക്കൂറില്‍ പങ്കുചേരാം

ഗുരുതരമായ ഒരു ഊര്‍ജ-പരിസ്ഥിതി പ്രതിസന്ധിയെ നേരിടാന്‍ നാമെല്ലാം സജ്ജരായിക്കഴിഞ്ഞു. ഒരോ ദിനം ചെല്ലുന്തോറും വൈദ്യുതിയെ ആശ്രയിച്ചുള്ള നമ്മുടെ പ്രവര്‍ത്തനം കൂടിക്കൂടി വരുന്നു, എന്നാല്‍ അതിനനുസരിച്ച് ഉത്പാദനം ശക്തിപ്പെടുന്നുമില്ല. ഇപ്പോള്‍ ലഭ്യമായ വൈദ്യുതി തന്നെ കടുത്ത പാരിസ്ഥിതിക പ്രശ്നങ്ങളാണ് സൃഷ്ടിച്ചുകൊണ്ടിരിക്കുന്നത്. കാലം തെറ്റിയ കാലാവസ്ഥയും, ശരീരം പൊള്ളുന്ന ചൂടും ഒക്കെ ഈയടുത്ത ദിവസത്തെ വാര്‍ത്തയാണങ്കില്‍ അതിന് മുഖ്യകാരണക്കാരന്‍ നമ്മള്‍ അനിയന്ത്രിതമായി ഉപയോഗിക്കുന്ന ഊര്‍ജരൂപങ്ങള്‍ തന്നെ. വൈദ്യുതോത്പാദന കേന്ദ്രമായാലും മോട്ടോര്‍ വാഹനങ്ങളായാലും പുറത്തേക്ക് വമിപ്പിക്കുന്നത് അന്തരീക്ഷതാപനിലയെ താറുമാറാക്കാന്‍ സാധ്യതയുള്ള ഹരിതഗൃഹവാതകങ്ങളാണ്.
എങ്ങനെ നമ്മുടെ ഭൂമിയമ്മയെ ഈ വിപത്തില്‍ നിന്ന് രക്ഷിക്കാം?
ആകെയുള്ള പോം വഴി മുഖ്യമായും മൂന്നെണ്ണമാണ്

1.കുറഞ്ഞ കാര്‍ബണ്‍ മാത്രം പുറത്തേക്ക് വിടുന്ന ഊര്‍ജ സ്രോതസുകളിലേക്ക് മാറുക . ബദല്‍ ഊര്‍ജ സ്രോതസുകളിലേക്ക് മാറാനുള്ള സമയമായി. ഇത് സ്വയം പുതുക്കപ്പെടുന്നവയാണ്. എന്നാല്‍ ഇന്ന് ലോകമാകമാനം വൈദ്യുതോത്പാദനത്തിനായി ആശ്രയിക്കുന്നത് ഖനിജ ഇന്ധനങ്ങളെ കുടിച്ചുതീര്‍ത്ത് പ്രവര്‍ത്തിക്കുന്ന താപവൈദ്യുത നിലയങ്ങളെയാണ്, ഇവയാകട്ടെ ടണ്‍ കണക്കിന് ഹരിതഗൃഹവാതകങ്ങളാണ് ഒരോ നിമിഷത്തിലും ഒരോ കേന്ദ്രങ്ങളില്‍ നിന്നും പല പുകക്കുഴലുകളീലൂടെ പുറത്തേക്ക് വമിപ്പിക്കുന്നത്.
2.വളരെ കുറച്ച് ഊര്‍ജം മാത്രം എടുക്കുന്ന ഉപകരണങ്ങളിലേക്ക് മാറുക . വെളിച്ചത്തിനായി സി എഫ് അല്ലെങ്കില്‍ എല്‍ ഇ ഡി വിളക്കുകള്‍ , ടെലിവിഷന്റെ കാര്യത്തില്‍ എല്‍ സി ഡി, കമ്പ്യൂട്ടറിന്റെ കാര്യത്തില്‍ ലാപ്ടോപ്പും നെറ്റ്ബുക്കുകളും ,നാലോ അതില്‍ കൂടുതലോ നക്ഷത്രചിഹ്നമുള്ള വീട്ടുപകരണങ്ങള്‍ ,പ്രതി ലിറ്റര്‍ എണ്ണയില്‍ 70 കി മീ ലേറെ ദൂരം സഞ്ചരിക്കാന്‍ സാധിക്കുന്ന മോട്ടോര്‍ ബൈക്കുകള്‍ എന്നിവ ഉദാഹരണം മാത്രം
3.കുറഞ്ഞ കാര്‍ബണ്‍ കാല്പാട് ഉണ്ടാക്കുന്ന ജീവിത ശൈലി പിന്തുടരുക, : പ്രകൃതി സൌഹൃദമായി ജീവിക്കാന്‍ മറ്റുള്ളവരേയും പ്രേരിപ്പിക്കുക. കുറഞ്ഞ കാര്‍ബണ്‍ കാല്പാട് കൊണ്ടുദ്ദേശിച്ചത് പരമാവധി കുറവ് ഊര്‍ജം മാത്രം ഉപയോഗിക്കുന്ന ഉപകരണമോ സേവനമോ സ്വീകരിക്കുക എന്നതാണ്, സംരക്ഷിക്കാന്‍ കഴിയുന്ന ഒരോ യൂണിറ്റ് ഊര്‍ജത്തിനും പുറത്തേക്ക് വിടുന്ന കാര്‍ബണിന്റെ അളവില്‍ ഗണ്യമായ കുറവ് വരുത്താനാകും എന്ന് സാരം.

