ബ്ലോഗ് ഭൂമി - e lekhanangal

2012 ഐ ടി

2012-01-05T09:11:00.000-08:00

ലാപ്‌ടോപ്പ് , സ്‌മാര്‍ട്ട് ഫോണ്‍ , ടാബ്‌ലറ്റ് കമ്പ്യൂട്ടറുകള്‍ എന്നിവ തമ്മിലുള്ള അതിര്‍വരമ്പുകള്‍ ഇല്ലാതാകാന്‍ അല്ലെങ്കില്‍ നേര്‍ത്തതാകാന്‍ ഇടയുണ്ട്, ഇതിനോടകം തന്നെ സ്‌മാര്‍ട്ട് ഫോണും ടാബും തമ്മില്‍ വലിപ്പത്തിന്റെ വ്യത്യാസം മാത്രമേ ഉള്ളൂ എന്ന് പറയാം. ചുരുക്കം ചില കമ്പനികളേ ടാബ് , സ്‌മാര്‍ട്ട് ഫോണ്‍ വിപണിയില്‍ ഇത് വരെ ഇറങ്ങിയിട്ടൂള്ളൂ എങ്കിലും ഈ വര്‍ഷം വിപണിയില്‍ ഭാവികാലത്തും പിടിച്ച് നില്‍ക്കണം എന്ന് താത്പര്യമുള്ളവരെല്ലാം ടാബുമായി എത്തും. ഒപ്പം തന്നെ ടാബിനും സ്‌മാര്‍ട്ട് ഫോണിനും മധ്യേ ഇരിപ്പുറപ്പിക്കാവുന്ന തരത്തിലുള്ള ഉപകരണങ്ങളും മത്സരിക്കും , നിലവില്‍ ഗാലക്‍സി നോട്ട് ഈ വിടവില്‍ സാന്നിദ്ധ്യമറിയിച്ച് കഴിഞ്ഞു. ലോകമാകമാനം സ്‌മാര്‍ട്ട് ഫോണുകളുടെ സഞ്ചിത ശരാശരി വളര്‍ച്ചാ നിരക്ക് (CAGR) ഇരട്ട അക്കത്തിലാണ്, സാധാരണ ഫോണുകളുടേതാകട്ടെ ഒറ്റ അക്കത്തിലും. ഇത് കൃത്യമായി വിരല്‍ ചൂണ്ടുന്നത് വരും വര്‍ഷങ്ങളിലെ സ്‌മാര്‍ട്ട് ഫോണ്‍ വിപണിയുടെ വളര്‍ച്ചയിലേക്ക് തന്നെയാണ്. ഫോണ്‍ വിപണിയുടെ ചരിത്രം തന്നെ നോക്കിയാല്‍ ഇത് മനസിലാകും. ഒറ്റവര്‍ണ സ്‌ക്രീനില്‍ നിന്ന് ബഹുവര്‍ണ സ്‌ക്രീന്‍ സൌകര്യത്തിലേക്ക് നാം പറിച്ച്നടപ്പെട്ടതിലും വേഗത്തിലാകും സ്‌മാര്‍ട്ട് ഫോണിലേക്കുള്ള വളര്‍ച്ച. കേവലം വിളി ഉപകരണം മാത്രമല്ല കൈഫോണുകള്‍ എന്ന തിരിച്ചറിവാകാം ചില ഉപഭോക്താക്കളെ എങ്കിലും മാറ്റത്തിന് പ്രേരിപ്പിക്കുന്നത്.

മൊബൈല്‍ ഫോണിലേക്ക് ആദ്യം കൂട്ടിയിണക്കപ്പെട്ടത് ക്യാമറ ആയിരുന്നെങ്കില്‍ പിന്നീട് പാട്ട് പെട്ടി , സഞ്ചരിക്കുന്ന സിനിമാ തീയേറ്റര്‍ , സ്ഥലമാപിനി (ജി പി എസ് ), ഇന്റര്‍നെറ്റ് (ജി പി ആര്‍ എസ് / ത്രി ജി) , വായന (ബുക്ക്/ പി ഡി എഫ് റീഡര്‍ ), ബാങ്കിംഗ് (ഇന്റര്‍നെറ്റ് /മൊബീല്‍ ബാങ്കിംഗ് ) ഒക്കെയായി ഫോണ്‍ മാറി. പോയ രണ്ട് വര്‍ഷങ്ങളിലായി മൊബൈല്‍ ഓപ്പറേറ്റിംഗ് സിസ്റ്റത്തിന്റെ വ്യാപകമായ സ്വീകാര്യത നവം‌നവങ്ങളായ എത്രയോ ആപ്ലിക്കേഷനുകളാല്‍ ഇന്ന് നമ്മുടെ ഫോണുകളെ വിവര സമ്പന്നമാക്കി കൊണ്ടിരിക്കുന്നു. ആന്‍‌ഡ്രോയ്‌ഡ്, ആപ്പിള്‍ ഐ ഓ‌എസ് , ബ്ലാക്ക് ബെറി എന്നിവയിലായി അഞ്ച് ലക്ഷത്തിലേറേ ആപ്ലിക്കേഷനുകള്‍ നിലവിലുണ്ട് ഒരു പക്ഷെ ഈ വര്‍ഷാവസാനത്തിന് മുന്നെ തന്നെ ഇത് പുതിയ കടമ്പ കടന്നേക്കാം.

മൊബൈല്‍ ഫോണില്‍ സന്നിവേശിപ്പിച്ചിട്ടുള്ള ഒരോ ഘടകത്തിനും സാമാന്യ ചിന്തയ്‌ക്ക് അപ്പുറത്തെ പ്രയോഗ സാധ്യതകളാണ് വരുന്നത്. ഒരു ഉദാഹരണം എടുത്ത് കാട്ടാനായി കാമറയുടെ കാര്യം തന്നെ നോക്കാം. ഉചിതമായ ഒരു ആപ്ലിക്കേഷന്‍ കൂട്ടിച്ചേര്‍ത്താല്‍ ഫോണ്‍ ക്യാമറയെ ബാര്‍ കോഡ് ഒപ്പിയെടുക്കല്‍ സംവിധാനമാക്കാം. വിപണിയിലെ പല ഉത്പന്നങ്ങളുടേയും പുറം‌ചട്ടയില്‍ കുത്തനെയുള്ള വരകളുടെ കൂട്ടം കാണമല്ലോ. സാധാരണയായി ബാര്‍കോഡ് സ്‌കാനര്‍ എന്ന ഉപകരണം ഉപയോഗിച്ച് കടകളില്‍ വിലയിടല്‍ വേളയിലാണ് ഈ വരകളെ വിവരമാക്കി ബില്ലില്‍ അച്ചടിച്ച് തരുന്നത്. എന്നാല്‍ ഇതിന് വേണ്ടിയുള്ള ആപ്ലിക്കേഷന്‍ സജീവമാക്കിയാല്‍ ഉടന്‍ തന്നെ മൊബൈല്‍ ഫോണ്‍ കാമറ വരകള്‍ക്ക് അഭിമുഖമായി പിടിച്ച് ക്യാമറ ക്ലിക്ക് ചെയ്താല്‍ ഉത്പന്ന/പുസ്തക വിവരം ഫോണ്‍ സ്‌ക്രീനില്‍ എത്തും. അതായത് ക്യാമറയെ വെറും പടമെടുക്കല്‍ സംവിധാനമായല്ല സ്‌മാര്‍ട്ട് ഫോണ്‍ കാണുന്നത്. സ്‌മാര്‍ട്ട് ഫോണ്‍ ഉപയോഗിച്ചുള്ള വൈദ്യശാസ്ത്രവുമായി ബന്ധപ്പെട്ട പ്രയോഗങ്ങളും നിലവില്‍ വന്നു കഴിഞ്ഞു, ചിലത് പണിപ്പുരയിലുമാണ്. വരും വര്‍ഷങ്ങളില്‍ ഫോണിന് മെഡിക്കല്‍ മേഖലയില്‍ വര്‍ധിച്ച സാധ്യതകളാകും തുറക്കപ്പെടുക.

എടുത്ത് പറയേണ്ട മറ്റൊരുമാറ്റം സമീപസ്ഥ വിനിമയ ധാര -സവിധ! (Near Field Communication) ആകും. സവിസം പ്ലാസ്റ്റിക് പണമായ ഡെബിറ്റ്/ക്രെഡിറ്റ് കാര്‍ഡുകളെ ഇല്ലായ്‌മ ചെയ്യും എന്ന് പോലും പ്രവചിക്കുന്നവര്‍ ഉണ്ട്. ക്യാമറ പോലെ തന്നെ ഫോണിനുള്ളില്‍ കൂട്ടിച്ചേര്‍ക്കപ്പെടുന്ന ഈ ഹാര്‍ഡ്‌വെയര്‍ ഉപയോഗിച്ച് തൊട്ടടുത്തുള്ള ഫോണുകള്‍ തമ്മിലോ അല്ലെങ്കില്‍ കടകളിലെ ബില്ലിംഗ് ഉപകരണമായോ ബന്ധിപ്പിച്ച് പണമടവ് നടത്താം. എ ടി എം ന് പകരം വ്യാപകമായി ഉപയോഗിക്കപ്പെട്ടേക്കാം, പെട്ടെന്ന് മറ്റോരു മികച്ച ബദല്‍ ഉപകരണം ഉരുത്തിരിഞ്ഞ് വന്നില്ലെങ്കില്‍ അടുത്ത കാലത്ത് സമീപസ്ഥ വിനിമയ ധാര മേല്‍‌ക്കൈ നേടും. എ ടി എം മുറിയില്‍ ഇത് മതിയാകും പണമെടുക്കാന്‍ . 2014 ആകുമ്പോള്‍ 50 ശതകോടി ഡോളര്‍ പണം സവിധ ഉപകരണങ്ങള്‍ കൈകാര്യം ചെയ്യുമെന്ന് അനുമാനിക്കപ്പെടുന്നു. വീസ , അമേരിക്കന്‍ എക്‍സ്‌പ്രസ്, മാസ്റ്റര്‍ കാര്‍ഡ് എന്നീ‍ പ്രബലര്‍ ഇതില്‍ നേരിട്ടോ അല്ലെങ്കില്‍ സാങ്കേതിക പങ്കാളി വഴിയോ നിക്ഷേപമിറക്കി കഴിഞ്ഞു. രസകരമായ മറ്റൊരു സമാന ഉപകരണം സ്‌ക്വയര്‍ ആണ്. ഐ ഫോണിലെ ഹെഡ്ഫോണ്‍ ജാക്കില്‍ പിടിപ്പിക്കാവുന്ന കാര്‍ഡ് റീഡര്‍ ആണ് ഇത്. പണക്കൈമാറ്റം ആവശ്യം വരുമ്പോള്‍ കാര്‍ഡ് ഇതില്‍ ഉരസിയാല്‍ പണം നല്‍കാം. സവിധ ആയാലും സ്‌ക്വയര്‍ ആയാലും ഇ-കൊമേഴ്സിന്റെയും എം-കൊമേഴ്സിന്റെയും വരും കാല ഉപയോഗത്തിന്റെ സാധ്യത ആണ് ഉറപ്പിക്കുന്നത്. സ്‌ക്വയര്‍ എന്ന സംരംഭത്തിന് ചുക്കാന്‍ പിടിക്കുന്നത് ട്വിറ്ററിന്റെ സഹസ്ഥാപകനായ ജാക്ക് ഡോഴ്സിയും.

എടുത്ത് പറയാവുന്ന മാറ്റം ഈ വര്‍ഷം നടക്കാനിടയുള്ളത് ടെലിവിഷനിലാകും. ഇതിനോടകം തന്നെ കേരളവിപണിയിലടക്കം സ്‌മാര്‍ട്ട് ടിവി വരവറിയിച്ച് കഴിഞ്ഞു. സോഷ്യല്‍ നെറ്റ്വര്‍ക്കിംഗും യൂ ട്യൂബ് വീഡിയോയും ഒക്കെ ലഭിക്കുന്ന ടി‌വിക്ക് വര്‍ധിച്ച സ്വീകാ‍ര്യത ആണ് ലഭിച്ച് വരുന്നത്. ടി വി യും ഇന്റര്‍നെറ്റും സമ്മേളിക്കുന്ന അനുഭവം (Convergence) . ഒപ്പം തന്നെ സ്‌ക്രീന്‍ സാങ്കേതികവിദ്യയിലും വന്‍‌കുതിച്ച് ചാട്ടമാണ് സംഭവിക്കുന്നത്, ഇത് ഊര്‍ജ ഉപഭോഗത്തില്‍ കുറവ് ഉണ്ടാക്കുന്നു , മിഴിവുള്ള ചിത്രങ്ങള്‍ നയനാന്ദകരമായി സ്വീകരണ മുറിയിലെത്തുന്നു. ഗെയിമിങ്ങ് സൌകര്യങ്ങളായ ഹാര്‍ഡ്‌വെയര്‍ കൂട്ടിയിണക്കാനും ഇന്ന് ടി‌വിക്ക് സാധിക്കുന്നു. ചില നിര്‍മ്മാതക്കള്‍ ആകട്ടെ ഉള്‍ച്ചേര്‍ന്ന (in built) രീതിയില്‍ കമ്പ്യൂട്ടര്‍ ഗെയിമിങ്ങ് ഹാ‍ര്‍ഡ്‌വെയര്‍ ടി വി ക്കുള്ളില്‍ തന്നെ ചേര്‍ക്കുന്നു. പ്രകടമായ മറ്റൊരു മാറ്റം കാണാന്‍ സാധ്യത ഉള്ളത് ടി വി റിമോട്ടുകള്‍ക്കാകും. വിവരം ടൈപ്പ് (text input) ചെയ്യലും മൌസ് മുന ചലിപ്പിക്കാന്‍ പറ്റുന്ന സ്‌ക്രോള്‍ വീലും റിമോട്ടില്‍ വ്യാപകമായി വരാന്‍ ഇടയുണ്ട്. ഇതില്ലാതെ പൂര്‍ണ ഇന്റര്‍നെറ്റ് അനുഭവം പെട്ടെന്ന് സാധ്യമാകുവതെങ്ങനെ ! ശബ്ദ നിയന്ത്രിത സൌകര്യവും റിമോട്ടിലേക്ക് / ടി വി യിലേക്ക് വരുമെന്ന് കണക്കു കൂട്ടുന്നവരും കുറവല്ല, ചാനല്‍ മാറ്റാന്‍ ആജ്ഞാപിച്ചാല്‍ മതി ബട്ടന്‍ അമര്‍ത്തേണ്ടതില്ലന്ന് ചുരുക്കം

സിനിമാ ഗാനങ്ങള്‍ ട്യൂണിനൊപ്പിച്ച് എഴുതുന്നു എന്ന ആക്ഷേപം പോയ ദശകങ്ങളില്‍ പലവുരു ചര്‍ച്ചയായതാണ്. എന്നാല്‍ ഇനി കേള്‍ക്കാനാകുക പാട്ടെഴുതുന്നത് റിംഗ് ടോണിനൊപ്പിച്ചാണ് എന്നതാകും. സംവാദങ്ങളില്‍ ഇത് ഇടം പിടിച്ച് തുടങ്ങിയിട്ടില്ലെങ്കിലും ഹിന്ദിയില്‍ ഇത് തുടങ്ങിക്കഴിഞ്ഞെന്ന് പറയാം. വരാനിരിക്കുന്ന സിനിമ ഹിറ്റാകാന്‍ ഉപകരിക്കുമെന്ന് മാത്രമല്ല , ഇത് വഴി നല്ലോരു തുക വരുമാനമായും നിര്‍മാതാവിന് ലഭിക്കുമെന്ന സാമ്പത്തിക മേന്മയുമുണ്ട്. സിനിമാ മാര്‍ക്കറ്റിംഗിന് സോഷ്യല്‍ നെറ്റ്വര്‍ക്കിംഗ് ഉപാധികള്‍ മികച്ച തന്ത്രബോധത്തോടെ തന്നെ 2012 ല്‍ ഉപയോഗിക്കും എന്നതില്‍ തര്‍ക്കമില്ല. സിനിമ ടെലി‌വിഷനില്‍ റിലിസ് ചെയ്യുന്നത് പോലെ വീഡിയോ ഷെയറിംഗ് സൈറ്റുകളായ യൂ ട്യൂബ് പൊലെയുള്ളവ വഴി എല്ലാ നാടുകളിലെയും കാഴ്ചക്കാരെ തേടി ഔദ്യോഗികമായി തന്നെ എത്തും.

പ്രാദേശിക ഭാഷകളിലെ ആപ്ലിക്കേഷനുകള്‍ മൊബീല്‍ ഫോണുകളില്‍ ഇടം പിടിക്കേണ്ടത് അനിവാര്യതയാകും. വിവിധ കമ്പനികള്‍ തമ്മിലുള്ള പേറ്റന്റ് യുദ്ധം മുറുകാന്‍ ഇടയുണ്ട്. കമ്പനികളും സര്‍ക്കാരും പരമ്പരാഗത മാധ്യമങ്ങളും എങ്ങനെയാകും ഫേസ്‌ബുക്ക്, ട്വിറ്റര്‍ , യൂ ട്യൂബ് തുടങ്ങിയ സോഷ്യല്‍ നെറ്റ് വര്‍ക്കിംഗ് ഉപാധികളെ ഉരുക്ക്/നിയമ മുഷ്ടി കൊണ്ട് നേരിടുമോ സക്രീയമായി ഈ നവമാധ്യമത്തെ വരിക്കുമോ എന്നും 2012 തീരുമാനിക്കും. 2011 ന്റെ പാഠം അതാണല്ലോ സൂചിപ്പിക്കുന്നത് .

