Saturday, September 21, 2013

ബാങ്കുകളിലെ സോഫ്ട്‌വെയര്‍ ഔട്ട്സോഴ്സിംഗ് പൊതുമേഖലയിലേക്ക് അല്ലേ കൂടുതല്‍ നല്ലത് ?


അധ്വാനം പുറത്തേക്ക് പോകുന്നത് ആണല്ലോ നമ്മള്‍ പുറംജോലിക്കരാര്‍ എന്നത് കൊണ്ട് സാമാന്യമായി ചര്‍ച്ച ചെയ്യുന്നത്. ടെക്‍നോളജി രൂപപ്പെടുത്താന്‍ മറ്റുള്ള കമ്പനികളെ ആശ്രയിക്കുമ്പോള്‍ (ഇതും ഔട്ട്‌സോഴ്സിംഗ് തന്നെ) ലഭിക്കുന്നത് ഒരു സോഫ്ട്‌വെയര്‍ മാത്രമായി കാണാതെ അതില്‍ അന്തര്‍ലീനമായിരിക്കുന്ന മനുഷ്വാധ്വാനത്തെ കൂടി കാണണം. സാങ്കേതികവിദ്യയുടെ ഉപായങ്ങളില്‍ കാര്യമായ തോതില്‍ മനുഷ്യന്റെ ബുദ്ധിശക്തി ഉപയോഗപ്പെടുത്തിയാണ് സോഫ്ട്‌വെയര്‍ ഉണ്ടാക്കി എടുക്കുന്നത്. ഇതര വ്യവസായങ്ങളില്‍ ഒരിക്കല്‍ ഉണ്ടാക്കി എടുത്ത വിജയകരമായ മാതൃക അനുസരിച്ചാണ് വ്യാവസായികമായി വന്‍ തോതില്‍ ഉത്പാദനം നടത്തുന്നത്. മോട്ടോര്‍ കാര്‍ മുതല്‍ സോപ്പ് വരെ ഉദാഹരണം. ആവശ്യകത കൂടുന്നതനുസരിച്ച് വില കുറയാന്‍ സാധ്യതയും ഉണ്ട്. എന്നാല്‍ സോഫ്ട്‌വെയര്‍ അങ്ങനെ അല്ല. ഒരിക്കല്‍ വിജയകരമായാല്‍ അവയുടെ വ്യാവസായികമായ വ്യാപനത്തിന് വേണ്ടി കൂട്ടിച്ചേര്‍ക്കപ്പെടുന്ന അധ്വാനം പരമ്പരാഗത വ്യവസായശാലകളെ അപേക്ഷിച്ച് തുലോം തുശ്ചമാണ്, അഥവാ ഇല്ല എന്ന് തന്നെ പറയാം. എന്നാല്‍ ഇതിനനുസരിച്ച് അല്ല ഇതിന്റെ വില മിക്കപ്പോഴും നിശ്ചയിക്കപ്പെടുന്നത്. എ എന്ന ബാങ്കിന് വേണ്ടി ഉണ്ടാക്കിയ കോര്‍ ബാങ്കിംഗ് സൊല്യൂഷന്‍ ബി മുതല്‍ ഇസഡ് വരെയുള്ള ബാങ്കുകള്‍ക്ക് ഒരു കമ്പനി കൊടുക്കുന്നത് ഒരോ തവണയും ആദ്യമായി ഉണ്ടാക്കുന്ന തരത്തില്‍ വിലയിട്ടാണ്. ചിലപ്പോള്‍ ഒരോ ബാങ്കിന്റെയും രീതി അനുസരിച്ച് ചില മുഖം‌മിനുക്കല്‍ സമാനമായ മാറ്റം ഉണ്ടാകും, പക്ഷെ ഇതിന് ആവശ്യമായി വരുന്ന അധ്വാന മണിക്കൂറുകള്‍ എടുത്ത് താരതമ്യം ചെയ്‌താല്‍ അവഗണിക്കാവുന്ന തരത്തില്‍ തുശ്ചമാണ് മൂല്യ വര്‍ദ്ധനവ് എന്ന് ബോധ്യമാകും
ഇവിടെയാണ് കാര്യമായി ഇടപെടേണ്ടത്, കമ്പ്യൂട്ടര്‍ എഞ്ചിനീയറിംഗ് രംഗത്ത് ഭാരതത്തെ പോലെ സുശക്‍തമായ പൊതു മേഖലാ സ്ഥപനങ്ങളുടെ നിര മറ്റൊരു രാജ്യത്തിന് ഉണ്ടാകുമോ എന്ന് തന്നെ സംശയമാണ്. ഇലക്‍ട്രോണിക്‍സ് കോര്‍പ്പറേഷന്‍ ഓഫ് ഇന്ത്യ, സിഡാക്, ഭാരത് ഇലക്‍ട്രോണിക്‍സ് , കേന്ദ്ര ഇലക്‍ട്രോണിക്‍സ് എഞ്ചിനീയറിംഗ് റിസര്‍ച്ച് ഇന്‍‌സ്റ്റിട്യൂട്ട്.....തുടങ്ങീ കേരളത്തിലെ കെല്‍‌ട്രോണ്‍ വരെ. പൊതുമേഖലാ സ്ഥാപനത്തെ ആണ് ഇക്കാര്യത്തില്‍ പൊതുമേഖലാ ബാങ്കുകള്‍ ആശ്രയിക്കുന്നത് എങ്കില്‍ അത് ഫലപ്രദമായതും ദീര്‍ഘകാലാടിസ്ഥാനത്തില്‍ തന്ത്രപരമായ നേട്ടങ്ങള്‍ ഉണ്ടാക്കാനാകുന്ന തീരുമാനവും ആണ്‍. സോഫ്ട്‌വെയര്‍ സങ്കേതങ്ങള്‍ നിര്‍മ്മിക്കാനും അത് വിന്യസിക്കാനും മിക്കപ്പോഴും പുറത്തെ സ്ഥാപനങ്ങളെ ആശ്രയിക്കാറുണ്ട്, ഇതില്‍ തെറ്റുമില്ല കാരണം ഉദാഹരണമായി ബാങ്കിനെ തന്നെ എടുത്ത് പറയാം. കോര്‍ ബാങ്കിംഗിനും മറ്റ് ഉപാധികള്‍ക്കും ഇന്റര്‍നെറ്റ് ബാങ്കിംഗിനും ഒക്കെ വ്യത്യസ്ഥമായ പാക്കേജുകളോ അല്ലെങ്കില്‍ മൊഡ്യൂളുകളോ ആവശ്യം വരും. ഇതില്‍ സിഡാക്ക്, എന്‍ ഐ സി പോലെയുള്ള സോഫ്‌ട്‌വെയര്‍ രംഗത്തെ പൊതുമേഖലാ സ്ഥാപനങ്ങളെ ആണ് ആശ്രയിക്കുന്നതെങ്കില്‍ സാമൂഹികപരമായ നേട്ടവും ഏറെയാണ്. നിലവില്‍ അതാത് ബാങ്കിന്റെ ഡാറ്റാ സെന്ററില്‍ ആണ് വിവരം അതുകൊണ്ട് വിവരചോരണം എന്ന പ്രശ്‌നം ഇല്ല എന്ന് പറയാമെങ്കിലും ടെക്നോളജി ഔട്ട്സോഴ്സിംഗ് എന്ന പേരില്‍ പുറത്തേക്ക് പോകുന്ന പണത്തിന് ആനുപാതികമായ തൊഴില്‍ പുറത്ത് സൃഷ്‌ടിക്കപ്പെടുന്നില്ല എന്നത് കാര്യമായ വിശകലനത്തിന് വിധേയമായിട്ടുണ്ടോ?