എന്തിനാണ് ഈ ഭൌമ മണിക്കൂര്‍ ആചരണം :
ഈ വര്‍ഷം മാര്‍ച്ച് 27 ന് രാത്രി 8.30 മുതല്‍ 9.30 വരെയാണ് നമ്മുടെ നാട്ടില്‍ എര്‍ത്ത് അവര്‍ അഥവാ ഭൌമ മണിക്കൂര്‍ ആയി ആചരിക്കുന്നത്. ഈ ഒരു മണിക്കൂര്‍ സമയത്ത് എല്ലാ വൈദ്യുത വിളക്കുകളും കെടുത്തി നമ്മള്‍ ഈ യത്നത്തില്‍ പങ്കാളിയാകുന്നു. വേള്‍ഡ് വൈഡ് ഫണ്ട് ഫോര്‍ നേച്ചര്‍ എന്ന പരിസ്ഥിതി സംഘടനയുടെ ആഭിമുഖ്യത്തില്‍ ലോകവ്യാപകമായി 6000 നഗരങ്ങളിലായി നൂറുകോടിയാളുകളാണ് ഒത്തൊരുമയില്‍ ഭാഗമാകുന്നത്. സര്‍ക്കാര്‍ ഓഫീസുകള്‍ ,വാണിജ്യ വ്യാപാര സ്ഥാപനങ്ങള്‍ ,വിദ്യാലയങ്ങള്‍ ,തദ്ദേശ സ്വയം ഭരണ സ്ഥാപനങ്ങള്‍ ,സന്നദ്ധ സംഘടനകള്‍ എന്നിവ ഔദ്യോഗികമായി തന്നെ ഭൌമ മണിക്കൂര്‍ ആചരണത്തില്‍ ചേരുന്നുണ്ട് ഒപ്പം വ്യക്തിഗത ഉപയോക്താക്കളും.
2007 ല്‍ സിഡ്നി നഗരത്തില്‍ ഒരു പരീക്ഷണമെന്നോണം തുടങ്ങിയ ഈ പദ്ധതിയില്‍ അന്ന് രണ്ട് ദശലക്ഷം ആളുകള്‍ പങ്കെടുത്തു. തൊട്ടടുത്ത വര്‍ഷം 35 രാജ്യങ്ങളിലായി 50 ദശലക്ഷം പേരിലേക്ക് ഊര്‍ജസംരക്ഷണസന്ദേശം എത്തി. പോയ വര്‍ഷം ഭാരതം അടക്കമുള്ള 35 രാജ്യങ്ങളിലെ 4000 നഗരങ്ങള്‍ പങ്കുചേര്‍ന്നു. നമ്മുടെ നാട്ടിലെ 56 പട്ടണങ്ങളിലെ അഞ്ച് ദശലക്ഷം ആളുകള്‍ക്ക് ഒരു മണിക്കൂര്‍ കൊണ്ട് 1000 മെഗാവാട്ട് വൈദ്യുതി മിച്ചം പിടിക്കാനായി.
ലോകപ്രശസ്തമായ സ്ഥാപനങ്ങളും കെട്ടിടങ്ങളും പ്രതീകമെന്നോണം ഇതില്‍ പങ്കാളിയാകുന്നു. കുത്തബ് മിനാര്‍ ,ചെങ്കോട്ട ,മുംബൈയിലെ ഛത്രപതി ശിവജി ടെര്‍മിനസ് ,റിസര്‍വ് ബാങ്ക് ,ഹഡ്കോ, ഐ ഐ ടി കള്‍ , ഐ ഐ എം കള്‍ , ജാമിയ മിലിയ, ജവഹര്‍ലാല്‍ നെഹ്രു സര്‍വകലാശാലാ തുടങ്ങിയ വയ്ക്ക് ഒപ്പം പ്രശസ്ത സ്വകാര്യ സ്ഥാപനങ്ങളായ ഇന്‍ഫോസിസ്,വിപ്രോ,ഗൂഗിള്‍ ,ടാജ് ഹോട്ടല്‍ ശൃംഖല എന്നിവയെല്ലാം ഒരു മണിക്കൂര്‍ വിളക്കുകള്‍ ഒഴിവാക്കി സന്ദേശപ്രചരണത്തില്‍ സജീവമായി പങ്കെടുക്കുന്നു. പോയ വര്‍ഷം ബോളിവുഡ് താരം ആമീര്‍ ഖാനായിരുന്നു ഈ പദ്ധതിയുടെ ബ്രാന്‍ഡ് അം‌ബാസിഡര്‍ ഇത്തവണ ഊഴം അഭിഷേക് ബച്ചനാണ്. സച്ചിന്‍ തെണ്ടുല്‍ക്കര്‍ , അഭിനവ് ബിന്ദ്ര തുടങ്ങിയ പ്രമുഖരും പലതരത്തില്‍ ഊര്‍ജസംരക്ഷണ പ്രവര്‍ത്തനവുമായി സഹകരിക്കുന്നു. കേരളത്തില്‍ എനര്‍ജി മാനേജ്മെന്റ് സെന്റര്‍ , ഭൌമശാസ്ത്ര പഠന കേന്ദ്രം എന്നിവ ഉള്‍പ്പെടെയുള്ള സര്‍ക്കാര്‍ സംവിധാനങ്ങളും പദ്ധതിയുമായി ചേര്‍ന്നു പ്രവര്‍ത്തിക്കുന്നു. ഇത് കേവലം ഊര്‍ജസംരക്ഷണ പ്രവര്‍ത്തനം മാത്രമല്ല, ചൂടുപിടിച്ച് ഗുരുതരമായ വിപത്തിലേക്ക് നീങ്ങുന്ന ഭൂമിയുടെ വീണ്ടെടുപ്പിനുള്ള ഓര്‍മ്മപ്പെടുത്തല്‍ കൂടിയാണ്.