സിരി - ഇന്റര്‍നെറ്റ് തിരയലിന്റെ ശബ്‌ദ വസന്തം

2011-11-10T10:53:00.000-08:00

ആപ്പിള്‍ 4എസ് മൊബീല്‍ ഫോണിലെ ഒരു പേഴ്‌സണല്‍ അസിസ്റ്റന്റ് ആപ്ലിക്കേഷന്‍ മാത്രമായി സിരീ എന്ന ശബ്‌ദ തിരയല്‍ സംവിധാനത്തെ കാണുന്നത് ശരിയാകില്ല. നിര്‍മ്മിത ബുദ്ധി (ആര്‍ട്ടിഫിഷ്യല്‍ ഇന്റലിജന്‍സ്) യുടെ സമര്‍ത്ഥമായ പ്രയോഗമാണ് ഈ സ്വഭാവിക ഭാഷാ വിശകലന ഉപാധി. ഈ ആപ്ലിക്കേഷന്‍ സജീവമാക്കിയ ശേഷം ആവശ്യമുള്ള വിവരം ഫോണിനോട് ചോദിക്കുക. ഉടന്‍ തന്നെ ഉത്തരം ലഭിക്കും. സാങ്കേതികതയുടെ ബാലാരിഷ്ടതകള്‍ ഒഴിവാക്കിയാല്‍ സീരി അടുത്ത ടെക് വിപ്ലവം എന്ന് തന്നെ പറഞ്ഞാലും തെറ്റില്ല. കാരണം ഫോണിനോ സമാന ഉപകരണങ്ങള്‍ക്കോ അതിന്റെ സന്തത സഹചാരിയായ ബഹുവര്‍ണ സ്‌ക്രീന്‍ തന്നെ ആവശ്യമില്ലാത്ത തരത്തിലാണ് കാര്യങ്ങള്‍ പുരോഗമിക്കുന്നത്. സമീപ ഭാവിയില്‍ ഒരാളെ വിളിക്കണമെങ്കില്‍ ഫോണ്‍ എടുത്ത് വിളിക്കണം എന്ന് പറയുക. തിരികെ ആരെ വിളിക്കണം എന്ന് ഫോണ്‍ ചോദിക്കും. പേര് പറയുക. ഒന്നിലേറേ പേര് ഫോണ്‍ ബുക്കില്‍ ഉണ്ടെങ്കില്‍ അതില്‍ എത് വേണമെന്ന് ഫോണ്‍ വീണ്ടും ചോദിക്കും അതനുസരിച്ച് വിളിച്ച് തരും. ഇനി അങ്ങേപ്പുറത്തെ ആള്‍ തിരക്കിലോ അല്ലെങ്കില്‍ ഫോണ്‍ ഓഫ് ചെയ്‌തിരിക്കുന്ന അവസ്ഥയിലോ ആണെങ്കില്‍ ചിലപ്പോള്‍ സീരി ഇങ്ങനെ മറുപടി പറയാം. അദ്ദേഹത്തിനെ ഈ നമ്പറില്‍ കിട്ടുന്നില്ല വീട്ടിലെയോ അല്ലെങ്കില്‍ ഓഫീസിലെയോ നമ്പറില്‍ ശ്രമിക്കണോ. അതുമല്ലെങ്കില്‍ കുറച്ച് കഴിഞ്ഞ് വിളിക്കാം. എസ് എം എസ് വേണമെങ്കിലും അയക്കാം വേണ്ടത് പറഞ്ഞ് കൊള്ളൂ. അല്‍‌പം കഴിഞ്ഞ് വിളിക്കാം എന്നാണ് മറുപടി എങ്കില്‍ ഉടനെ വരും അടുത്ത ഉപദേശം എത്ര സമയം കഴിഞ്ഞ് വിളിക്കണം സമയം പറഞ്ഞോളൂ !

കഴിഞ്ഞ വര്‍ഷം ഏപ്രിലിലാണ് സീരിയെ ആപ്പിള്‍ സ്വന്തമാക്കുന്നത്. ഉത്പന്നം എന്ന നിലയില്‍ അവതരിപ്പിക്കുന്നത് കഴിഞ്ഞ മാസം അവതരിപ്പിച്ച എറ്റവും പുതിയ ഐ ഫോണിലും. നാല് വര്‍ഷം മുന്‍‌പ് ഒരു ചെറു സംരംഭമായി വികസിപ്പിച്ച് തുടങ്ങിയതാണ് സിരീ. അമേരിക്കന്‍ പ്രതിരോധ സ്ഥാപനമായ ദര്‍പ (ഡിഫന്‍സ് അഡ്വവാന്‍സ്‌ഡ് റിസര്‍ച്ച് പ്രോജക്‍ട്) യുടെ സഹകരണവും ആവോളം ഉണ്ടായിരുന്നു. SRI International ആണ് ഈ പദ്ധതിയുടെ ഇടനാഴിയായി പ്രവര്‍ത്തിച്ചത്, ഏതാനും സര്‍വകലാശാലകളുടെ അക്കാദമിക-സാങ്കേതിക സഹായവും പിന്നിലുണ്ടായിരുന്നു. ആന്‍‌ഡ്രോയ്ഡ്, ബ്ലാക്ക്‍ബെറി തുടങ്ങിയ സ്‌മാര്‍ട്ട് ഫോണുകളിലും ശബ്ദത്തിരയല്‍ ആയി ഇത് വരുമെന്ന് അനുമാനിച്ചവര്‍ ഏറെയായിരുന്നു. എന്നാല്‍ ആപ്പിള്‍ ഇത് എറ്റെടുത്തതോടെ ഇനി ഐ ഫോണിലൂടെയാകും മുഖ്യമായും സീരി ശബ്‌ദമുണ്ടാക്കി നീങ്ങുന്നത്. നമ്മുടെ ശബ്‌ദാന്വേഷണത്തിന് വിവരം ലഭിക്കുന്നതിനായി ഇന്റര്‍നെറ്റിലെ ആശ്രയിക്കാനാകുന്ന ഇടങ്ങള്‍ക്കൊപ്പം ഫോണിലെ റിമൈന്‍ഡര്‍ , ഫോണ്‍ ബുക്ക്, എസ് എം എസ് പെട്ടി, നോട്ട്സ് ,കലണ്ടര്‍ , സമയവിവരം, ഭൂപട സൌകര്യം എന്നിവയും ഉപയോഗിക്കും. ഓഹരി വിപണി വാര്‍ത്ത കാലാവസ്ഥാ വിവരം എന്നിവയും അവിഭാജ്യ ഘടകമാണ്. മഴവരുന്നോ, ഓഹരി വിപണി ഉയര്‍ന്നോ എന്ന് വിളിച്ച് തന്നെ ചോദിക്കാം ഉടനെ ഫോണ്‍ മറുപടിയും പറയും. നമ്മള്‍ നില്‍ക്കുന്നയിടം ഫോണിന് അറിയാവുന്നതിനാല്‍ അവിടെ മഴപെയ്യുമോ ഇല്ലയോ എന്നാകും മിക്കവാറും ആദ്യം മറുപടി പറയുക എന്ന് ഊഹിക്കുന്നതില്‍ തെറ്റില്ലല്ലോ. ഒപ്പം തന്നെ മറ്റ് സ്ഥലങ്ങളുടെ കാലാവസ്ഥാ വിവരം ആണ് വേണ്ടതെങ്കില്‍ സ്ഥലനാമം പറഞ്ഞു കൊള്ളൂ എന്ന് ഉപദേശിച്ചാലോ!

നിലവില്‍ തന്നെ മൊബീല്‍ ഫോണുകള്‍ മൂകരും ബധിരരുമായവര്‍ക്ക് അനുഗ്രഹമാണ്. എസ് എം എസ് വഴിയും മൊബീല്‍ ഫോണ്‍ സ്‌ക്രീനിലെ മറ്റ് ഇന്ദ്രജാലങ്ങള്‍ വഴിയും അവര്‍ എത്ര സ്വാതന്ത്ര്യത്തോടെയാണ് നമ്മളുമായി ആശയവിനിമയം ചെയ്യുന്നത്. ഇക്കഴിഞ്ഞ പതിനഞ്ചുവര്‍ഷം കൊണ്ട് മൊബീല്‍ ഫോണ്‍ വ്യാപകമായപ്പോഴും അന്ധരായ ചങ്ങാതിമാര്‍ക്ക് അത്ര ചങ്ങാത്തം കൂടാന്‍ പറ്റിയ ഉപകരണമായിരുന്നില്ല ഫോണുകള്‍ .ചില മോഡലുകളില്‍ വോയ്സ് റെക്കഗ്നിഷന്‍ സംവിധാനം ഉണ്ടെങ്കിലും അത് ഫോണിന്റെ പൂര്‍ണ ഉപയോഗം സാധ്യമാക്കിയിരുന്നില്ല. എന്നാല്‍ സീരിയും ഇതിനെ പ്രതിരോധിക്കാന്‍ ആന്‍‌ഡ്രോയ്‌ഡും ബ്ലാക്ക്ബെറിയും അടങ്ങുന്ന എതിരാളികള്‍ ഇറക്കാന്‍ ഇടയുള്ള സംവിധാനങ്ങളും കൂടി എത്തുന്നതോടെ കണ്ണുകാണാത്തത് ഒരു തടസമായി കുറഞ്ഞ പക്ഷം ഫോണുപയോഗിക്കുന്നതില്‍ അവര്‍ക്ക് അനുഭവപ്പെടില്ല. ഇതുവരെ അന്യമായിരുന്ന എസ് എം എസ് അവര്‍ക്ക് ഇനി ഇണങ്ങും. ആളിന്റെ പേര് പറയുക അയക്കാനുള്ള സന്ദേശം നിര്‍ദ്ദേശാനുസരണം നല്‍കുക. പൂര്‍ത്തിയായ ശേഷം ഫോണ്‍ തന്നെ ടൈപ്പ് ചെയ്യിപ്പിച്ചത് വായിച്ച് കേള്‍പ്പിക്കും അയക്കട്ടെ എന്ന അവസാന ചോദ്യത്തിന് യെസ് പറയുന്നതോടെ സന്ദേശം ഫോണ്‍ കടന്ന് അടുത്ത ഫോണിലേക്കോ കമ്പ്യൂട്ടറിലേക്കോ പറക്കും.

ഫോണിലെ വിവരവിശകലന ശേഷിയുള്ള അത്യാധുനിക ചിപ്പ്, പ്രത്യേക ആപ്പ്(ളിക്കേഷന്‍), ഇന്റര്‍നെറ്റ് ബന്ധം, ഇതിനായി ആ‍ശ്രയിക്കാവുന്ന വിവരയിടങ്ങള്‍ എന്നിവയുടെ ചേരുവയാണ് ശബ്‌ദതിരയല്‍ നടത്തുന്നത്. നിര്‍മ്മിത ബുദ്ധി അടിസ്ഥാനമാക്കി പ്രവര്‍ത്തിക്കുന്നതിനാല്‍ വരും കാലത്ത് അതിശയിപ്പിക്കുന്ന മാറ്റങ്ങള്‍ ഈ സംവിധാനത്തില്‍ ഉണ്ടാകും. നിലവില്‍ പരിമിതികള്‍ ഏറെയുണ്ട്. കൂടുതലും അമേരിക്ക അടിസ്ഥാനമാക്കിയുള്ള വിവരങ്ങളാണ് ചികഞ്ഞെടുത്ത് പറയുന്നത്. ആംഗലേയവും സഹായവാണികളുമാണ് ഇപ്പോള്‍ അനുസരിക്കുന്നത്. എന്നാല്‍ എല്ലാ കണ്ടുപിടുത്തങ്ങളെയും പോലെ ഇതും ചിറക് വിരിച്ച് പറക്കാന്‍ തുടങ്ങും എന്നതില്‍ സംശയമില്ല. 1903 ല്‍ റൈറ്റ് സഹോദരന്മാര്‍ വിമാനം കണ്ടുപിടിച്ചത് നാം ഇന്ന് കാണുന്ന രൂപത്തിലും ഭാവത്തിലും അല്ലല്ലോ. ഒരു പക്ഷെ അവരുടെ ഭാവനയ്‌ക്കും അപ്പുറത്താണ് ഇന്ന് വിമാനങ്ങളുടെ ഭൂഖണ്ഡാന്തര സഞ്ചാരം. അതുപോലെ ഈ ശബ്‌ദത്തിരയല്‍ വസന്തം ഇന്റര്‍നെറ്റിനെയും മൊബീല്‍ ഫോണിനെയും സമാനതകളില്ലാത്ത പുതിയ വഴികളിലൂടെ നടത്തും. ഒരു പക്ഷെ ഭാവി സ്‌മാര്‍ട്ട് ഫോണുകള്‍ക്ക് സ്‌ക്രീന്‍ ഇല്ലാത്ത മോഡലുകളും ഉണ്ടാകും. ഒരു പേനയുടെ അടപ്പ് പോലെ കീശയില്‍ കുത്തിക്കൊണ്ട് നടക്കാനായേക്കാം.

ബിറ്റ്സ് ആന്‍ഡ് ബൈറ്റ്സ് : കല്‍‌പിത കഥ പോലെ ഒരു കാര്യം പറയാം. പുലര്‍കാലെ 4.30 നുള്ള ഒരു തീവണ്ടിയില്‍ കയറിപറ്റാനായി 4.00 മണിക്ക് അലാറം വച്ച് കിടന്നുറങ്ങുന്നു. രാവേറെ വൈകി കിടന്നതിന്റെ ക്ഷീണവുമുണ്ട് അതേ സമയം യാത്ര ഒഴിവാക്കാനും വയ്യാത്തത് കൊണ്ട് മാത്രമാണ് അലാറം വച്ചത്. പക്ഷെ ഫോണ്‍ അലാറം ശബ്‌ദിച്ചത് കൃത്യം 7 മണിക്ക് എന്നിട്ടും തീവണ്ടി കിട്ടാതെയുമിരുന്നില്ല യാത്ര മുടങ്ങിയതുമില്ലത്രേ! എങ്ങനെയെന്നോ വണ്ടി മൂന്ന് മണിക്കൂര്‍ വൈകിയോടുന്നു എന്ന വിവരം തീവണ്ടിയാപ്പീസിലെ സമയവിവര പട്ടികയില്‍ നിന്നോ റേഡിയോ അറിയിപ്പില്‍ നിന്നോ മൊബില്‍ ഫോണ്‍ സ്‌മാര്‍ട്ടായി മനസിലാക്കി. തന്റെ യജമാനന്റെ ദിനക്കുറിപ്പ് നോക്കിയപ്പോള്‍ ഈ സമയത്തിനിടയ്‌ക്ക് വേറേ പരിപാടികള്‍ ഒന്നും കണ്ടതുമില്ല, അതു കൊണ്ട് പാവം കിടന്നുറങ്ങിയതല്ലേ എന്ന് ഫോണ്‍ കണക്കുകൂട്ടി. ആര്‍ട്ടിഫിഷ്യല്‍ ഇന്റലിജന്‍സിന് അല്പസ്വല്‍പ്പം ബുദ്ധിയൊക്കെ ഉണ്ടെന്ന് മനസിലായില്ലേ !

നമുക്ക് സ്റ്റീവ് ജോബ്‌സില്‍ നിന്ന് പഠിക്കാവുന്നത്

2011-10-18T20:30:00.000-07:00

ആപ്പിള്‍ മേധാവിയായിരുന്ന സ്റ്റീവ് ജോബ്സിന്റെ (1955-2011) മരണം പോയ വാരം വാര്‍ത്തകളില്‍ നിറഞ്ഞു നിന്ന് സംഭവം ആയിരുന്നല്ലോ. അനാഥബാല്യത്തില്‍ നിന്ന് തുടങ്ങി പഠനം പാതിവഴിയില്‍ ഉപേക്ഷിച്ച ശേഷം, സ്വയം പോറ്റിവളര്‍ത്തിയ കമ്പനിയില്‍ നിന്നും ഇടക്കാലത്ത് പുറത്താക്കപ്പെടുകയും പിന്നീട് വര്‍ധിത വീര്യത്തോടെ തിരിച്ചെത്തി സ്ഥാപനത്തിന്റെ അനുപമമായ വളര്‍ച്ചയ്‌ക്ക് തന്നെ കാരണമായ വ്യക്തിത്വം, അവസാനം അര്‍ബുദ രോഗം കീഴ്പ്പെടുത്തിയപ്പോഴേക്കും ജീവിതത്തിന്റെ നി‌മ്നോന്നതങ്ങള്‍ വളരെപ്പെട്ടന്ന് തന്നെ ഈ മനുഷ്യനിലൂടെ കടന്നു പോയിരുന്നു. എത് വീക്ഷണ കോണില്‍ നിന്ന് നോക്കിയാലും സ്റ്റീവ് ജോബ്സില്‍ നിന്ന് പഠിക്കാന്‍ എറെയുണ്ട്. പരമ്പരാഗതമായ പലധാരണകളെയും തച്ചുടയ്‌ക്കുന്നതായിരുന്നു ഇദ്ദേഹം നടന്നു വന്ന വഴികള്‍ . ചെറിയ തിരിച്ചടിയില്‍ പോലും ജീവിതം അസ്തമിച്ചെന്ന് കരുതുന്ന സാധാരണക്കാര്‍ക്കിടയില്‍ ഇദ്ദേഹം ഒരു പ്രകാശ ഗോപുരമായി എക്കാലവും നില നില്‍ക്കും.

ദത്തുപുത്രനായാണ് സ്റ്റീവ് ജോബ്സ് വളര്‍ന്നത്. 2005 ല്‍ അമേരിക്കയിലെ സ്റ്റന്‍ഫഡ് സര്‍വകലാശാലയില്‍ ബിരുദപൂര്‍വ സമ്മേളനത്തെ അഭിസംബോധന ചെയ്ത് നടത്തിയ പ്രസംഗം പലതു കൊണ്ടും ശ്രദ്ധേയമായിരുന്നു. ജീവിതത്തില്‍ നേരിട്ട തിരിച്ചടികള്‍ അക്കമിട്ട് നിരത്തി പ്രസംഗിച്ചത് ശ്രദ്ധേയമായിരുന്നു. മരണാനാന്തരം മിക്ക ദിനപത്രങ്ങളും വെബ് പോര്‍ട്ടലുകളും ഈ പ്രസംഗം വീണ്ടും വായനക്കാരിലേക്ക് എത്തിച്ചിരുന്നു. യൂ ട്യൂബ് പോലെയുള്ള വീഡിയോ പങ്കിടല്‍ സൈറ്റുകളില്‍ പ്രസംഗം ശ്രവിക്കാനാത്തൈയവരുടെ എണ്ണ കുത്തനെ കൂടി. തിരിച്ചടികളില്‍ നിന്ന് ഫീനീക്‍സ് പക്ഷിയെ പോലെ ഉയര്‍ത്തെഴുന്നേല്‍ക്കുന്ന സവിശേഷമായ സഹജസ്വഭാവം ഇദ്ദേഹത്തില്‍ ജന്മനാ തന്നെ ഉണ്ടായിര്‍ുന്നു എന്ന് പറയുന്നതാണ് ശരി.