എല്ലാ പൊതുമേഖലാ ബാങ്കുകളുടെയും സോഫ്ട്‌വെയര്‍ നിര്‍മാണത്തിന് വര്‍ഷം തോറും എത്രമാത്രം പണം, സമയം എന്നിവ ചിലവഴിക്കുന്നുവെന്ന് നോക്കിയാല്‍ ഇത് എല്ലാം കൂടി ഒരു പൊതുമേഖലാ സ്ഥാപനത്തിലേക്ക് കൊണ്ട് വന്നാല്‍ ഉണ്ടാകുന്ന നേട്ടം മനസിലാകും. മാത്രവുമല്ല ഇക്കാര്യത്തില്‍ പ്രത്യേകമായ ഒരു വൈദഗ്ദ്യം നമുക്ക് ഉണ്ടാക്കി എടുക്കുകയും ചെയ്യാം. സോഫ്ട്‌വെയര്‍ ഉണ്ടാക്കല്‍ ,ഇന്‍‌സ്റ്റലേഷന്‍ , പരിപാലനം എന്നിവ അത്രമേല്‍ കുശാഗ്രമായ വൈദഗ്ദ്യം വേണ്ടുന്ന റോക്കറ്റ് സയന്‍സ് ഒന്നുമല്ല. കൂട്ടായ യത്നത്തിലൂടെ സുസ്ജ്ജമായ ഒരു പാക്കേജ് ഉണ്ടാക്കി എടുക്കാവുന്നതേയുള്ളൂ