ഈ വേനലവധിക്കാലത്ത് കൂട്ടുകാര്‍ക്കെന്തു ചെയ്യാനാകും ?
ഒരു ലൈറ്റണയ്ക്കൂ ലോഡ് ഷെഡിംഗ് ഒഴിവാക്കൂ : അതായത് സന്ധ്യാ സമയത്ത് നമ്മുടെ വീടുകളില്‍ ഒരു സാധാരണ ബള്‍ബ് അണച്ചിടാനായാല്‍ ഉണ്ടാകുന്ന നേട്ടം എന്താണന്നറിയാമോ? ചിലപ്പോള്‍ ലോഡ്ഷെഡിംഗ് തന്നെ ഒഴിവാക്കാനാകും. എങ്ങനെയെന്നറിയേണ്ടേ! 75 ലക്ഷത്തോളം വരുന്ന ഗാര്‍ഹിക വൈദ്യുതോപഭോക്താക്കളില്‍ 70 ലക്ഷം പേര്‍ അറുപത് വാട്സ് ശേഷിയുള്ള ഒരു വിളക്ക് മാത്രം കെടുത്തി സഹകരിച്ചാല്‍ തന്നെ സംസ്ഥാനം ഒട്ടാകെ 420 മെഗാ വാട്ട് ലാഭിക്കാം.
സി എഫ് എല്‍ ലേക്കുമാറാന്‍ ഉപദേശിക്കൂ : സംസ്ഥാനത്തെ വീടുകളിലും വ്യാപാര സ്ഥാപനങ്ങളിലും നിലവില്‍ ഉപയോഗിക്കുന്ന രണ്ട് സാധാരണ ബള്‍ബുകള്‍ക്ക് പകരം ഊര്‍ജക്ഷമത കൂടിയ സി എഫ് വിളക്കുകള്‍ പിടിപ്പിച്ചാല്‍ ഉണ്ടാകുന്ന ലാഭം 600 മെഗാ വാട്ടോളം വരും. സംസ്ഥാന ഊര്‍ജ സുരക്ഷാ മിഷന്റെയും കെ എസ് ഇ ബി യുടെയും ആഭിമുഖ്യത്തില്‍ സൌജന്യനിരക്കില്‍ ഒരോ ഉപഭോക്താവിനും രണ്ട് സി എഫ് വിളക്കുകള്‍ കൊടുക്കുന്ന നടപടി പുരോഗമിക്കുന്നു. ഇതു കൂടാതെ മറ്റ് ബള്‍ബുകളും മാറ്റിയിടാനായി കുടുംബാംഗങ്ങളേയും അയല്‍ക്കാരെയും പ്രേരിപ്പിക്കുക, ഇതുമൂലം അവരുടെ വൈദ്യുത ബില്ലില്‍ ഉണ്ടാകുന്ന കുറവും സംസ്ഥാനത്തിനുണ്ടാകുന്ന മൂലധന നേട്ടവും ബോധ്യപ്പെടുത്തുക. ഒരു മെഗാവാട്ട് വൈദ്യുതി ഉണ്ടാക്കാനുള്ള പ്രാരംഭച്ചിലവ് എകദേശം നാലു കോടി രൂപയില്‍ കൂടുതലാണ്. ഉപയോഗ സമയത്തുള്ള പ്രസരണ വിതരണ നഷ്ടം വേറെ.
മേല്‍പ്പറഞ്ഞ രണ്ട് മാര്‍ഗങ്ങളിലൂടെ കുറഞ്ഞത് 1000 മെഗാവാട്ട് ലാഭിക്കാനായാല്‍ എകദേശം 4000 കോടിയിലേറേ രൂപയുടെ പദ്ധതിച്ചിലവാണ് നമുക്ക് മിച്ചം പിടിക്കാനാവുന്നത്. മാത്രമല്ല പദ്ധതിമൂലം പുനരധിവസിപ്പിക്കേണ്ടിവരുന്നവരുടെ പ്രശ്നങ്ങളും, പദ്ധതിയുണ്ടാക്കുന്ന പാരിസ്ഥിതികാഘാതവും ഒഴിവാക്കുകയും ചെയ്യാം.