കോളെജ് വിദ്യാര്‍ത്ഥിനി ആയിരിക്കെ ഗര്‍ഭിണിയായ അവിവാഹിത കൂടിയായ അമ്മ കുഞ്ഞിനെ ദത്തു നല്‍കി. ഗര്‍ഭിണി ആയിരിക്കെ തന്നെ കുഞ്ഞിനെ ദത്തെടുക്കാന്‍ ഒരു വക്കീലും ഭാര്യയും തയ്യാറായി എന്നാല്‍ ജനിച്ചപ്പോള്‍ തങ്ങള്‍ക്ക് പെണ്‍‌കുട്ടിയെ മതി എന്ന കാരണം പറഞ്ഞ് അവര്‍ ഒഴിവായി. ജനിച്ചും വീണ സമയത്ത് തന്നെ തുടങ്ങുന്നു തിരിച്ചടി എന്ന് പറഞ്ഞാല്‍ പോലും അതിശയോക്‍തിയില്ല. അവസാനം മറ്റൊരു കൂട്ടര്‍ കുഞ്ഞിനെ ദത്തെടുക്കാന്‍ വന്നു. പക്ഷെ ബിരുദധാരിക്കെ കുഞ്ഞിനെ വളര്‍ത്താന്‍ നല്‍കൂ എന്ന് പെറ്റമ്മ വാശിപിടിച്ചും പിന്നെ കുഞ്ഞു സ്റ്റീവ് വളര്‍ന്ന് വരുമ്പോള്‍ കോളെജിലയച്ച് ബിരുദധാരിയാക്കാം എന്ന വ്യവസ്ഥയില്‍ കുട്ടിയെ ദത്ത് നല്‍കി. കൌമാരകാലത്തിന്റെ തുടക്കത്തില്‍ എല്ലാരെയും പോലെ കോളെജില്‍ എത്തിയങ്കിലും പഠനം ആദ്യവര്‍ഷം തന്നെ ഉപേക്ഷിച്ചു. അവിടെ നിന്നും മുങ്ങിയ സ്റ്റീവ് പൊങ്ങുന്നത് അക്ഷരരൂപത്തെ പറ്റി (കാലിഗ്രാഫി) പഠിക്കുന്ന ക്ലാസിലാണ്. അതാകട്ടെ സ്റ്റീവ് ജോബ്സ് എന്ന സംരംഭകന് പില്‍ക്കാലത്ത് വളര്‍ച്ചയുടെ പടവുകള്‍ ഓടിക്കയറാന്‍ കാരണമാവുകയും ചെയ്തു. യുവായ സ്റ്റീവ് ജോബ്സ് പലപ്പോഴും കൂട്ടുകാരുടെ താമസസ്ഥലത്ത് അധികപറ്റായി അന്തിയുറങ്ങുകയും ഉപയോഗശൂന്യമായ കോളാക്കുപ്പികള്‍ പെറുക്കി വിറ്റ് കിട്ടുന്ന കാശിന് ഉപജീവനം നടത്തിയ കാലവും ഉണ്ടായിരുന്നു. ആഴ്ചക്കവസാനം കിലോമീറ്ററുകള്‍ക്കപ്പുറമുള്ള ഇസ്‌കോണ്‍ കൃഷ്‌ണ ക്ഷേത്രത്തിലെ അന്നദാനമായിരുന്നു വിഭവ സ‌മൃദ്ധമായ ശാപ്പാട്

പിന്നീട് ഭാരതീയ തത്വചിന്തയിലും നാട് കാണാനുള്ള മോഹത്തിലും ഒരു ചങ്ങാതിയുമായി ഇന്ത്യയിലെത്തുകയും ചെയ്തു. തിരികെ നാട്ടിലെത്തിയ ശേഷമാണ് ഇന്ന് നാമറിയുന്ന സ്റ്റീവ് ജോബ്സിന്റെ ജൈത്രയാത്ര തുടങ്ങുന്നത്. 1975 ചങ്ങാതിയായ വോസ്‌നിയാക്കുമായി ചേര്‍ന്ന് അക്കാലത്ത് കേട്ട് കേള്‍വിമാത്രമുണ്ടായിരുന്ന കമ്പ്യൂട്ടര്‍ നിര്‍മ്മാണത്തിലേക്ക് കടക്കുന്നത്. കോളെജ് പഠനം ഇഷ്ടമായില്ലെങ്കിലും സ്റ്റീവിന് സാങ്കേതികവിദ്യയോട് അടങ്ങാത്ത കമ്പമായിരുന്നു. ഇതാണ് ഇന്ത്യയിലേക്ക് വരുന്നതിന് മുന്നെ അറ്റാറി എന്ന ടെക് കമ്പനിയില്‍ ചേരാന്‍ പ്രേരിപ്പിച്ചത്. ഈ സ്ഥാപനത്തില്‍ വച്ചാണ് ആപ്പിളിന്റെ സഹസ്ഥാപകനായ വോസ്‌നിയാക്കിനെ പരിചയപ്പെട്ടതും. ആപ്പിള്‍ 1 എന്ന ആദ്യ കമ്പ്യൂട്ടറിന്റെ പണിശാല സ്റ്റീവ് ജോബ്സിന്റെ കിടപ്പുമുറി തന്നെയായിരുന്നു. പതുക്കെ വളരാന്‍ തുടങ്ങി, ചില നിക്ഷേപകര്‍ പണം മുടക്കാനും തയാറായി. ഇതിനിടെ പെപ്‌സി യില്‍ നിന്നും ഒരാളെ ജോലിക്കെടുത്തു. ഇവിടെ തുടങ്ങുന്നു രണ്ടാം തിരിച്ചടിയുടെ ആദ്യ സ്ഫുരണങ്ങള്‍ .1984 ല്‍ മാക്കിന്റോഷ് കമ്പ്യൂട്ടര്‍ വില്‍‌പനയ്‌ക്ക് തയാറാക്കി നല്‍കി. കമ്പനിക്ക് പത്ത് വയസ് തികയുമ്പോഴേക്ക് കഠിനപരിശ്രമം കൊണ്ടും ചിന്തയുടെ പ്രയോഗം കൈമുതലാക്കിയും 20 ലക്ഷം അമേരിക്കന്‍ ഡോളര്‍ എന്ന കടമ്പ കടന്നു ഒപ്പം മൂവായിരത്തിയഞ്ഞൂറിലധികം ജീവനക്കാരും. ഇതിനിടെ തന്നെ സ്ഥാപനം ഓഹരിക്കമ്പോളത്തിലുമെത്തി. അപ്പോഴേക്കും ആഭ്യന്തര പ്രശ്‌നങ്ങള്‍ മൂര്‍ശ്ചിച്ച് സ്റ്റീവ് ജോബ്സിന്റെ സ്വന്തം കമ്പനി പുറത്താക്കി. ഇദ്ദേഹത്തിന്റെ തന്നെ വാക്കുകളില്‍ പറഞ്ഞാല്‍ - ഒപ്പമുള്ള വ്യവസായ സംരംഭകര്‍ക്കാകെ ഞാന്‍ തെറ്റായ മാതൃകയാണന്ന് തോന്നി പോയ നിമിഷം. പതിയെ ആ പുറത്താകല്‍ ഒരു അവസരമായി മനസിലായി. ഒരു വിജയവരിച്ചവന്റെ അഹങ്കാരത്തില്‍ നിന്നും തുടക്കക്കാരന്റെ വിനയത്തിലേക്ക് ഞാന്‍ എത്തപ്പെട്ടു.

1984 ല്‍ അതായത് ആപ്പിളില്‍ നിന്ന് പുറത്താകുന്നതിന് തൊട്ട് മുന്നെ പുറത്തിറക്കിയ ആപ്പിള്‍ മാക്കിന്റോഷ് കമ്പ്യൂട്ടറിന് ചിത്രരൂപേണ സംവദിക്കാവുന്ന (ഗ്രാഫിക്കല്‍ യൂസര്‍ ഇന്റര്‍ഫേസ്) സംവിധാനം ഉണ്ടായിരുന്നു, അക്കാലത്ത് അത് പുതുമയോ അല്ലെങ്കില്‍ അത്ഭുതമോ ആയിരുന്നു. ആപ്പിളില്‍ നിന്ന് പടിയിറങ്ങിയ ശേഷം നെക്‍സ്റ്റ് എന്ന കമ്പനിയും പിക്സാര്‍ എന്ന ആനിമേഷം സംരംഭവുമായി സ്റ്റീവ് തന്റെ സ്വപ്‌നങ്ങള്‍ സാക്ഷാത്കരിക്കാനുള്ള അവിരാമമായ യാത്രയിലായിരുന്നു. 1996 ല്‍ തന്നെ പുറത്താക്കിയ അല്ലെങ്കില്‍ സ്വന്തം സ്ഥാപനമായ ആപ്പിളിന് സ്റ്റീവ് ജോബ്സ് എന്ന മാന്ത്രികനെ തിരിച്ച് വിളിക്കേണ്ടി വന്നു. ഒന്ന് നോക്കണേ ! ലോകത്തില്‍ ഒരു വ്യവസായി സ്റ്റീവ് നടന്ന സംരംഭവഴികളിലൂടെ നടന്നുകാണില്ല. തിരികെ എത്തിയത് പ്രതാപകാലം മങ്ങിത്തുടങ്ങുകയായിരുന്ന ആപ്പിളിലേക്കായിരുന്നു, പുറത്ത് നിന്ന 11 വര്‍ഷം ആപ്പിള്‍ നിര്‍ണായകമായ ഒരു ചലനവും സാങ്കേതികലോകത്ത് സൃഷ്ടിച്ചതുമില്ല എന്നത് സത്യം.

തിരിച്ചെത്തിയപ്പോള്‍ ആപ്പിളും സ്റ്റീവ് ജോബ്സും മുന്‍‌പെങ്ങുമില്ലാത്ത കരുത്താര്‍ജിക്കുകയായിരുന്നു അതു വരെ കണ്‍‌സ്യൂമര്‍ ഇലക്‍ട്രോണിക്‍സ് വിപണിയില്‍ കമ്പനി ഒന്നുമല്ലായിരുന്നു. 2001 ല്‍ സംഗീതാസ്വാദന ലോകത്ത് ഐ പോഡ് എന്ന തീരെ ചെറിയ ഒരു ഉപകരണം പുറത്തിറക്കുമ്പോള്‍ എതിരാളികള്‍ അക്ഷരാര്‍ത്ഥത്തില്‍ ഞെട്ടി. വിപണി വാണിരുന്നവര്‍ക്ക് അവഗണിക്കാവുന്നതായിരുന്നില്ല ഈ കൊണ്ടുനടക്കാവുന്ന ഒരു ബിസ്‌കറ്റിന്റെയത്ര മാത്രം വലിപ്പമുള്ള പാ‍ട്ട് പെട്ടി. ഉപയോക്താക്കള്‍ ഇരു കൈയ്യും നീട്ടി ഉത്പന്നത്തെ സ്വീകരിച്ചു. അവര്‍ സ്വപ്‌നം പോലും കാണാത്ത സാങ്കേതികത്തികവായിയിരുന്ന ഐ പോഡ് എന്ന ചെപ്പില്‍ ഒളിപ്പിച്ച് വച്ച് നല്‍‌കിയത്. ഐ പോഡിന്റെ വിപണിത്തിളക്കം ആപ്പിളിനെ ഉപഭോക്‍തൃ ഉത്പന്നങ്ങളുടെ ലോകത്ത് ഇരുപ്പുറപ്പിച്ചു. തുടര്‍ന്ന് ഐ ട്യൂണ്‍സ് എന്ന മ്യൂസിക് സ്റ്റോര്‍ , ഐ ഫോണ്‍ എന്ന മൊബൈല്‍ ഫോണ്‍ എന്നിവയും 2010 ജനുവരിയില്‍ ഐ പാഡ് എന്ന ടാബ്‌ലറ്റ് കമ്പ്യൂട്ടറും അവതരിപ്പിച്ചു. തൊട്ടതെല്ലാം പൊന്നാക്കി എന്ന പ്രയോഗം ആപ്പിളിന്റെയും സ്റ്റീവ് ജോബ്സിന്റെയും കാര്യത്തില്‍ നൂറു ശതമാനം ശരിയായി. എല്ലാ ഉപകരണങ്ങളും വിപണി റെക്കോഡുകള്‍ തകര്‍ത്തെറിഞ്ഞു. ഇന്ന് 40,000 കോടി അമേരിക്കന്‍ ഡോളര്‍ മൂല്യമുള്ള സ്ഥാപനമായി ആപ്പിള്‍ മാറി.

ഒരു വ്യവസായ സംരംഭകന്റെ നിറം പിടിപ്പിച്ച പതിവ് കഥ എന്ന് പറഞ്ഞ് അലക്ഷ്യമായി വായിച്ചുപേക്ഷിക്കാവുന്നതാണോ സ്റ്റീവ് ജോബ്സിന്റെ ജീവിതവും ആപ്പിളിന്റെ കഥയും. അല്ല എന്ന് ഉത്തരം. മേന്മയേറിയ സ്ഥാപനങ്ങളില്‍ പഠിച്ചവര്‍ക്ക് മാത്രം പ്രാപ്യമാകുന്ന സാങ്കേതികവിദ്യാ ലോകത്താണ് ഇദ്ദേഹം വിജയപതാക പാറിച്ചത്. അക്കാ‍ദമിക് യോഗ്യത ഒന്നും ഇല്ല. അതെ സ്റ്റീവ് ജോബ്സില്‍ നിന്നും പഠിക്കാവുന്ന പാഠം ഇതാണ്: സ്വപ്‌നം കാണാനുള്ള കഴിവും ആ സ്വപ്‌നത്തെ ആര്‍ക്കും അസൂയ ജനിപ്പിക്കാവുന്ന തരത്തിലെ ഉത്പന്നമാക്കാനുള്ള കഴിവും ഉണ്ടെങ്കില്‍ പിന്നെ ഒരു യോഗ്യതയും ആവശ്യമില്ല. സംരംഭകത്വ ബോധം തീരെ കുറഞ്ഞ ഇന്ത്യയില്‍ (പ്രത്യേകിച്ച് കേരളത്തില്‍ ) ആപ്പിളിന്റെ ജൈത്രയാത്ര ആവര്‍ത്തിച്ച് പഠന വിധേയമാക്കേണ്ടതുണ്ട്. നമ്മുടെ നാട്ടിലെ ഡി ടി പി സെന്റര്‍ നടത്തിപ്പുകാരന് പോലും സാങ്കേതികയോഗ്യത വേണം എന്ന് ശഠിക്കുന്ന കാലത്ത് സ്റ്റീവ് ജോബ്സിനെ പോലെ ഒരു സംരംഭകനെ ഉള്‍ക്കൊള്ളാന്‍ ഇക്കാലത്ത് പോലും ആകുമോ? അതേ സമയം തന്നെ കോളെജില്‍ നിന്നും ആദ്യവര്‍ഷം തന്നെ പുറത്താകേണ്ടി വരുന്ന ഒരാള്‍ക്ക് മാനസികമായും മറ്റും നേരിടേണ്ടി വരുന്ന പീഡനപര്‍വം തുടരുന്ന നാട്ടില്‍ സ്റ്റീവ് ജോബ്സിന്റെ ലോകം അവര്‍ക്ക് മുന്നോട്ട് പോകാന്‍ ഒരു പിടിവള്ളിയാകണം.

ഇന്നാട്ടില്‍ ഏതാനും കോടി വാര്‍ഷിക വിറ്റുവരവുള്ള സ്ഥാപനങ്ങളും അതിന്റെ മേധാവികളും ത്രീ പീസ് സ്യൂട്ടില്‍ ധനാഡ്യനായി വന്നിറങ്ങുമ്പോള്‍ പലതരം പത്മാ അവാര്‍ഡുകള്‍ക്കുമായി ചരടുവലിക്കുമ്പോഴാണ്. എണ്‍പതുകള്‍ മുതല്‍ക്ക് തന്നെ ഫോര്‍ച്യൂണ്‍ 500 പട്ടികയില്‍ ഇടം പിടിച്ച ആപ്പിളിന്റെ സ്ഥാപകന്‍ ഒരു വട്ടക്കഴുത്ത് ടീ ടര്‍ട്ടും ജീന്‍സുമിട്ട് എല്ലായ്പ്പോഴും നടക്കുന്നത്. ലോകം സാകൂതം കാത്തിരിക്കുന്ന പത്രസമ്മേളനങ്ങളില്‍ പോലും കമ്പനിയുടമയുടെ നാട്യങ്ങളില്ലാതെ ഇതേ വസ്ത്രധാരണവുമായാണ് എത്തുന്നത്. ഭാരതീയ തത്വചിന്തയില്‍ ആകൃഷ്ടനായി പില്‍ക്കാലത്ത് ഇദ്ദേഹം ബുദ്ധമതം സ്വീകരിക്കുകയും ചെയ്തു എന്നത് ചരിത്രം.

സ്വന്തം കമ്പനിയില്‍ നിന്നും താന്‍ കൊണ്ട് വന്ന സഹപ്രവര്‍ത്തകനാല്‍ തന്നെ പടിയിറക്കപ്പെട്ടപ്പോഴും ശുഭചിന്ത കൈവിടാതെ അവിരാമം പ്രവര്‍ത്തിച്ചിരുന്ന സ്റ്റീവ് ജോബ്സിനെ താരതമ്യപ്പെടുത്താന്‍ മറ്റ് വ്യക്തികള്‍ ഇല്ല എന്ന് പറയുമ്പോള്‍ തന്നെ ചിന്തയുടെ നൂതനത്വം കൊണ്ട് വിജയം കൊയ്യാന്‍ ഒരു സ്ഥാപന പിന്തുണയും ആവശ്യമില്ല എന്ന് ബോധ്യമാകും. ചെറിയ പ്രതിസന്ധികളില്‍ പോലും ആടിയുലയുന്നവര്‍ക്ക് പ്രതീക്ഷയുടെ തിരിനാളമായി സ്റ്റീവ് ജോബ്സിന്റെ ജീവിതം മാറുന്നത് ഇവിടെയാണ്. മറ്റുള്ളവര്‍ ഉണ്ടാക്കിയ (കമ്പ്യൂട്ടര്‍ , മ്യൂസിക് പ്ലയര്‍ , മൊബീല്‍ ഫോണ്‍ , ടാബ്‌ലറ്റ് കമ്പ്യൂട്ടര്‍ ) ഉപകരണങ്ങളാണ് ആപ്പിള്‍ പരിഷ്‌കരിച്ച് അവതരിപ്പിച്ചത്. അതായത് തികച്ചും പുത്തന്‍ പുതിയ ഉപകരണം അല്ല വിജയത്തിനായി ഇദ്ദേഹം തിരഞ്ഞെടുത്തത്, മറിച്ച് നിലവിലുള്ളവയെ തന്നെ സ്വപ്‌നം ചാലിച്ച് തികച്ചും നൂതനമായ ഒന്നാക്കി മാറ്റി. ഒരോ ഉപകരണം അവതരിപ്പിക്കുന്ന ആദ്യദിനം തന്നെ അത് വിപണിയെ പിടിച്ചു കുലുക്കി . നിലവിലുള്ള പ്രബലരായ ഉത്പാദകരുടെ ഉറക്കം കെടുത്താന്‍ തക്ക എന്ത് സാധനം ആണ് സ്റ്റീവ് ജോബ്സിന്റെ പക്കല്‍ ഉണ്ടായിരുന്നത്? ഉത്തരം ഒന്ന് മാത്രം സ്വപ്‌നം ..സ്വപ്‌നം മാത്രം. ഇതിനെ ഉപകരണമാക്കിമാറ്റാനുള്ള കര്‍മ്മകുശലത എതെങ്കിലും ഇന്‍സ്റ്റിട്യൂട്ടില്‍ നിന്നല്ല സ്വയാര്‍ജിതമായാണ് സ്റ്റീവ് ഉണ്ടാക്കിയെടുത്തത്. ഇതാകണം ഇന്ത്യന്‍ സംരംഭകര്‍ക്ക് പകര്‍ത്താനാകുന്നത്. അല്ലെങ്കില്‍ കേവലം ഒരു ബിസിനസ് കാരന്റെ വിജയചരിത്രം മാത്രമായി ഒരു ജീവിതം മാറും.