ഇനി നിലവിലുള്ള പൊതുമേഖലാ കം‌പ്യൂട്ടര്‍ /ഐടി സ്ഥാപനങ്ങളില്‍ വിശ്വാസം വരുന്നില്ലങ്കില്‍ ഇതിനായി ഒരു പുതിയ സ്ഥാപനം ഉണ്ടാക്കുന്നതിലും തെറ്റില്ല. വിവിധ ബാങ്കുകള്‍ സഹകരിച്ചാണല്ലോ സിബില്‍ , സര്‍സായി (CIBIL, CERSAI ) സേവനങ്ങള്‍ എന്നിവ ഇപ്പോള്‍ നല്‍‌കുന്നത്, അതില്‍ സഹകരിക്കാമെങ്കില്‍ ഇതും സാധ്യമാണ്.
സ്വതന്ത്ര സോഫ്ട്‌വെയറിന്റെ സാധ്യതകള്‍ കൂടി പ്രയോജനപ്പെടുത്തിയാല്‍ സോഫ്ട്‌വെയര്‍ നിര്‍മാണത്തിന് വേണ്ടി വരുന്ന ചിലവ് ഇനിയും ഗണ്യമായ തോതില്‍ കുറയ്‌ക്കുകയും ചെയ്യാമെന്ന മെച്ചവുമുണ്ട്. മാത്രമല്ല ഒരോ കമ്പ്യൂട്ടറിലേയും ഓപ്പറേറ്റിംഗ് സിസ്റ്റത്തിനും ഓഫീസ് പാക്കേജിനും മുറയ്‌ക്ക് നല്‍കേണ്ടി വരുന്ന ആവര്‍ത്തന ചിലവ് നിലയ്‌‌ക്ക് നിര്‍ത്താം.

3 comments:

ASOKAN T UNNI said...

ഇതും ഇതിലപ്പുറവും
നമ്മുടെ ധുരന്ധരന്മാർക്ക്‌
നന്നായി അറിയാം...ആദർശേ...

പക്ഷേ ചോറിങ്ങും
കൂറങ്ങുമായിപ്പോയി....

ചീട്ടൂകൊട്ടാരം പോലെ
തകർന്നു വീണ വിദേശബാങ്കുകളുടെ
ചിത്രം മുന്നിൽ വച്ചുകൊണ്ടാണു ഇവർ
ബാങ്കിങ്ങ്‌ നിയമ ഭേദഗതി ബിൽ
പാസാക്കിയെടുത്തത്‌...
ഏറ്റവും ഒടുവിൽ നമ്മുടെ ഗവർണർ പോലും..............

യഥാ പ്രജാ തഥാ രജാ-എന്നതാണു സത്യം..
നമ്മളിതേ അർഹിക്കുന്നുള്ളു..
WE GET WHAT WE DESERVE..

snehitan said...
This comment has been removed by the author.
Vivek said...

But the quality of service that you get from public enterprises will make any organization think twice before approaching them..