പൂജാമുറിയിലും ആരാധനാ സ്ഥലങ്ങളിലും ഇടുന്ന സീറോ വാട്സ് ബള്‍ബ് (ഇത് സീറോ അല്ല മറിച്ച് 15 വാട്ട് വൈദ്യുതി എടുക്കുന്നതാണ്) മാറ്റി പകരം ഒരു/രണ്ട് വാട്ട് മാത്രം എടുക്കുന്ന എല്‍ ഇ ഡി ബള്‍ബ് ഇടാന്‍ പ്രേരിപ്പിക്കാം. സംസ്ഥാനത്തൊട്ടാകെ ഇത്തരം 10 ലക്ഷം ബള്‍ബ് മാറ്റാനായാല്‍ വരുത്താനാകുന്ന ലാഭം 13 മെഗാവാട്സിന്റെതാണ് എന്ന് ഓര്‍ക്കുക. ഇത്തരം ബള്‍ബുകള്‍ മിക്കയിടങ്ങളിലും ദിനം മുഴുവന്‍ പ്രകാശിക്കുന്നതിനാല്‍ ഈ ചെറിയ നീക്കം ഉണ്ടാക്കുന്ന മാറ്റം വളരെ വലുതാണ്.
ചെറിയ ദൂരത്തിനുള്ളിലെ യാത്ര കാല്‍നടയായോ അല്ലെങ്കില്‍ സൈക്കിളിലോ ആക്കിക്കോളൂ, ഊര്‍ജവും കരുതാം പ്രകൃതിയെ സംരക്ഷിക്കം ഒപ്പം ആരോഗ്യവും നിലനിര്‍ത്താം.
ദീര്‍ഘദൂരയാത്രയ്ക്ക് കഴിവതും ബസ്, ട്രെയിന്‍ എന്നീ പൊതു ഗതാഗത സംവിധാനങ്ങള്‍ ഉപയോഗിക്കുക. ഒരു കാറില്‍ ഒന്നോ രണ്ടോ ആളുകള്‍ മാത്രം യാത്രചെയ്യുമ്പോള്‍ ഉണ്ടാകുന്ന പ്രതിശീര്‍ഷ എണ്ണയുപയോഗവും ബസിലോ ടെയിനിലോ യാത്രചെയ്യുമ്പോള്‍ ആള്‍ക്കൊന്നിന് ഉണ്ടാകുന്ന എണ്ണച്ചിലവും തമ്മില്‍ വന്‍ അന്തരമാണുള്ളത്. പാതകളിലെ ഗതാഗത കുരുക്കിനും ശമനമാകും. ലാഭിക്കുന്ന ഒരോ തുള്ളി എണ്ണ വഴിയും നമുക്ക് ഒഴിവാക്കാനാകുന്നത് അത് പുറത്തേക്ക് തള്ളുമായിരുന്ന ടണ്‍ കണക്കിന് ഹരിത്ര ഗൃഹ വാതകങ്ങളാണ്. ഈ വാതകങ്ങളാണ് ക്രമേണ ഭൂമിയെ ചൂടുപിടിപ്പിക്കുന്നത്.
നാം ജീവിക്കുന്ന ഭൂമി ഭാവി തലമുറയുടെ പക്കല്‍ നിന്നും കടം വാങ്ങിയതാണന്നോര്‍ക്കുക, അത് സുരക്ഷിതമായി തിരിച്ചേല്‍പ്പിക്കേണ്ട ധാര്‍മിക ബാധ്യത നമുക്കുണ്ടെന്ന് ഓര്‍ക്കാം.