സ്റ്റീവ് ജോബ്സിന്റെ അവസാന തിരിച്ചടി എന്ന് അദ്ദേഹം തന്നെ വിശേഷിപ്പിക്കുന്നത് തന്നില്‍ പിടിപെട്ട അപൂര്‍വമായ പാന്‍‌ക്രിയാസ് അര്‍ബുദമാണ്. ആറുവര്‍ഷത്തിന് മുന്നെ തന്നെ അര്‍ബുദരോഗം സ്ഥിരീകരിക്കപ്പെട്ടു. ചികില്‍‌സയില്ല എന്നറിയമായിരുന്നിട്ടും കര്‍മമേഖലയില്‍ നിന്ന് ഒരടി പോലും ഇദ്ദേഹം പിന്‍‌മാറിയില്ല എന്ന് മാത്രമല്ല കൂടുതല്‍ തീവ്രമായി തന്റെ സ്വപ്‌നങ്ങളെ താലോലിക്കാനും അത് പ്രാവര്‍ത്തികമാക്കാനും ആണ് സമയം കണ്ടെത്തിയത്. കരിയറിന്റെ അവസാന കാലത്ത് നടത്തിയ പ്രസംഗങ്ങളിലും യുവാക്കളോട് നടത്തിയ ഉപദേശം വിശപ്പുള്ളവനായിരിക്കൂ വിഡ്ഡിയായിരിക്കൂ എന്നതാണ്.

ജനനസമയത്ത്, പഠനകാലത്ത്, സംരംഭകനായിരിക്കെ എറ്റവും ഒടുവില്‍ രോഗാതുരനായി സ്റ്റീവ് ജോബ്സ് പ്രതിസന്ധികളോട് തന്നെയാണ് പടവെട്ടിയത്. ഇതില്‍ നിന്ന് നമുക്ക് പഠിക്കാവുന്നത് വിജയത്തിന് എളുപ്പവഴിയോ കുറുക്കുവഴിയോ ഇല്ല എന്നതാണ്. ചിലര്‍ പറയാറുള്ളത് പോലെ കഠിനാധ്വാനം എന്നും ഇദ്ദേഹത്തിന്റെ ജീവിതവഴിയെ വിശേഷിപ്പിക്കാനാകുമോ? ഇല്ല. മറിച്ച് innovate and improve (നൂതനത്വത്തിലൂടെ പുരോഗതിയുടെ പടവുകളിലേക്ക്) തന്നെയായാണ് നമുക്ക് ഈ ജീവിതത്തില്‍ നിന്ന് പഠിക്കാനാവുന്നത്

ട്വിറ്റര്‍ മാധ്യമങ്ങള്‍ക്ക് ഒരു വിവര സ്രോതസ്

2011-09-15T10:21:00.000-07:00

സെപ്തംബര്‍ 8 ന് രാത്രി 11 മണി കഴിഞ്ഞതോടെ ഡല്‍ഹിയില്‍ വന്‍‌ശബ്ദത്തോടെ ഭൂചലനം ഉണ്ടായി. ഉടന്‍ തന്നെ ജനങ്ങളുടെ ഭയം അതേ ദിനം രാവിലെ സംഭവിച്ച ഹൈക്കോടതി- ബോംബ് സ്ഫോടനവുമായി ബന്ധപ്പെട്ടു എന്നത് സ്വാഭാവികം എന്നാല്‍ ഈ അവസരത്തില്‍ ചില മാധ്യമങ്ങള്‍ അവസരത്തിനൊത്ത് ഉയര്‍ന്നു. തല്‍‌ക്ഷണം തന്നെ ട്വിറ്ററില്‍ അടക്കം അവര്‍ ശബ്‌ദം ഭൂചലനത്തിന്റേതാണന്ന് എഴുതുക മാത്രമല്ല. Earthquake in Delhi. Send us your pictures/videos to email or tweet us #delhiearthquake ഇങ്ങനെ കൂടി ട്വിറ്ററില്‍ കുറിച്ചിട്ടു. ഒരേ സമയം തന്നെ എത്ര സമര്‍ത്ഥമായാണ് വാര്‍ത്താ ശേഖരണത്തിനും ഒപ്പം വാര്‍ത്ത ജനങ്ങളിലെത്തിക്കാനും അവര്‍ സോഷ്യല്‍ മീഡിയ ഉപയോഗിക്കുന്നത്.

കേരളത്തില്‍ പോയ ഒരു വര്‍ഷത്തിനിടെ എത്രയോ പ്രാവശ്യം അടിയന്തിരമായി ഇടപെടേണ്ട വാര്‍ത്താസംഭവങ്ങള്‍ ഉണ്ടായി, എന്നിട്ടും നമ്മള്‍ ട്വിറ്ററിനെയും ഫേസ്‌ബുക്കിനെയും കാര്യമായി വാര്‍ത്ത ശേഖരിക്കാനുള്ള ഒരു ഇടമായി കാണുന്നില്ല. ഉദാ: ഒരു വിമാനം തെന്നിമാറല്‍ അല്ലെങ്കില്‍ ആളില്ലാത്ത തിവണ്ടിമുറിച്ചുകടക്കല്‍ ഇടത്തെ അപകടങ്ങള്‍ . ഇവിടെ ഒക്കെ ജനങ്ങള്‍ അവരുടെ ക്യാമറ ഉപയോഗിച്ച് ദൃശ്യങ്ങള്‍ എടുക്കുന്നുണ്ട് അല്ലെങ്കില്‍ ട്വിറ്റില്‍ കുറിക്കുന്നുണ്ട്. മിക്കപ്പോഴും ഇത് റിപ്പോര്‍ട്ടര്‍മാര്‍ സ്ഥലത്തെത്തിയ ശേഷം ആകും ശേഖരിക്കപ്പെടുന്നത്. എന്നാല്‍ നിമിഷനേരം കൊണ്ട് തന്നെ ഇവയെല്ലാം യൂടൂബ് ലിങ്ക് വഴി ചാനലില്‍ കാണിച്ചുകൂടാ. കുറഞ്ഞ പക്ഷം ചിത്രങ്ങള്‍ എങ്കിലും ! ഇതിന് മാത്രമല്ല. നമ്മുടെ നാട്ടില്‍ നടക്കുന്ന ഇത്തരം പ്രധാന വിവരങ്ങള്‍ അവര്‍ മാധ്യമങ്ങളിലേക്ക് വിളിച്ച് പറയും മുന്നെ തന്നെ സോഷ്യല്‍ മീഡിയയില്‍ നിന്ന് സോഴ്സ് ചെയ്ത് എടുക്കാവുന്നതേയുള്ളൂ. വേണമെങ്കില്‍ ആ സംഭവ സ്ഥലത്തുള്ള വിശ്വസിനീയമായ ഒരാളെ ഫോണ്‍ ഇന്‍ ല്‍ കിട്ടുകയും ചെയ്യും, അല്ലെങ്കില്‍ ഉടനെ അവിടെ ചെല്ലാനിടയുള്ള റിപ്പോര്‍ട്ടര്‍ക്ക് ശരിയായ ഒരു സഹായിയായി ആദ്യവിവരം നല്‍കാന്‍ ഇങ്ങനെയുള്ളവര്‍ക്ക് ആകും.
ഡല്‍ഹി ഭൂചലന സമയത്ത് ഉപയോഗിച്ച #delhiearthquake എന്ന ടാഗില്‍ ഒരു സെക്കന്റില്‍ പത്തോളം സന്ദേശങ്ങള്‍ ആദ്യമിനുട്ടില്‍ തന്നെ വന്നുകൊണ്ടിരുന്നു. ഇത് ഒരു പക്ഷെ ആ ചാനലിലും മറ്റുള്ളവര്‍ക്കും കാര്യമായി തന്നെ പ്രയോജനപ്പെടും. സ്ഥലത്തെത്തുന്ന റിപ്പോര്‍ട്ടറുടെ ജോലി കൂടുതല്‍ എളുപ്പമാവുകയും ചെയ്യും. മേയ് മാസം ആദ്യം ഒസാമ ബിന്‍ ലാദന്റെ മരണം സ്ഥിരീകരിക്കപ്പെടുന്ന സമയത്ത് ഒരു സെക്കന്റില്‍ 5000 ട്വിറ്റ്കളാണ് പ്രവഹിച്ചത്. പിന്നീട് സംഭവിച്ച മുംബൈ ബോബ് സ്ഫോടന സമയത്തും സന്നദ്ധപ്രവര്‍ത്തകരെ എകോപിപ്പിക്കുന്നതിനും വാര്‍ത്ത ശേഖരിക്കാനും മികച്ച പിന്തുണയാണ് ട്വിറ്റര്‍ നല്‍കിയത്.

ഗൌരവമായ ജേണലിസത്തിന് ട്വിറ്റര്‍ എങ്ങനെ പ്രയോജനപ്പെടുത്താം.

ബ്രേക്കിംഗ് ന്യൂസിന്റെ കണ്ടെത്തലിന് : സാമാന്യം നല്ല രീതിയില്‍ ട്വിറ്റ് ചെയ്യുന്ന മാധ്യമപ്രവര്‍ത്തകര്‍ക്ക് അപ്പപ്പോള്‍ തന്നെ വിവരം ‌@username ആയി കിട്ടും. ട്വിറ്ററില്‍ ഒരാള്‍ വായിക്കണം എന്ന് സന്ദേശം നല്‍കുന്നയാള്‍ ഉദ്ദേശിച്ചാല്‍ പ്രസ്തുതയാളുടെ ട്വിറ്റ് വിലാസത്തിന് മുന്നില്‍ @ ചേര്‍ക്കും. ഇത് വഴി ഒരു എസ് എം എസ് വായിക്കുന്ന ലാഘവത്തില്‍ അപ്പപ്പോഴുള്ള ബ്രേക്കിംഗ് ന്യൂസ് മാധ്യമപ്രവര്‍ത്തകര്‍ക്ക് അറിഞ്ഞു കൊണ്ടിരിക്കാം. ഇല്ലെങ്കില്‍ #ടാഗില്‍ ഒരു പ്രത്യേക വിവരം സാമാന്യത്തിലധികം വരുന്നുണ്ടന്ന് മനസിലായാല്‍ ഉടനെ തന്നെ വാര്‍ത്തയുടെ പ്രഭവകേന്ദ്രം കണ്ടെത്തി റിപ്പോര്‍ട്ടര്‍മാരെ വിന്യസിക്കാം. ഇനി ഒരു വാര്‍ത്ത അറിഞ്ഞു എന്ന് വയ്ക്കുക, കൂടുതല്‍ വിവരങ്ങള്‍ തേടണം എന്നാല്‍ റിപ്പോര്‍ട്ടര്‍മാര്‍ സംഭവസ്ഥലത്ത് എത്താന്‍ സമയവും എടുക്കും എങ്കില്‍ പുതിയ #ടാഗ് ഉചിതമായി നല്‍കിയാല്‍ മതി. ഡല്‍ഹി ഭൂചലന സമയത്ത് #delhiearthquake ആയിരുന്നു വിവരങ്ങളെ കോര്‍ത്തിണക്കാന്‍ ഉപയോഗിക്കപ്പെട്ടത്. സിറ്റിസണ്‍ ജേണലിസ്റ്റുകള്‍ എന്ന് വിളിക്കാവുന്ന സംഭവങ്ങള്‍ക്ക് സാക്ഷിയാകുന്ന ടെക് സാക്ഷരരായ പൊതുജനം വിവരം ബ്ലോഗിലിടാന്‍ മടിക്കും എന്നാല്‍ ഒരു എസ് എം എസ് പോലെ ലളിതമായ ഘടന ട്വിറ്റിനെ ഇവര്‍ക്കിടയില്‍ പ്രീയങ്കരമാക്കുന്നു. മൊബൈലില്‍ എടുത്ത പടം അല്ലെങ്കില്‍ ആദ്യമാത്ര പ്രതീകരണം ഒരു വരിയായി ട്വിറ്ററില്‍ ഇടുന്നു. അതുകൊണ്ടാണ് ഒരു വാര്‍ത്താമൂല്യം ഉള്ള സംഭവം നടക്കുന്ന അതേ സമയത്ത് തന്നെ നൂറുകണക്കിന് ട്വിറ്റുകള്‍ എത്തുന്നത്. സാങ്കേതികഭാഷയില്‍ TPSഎന്നാണ് പറയുന്നത് ട്വിറ്റ് പ്രതി സെക്കന്റ് ! . ഇത് നോക്കി സംഭവത്തിന്റെ വാര്‍ത്തയാഴം എളുപ്പത്തില്‍ മനസിലാക്കാം .
അഭിമുഖം മികവുറ്റതാക്കാന്‍ : വാര്‍ത്താ മാധ്യമങ്ങളില്‍ അഭിമുഖം ഒഴിച്ചുകൂടാനാവാത്ത ഘടകമാണ്. രസമുള്ള അഭിമുഖത്തിന്റെ രസത്രന്ത്രം അപൂര്‍വമായതും കൃത്യമായ വിവരം ഊറ്റിയെടുക്കാനാവുന്ന ചോദ്യങ്ങള്‍ തന്നെ. ആദ്യന്തമായി ഇത് പത്രപ്രവര്‍ത്തകന്റെ ആഴത്തിലും പരപ്പിലും ഉള്ള വായനയെ ആശ്രയിച്ചിരിക്കും എന്നിരിക്കിലും സമര്‍ത്ഥമായി ട്വിറ്റര്‍ ഉപയോഗിച്ച് ഇന്ന് ചോദ്യങ്ങള്‍ പിറവി കൊള്ളുന്നുണ്ട്. ഉദാ: ഒരു കമ്പനി ഉടമയെ അല്ലെങ്കില്‍ രാഷ്ട്രീയ താരത്തെ ആണ് അഭിമുഖം ചെയ്യുന്നതെന്നിരിക്കട്ടെ , ആ സ്ഥാപനത്തിലെ സര്‍വവിവരവ്യാപിയായ ഒരാള്‍ / രാഷ്ട്രീയക്കാരന്റെ അടുത്ത അനുയായി അല്ലെങ്കില്‍ എതിരാളി നല്‍കുന്ന ഒരു ചോദ്യമുനക്ക് മൂര്‍ച്ചയേറും എന്ന് പറയേണ്ടതില്ലല്ലോ. ടിവി പരിപാടികളില്‍ ഇന്ന് ഒരോ പ്രത്യേക പരിപാടിയും നേരിട്ട് സം‌പ്രേഷണം ചെയ്യുന്ന സമയത്ത് തന്നെ അവര്‍ സ്‌ക്രീനില്‍ സ്ഥാപനത്തിന്റെ/പരിപാടിയുടെ ട്വിറ്റ് ഐഡി പ്രദര്‍ശിപ്പിക്കാറുണ്ട്. ഉടന്‍ തന്നെ കാഴ്ചക്കാരുടെ വക ചോദ്യങ്ങളെത്തി തുടങ്ങും. ഇതില്‍ നിന്നും കാമ്പുള്ളവ വാര്‍ത്തവതാരകന്റെ ശബ്ദത്തില്‍ എതിരെയിരിക്കുന്ന പാനലംഗങ്ങള്‍ക്ക് മുന്നില്‍ എത്തും. ചാനലില്‍ വിളിക്കുന്നതും ചോദ്യമെറിയാന്‍ ടെലഫോണ്‍ ക്യൂവില്‍ നില്‍ക്കുന്നതും ഒക്കെ പഴങ്കഥ എന്ന് പറയാം
വിവരാധികാരികതയ്‌ക്ക് : ഒരു ബ്രേക്കിംഗ് ന്യൂസ് പരമ്പരാഗത രീതിയില്‍ എത്തിയാല്‍ ഉടനെ തന്നെ ആധികാരികത ഉറപ്പാക്കാനായും അതിന്റെ മറ്റ് അനുബന്ധവിവര ശേഖരണത്തിനും ട്വിറ്റ് ടാഗുകള്‍ നിരീക്ഷിക്കുന്നത് ഇന്ന് പതിവാണ്. മറ്റ് ചിലപ്പോള്‍ സം‌പ്രേഷണം ചെയ്ത് കൊണ്ടിരിക്കുന്ന /അച്ചടിച്ച് വന്ന റിപ്പോര്‍ട്ടുകളിലെ തെറ്റുകളോ അക്ഷരപിശാചോ വരെ കണ്ടുപിടിക്കാന്‍ സ്ഥാപനത്തിന്റെ ട്വിറ്റ് ഐഡിയിലേക്ക് വരുന്ന സന്ദേശങ്ങള്‍ നോക്കിയാല്‍ മതി. ഒരു മൊബീല്‍ നമ്പര്‍ കൊടുത്താല്‍ പോരെ എന്ന് കരുതാം എന്നാല്‍ എസ് എം എസ് അയക്കുന്നതില്‍ പ്രേക്ഷകര്‍ താത്പര്യം ഇല്ല എന്ന് ചില പഠനങ്ങള്‍ സൂചിപ്പിക്കുന്നു, കാരണം എസ് എം എസ് ഒരു നമ്പരിലേക്ക് മാത്രം പോകുന്ന വിവരമാണ് , പബ്ലിക് ഡൊമൈനില്‍ വിവരം എത്തുന്നുമില്ല ! എഴുതുന്നയാള്‍ക്ക് മാധ്യമത്തെ മാത്രമല്ല മറ്റുള്ളവരെ കൂടിയാണ് അറിയിക്കേണ്ടത്.
കൂടുതല്‍ പ്രേക്ഷകര്‍ /വായനക്കാര്‍ : ഇപ്പോള്‍ നടക്കുന്ന പരിപാടി കാണാനായി/ ഇന്ന് പ്രസിദ്ധീകരിച്ച വാര്‍ത്ത വായിക്കാനായി ഉള്ള സന്ദേശങ്ങള്‍ ട്വിറ്റ് പേജില്‍ ഇടുന്നത് മാധ്യമത്തിന്റെ കാഴ്ചക്കാരുടെ എണ്ണം കുത്തനെ കൂട്ടും. പ്രത്യേകിച്ചും എന്തെങ്കിലും മൌലികത/പ്രത്യേകത ഉള്ള വിവരം ആണെങ്കില്‍ . ട്വിറ്റര്‍ ഒരു ഉച്ചഭാഷിണി (Twitter amplifying news to traditional media) എന്നാണ് വെബ് ലോകത്തെ വര്‍ത്തമാനം അത് ഒരു പരിധി വരെ ശരിയുമാണ്. ഒരു ട്വിറ്റ് മറ്റൊരാള്‍ എടുത്ത് വീണ്ടും ട്വിറ്റ് ചെയ്യുന്നതിനെ റീട്വീറ്റ് അല്ലെങ്കില്‍ RT എന്നാണ് പറയുന്നത്. ചില സന്ദേശങ്ങള്‍ മിനിട്ടുകള്‍ക്കുള്ളില്‍ തന്നെ ആ‍യിരക്കണക്കിന് പുനപ്രക്ഷേപണം നടക്കും. ഇത് മാധ്യമത്തിനോ അല്ലെങ്കില്‍ അതിന്റെ ഔദ്യോഗിക വെബ്സൈറ്റിലോ ഉള്ള സന്ദര്‍ശകരുടെ എണ്ണം പല മടങ്ങ് വര്‍ധിപ്പിക്കും
പണച്ചിലവ് കുറവ് : ട്വിറ്ററില്‍ എത്താനും സജീവമായി ഉപയോഗിക്കാനും പ്രത്യേകിച്ച് പണച്ചിലവ് അധികമായി ഉണ്ടാകുന്നില്ല, നിലവിലുള്ള ഇന്റര്‍നെറ്റ് അടിസ്ഥാന സൌകര്യങ്ങള്‍ തന്നെ ധാരാളം. റിപ്പോര്‍ട്ടര്‍ മാര്‍ക്കെല്ലാം ട്വിറ്റ് ഐഡി ഉണ്ടെങ്കില്‍ സംഗതി കൂടുതല്‍ എളുപ്പമായി എന്ന് പറയാം. വാര്‍ത്ത തേടുന്ന സ്ഥലത്തുള്ളവര്‍ റിപ്പോര്‍ട്ടര്‍മാര്‍ , ന്യൂസ് റൂം , കാഴ്ചക്കാര്‍ , സംഭവത്തിന്റെ ആദ്യ ദൃക്‌സാക്ഷികള്‍ , മറ്റ് വാര്‍ത്താ ഉറവിടങ്ങള്‍ എന്നിവയെ മികച്ച രീതിയില്‍ എകോപിപ്പിച്ച് വാര്‍ത്തയ്‌ക്ക് ആധികാരികതയും മൂല്യവും പുതിയ ഡയമന്‍ഷനുകളും ഉണ്ടാക്കാന്‍ എളുപ്പമാണ്.
ഹാഷ് ടാഗ് (#incident) , @username അടയാളം , ടീ ട്വീറ്റ് (RT) , ലിസ്റ്റുകള്‍ , ഡയറക്‍ട് മെസേജ് (DM) ,സേവ്ഡ് സര്‍ച്ചുകള്‍ , വെബ് വിലസത്തെ ചെറുതാക്കല്‍ (URL Shortners) എന്നീ അനുബന്ധ ഘടകങ്ങള്‍ വേണ്ട വിധം പ്രയോജനപ്പെടുത്തിയാല്‍ ട്വിറ്റര്‍ ഒന്നാം തരം വാര്‍ത്താ സഹായി ആണ്
ഒപ്പം സ്ഥാപനത്തിന്റെ ലോഗോ / റിപ്പോര്‍ട്ടര്‍മാരുടെ ഫോട്ടോ എന്നിവയും അകമ്പടിയായി ചെറുതും കുറിക്ക് കൊള്ളുന്നതുമായ ഒരു ഒറ്റവരി വ്യക്തി/സ്ഥാപന വിവരണക്കുറിപ്പ് കൂടി എഴുതിയാല്‍ ലക്ഷണമൊത്ത ഒരു ട്വിറ്റ് ഹാന്‍ഡില്‍ ആയി .