“എല്ലാവരുടേയും ആവശ്യങ്ങളെ സഫലീകരിക്കാനുള്ള വിഭവങ്ങള്‍ ഈ ഭൂമിയിലുണ്ട്. പക്ഷെ അത് എല്ലാവരുടെയും അത്യാര്‍ത്തിക്ക് തികയില്ല”
ഈ ഗാന്ധീ സൂക്തം എക്കാലത്തും പ്രസക്തം.

8 comments:

ശ്രീ said...

അവസരോചിതമായ കുറിപ്പ്.

jasy said...

അതെ....നമുക്കെല്ലാവര്‍ക്കും ഒരുമിച്ചു മുന്നോട്ടു നീങ്ങാം, നമ്മുടെ തന്നെ പവര്‍ക്കട്ടില്ലാത്ത നാളെക്കായി. ഇല്ലെങ്ങില്‍ ഇനിയങ്ങോട്ട് രണ്ടും മൂന്നും മണിക്കൂര്‍ പവര്‍ കട്ടായിരിക്കും. എന്റെ ബ്ലോഗ്‌ -netizensallover.blogspot.com

ചാർ‌വാകൻ‌ said...

അവസരോചിതമായ പോസ്റ്റിട്ടതിനു നന്ദിയുണ്ട്.

മൈലാഞ്ചി said...

വലിയ ആദര്‍ശങ്ങളുടെ പേരില്‍ അല്ലെങ്കിലും രാവിലെയും വൈകീട്ടും 3-4 മണിക്കൂര്‍ ഫ്രിഡ്ജ് ഓഫ് ചെയ്തിടാറുണ്ട് ഞാന്‍..കൂടാതെ വൈകീട്ട് എല്ലാവരും ഒരു മുറിയില്‍ ഇരുന്നേ പഠനവും മറ്റുകാര്യങ്ങളും നടത്താവൂ എന്ന അലിഖിത നിയമവും ഉണ്ട് ഇവിടെ..ഊര്‍ജസംരക്ഷണം മാത്രമല്ല, ബില്ല് വരുമ്പോളുള്ള ഞെട്ടല്‍ അല്പം കുറക്കുകയും ചെയ്യാം..

ഇപ്പോഴുള്ള ഉപകരണങ്ങള്‍ പലതും കൂടുതല്‍ ഊര്‍ജം ചിലവാക്കുന്നതാണ് എന്നറിയാം..എന്നാലും ഒരു കേടുമില്ലാത്ത അവയെ ഒക്കെ എങ്ങനെ ഉപേക്ഷിച്ച് പുതിയത് വാങ്ങും? ഉപയോഗിക്കാതിരിക്കാനും വയ്യ... ഈ കണ്‍ഫ്യൂഷന്‍ എന്നെപ്പോലെ പലരും പങ്കുവക്കുന്നുണ്ടെന്ന് തോന്നുന്നു...