എല്ലാത്തിലും ഉപരിയായി വിവരങ്ങള്‍ ട്വിറ്റ് ചെയ്യുന്നതും ട്വിറ്ററില്‍ നിന്ന് വിവരം ശേഖരിക്കുന്നതും ഒരു നിത്യാഭ്യാസമാക്കിയാല്‍ (Habit) വാര്‍ത്താമൂല്യം കൂട്ടാം വിവരങ്ങള്‍ തല്‍‌ക്ഷണം അറിയുകയും ചെയ്യാം. കമ്പ്യൂട്ടറിനെക്കാളും കൂടുതല്‍ ഉപയോക്താക്കള്‍ മൊബൈല്‍ ഫോണ്‍ വഴിയാണ് ട്വിറ്റര്‍ ഉപയോഗിക്കുന്നത് എന്നതിനാല്‍ സമീപകാലത്ത് തന്നെ കൂടുതല്‍ ജനകീയമാകാന്‍ സാധ്യതയുള്ളതിനാല്‍ വാര്‍ത്താമാധ്യമങ്ങള്‍ക്ക് ഒഴിവാക്കാനാകാത്ത അക്ഷയഖനിയാണ് ഇത് എന്നതില്‍ സംശയമില്ല

സിജിയാര്‍ -അധ്യാപകദിനക്കുറിപ്പ്

2011-09-05T05:44:00.000-07:00

ഒരു അധ്യാപകദിനത്തിലാണ് ഈ കുറിപ്പെഴുതുന്നത്. പല തരത്തിലും സ്വാധീനിച്ച ഗുരുക്കന്മാര്‍ എല്ലാവര്‍ക്കും ഉണ്ടാകും. അറിവിന്റെ അഗാധത, വാഗ്ദോരണിയുടെ സൌന്ദര്യം ഒപ്പം സ്നേഹം ചാലിച്ച പെരുമാറ്റം എന്നിവ കൊണ്ട് ഞങ്ങളെ സ്വാധീനിച്ച ഒരു അധ്യാപകനെ കുറിച്ചുള്ള ഓര്‍മയാണ് ഇവിടെ പങ്കു വയ്‌ക്കുന്നത്.

കേരള സര്‍വകലാശാലയിലെ ഭാവിപഠന വകുപ്പില്‍ എം.ടെക് വിദ്യാര്‍ത്ഥികളായിരുന്ന ഞങ്ങള്‍ ഒന്‍പത് പേരുടെയും പ്രീയപ്പെട്ട അധ്യാപകനായ ഡോ.സി.ജി രാമചന്ദ്രന്‍ നായര്‍ സാറിന്റെ ലളിതമായ പെരുമാറ്റം സമയനിഷ്ഠ , ചിട്ടയായ വസ്ത്രധാരണം എന്നിവ ഇപ്പോഴും പാഠം ആണ്. ഒപ്പം എഴുപത്തിയഞ്ചാം വയസിലും ചെറുപ്പത്തിന്റെ പ്രസരിപ്പോടെ കഥകളില്‍ നിന്ന് കഥകളിലേക്ക് ഊളിയിട്ട് എത്ര സരസമായാണ് സിജിയാര്‍ ക്ലാസ് എടുത്തിരുന്നത്, മണിക്കൂറുകള്‍ കടന്നു പോകുന്നത് അറിയുകയേ ഇല്ല. സെമസ്റ്റര്‍ അന്ത്യ പരീക്ഷയില്ലാത്ത സയന്‍സ് ഫിക്ഷന്‍ എന്ന പേപ്പര്‍ ആണ് സര്‍ പഠിപ്പിച്ചിരുന്നത്. ആഴ്ചയിലൊരിക്കലുള്ള ക്ലാസിനായി തന്റെ സ്വന്തം മാരുതി 800 ഡ്രൈവ് ചെയ്ത് വരുന്നത് കാണുന്നത് തന്നെ രസകരമായിരുന്നു. പഠിപ്പിക്കാന്‍ പുസ്തകം ഒന്നും സാറിന് ആവശ്യമില്ലായിരുന്നു. പരീക്ഷയില്ല എന്ന ആശ്വാസത്തില്‍ ഞങ്ങള്‍ക്കും നോട്ട് പേപ്പര്‍ പോലും ഇല്ലായിരുന്നു എന്നത് മറ്റൊരു വസ്തുത, എന്നിരിക്കിലും സര്‍ പഠിപ്പിച്ച ഒരോ കൃതിയും ഇന്നും ഓര്‍മയില്‍ തെളിമയോടെ നില്‍ക്കുന്നു. ഒരോ ശാസ്ത്രജ്ഞരെക്കുറിച്ച് അല്ലെങ്കില്‍ ശാസ്ത്രസാങ്കേതിക നേട്ട-കോട്ടങ്ങളെ പറ്റി പറയുമ്പോഴും ഒരുപിടി അകമ്പടി വസ്തുതകളാല്‍ വിവരസമ്പന്നമാക്കി, ഞങ്ങളുടെ ക്ലാസുകളെ പ്രൊഫസര്‍ ഹരം പിടിപ്പിച്ചിരുന്നു.

സിജിയാറിനെ പറ്റി ഒരു വരിയില്‍ ഇങ്ങനെ ഒതുക്കുന്നത് സാഹസമാണ് എങ്കിലും: അന്താരാഷ്‌ട്ര പ്രശസ്തരായ ശിഷ്യസമ്പത്തും സഹപ്രവര്‍ത്തക ബന്ധവും ഉള്ള ശാസ്ത്രജ്ഞന്‍ ,കേരള സര്‍വകലാശാല രസതന്ത്രവകുപ്പിന്റെ അധ്യക്ഷനും സയന്‍സ് ഡീനും, സര്‍വവിജ്ഞാനകോശം ഇന്‍സ്റ്റിട്യൂട്ടിന്റെ ഡയറക്‍ടറും ചീഫ് എഡിറ്ററും, കേരള സര്‍ക്കാരില്‍ ശാസ്ത്ര സാങ്കേതിക വകുപ്പ് സെക്രട്ടറി, അമേരിക്ക-ഇംഗ്ലണ്ട് അടക്കമുള്ള വിദേശരാജ്യങ്ങളില്‍ വിസിറ്റിംഗ് പ്രഫസര്‍ ,ഇരുപത്തിയഞ്ചിലധികം മലയാളം ശാസ്ത്രപുസ്തകങ്ങളുടെ രചയിതാവ്, പ്രഭാഷകന്‍ , ഫ്രഞ്ച്, ജര്‍മന്‍ ഭാഷകളില്‍ പാണ്ഡിത്യമുള്ള ഇദ്ദേഹം മാതൃഭാഷ ഫ്രഞ്ച് ആയ ഒരു ഗവേഷണ ബിരുദവിദ്യാര്‍ത്ഥിയെ ആ ഭാഷയില്‍ തന്നെ ഗൈഡ് ചെയ്തിട്ടുമുണ്ട്.

സാധാരണ വിശ്രുതരായ അധ്യാപകര്‍ക്ക് രാഷ്ട്രീയക്കാരോട് അത്ര ബഹുമാനം ഉണ്ടാകാന്‍ വഴിയില്ല. എന്നാല്‍ നെഹ്രുവിനെ പറ്റിയായാലും ഇയെമ്മെസിനെ പറ്റിയായാലും ഇനി കരുണാകരനായാലും സാറിന് നൂറ് നാവാണ്. എത്രയോ വ്യക്തികളുടെ ജീവിതരേഖയും നേട്ടങ്ങളും വിശദമായി ക്ലാസില്‍ പറഞ്ഞിരിക്കുന്നു ഒരു തവണ പോലും ആരെയെങ്കിലും പറ്റി തെറ്റായ ധ്വനി പോലും വരുന്ന വാക്കുകള്‍ കേട്ടിട്ടേയില്ല, ഒരു പക്ഷെ അങ്ങനെ പറയേണ്ട അവസരത്തില്‍ പോലും സംസാരത്തിലോ പെരുമാറ്റത്തിലോ അങ്ങനെ വരാതിരിക്കാന്‍ സര്‍ സൂക്ഷിച്ചിരുന്നു. സാഹിത്യത്തില്‍ ഇത്രയേറെ കമ്പമുള്ള ഒരു ശാസ്ത്രാധ്യാപകനെ പഠനക്കാലയളിവില്‍ ഞങ്ങള്‍ക്കാര്‍ക്കും കണ്ടെത്താനായിട്ടില്ല. ശാസ്ത്രത്തിന്റെ രീതിയെ പറ്റി സര്‍ പറയുന്ന ഒരു കഥ ഇങ്ങനെയാണ്. “അല്പം അകലെ മേഞ്ഞിരുന്ന ഒരു കുതിരയ്‌ക്ക് എത്ര പല്ലുകള്‍ ഉണ്ടെന്നതിനെ പറ്റി രണ്ടു ശാസ്ത്രജ്ഞര്‍ തമ്മില്‍ മൂത്ത തര്‍ക്കം നടക്കുകയായിരുന്നു. ഒരാള്‍ പറഞ്ഞു 'X' പല്ലെന്ന് രണ്ടാമന്‍ 'Y' എന്നും. അവരവരുടെ സീറ്റിലിരുന്ന് മുയലിന് മൂന്ന് കൊമ്പ് എന്ന കണക്കേ സൈദ്ധാന്തിക വാദങ്ങള്‍ സമര്‍ത്ഥിച്ചിരുന്നത് കേട്ടിരുന്ന ഒരു നാട്ടിന്‍‌പുറത്തുകാരന്‍ കുതിരയുടെ വായ നയത്തില്‍ തുറന്ന് നോക്കി 'Z' പല്ലുകള്‍ ഉണ്ടെന്ന് ഇവരിരുവരോടും വിനയപൂര്‍വം പറഞ്ഞു, ഒപ്പം നിങ്ങള്‍ വൃഥാ സമയം പാഴാക്കുകയാണന്നും” ഇതിന്റെ സാരാംശമായി സര്‍ ഊന്നിപ്പറയുന്നത് ഒരു ശാസ്ത്രവിദ്യാര്‍ത്ഥിക്ക് നാട്ടിന്‍പുറത്തുകാരന്റെ നിരീക്ഷണമാണ് വേണ്ടതെന്നാണ്. ദന്തഗോപുരങ്ങളിലിരുന്ന് വാദിക്കാതെ പരീക്ഷണശാലയിലും പ്രശ്‌ന മേഖലയിലും ചെന്ന് ശാസ്ത്രീയമാര്‍ഗത്തിലൂടെ സത്യം കണ്ടുപിടിക്കുക തന്നെ വേണമെന്ന് ആവര്‍ത്തിച്ച് പറയും. നേരത്തെ ക്ലാസിലും പുറത്തും പറഞ്ഞ പല കഥകളും ആവര്‍ത്തിക്കുമ്പോള്‍ പെട്ടെന്ന് 'A gentleman is one who can patiently hear an anecdote for the second time and still pretend that he is hearing it for the first time!' എന്ന ഉദ്ധരണി തൊടുത്തുവിടുന്നത് ഒരു പക്ഷെ ഞങ്ങള്‍ക്ക് ബോറടിക്കും എന്ന് തോന്നിയിട്ടാകാം. പക്ഷെ സര്‍ അറിയുന്നില്ലായിരുന്നിരിക്കാം ഒരോ പ്രാവശ്യവും ആവര്‍ത്തിക്കുന്ന കഥകള്‍ക്കൊപ്പമുള്ള വിവരങ്ങള്‍ , അതിന്റെ ഭാഷ സൌന്ദര്യം എന്നിവ ആവര്‍ത്തിക്കുന്നില്ലന്ന്. എന്‍ വി കൃഷ്‌ണവാരിയരെ പറ്റിപറയുമ്പോള്‍ എത്ര വാചാലനാകാറുണ്ടെന്ന് ഞങ്ങള്‍ക്കറിയാം, അതില്‍ പിന്നെയാണ് എന്‍ വി സാഹിത്യം പരിചയപ്പെട്ടതും. ശാസ്ത്രജ്ഞാനം സൌന്ദര്യാസ്വാദനത്തിന് തടസമല്ല എന്ന എന്‍ വി സിദ്ധാന്തം സിജിയാറിന്റെ കാര്യത്തിലും നൂറു ശതമാനം ശരിയായിരുന്നു.

സര്‍ ഞങ്ങളെ പഠിപ്പിച്ചിരുന്ന വിഷയത്തിലേക്ക് വരാം ശാസ്ത്രകല്പിത കഥാലോകത്തെ അതികായരായ ഐസക് അസിമോവ്,ആര്‍തര്‍ സി ക്ലര്‍ക്ക് എന്നിവരെയും കൃതികളേയും ആവേശത്തോടെ പഠിപ്പിക്കുമ്പോള്‍ ഭാരതീയ ഭാഷകളിലെ സയന്‍സ് ഫിക്ഷന്‍ ശാഖ പൊതുവില്‍ ദരിദ്രമാണന്നും പ്രത്യേകിച്ചും കേരളത്തില്‍ , ആകെ ഒരു നേട്ടം എന്ന് പറയാനാകുന്നത് ജയന്ത് നാര്‍ലിക്കറുടെ മറാത്ത,ഹിന്ദി എഴുത്തുകള്‍ മാത്രമാണന്ന് ഓര്‍മ്മിപ്പിക്കും. ആ മാസമാണ് ജി ആര്‍ ഇന്ദുഗോപന്റെ ‘ഐസ് -196 ഡിഗ്രി സെല്‍‌ഷ്യസ് ‘ എന്ന കൃതി പുസ്തകരൂപത്തില്‍ വന്നത്. സര്‍ ഇപ്പോള്‍ മലയാളത്തില്‍ കൃതികള്‍ ഉണ്ടെന്നും ഐസ് അതില്‍ ഒന്നാണന്നും പറഞ്ഞ് ഒരു കോപ്പി നല്‍കി. അടുത്ത ആഴ്ച എന്തോ അസൌകര്യമായതിനാല്‍ വരാന്‍ ആയില്ല ആ ഒഴിവില്‍ ജി.ആര്‍ ഇന്ദുഗോപനെ തന്നെ ഞങ്ങള്‍ ക്ലാസെടുക്കാന്‍ വിളിച്ചു. ശാസ്ത്രകഥ മാത്രമല്ല ആ എഴുത്തിന്റെ രസതന്ത്രം കൂടി അറിയണമല്ലോ. അടുത്ത ക്ലാസ് ഊഴത്തില്‍ പതിവിലും ഊര്‍ജസ്വലനായാണ് അതും ഇന്ദുഗോപന്റെ പുസ്തകവും പിടിച്ച് ക്ലാസില്‍ എത്തിയത്, ഈ കൃതി ഇംഗ്ലീഷില്‍ ആയിരുന്നെങ്കില്‍ ഇതിലും നന്നായി വിറ്റുപോകും എന്ന് സര്‍ പറഞ്ഞു, പോയ ആഴ്ച ഇന്ദുഗോപനെ വിളിച്ചു കൊണ്ടുവന്ന വിവരം ഞങ്ങള്‍ പറഞ്ഞപ്പോള്‍ സര്‍ ഉത്സാഹത്തോടെ എഴുത്തുകാരനോട് ബന്ധപ്പെടാനും ഒപ്പം അങ്ങോട്ടേക്ക് വിളിക്കാന്‍ മൊബൈല്‍ നമ്പറും വാങ്ങി. തൊട്ടടുത്ത ഓണപ്പതിപ്പുകളില്‍ ഒന്നില്‍ ഒരോ മേഖലയിലേയും പ്രശസ്തരോട് അവരുടെ തട്ടകത്തിലെ യുവനാമ്പുകളെ പരിചയപ്പെടുത്താന്‍ ആവശ്യപ്പെട്ടു. സ്വഭാവികമായും ഡോ.സിജിയാറിന് ഒരു യുവശാസ്ത്രജ്ഞനെ പരിചയപ്പെടുത്തേണ്ട ചുമതലയായി, അതനുസരിച്ച് ഒരാളെ കൃത്യമായി അവതരിപ്പിച്ചു, ഒപ്പം അവസാന ഭാഗത്തായി ശാസ്ത്രത്തിന്റെ വേലി കടന്ന് സാഹിത്യത്തെ കൂടെക്കൂട്ടി, ഇതാ ശാസ്ത്രകല്പിതകഥാ ലോകത്ത് പ്രതീക്ഷയര്‍പ്പിക്കാവുന്ന ഒരു യുവാവിനെ കൂടി പരിചയപ്പെടുത്തുന്നു എന്ന മുഖവുരയോടെ ഇന്ദുഗോപനെയും പരാമര്‍ശിച്ചു.

നെഹ്രുവിനെ പറ്റി സിജിയാര്‍ പറയാറുള്ളത് ഇങ്ങനെയാണ് “നമ്മള്‍ ഭാഗ്യവാന്മാരാണ് . നെഹ്രു നമ്മുടെ നാടിന് കൈവന്ന ഭാഗ്യം തന്നെയായിരുന്നു, പണ്ഡിറ്റ് നെഹ്രുവിനെ പോലെ ശാസ്ത്രാവബോധവും ശാസ്ത്രാഭിമുഖ്യവും അതോടോപ്പം തന്നെ സൌന്ദര്യാസ്വാദന ത്വരയും പ്രകൃതി സ്നേഹവും ഒത്തിണങ്ങിയ ബഹുമുഖ പ്രതിഭയായ ഒരു മഹാപുരുഷനെ രാഷ്ട്രത്തിന്റെ പ്രഥമ പ്രധാന മന്ത്രിയായി ലഭിച്ച ഭാഗ്യവാന്മാര്‍ “ ഡോ. സി.ജി രാമചന്ദ്രന്‍ നായരുടെ കാര്യത്തിലും ഇത് നൂറു ശതമാനം ശരിയാണന്ന് ഒരു പ്രാവശ്യമെങ്കിലും ക്ലാസില്‍ ഇരുന്ന ഭാഗ്യവാന്മാരായ വിദ്യാര്‍ത്ഥികള്‍ അല്ലെങ്കില്‍ പ്രഭാഷണം കേട്ടവരോ ശരിവയ്‌ക്കും.

(കഴിഞ്ഞ അധ്യാപകദിനത്തില്‍ എഴുതിയ കുറിപ്പ്, പിന്നീട് മാതൃഭൂമി ആഴ്ചപതിപ്പിലെ മധുരച്ചൂരല്‍ പേജില്‍ വന്നിരുന്നു)

കാമ്പസ് ഇന്റര്‍വ്യൂ നെ കാമ്പസിന് പുറത്താക്കേണ്ടേ ?

2011-07-24T08:31:00.000-07:00

ഇന്ന് എല്ലാ കോളെജുകളും മേന്മഘടകങ്ങളിലൊന്നായി അവതരിപ്പിക്കുന്നത് കാമ്പസ് ഇന്റര്‍വ്യൂ നെയാണ്. അത്രയ്‌ക്ക് മെച്ചമുള്ളതാണോ ഈ സംവിധാനം. . സ്വകാര്യ കമ്പനികളെ പിന്‍‌പറ്റി പൊതു മേഖലാ സ്ഥാപനങ്ങളും ഇപ്പോള്‍ കാമ്പസ് ഇന്റര്‍വ്യൂനെ വരിക്കാന്‍ തുടങ്ങി

സര്‍ക്കാര്‍ സ്ഥാപനങ്ങള്‍ ഇതിനു തുനിഞ്ഞിറങ്ങുന്നത് എതിര്‍ക്കപ്പെടേണ്ടതല്ലേ ?
പൊതു പണത്തില്‍ പ്രവര്‍ത്തിക്കുന്ന സ്ഥാപനങ്ങള്‍ എന്ത് അടിസ്ഥാനത്തിലാണ് കോളെജുകള്‍ ഇതിനായി തിരഞ്ഞെടുക്കുന്നത്. ഉദാഹരണത്തിന് പൊതുമേഖലാ എണ്ണശുദ്ധീകരണ സ്ഥാപനമായ ഒ എന്‍ ജി സി കാമ്പസ് റിക്രൂട്ട്‌‌മെന്റ് വഴി ആളെ എടുക്കാന്‍ പോകുന്നെങ്കില്‍ നിശ്ചയമായും നഗര കേന്ദ്രീകൃതമായതും പേരും പെരുമയും ഉള്ള സ്ഥാപനങ്ങളിലേക്ക് മാത്രമായിരിക്കുമല്ലോ ആനയിക്കപ്പെടുന്നത്. അതേ കോളെജിലെ തതുല്യമായ ബിരുദ/ബിരുദാനന്തര ബിരുദം തന്നെ നല്‍കുന്ന ഗ്രാമ/ഇടത്തരം പട്ടണത്തിലെ കോളെജിലെ വിദ്യാര്‍ത്ഥിക്ക് ഒരു പക്ഷെ താന്‍ സ്വപ്‌നം കാണുന്ന കരിയറിലേക്ക് അപേക്ഷ അയക്കാന്‍ പോലും ആകുന്നില്ല എന്ന് പറഞ്ഞാല്‍ അവന്‍ മുന്തിയ ജോലികളില്‍ നിന്ന് പാര്‍ശ്വവല്‍ക്കരിക്കപ്പെടുകയല്ലേ.
ഐ ഐ എം /ഐ ഐ ടി/ എന്‍ ഐ ടി മാത്രമല്ല നമ്മുടെ നാട്ടിലെ സ്വാശ്രയ എഞ്ചിനീയറിംഗ് കോളെജുകളിലേക്ക് വരെ പൊതുമേഖലാ സ്ഥാപനങ്ങള്‍ വരുന്നു എന്നത് ഇന്ന് സത്യമാണ്. എന്തുകൊണ്ട് കുറഞ്ഞപക്ഷം സര്‍ക്കാര്‍ എഞ്ചിനീയറിംഗ് കോളെജുകളിലേക്ക് പോയ ശേഷം ആകുന്നില്ല ഇവര്‍ രണ്ടാം തരം /മൂന്നാം തരം കോളെജുകളിലേക്ക് എത്തുന്നത്

പോയ ദിവസങ്ങളിലൊന്നില്‍ തീവണ്ടി യാത്രയ്ക്കിടെ ഒരു ഗവ: എഞ്ചിനീയറിംഗ് കോളെജിലെ രണ്ട് അവസാനവര്‍ഷ വിദ്യാര്‍ത്ഥികളെ കണ്ടു. ഒറ്റ കമ്പനി പോലും ഇവിടെ എത്തിയിട്ടില്ല. അതേ സമയം അമൃത അടക്കമുള്ള കാമ്പസുകളിലേക്ക് പൊതു മേഖലാസ്ഥാപനങ്ങള്‍ പോകുന്നു

അ ) എന്തു മാനദണ്ഡം ഉപയോഗിച്ചാണ് പൊതുമേഖലാ സ്ഥാപനങ്ങള്‍ കാമ്പസ് റിക്രൂട്ട്മെന്റിനായി കോളെജുകള്‍ തിരഞ്ഞെടുക്കുന്നത്
ആ ) പൊതുജനങ്ങളുടെ മൂലധനത്തില്‍ പ്രവര്‍ത്തിക്കുന്ന സ്ഥാപനങ്ങള്‍ ഉദ്യോഗാര്‍ത്ഥികളെ തിരയാന്‍ തുടങ്ങുമ്പോള്‍ തന്നെ അവര്‍ നിഷ്കര്‍ഷിക്കുന്ന അതേ മാനദണ്ഡങ്ങള്‍ ഉള്ള എല്ലാ യുവാക്കള്‍ക്കും അപേക്ഷിക്കാന്‍ അര്‍ഹത നല്‍കേണ്ടതല്ലേ. അത് തന്നെയല്ലേ ഭരണഘടന നല്‍കുന്ന തൊഴിലെടുക്കാനുള്ള സ്വാതന്ത്ര്യവും
ഇ ) ഇങ്ങനെ കാമ്പസ് ഇന്റര്‍വ്യൂ വഴി പൊതുമേഖലാ എണ്ണക്കമ്പനികളിലേക്കും ബാങ്കുകളിലേക്കും വരുന്ന ഉദ്യോഗാര്‍ത്ഥികള്‍ അവിടെ നില്‍ക്കുന്നില്ല എന്നതാണ് സത്യം. മറ്റൊരു തരത്തില്‍ പറഞ്ഞാല്‍ ആദ്യ കരിയറിലെ ചവിട്ടുപടി സര്‍ക്കാര്‍ ചിലവില്‍ . ഇവര്‍ക്ക് വേണ്ടത് ഒന്നാം തരം സര്‍ക്കാര്‍ /പൊതുമേഖലാ സ്ഥാപനങ്ങളിലെ രണ്ടോ മൂന്നോ വര്‍ഷം പ്രവര്‍ത്തി പരിചയം മാത്രം. ഉടന്‍ തന്നെ ഇക്കൂട്ടര്‍ സമാനമായ അല്ലെങ്കില്‍ പ്രതിയോഗികളായ സ്വകാര്യ സ്ഥാപനങ്ങളിലേക്ക് ചേക്കേറും. ചുരുക്കത്തില്‍ സര്‍ക്കാര്‍ ചിലവില്‍ ആദ്യവര്‍ഷങ്ങളില്‍ പരിശീലനം പൂര്‍ത്തിയാക്കുന്ന ഇവരുടെ യഥാര്‍ത്ഥ പ്രയോജനം ആ സ്ഥാപനത്തിലേക്ക് മുതല്‍ക്കൂട്ടാകുന്ന സമയം ആകുമ്പോഴേക്ക് ഇവര്‍ സ്ഥാപനം വിട്ടിട്ടുണ്ടാകും.
ഈ ) അതേ സമയം തന്നെ കോളെജുകളില്‍ നിന്ന് ശമ്പളത്തിന്‍െ കനം മാത്രം കണ്ട് കരിയര്‍ തിരഞ്ഞെടുക്കാന്‍ കുട്ടികള്‍ ആകര്‍ഷിക്കപ്പെടുന്നത് ഐ‌എ‌എസ് പോലെയുള്ള അത്യാകര്‍ഷകമായ തൊഴിലിലേക്ക് പോലും അപകര്‍ഷതാ മനോഭാവം ഉണ്ടാക്കിയിട്ടുണ്ട്. ഇതറിയാന്‍ സമീപ കാലത്ത് സര്‍ക്കാര്‍ കോളെജുകളില്‍ നിന്ന് സിവില്‍ സര്‍വീസിലേക്ക് എത്തുന്നവരുടെ എണ്ണം ഒന്ന് ഓടിച്ച് നോക്കിയാല്‍ മതിയാകും. നേരത്തെ കേരള കേഡര്‍ ഐ‌എ(പി)എസ് കാരില്‍ എഞ്ചിനീയര്‍മാരുണ്ടെങ്കില്‍ അത് മിക്കവാറും കോളെജ് ഓഫ് എഞ്ചിനീയറിംഗ് തിരുവനന്തപുരം തന്നെയാകും. എന്നാല്‍ ഇന്നോ ? ഇതേ കോളെജിലെ കാമ്പസ് ഇന്റര്‍വ്യൂ കനപ്പെട്ട് തുടങ്ങിയ സമയത്ത് തന്നെ സിവില്‍ സര്‍വീസിലേക്കെത്തുന്ന ഇവിടെ നിന്നുള്ളവരുടെ എണ്ണം കുത്തനെ കുറഞ്ഞും വരുന്നു
ഉ ) സമാനമായ ഒരു തര്‍ക്കം ഇന്ത്യലെ എറ്റവും വലിയ പൊതുമേഖലാ സ്ഥാപനങ്ങളിലൊന്നിലെ കാമ്പസ് ഇന്റര്‍വ്യൂവുമായി ബന്ധപ്പെട്ട് ഹൈക്കോടതിയിലേക്ക് എത്തി. അവസാനം കോടതി തീരുമാനം എതിരാകും ,ഭാവിയിലെ എല്ലാ കാമ്പസ് ഇന്റര്‍വ്യൂകളും അവതാളത്തിലാകും എന്ന് കണ്ട് ഞങ്ങള്‍ പ്രസ്തുത കാമ്പസ് ഇന്റര്‍വ്യൂവിന് ഇല്ല എന്ന് സത്യവാങ്ങ്മൂലം നല്‍കി അവര്‍ തടിയൂരി
ഊ ) കാമ്പസ് ഇന്റര്‍വ്യൂ ലഭിക്കുന്ന വിദ്യാര്‍ത്ഥികള്‍ ,അതായത് ഏഴാം സെമസ്റ്ററില്‍ കിട്ടുന്നവര്‍ എട്ടാം സെമസ്റ്ററില്‍ പഠനം ഗൌരവമായേ എടുക്കാറില്ല. എങ്ങനെയോ ക്ലാസ് വര്‍ക്ക് പൂര്‍ത്തിയാക്കി കമ്പനിയിലേക്ക് ചേക്കേറാന്‍ സ്വപ്‌നം കണ്ടാണിരിക്കുന്നതെന്ന് അഭിപ്രായപ്പെടുക മാത്രമല്ല , മത്സരം മൂത്ത് മൂത്ത് മൂന്നാം വര്‍ഷം തന്നെ (അഞ്ചാം സെമസ്റ്ററില്‍ ) കാമ്പസ് ഇന്റര്‍വ്യൂവിന് വരുന്ന കമ്പനികളെ വിലക്കണമെന്ന് അഭിപ്രാ‍യപ്പെട്ടത് അറിയപ്പെടുന്ന കമ്പ്യൂട്ടര്‍ ശാസ്ത്ര ഗ്രന്ഥകാരനും അണ്ണാ സര്‍വകലാശാല വൈസ് ചാനസലറുമായിരുന്ന ബാലഗുരുസ്വാമി ആണ്

ഇക്കാര്യത്തില്‍ പൊതു സമൂഹത്തിന്റെ ശ്രദ്ധ പതിഞ്ഞിട്ടുണ്ടോ എന്ന് സംശയമാണ്

ഇത്തരം പൊതുമേഖലാ സ്ഥാപനങ്ങളിലെ ഉന്നത പദവികളില്‍ ഇരിക്കുന്ന ചിലരുടെ മക്കള്‍ പഠിക്കുന്ന കോളെജിലേക്ക് തന്നെ അതേ സ്ഥാപനം കാമ്പസ് ഇന്റര്‍വ്യൂന് പോകുന്ന വിരുതുകള്‍ പോലും നടക്കുന്നുണ്ടന്നാണ് പിന്നാമ്പുറ വര്‍ത്തമാനം. കാരണം ഒരു പാടും അവശേഷിപ്പിക്കാതെ ഇക്കൂട്ടര്‍ക്ക് മക്കളെ കമ്പനിക്കകത്താക്കമല്ലോ എന്തെളുപ്പം !