എന്തായാലും എര്‍ത്ത് അവറില്‍ പങ്കുചേരുന്നതാണ്...തീര്‍ച്ചയായും.

ആദര്‍ശ് സര്‍..നമ്മള്‍ പരിചയപ്പെട്ടിട്ടുണ്ട് യുസി കോളേജില്‍ സെമിനാറില്‍ വച്ച്..പിന്നെ ഒന്ന് രണ്ടിടങ്ങളിലും കണ്ടിരുന്നു..ഓര്‍മ കാണാന്‍ വഴിയില്ല...ആലോചിച്ചു ബുദ്ധിമുട്ടണ്ട...

താങ്കളുടെ എഴുത്തുകള്‍ വായിക്കുന്നുണ്ട്.. ബ്ലോഗും അല്ലാത്തതും... നന്ദി.

ടോട്ടോചാന്‍ (edukeralam) said...

എല്‍.ഇ.ഡി വിളക്കുകള്‍ പ്രചാരത്തിലായി വരുന്നു. ഇപ്പോള്‍ ചൈനീസ് നിര്‍മ്മിതമായ എല്‍.ഇ.ഡി വിളക്കുകള്‍ ലഭ്യമാണ്.80 രൂപമുതല്‍ 200 രൂപവരെ വിലയുണ്ട്. ഒരു വാട്ടില്‍ താഴെ മാത്രമാണ് ഇവയുടെ പവര്‍. 1w, 2w ഇനത്തിലുള്ള ഹൈ ബ്രൈറ്റ് LED കള്‍ക്ക് ഇന്ന് വില കൂടും. എങ്കിലും മികച്ച പ്രകാശം തരും.
ഒരു മാസത്തില്‍ ഒരു എല്‍.ഇ.ഡി വിളക്ക് എന്ന ഒരു പദ്ധതി ആവിഷ്കരിച്ചാല്‍ ഒന്നോ രണ്ടോ വര്‍ഷങ്ങള്‍ക്കകം നമുക്ക് പൂര്‍ണ്ണമായും അതിലേക്ക് മാറാന്‍ കഴിയും.. പിന്നെ സൈക്കിളുകളും വൈദ്യുതസ്കൂട്ടറുകളും... അതും ഊര്‍ജ്ജം ലാഭിക്കുന്നവയാണ്...
15% മാത്രം ദക്ഷതയുള്ള പെട്രോള്‍വാഹനങ്ങളേക്കാള്‍ 80% ത്തിലധികം ദക്ഷതയുള്ള വൈദ്യുതവാഹനങ്ങള്‍ തന്നെയാണ് നല്ലത്...
എനിക്കും കെടുത്താം ഒരു വിളക്ക്...

Haree said...

ഒരു സംശയം ചോദിക്കട്ടെ:
വര്‍ഷങ്ങളായി ഒരു മിനിറ്റ് പോലും കറന്റ് മുടങ്ങാത്ത പശ്ചാത്യരാജങ്ങളില്‍ ഇങ്ങിനെയൊരു മണിക്കൂര്‍ ആചരിക്കുന്നതില്‍ യുക്തിയുണ്ട്. ദിവസത്തില്‍ പല തവണയായി മണിക്കൂറുകളോളം കറന്റില്ലതെയാവുന്ന കേരളത്തിലും; ദിവസം അഞ്ചും ആറും മണിക്കൂറുകള്‍ തന്നെ കറന്റില്ലാത്ത ഇന്ത്യയിലെ മറ്റിടങ്ങളിലും ഇതിനെന്തു പ്രസക്തി? വഴിവക്കിലെ വെളിച്ചം വീട്ടിലെത്തിക്കുവാന്‍ ഗതിയില്ലാത്തവര്‍ ഏറെയുള്ള ഇന്ത്യ പോലെയൊരു രാജ്യം ഇത് ആചരിക്കുന്നതില്‍ എന്തെങ്കിലും യുക്തിയുണ്ടോ?