ഇത് മാത്രമല്ല ചേര്‍ത്ത് വായിക്കേണ്ട മറ്റൊരു സംഗതിയുള്ളത്. പെന്‍ഷന്‍ പദ്ധതി പഴയത് അല്ല ഇപ്പോള്‍ ഉള്ളത്, എത് കമ്പനിയില്‍ ചേര്‍ന്നാലും കൂടെ കൊണ്ട് പോകാന്‍ പറ്റുന്ന പരുവത്തിലുള്ള പെന്‍ഷന്‍ ഫണ്ട് ആണ് പുതിയ തൊഴില്‍ പടയ്‌ക്ക് നിര്‍ബന്ധമായും നല്‍കുന്നത്. അതുകൊണ്ട് തന്നെ സ്ഥാപനത്തോട് ഒരു കൂറും ഇല്ലാത്ത മരം ചാടി ചാടി തൊഴില്‍ മാറുന്നവര്‍ക്ക് പേടിക്കാനും ഇല്ല. പണ്ടാണെങ്കില്‍ പെന്‍ഷന്‍ പോകും സേവന കാലയളവില്‍ മുറിവ് (സര്‍വീസ് ബ്രേക്ക്) വീഴും എന്ന് ഭയവും ഉണ്ടാകുമായിരുന്നു. ചുരുക്കത്തില്‍ കാമ്പസ് ഇന്റര്‍വ്യൂ, പെന്‍ഷന്‍ ഫണ്ട് എന്നിങ്ങനെ പരസ്പരം ബന്ധം ഇല്ല എന്ന് പ്രത്യക്ഷത്തില്‍ തോന്നുന്ന ബ്ലോക്കുകള്‍ തമ്മില്‍ അഭേദ്യമായ ഇണക്കപ്പൊരുത്തം ഉണ്ട് എന്ന് മനസിലാകും. സ്വകാര്യ സ്ഥാപനങ്ങള്‍ ആകട്ടെ കഴുകന്‍ കണ്ണുമായി സര്‍ക്കാര്‍ /പൊതു മേഖലാ സ്ഥാപനങ്ങളിലെ ആദ്യവര്‍ഷ പരിചയം സിദ്ധിച്ചവരെ വലിയ പാക്കേജ് തന്നെ നല്‍കിയാണ് വീശിപ്പിടിക്കുന്നത്.
മറ്റൊരു തരത്തില്‍ പറഞ്ഞാല്‍ പൊതുമേഖലാ സ്ഥാപനങ്ങള്‍ കാമ്പസ് ഇന്റര്‍വ്യൂന് പോകാനുള്ള കാരണമായി പറയുന്ന ഘടകങ്ങള്‍ ഒന്നും അവര്‍ക്ക് ഹിതകരമായി മാറുന്നില്ല എന്നതാണ് സത്യം. സത്യം ഇങ്ങനെ ആയിരിക്കെ പിന്നെയും പിന്നെയും ഇവര്‍ എന്തിനാണ് കാമ്പസ് ഇന്റര്‍വ്യൂവിന് അടിമപ്പെടുന്നത് . ഇന്ത്യയില്‍ ഒരു ആര്‍ട്സ് ആന്റ് സയന്‍സ് കോളെജ് പോലും ഇല്ലാത്ത എത്രയോ ജില്ലകള്‍ ഉണ്ട്. എന്തിന് മൊത്തം ആറ് ലക്ഷം ഗ്രാമങ്ങളില്‍ പകുതിയില്‍ പോലും വൈദ്യുതി വരെ ഇന്നേ വരെ എത്തിയിട്ടില്ല. ഇവിടങ്ങളില്‍ മണ്ണെണ്ണ വിളക്കിന്റെ അല്ലെങ്കില്‍ വഴി വെളിച്ചത്തില്‍ പഠിക്കുന്ന മിടുക്കനും മിടുക്കിക്കും കൂടി അര്‍ഹതപ്പെട്ടതാണ് പൊതു മേഖലാ/സര്‍ക്കാര്‍ സ്ഥാപനങ്ങളിലെ ജോലി

വിപണി മത്സരത്തില്‍ പങ്കാളിയാകുന്നത് അസംസ്‌കൃത വസ്തു (ഫാക്ടറി ആണെങ്കില്‍ ) എടുക്കാനും ഉത്പന്നങ്ങളുടെ / സേവനങ്ങളുടെ വിപണി കണ്ടെത്താനുമാകണം. അല്ലാതെ സ്വന്തക്കാരെ സ്ഥാപനത്തിലേക്ക് തിരുകി കയറ്റാനുള്ള പാര്‍ശ്വ പ്രവേശനദ്വാരം ആയി കാമ്പസ് ഇന്റര്‍വ്യൂ നെ മാറ്റരുത്
ഈ വാര്‍ത്ത നോക്കുക

Campus recruitment to hire employees by PSU banks affected CET for bank job as first exam announcement scheduled in June 2011. In recent years PSU banks hired officers in specialist cadre and Middle Management directly from campus recruitment.

As reported in some banks high officials are successful in placement of their wards via campus placement, RBI intervened and directed banks for general recruitment also.

The Reserve Bank of India (RBI) is of the view that banks should not look at only campus recruitment to hire employees.
"Why should banks rush to recruit from campus? None of us would get a job if recruitment was from campus. Banks must give opportunity to everybody. I am not sure however many from campus will have empathy for the poor of the poorest, RBI deputy governor, K C Chakrabarty said
He indicated that banks should look at hiring across the country and be fair to those in hinterland. This is required in context of financial inclusion initiative taken by banks and RBI jointly to provide formal banking to all in rural India. Those hired from rural India would be close to ground realities compared to others. (ഉറവിടം : http://www.bankingonly.com/detail-news.php?news_id=622)

1974 മുതല്‍ 1980-82 വരെ കെല്‍ട്രോണ്‍ പിന്തുടര്‍ന്ന് വന്ന ഒരു വഴിയുണ്ടായിരുന്നു. കേരളത്തിലെ എല്ലാ കോളെജുകളില്‍ നിന്നും ഒരു നിശ്ചിത ശതമാനത്തില്‍ കൂടുതല്‍ മാര്‍ക്ക് കിട്ടി പാസായവരുടെ ലിസ്റ്റ് വാങ്ങും. അവരില്‍ നിന്നും ടെസ്റ്റും ഇന്റര്‍വ്യൂം നടത്തി ആളുകളെ തെരഞ്ഞെടുക്കും. ഈ കാമ്പസ് തിരഞ്ഞെടുപ്പിനെക്കാളും എന്തുകൊണ്ടും നല്ലത് അത് തന്നെയാണ് . നമ്മുടെ പൊതുമേഖലാ സ്‌നേഹികള്‍ ആയ യുവജന വിദ്യാര്‍ത്ഥി പ്രസ്ഥാനങ്ങള്‍ എങ്കിലും ഈ കാര്യത്തില്‍ ഇടപെട്ടെങ്കില്‍ ? നഗ്നമായ ഭരണഘടനാ ലംഘനം ആണ് ഇത്തരം കാമ്പസ് റിക്രൂട്ട്മെന്റുകള്‍

കാര്‍ഷിക കോളെജുകളില്‍ നിന്ന് ആര്‍ ഡി ഓ (റൂറല്‍ ഡവലപ്മെന്റ് ഓഫീസര്‍ ) മാരെ സര്‍ക്കാര്‍ സ്ഥാപനങ്ങള്‍ കാമ്പസ് റിക്രൂട്ട്മെന്റ് ആയി തിരഞ്ഞെടുക്കുന്നുണ്ട്. ഇക്കാര്യത്തില്‍ ഇവിടെ സൂചിപ്പിക്കുന്ന പ്രശ്‌നം അത്രയ്ക്കില്ല, കാരണം മറ്റൊന്നുമല്ല. കാര്‍ഷിക ബിരുദം നല്‍കുന്ന സ്വാശ്രയ / ഡീംഡ് (അവരെന്താണാവോ ഈ കൃഷിക്കിറങ്ങാത്തത്?) കോളെജുകള്‍ ഇല്ലാത്തതിനാല്‍ പ്രത്യേകിച്ചും. കേരളത്തില്‍ ആകെ നൂറ്റമ്പതില്‍ താഴെ കാര്‍ഷിക ബിരുദധാരികളല്ലേ വര്‍ഷം തോറും പുറത്തിറങ്ങുന്നുള്ളൂ. ഇവിടെ കാമ്പസ് വഴി തൊഴില്‍ സേനയെ എടുക്കാന്‍ എത്തിയില്ലെങ്കില്‍ പരമ്പരാഗതമായ എഴുത്തുപരീക്ഷ, അഭിമുഖപരിക്ഷ എന്നിവയ്ക്ക് ശേഷം ആളെ എടുക്കാം. അങ്ങനെ ചെയ്യുമ്പോഴും ഇതേ ആളുകള്‍ തന്നെയാകും എത്തുക. അപ്പോള്‍ പരമ്പരാഗത വഴി പൊതുമേഖലാ സ്ഥാപനങ്ങളെ സംബന്ധിച്ചിടത്തോളം അധിക ചിലവാണ്. പക്ഷെ കോളെജുകളുടെ എണ്ണവും സീറ്റുകളുടെ വണ്ണവും കൂടുമ്പോള്‍ കാമ്പസ് പ്രവേശനം ഇപ്പറഞ്ഞ രീതിയില്‍ ആകില്ല. അവിടെയാണ് കാമ്പസ് റിക്രൂട്ട്മെന്റ് എതിര്‍ക്കപ്പെടേണ്ടത്.
1. പക്ഷെ എന്നിരുന്നാലും ചെറിയ പ്രശ്‌നങ്ങള്‍ ഇല്ലാതില്ല. ഉദാഹരണത്തിന് ഒരു പൊതു മേഖലാ സ്ഥാപനം മാത്രം ഒരു കാര്‍ഷിക കോളെജില്‍ നിന്ന് 10 ആളെ കഴിഞ്ഞവര്‍ഷം എടുത്തു എന്നിരിക്കട്ടെ. ആകെ സീറ്റ് അന്‍പതോ അറുപതോ ആയിരിക്കേ, മറ്റുള്ള സ്ഥാപനങ്ങള്‍ക്ക് എടുക്കാന്‍ ആളെവിടെ?
2. കൊഴിഞ്ഞ് പോക്ക് തടയാനായി സ്ഥാപനങ്ങള്‍ ഇപ്പോള്‍ ബോണ്ട് തുക നിര്‍ബന്ധമാക്കിയിട്ടുണ്ട്. ഒരു ജോലി എന്നത് ജീവന്മരണ പ്രശ്‌നമായതിനാല്‍ കുട്ടികള്‍ ഇത് ഒപ്പിട്ട് കൊടുക്കും. ഇനി ജോലി ഇഷ്ടമില്ല എന്ന് കണ്ടാലോ അല്ലെങ്കില്‍ എം‌എസ്‌സി (അഗ്രി) ക്ക് പ്രവേശനം കിട്ടിയാലോ ചേരാനാകാത്ത അവസ്ഥ ആകും. ബോണ്ട് തുക വാങ്ങി വച്ച് പൊതുമേഖലാ സ്ഥാപനങ്ങളോ അല്ലെങ്കില്‍ സ്വകാര്യ സ്ഥാപനങ്ങളോ പണിയെടുപ്പിക്കുന്നത്. നിര്‍ബന്ധിപ്പിച്ച് തൊഴിലെടുപ്പിക്കലല്ലേ. ഇത് ഭരണഘടന നല്‍കുന്ന തൊഴില്‍ സ്വാതന്ത്ര്യത്തിന്റെ നേര്‍ക്കുള്ള സര്‍ക്കാരിന്റെ തന്നെ വെല്ലുവിളി അല്ലേ. അവനോ അവള്‍ക്കോ ഇഷ്ടമുള്ളപ്പോള്‍ തൊഴില്‍ മാറാനുള്ള അവസരം ഉണ്ടാകണ്ടേ?
3. ഒരു പൊതുമേഖലാ സ്ഥാപനത്തില്‍ നിന്ന് മറ്റൊരു സര്‍ക്കാര്‍ /പൊതുമേഖലാ സ്ഥാപനത്തിലേക്ക് പോകുന്നെങ്കില്‍ എന്തുകൊണ്ട് ബോണ്ട് തുക അടയ്ക്കല്‍ ഒഴിവാക്കിക്കൂടാ. ഒരു സര്‍ക്കാര്‍ സ്ഥാപനത്തില്‍ നിന്ന് ലഭിക്കുന്ന പരിചയം മറ്റൊരു സര്‍ക്കാര്‍ സ്ഥാപനത്തിനോ പൊതുമേഖലാ സ്ഥാപനത്തിനോ അല്ലേ ലഭിക്കുന്നത്. അത് വലിയ ഒരു വീക്ഷണകോണില്‍ നിന്ന് നോക്കുമ്പോള്‍ സര്‍ക്കാരിന് യഥാര്‍ത്ഥത്തില്‍ നല്ലതാണ്.
4. എന്നാല്‍ സര്‍ക്കാര്‍ / പൊതുമേഖലാ സ്ഥാപനത്തില്‍ നിന്ന് സ്വകാര്യ സ്ഥാപനത്തിലേക്ക് മരം ചാടുന്നവര്‍ക്ക് ബോണ്ട് തുക ഇപ്പോഴുള്ളത് അത് പോലെ തുടരുന്നതില്‍ തെറ്റില്ല

നാളെ നല്ല ജഡ്‌ജുകളെ കിട്ടാന്‍ കോടതികള്‍ നുവാല്‍‌സിലേക്ക് കാമ്പസ് ഇന്റര്‍വ്യൂ‍ നടത്താന്‍ പോയാല്‍ നമ്മുടെ സര്‍ക്കാര്‍ ലോ കോളെജില്‍ പഠിക്കുന്ന സമര്‍ത്ഥര്‍ക്ക് ജുഡീഷ്യല്‍ സര്‍വീസ് തന്നെ അന്യമാകില്ലേ. ( NUALS-National University Of Advanced Legal Studies ഐഐടി /ഐ‌ഐ‌എം നിലവാരമുള്ളതും വന്‍‌നഗരങ്ങളില്‍ മാത്രം സാന്നിദ്ധ്യമുള്ളതുമായ മേല്‍ത്തരം ലോ കോളെജാണ് നുവാല്‍‌സുകള്‍ .സമാന്യപൊതുബോധം ഉള്ള രക്ഷകര്‍ത്താക്കള്‍ക്ക് പോലും പുത്തന്‍ കൂറ്റുകാരായ ഇത്തരം ശ്രേഷ്ഠസ്ഥാപനങ്ങളുടെ പേരു പോലും അറിയില്ല പിന്നല്ലേ മക്കളെ അവിടേക്ക് വിടുന്നത്! ഗ്രാമ നഗര വ്യത്യാസം അത്രയ്‌ക്കുണ്ട് നമ്മുടെ നാട്ടില്‍ പഠനസ്ഥാപനം തിരഞ്ഞെടുക്കുന്നതില്‍ എന്നതിന് ഇതില്‍ പരം ഉദാഹരണം വേണോ? CLATഎന്‍‌ട്രന്‍സ് പരീക്ഷ ആണ് ഇവിടേക്കുള്ള പ്രവേശനവഴി)

ഇതേപോലെ തന്നെ ഗ്രാമപ്രദേശത്തെ രക്ഷിതാക്കള്‍ക്ക് ഐ ഐ ടി യും ഐ ടി ഐ യും തമ്മിലുള്ള വ്യത്യാസം പോലും അറിയില്ല എന്നതാണ് സത്യം. സ്വാഭാവികമായും മിടുക്കുള്ളവന്‍ (ള്‍ ) വരെ പ്രാദേശികമായ കോളെജില്‍ പഠിക്കേണ്ടിയും വരുന്നു. ഇവര്‍ക്ക് ഈ പൊതു മേഖലാ സ്ഥാപനങ്ങള്‍ അന്യമാണന്ന് രക്ഷിതാവ് മനസിക്കുമ്പോഴേക്കും സന്തതികള്‍ പഠനം പൂര്‍ത്തിയാക്കി‌യിട്ടുണ്ടാകും. ഇനി കേരളത്തിലെ ഒന്നാം നിര കാമ്പസായ തിരുവനന്തപുരം എഞ്ചിനീയറിംഗ് കോളെജ് (ശ്രീകാര്യം) എത്തുന്ന വരില്‍ മുഖ്യപങ്കും തൃശൂര്‍ /പാലാ ഫാക്‍ടറിയില്‍ നിന്നും വിരിയുന്ന എന്‍‌ട്രന്‍സ് കുഞ്ഞുങ്ങള്‍ ആണന്നത് വിദ്യാഭ്യാസ അങ്ങാടിയിലെ പാട്ട്. പാലായിലെ ഫീസ് ലക്ഷമാണ് അവിടെ നിന്ന് പഠിക്കുകയും വേണം. പാവം രക്ഷിതാവ് ഇതെങ്ങനെ താങ്ങും. ഇങ്ങനെ താങ്ങാനാകുന്നവര്‍ നല്ല സാമ്പത്തിക സ്ഥിതി ഉള്ളവരാണന്നതില്‍ തര്‍ക്കമില്ല. ഇങ്ങനെയുള്ള കാമ്പസുകളിലേക്ക് മാത്രം പൊതു സ്ഥാപനങ്ങളുടെ കാമ്പസ് റിക്രൂട്ട്മെന്റ് നീളുന്നത് ഒരു തരത്തിലും നീതികരിക്കാനാകില്ല
കോരന് കഞ്ഞി കുമ്പിളില്‍ തന്നെ !

മൊബൈല്‍ വഴി പണം അയക്കാം ഇന്‍സ്റ്റന്റായി തന്നെ

2011-06-09T12:10:00.000-07:00

നിലവിലുള്ള ഇന്റര്‍നെറ്റ്/മൊബീല്‍ ബാങ്കിംഗിനെ പറ്റി അല്ല പരാമര്‍ശിക്കാന്‍ ഉദ്ദേശിക്കുന്നത്, പുതുതായി അവതരിപ്പിക്കാന്‍ പോകുന്ന ഐ‌എം‌പി‌എസ് (IMPSഇന്റര്‍ബാങ്ക് മൊബൈല്‍ പേയ്‌മെന്റ് സര്‍വീസ്) എന്ന പുതുനിര സേവനത്തെ പറ്റിയാണ്. ഇപ്പോള്‍ ഉള്ള മൊബൈല്‍ ബാങ്കിംഗില്‍ വളരെ പരിമിതമായ സൌകര്യങ്ങളെ അനുവദിക്കുന്നുള്ളൂ, എന്നാല്‍ IMPS സംവിധാനം വളരെ പ്രാധാന്യമുള്ള ഒട്ടേറെ സേവനങ്ങളെ ഒരു കുടക്കീഴില്‍ ആക്കികൊണ്ടാണ് വരുന്നത്. ഭാരതീയ റിസര്‍വ് ബാങ്ക് ഇത് അംഗീകരിക്കുക മാത്രമല്ല എത്രയും പെട്ടെന്ന് നടപ്പില്‍ വരുത്താന്‍ രാജ്യത്തെ ബാങ്കുകളെ ഉപദേശിക്കുകയും ചെയ്തിരിക്കുന്നു. സ്വാതന്ത്ര്യം കിട്ടിയിട്ട് ഇന്നേ വരെ രാജ്യത്ത് പൊതുമേഖലാ/സഹകരണ/ സ്വകാര്യ ബാങ്കുകള്‍ എല്ലാം കൂടി 35 കോടി വ്യക്തിഗത എസ് ബി അക്കൌണ്ട് മാത്രമേ തുറന്നിട്ടുള്ളൂ. പതിനായിരക്കണക്കിന് വിദൂ‍രഗ്രാമങ്ങളില്‍ ഇന്നേ വരെ ഒരു ബാങ്ക് ശാഖപോലും എത്തിയിട്ടുമില്ല. അതേ സമയം ഇക്കഴിഞ്ഞ 15 വര്‍ഷത്തിനിടെ 70 കോടി ജനങ്ങളിലേക്ക് ഗ്രാമ നഗര ഭേദമില്ലാതെ മൊബൈല്‍ ഫോണ്‍ എത്തിക്കഴിഞ്ഞു. പുതിയ നീക്കത്തിലൂലൂടെ ഇതുവരെ ബാങ്കിംഗ് സേവനം എത്താത്ത അല്ലെങ്കില്‍ ബാങ്കിലേക്ക് പോകാന്‍ മടിച്ചു നില്‍ക്കുന്ന സമൂഹത്തെ കൂടി ബാങ്കിംഗ് ശ്രംഖലയില്‍ കൊണ്ട് വരാന്‍ ലക്ഷ്യമിടുന്നു.