കറന്റു പോവുമ്പോള്‍ ശക്തികൂടിയ ഇന്‍‌വര്‍ട്ടറുകള്‍ ഉപയോഗിച്ച് ഇരുട്ട് അറിയാത്തവര്‍ / സ്ഥാപനങ്ങള്‍ എന്നിവ വേണമെങ്കില്‍ ആചരിച്ചുകൊള്ളട്ടെ!
--

Typist | എഴുത്തുകാരി said...

കാലികപ്രസക്തിയുള്ള പോസ്റ്റ്. ഞാനും കഴിയുന്നതും ചുരുക്കുന്നുണ്ട് വൈദ്യുതി ഉപയോഗം. ഏറ്റവും ചുരുങ്ങിയ വിളക്കുകള്‍ തെളിച്ചും, ഫ്രിഡ്ജ് ഓഫ് ചെയ്തുമൊക്കെ

Ente Swantham said...

പ്രത്യാശയുടെ ഒരു മണിക്കൂര്‍

നാളെ രാത്രി ഈ വര്‍ഷത്തെ 'എര്‍ത്ത് അവര്‍' ആചരിക്കും. എല്ലാ വര്‍ഷവും നടക്കുന്ന ഈ ഒരു മണിക്കൂര്‍ വിളക്കണക്കല്‍ ഭൂമിക്കുവേണ്ടിയുള്ള പ്രതീകാത്മകമായ ബോധവത്കരണമാണ്. വേള്‍ഡ് വൈല്‍ഡ് ലൈഫ് ഫണ്ടിന്റെയും യു.എന്നിന്റെയും മറ്റും ആഭിമുഖ്യത്തിലുള്ള പരിപാടിയില്‍, രാത്രി എട്ടര മുതല്‍ ഒമ്പതരവരെ വീടുകളിലും പൊതുസ്ഥലങ്ങളിലും ഓഫിസുകളിലുമായി പരമാവധി ഊര്‍ജവ്യയം കുറക്കുകയാണ് ലക്ഷ്യം. യു.എന്‍ സെക്രട്ടറി ജനറല്‍ പറഞ്ഞപോലെ ഇത് ഒരു മുന്നറിയിപ്പും ഒരു പ്രത്യാശയുമാണ്. ആഗോളതാപനവും ഊര്‍ജപ്രതിസന്ധിയും അനുബന്ധ പ്രശ്നങ്ങളുമെല്ലാം മനുഷ്യര്‍ക്ക് ബോധ്യപ്പെട്ടുകഴിഞ്ഞിരിക്കെ ഈ യജ്ഞത്തില്‍ പങ്കുചേരാന്‍ എല്ലാവരും സ്വമേധയാ മുന്നോട്ടുവരുമെന്നു കരുതാം.

ഭൂമി ചുട്ടുപൊള്ളുമ്പോഴും പ്രശ്നപരിഹാര, രാഷ്ട്രീയ വാഗ്വാദങ്ങളില്‍ കുടുങ്ങി അകന്നുകൊണ്ടിരിക്കുമ്പോഴും പരിഹാരം നമ്മുടെ വരുതിയില്‍തന്നെ ഉണ്ടെന്ന ശുഭചിന്തയാണ് 'എര്‍ത്ത് അവര്‍' പ്രസരിപ്പിക്കുന്നത്. കഴിഞ്ഞ വര്‍ഷം 88 രാജ്യങ്ങളിലായി നാലായിരത്തിലേറെ സ്ഥലങ്ങളില്‍ വിളക്കണച്ച് പ്രത്യാശയുടെ മണിക്കൂര്‍ കൊണ്ടാടി; ഇക്കൊല്ലം ആറായിരം സ്ഥലങ്ങള്‍ ഇതില്‍ പങ്കുകൊള്ളുമെന്നാണ് പ്രതീക്ഷിക്കപ്പെടുന്നത്. എട്ടു കോടിയില്‍പരം ആളുകള്‍ ഇതില്‍ ഭാഗഭാക്കാവും. വെറും ഒരു മണിക്കൂര്‍ വൈദ്യുതി ഓഫാക്കി ഇരുട്ടില്‍ ഫാനും എ.സിയുമില്ലാതെ ഇരുന്നതുകൊണ്ടെന്തു മെച്ചമെന്ന ദോഷചിന്ത തോന്നാം. പക്ഷേ, ഇത് ഒരു പ്രഖ്യാപനമാണ്: നാം വിചാരിച്ചാല്‍ ഭൂമിയെ വീണ്ടെടുക്കുക അസാധ്യമല്ലെന്ന്.