ഐ‌ എം പി എസ് സംവിധാനത്തിന്റെ ആരംഭദശയില്‍ തന്നെ ജനപ്രീയമായ ഒട്ടേറെ സൌകര്യങ്ങള്‍ കോര്‍ത്തിണക്കിയിട്ടുണ്ട്. എത് സമയത്തും എത് സ്ഥലത്ത് വച്ചും ഒരാളുടെ അക്കൌണ്ടില്‍ നിന്ന് മറ്റൊരാളുടെ അക്കൌണ്ടിലേക്ക് പണം കൈമാറാം. പണം കൈമാറ്റം നടന്ന സന്ദേശം നിമിഷങ്ങള്‍ക്കുള്ളില്‍ തന്നെ രണ്ടാളുടേയും മൊബീലില്‍ സന്ദേശമായി എത്തും.

പ്രത്യേകതകള്‍

എത് ബാങ്കില്‍ നിന്നും എത് ബാങ്കിലേക്കും

24 മണിക്കൂറും ആഴ്ചയില്‍ എഴ് ദിവസവും ലഭ്യത

നിങ്ങളുടെ ബാങ്ക് അക്കൌണ്ട് നമ്പറോ മറ്റ് വിശദാംശങ്ങളോ സ്വീകരിക്കുന്ന വ്യക്തി അറിയില്ല

ലളിതമായ ഉപയോഗ ക്രമം

തികച്ചും വിശ്വസിക്കാവുന്ന കുറ്റമറ്റ സാങ്കേതിക പിന്‍‌ബലം

സാധനങ്ങള്‍ വാങ്ങിയ ശേഷം ഡെബിറ്റ് കാര്‍ഡിന് പകരമായി കടയില്‍ പണമടവിന് ഉപയോഗിക്കാം

കേന്ദ്രസര്‍ക്കാര്‍ സ്ഥാപനമായ നാഷണല്‍ പേയ്‌മെന്റ് കോര്‍പ്പറേഷന്‍ ഓഫ് ഇന്ത്യ ആണ് ഇടനിലക്കാര്‍

ബാങ്ക് സേവനം ലഭിക്കാനായി നിലവില്‍ വിവിധ ശാഖകളില്‍ ഒന്നില്‍ പോകാം അല്ലെങ്കില്‍ എ ടി എം , ഇന്റര്‍നെറ്റ് ബാങ്കിംഗ് എന്നിവ ഉപയോഗപ്പെടുത്താം. എന്നാല്‍ മറ്റൊരാള്‍ക്ക് പണം അയക്കണമെങ്കില്‍ പ്രസ്തുത ആളിന്റെ അക്കൌണ്ട് നമ്പര്‍ അറിയേണ്ടതുണ്ട്. ഇത് ഒരു പക്ഷെ വ്യക്തിഗതമായ ഒരു നിര്‍ണായക വിവരമാണ്. നമ്മുടെ ബാങ്ക് അക്കൌണ്ട് നമ്പര്‍ പുറമേ വെളിപ്പെടുത്താന്‍ മടിയുള്ളവരും ഒരു പക്ഷെ അങ്ങനെ നല്‍കിയാല്‍ ദുരുദ്ദേശത്തോടെ സങ്കീര്‍ണവിവരങ്ങള്‍ ഖനനം ചെയ്‌തെടുക്കാന്‍ അതിവിദഗ്ദരും എറെയുള്ള നാട്ടില്‍ പൊല്ലാപ്പാകും എന്ന് പറയേണ്ടതില്ലല്ലോ. ഈ പുതിയ സംവിധാനത്തില്‍ നിങ്ങള്‍ അക്കൌണ്ട് നമ്പര്‍ നല്‍കേണ്ടതില്ല.

നിലവിലെ രീതി : മിക്ക ബാങ്കുകളും മൊബൈല്‍ ബാങ്കിംഗ് സേവനം നല്‍കുന്നുണ്ടെങ്കിലും അവരവരുടെ പ്ലാറ്റ്‌ഫോം ആണ് ഇതിന് ഉപയോഗിക്കുന്നത്. ഒരു ബാങ്കില്‍ നിന്ന് മറ്റൊരു ബാങ്ക് അക്കൌണ്ടിലേക്കുള്ള പണകൈമാറ്റം എന്‍‌ഇ‌എഫ്‌ടി (നാഷണല്‍ ഇലക്‍ട്രോണിക് ഫണ്ട് ട്രാന്‍സ്‌ഫര്‍ ) വഴിയാണ്. ഇതാകട്ടെ ഉടനടി കൈമാറ്റം ചെയ്യില്ല. വിവിധ ബാച്ചുകളിലായി പകല്‍ 9 നും 7നും മധ്യേ ആണ് വിനിമയം ചെയ്യുന്നത്. ഇതിന് പലബാങ്കുകളും പല നിരക്കില്‍ ചാര്‍ജും ഈടാക്കുന്നുണ്ട് . ആര്‍ക്കാണൊ പണം അയക്കുന്നത് അയാളുടെ അക്കൌണ്ട് നമ്പറും മറ്റ് വിശദാംശംങ്ങളും ഇപ്പോഴുള്ള സംവിധാനത്തില്‍ നിര്‍ബന്ധമായും വേണം. എന്നാല്‍ പുതിയ സംവിധാനം ഇതിന്റെ മൊത്തത്തിലുള്ള പൊളിച്ചെഴുത്താണ് ലക്ഷ്യമിടുന്നത്

നിലവില്‍ ബാങ്ക് അക്കൌണ്ട് ഉള്ള എല്ലാ ഉപയോക്താക്കള്‍ക്കും IMPS സേവനം ലഭ്യമാണ്. ഇതുവരെ 20 ബാങ്കുകള്‍ സംവിധാനത്തില്‍ ചേര്‍ന്ന് കഴിഞ്ഞു. മറ്റുള്ളസ്ഥാപനങ്ങളും ഇതിലേക്ക് വരാനുള്ള പാതയിലാണ്. 6 ബാങ്കുകള്‍ക്ക് സുസജ്ജമായ സര്‍ട്ടിഫിക്കേഷനും ലഭിച്ചു കഴിഞ്ഞു.

പ്രവര്‍ത്തനരീതി :

നിങ്ങളുടെ മൊബൈല്‍ നമ്പര്‍ ബാങ്ക് അക്കൌണ്ടിന്റെ ഡാറ്റാബേസില്‍ ചേര്‍ക്കുക. മിക്കപ്പോഴും ഇത് നല്‍കിയിട്ടുണ്ടാകും. നിലവില്‍ എസ് എം എസ് അലര്‍ട്ട് ലഭിക്കുന്നുണ്ടങ്കില്‍ നിങ്ങളുടെ നമ്പര്‍ ബാങ്കിന്റെ വിവരക്കലവറയില്‍ ഉണ്ടെന്നര്‍ത്ഥം. അടുത്തതായി അതാത് ബാങ്കില്‍ നിന്നോ വെബ്‌സൈറ്റില്‍ നിന്നോ IMPSനുള്ള പ്രത്യേക നമ്പര്‍ നേടുക. എം എം ഐ ഡി (MMID) എന്നാണ് ഈ നമ്പറിന്റെ പേര്. വളരെ ലളിതമായി ഇത് നേടാം, ബാങ്കില്‍ പോകേണ്ടതില്ല, നമ്മുടെ അക്കൌണ്ട് നമ്പറുമായി രജിസ്റ്റര്‍ ചെയ്ത മൊബീല്‍ നമ്പറില്‍ നിന്ന് ഒരു സന്ദേശം ബാങ്ക് ഇതിനായി ഏര്‍പ്പെടുത്തിയ നമ്പറിലേക്ക് അയച്ചാല്‍ ഉടന്‍ തന്നെ 7 അക്ക MMID കിട്ടും. അടുത്തതായി ഒരു പാസ്‌വേഡ് (MPIN) ലഭിക്കണം ഇതിനും എസ് എം എസ് അയച്ചാല്‍ മതിയാകും. ഇത്രയുമായാല്‍ നിങ്ങളുടെ അക്കൌണ്ട് പുതിയ മൊബൈല്‍ ബാങ്കിംഗിന് സജ്ജമായി കഴിഞ്ഞു. ഒരോ ബാങ്കുകളും ഇതിന് വേണ്ട നിര്‍ദ്ദേശങ്ങള്‍ അതാത് വെബ്‌സൈറ്റില്‍ ഉള്‍പ്പെടുത്തും.

പണം സ്വീകരിക്കാന്‍ നിലവില്‍ MPIN നേടണമെന്നില്ല, എന്നാല്‍ പണം അയക്കാന്‍ ഇത് നിര്‍ബന്ധം. ആരാണോ നിങ്ങള്‍ക്ക് പണം അയക്കാന്‍ പോകുന്നത് അല്ലെങ്കില്‍ പതിവായി പണം അയക്കുന്നത്. അയാളുടെ മൊബൈല്‍ നമ്പറും ആ നമ്പറുമായി കൂട്ടിയിണാക്കി രജിസ്റ്റര്‍ ചെയ്ത MMID അറിഞ്ഞാല്‍ പണം അയക്കാന്‍ കേവലം ഒരു മൊബൈല്‍ സന്ദേശദൂരം മാത്രം. ഉദാ: ദൂരെദേശത്തെ ഹോസ്റ്റലില്‍ നിന്ന് പഠിക്കുന്ന കുട്ടിക്ക് രക്ഷിതാവ് പതിവായി പണം അയക്കുമല്ലോ. അസമയത്തോ മറ്റോ പണത്തിന് അത്യാവശ്യം നേരിട്ടാല്‍ ഈ രീതിയില്‍ നിമിഷം കൊണ്ട് പണം എത്തേണ്ടിടത്ത് എത്തിക്കാം. ഉടന്‍ തന്നെ സമീപത്തെ എ ടി എം ല്‍ നിന്ന് കുട്ടിക്ക് പണം പിന്‍ വലിക്കാം. ഇനി അല്ല ഹോസ്റ്റല്‍ പണം അടയ്ക്കുക, സര്‍വകലാശാലാ ഫീസ് അടയ്ക്കുക എന്നിവ ആണെങ്കില്‍ അതും ഇതേ മാതൃകയില്‍ തന്നെ കുട്ടിക്ക് ചെയ്യാം എടി‌എം ലും പോകേണ്ടതില്ല. സംവിധാനം പൂര്‍ണതോതില്‍ എത്താന്‍ സമയം എടുക്കുമെങ്കിലും നിലവിലെ പുരോഗതി അതിവേഗത്തിലാണ്. പരിമിതമായി മാത്രം ആള്‍ക്കാര്‍ അറിഞ്ഞ ഈ സേവനത്തില്‍ പോയ മാസം 3965 ക്രയവിക്രയം നടന്നു, 155.85 ലക്ഷം രൂപയും വിനിമയം ചെയ്തു. 35 കോടി മൊത്തം ബാങ്ക് അക്കൌണ്ടില്‍ വെറും 1 കോടി പേര്‍ മാത്രമാണ് നാളിതു വരെ വിവിധ ബാങ്കുകളിലായി MMID നേടിയിട്ടുള്ളത്. പ്രത്യേക പരസ്യപ്രചരണങ്ങളും തുടര്‍ന്ന് ഉപയോഗം സാര്‍വത്രികമാകുന്നതോടെയും ഒരു പക്ഷെ എ‌ടി‌എം നെക്കാളും സുശക്തമായ ശ്രംഖലയായി ഇത് മാറുമെന്നാണ് പ്രതീക്ഷിക്കപ്പെടുന്നത്. ഒന്നിലേറെ അക്കൌണ്ട് ഉള്ളവര്‍ക്ക് ഒരു മൊബൈല്‍ നമ്പറില്‍ തന്നെ വിവിധ ബാങ്കുകളുടെ MMID കൂട്ടിചേര്‍ക്കാം. മറ്റൊരാള്‍ക്ക് നിങ്ങളുടെ മൊബൈല്‍ ,MMID നമ്പര്‍ കൊടുക്കുന്നതിലൂടെ ഒരു കാരണവശാലും അക്കൌണ്ടിന്റെ വിശദാംശങ്ങള്‍ അല്ല നല്‍കുന്നത് എന്ന രഹസ്യസ്വഭാവവും മേന്മയും ഉണ്ട്. MPIN വേണമെങ്കില്‍ പലപ്രാവശ്യമായി മാറാം, ഇപ്പോഴത്തെ എ ടി എം , ഇന്റര്‍നെറ്റ് ബാങ്കിംഗ് പാസ്‌വേഡ് മാറ്റുന്നത് പോലെ.

റിസര്‍വ് ബാങ്ക് അടുത്തിടെ ചെറിയ കടകളിലെ പണമിടപാടിനും (Merchant Payments) പച്ചക്കൊടി കാട്ടിക്കഴിഞ്ഞു. അതായത് കടയില്‍ നിന്നും സാധനം വാങ്ങിയ ശേഷം ഒരു എസ് എം എസ് അയച്ച് പണമടവ് നടത്താം. ഉടന്‍ തന്നെ കടയുടമയുടെ മൊബൈലില്‍ തുക എത്തിയ സന്ദേശം കിട്ടും. അദ്ദേഹം ട്രാന്‍സാക്ഷന്‍ കോഡ് രേഖപ്പെടുത്തിയ ബില്‍ തരും. ചില്ലറ ഇല്ല പിന്നെ തരാം തുടങ്ങിയ പൊല്ലാപ്പ് ഇല്ലല്ലോ ! തീര്‍ന്നില്ല റേയില്‍‌വേ സ്റ്റേഷനിലേക്ക് പോകും വഴി തന്നെ പ്ലാറ്റ് ഫോം ടിക്കറ്റ് എടുക്കാം എന്ന് വന്നാലോ ? പ്ലാറ്റ് ഫോം ടിക്കറ്റ് മൊബൈല്‍ സന്ദേശമായി എത്തും. പോരേ

ഓട്ടോ/ടാക്‍സി യാത്ര കഴിഞ്ഞ് കൂലി ഇത്തരത്തില്‍ ഡ്രൈവറുടെ അക്കൌണ്ടില്‍ കോടുക്കുന്ന കാലവും പലരില്‍ നിന്ന് കിട്ടുന്ന കൂലി, പെട്രോള്‍ ബങ്കിലും ഇങ്ങനെ തന്നെ കൈമാറ്റം ചെയ്ത് എണ്ണ നിറയ്ക്കുന്ന കാലവും അങ്ങകലെ ആണോ ?

ആപ്ലിക്കേഷന്‍ അടിസ്ഥാനമാക്കിയുള്ള ദിന പരിധി 50,000 രൂപയും എസ് എം എസ് അടിസ്ഥാനമാക്കിയുള്ള സേവനമാണ് ഉപയോഗിക്കുന്നതെങ്കില്‍ ദിനപരിധി 5000 രൂപയും ആണ് ഇപ്പോള്‍ അനുവദിച്ചിട്ടുള്ളത്, ഇത് ഉയര്‍ത്തിയേക്കാം. നിലവില്‍ ഒരു പണകൈമാറ്റത്തിന് 10 പൈസ ആണ് NPCI ഈടാക്കുന്നത്. നിങ്ങളുടെ രജിസ്റ്റര്‍ ചെ‌യ്‌ത മൊബൈല്‍ നമ്പറില്‍ നിന്നേ ഈ ക്രയവിക്രയമെല്ലാം അനുവദിക്കുകയുള്ളൂ, അഥവാ നമ്പര്‍ മാറിയാല്‍ ബാങ്ക് ശാഖയെ സമീപിച്ച് വേണ്ട ക്രമീകരണം നടത്തുക .

വിശദാംശങ്ങള്‍ക്ക് http://www.npci.org.in

വര്‍ത്തമാന പത്രത്തിന്റെ അടുത്ത അവതാരം

2011-02-10T19:24:00.000-08:00

വാര്‍ത്തയും വിശകലനങ്ങളുമായി പ്രഭാതത്തില്‍ നമ്മെ തേടി വരാറുള്ള ദിനപത്രങ്ങളുടെ ഭാവിയെ തന്നെ ബാധിച്ചേക്കാവുന്ന ഒരു മാറ്റത്തിന് പോയ വാരം തുടക്കം കുറിച്ചു. സാധാരണ മേശപ്പുറ കമ്പ്യൂട്ടറുകള്‍ അടക്കിവാണിരുന്ന സമയത്ത് എത്തിയ ലാപ്‌ടോപ്പ് വ്യക്തിഗത കമ്പ്യൂട്ടിംഗിന്റെ വിപണിയെ തന്നെ മാറ്റിമറിച്ചു എന്നത് വസ്‌തുതയാണ്. എന്നാല്‍ ആ ലാപ്ടോപ്പിനെയും കടപുഴക്കിയെറിഞ്ഞു കൊണ്ടാണ്ട് 2010 ജനുവരിയില്‍ വിപണിയിലെത്തിയ ടാബ്‌ലറ്റുകള്‍ വിപണി വാഴുന്നത്. കേവലം ഒരു വര്‍ഷത്തുനുള്ളില്‍ തന്നെ ദശലക്ഷക്കണക്കിന് ടാബ്‌ലറ്റ് കമ്പ്യൂട്ടറുകള്‍ വിറ്റഴിക്കപ്പെട്ടു. യാത്രാവേളയിലും ഓഫീസ് സമയത്തും ഒക്കെ വ്യക്തിപരമായ വിവരങ്ങള്‍ ചികയാനും മറ്റ് വിനോദോപാധികള്‍ക്കുമായി ടാബുകള്‍ ഇന്ന് നിര്‍ണായക സ്വാധിനം ചെലുത്തുന്നു. ആപ്പിള്‍ ഐ പാഡ് ആണ് നിലവിലെ ടാബ്‌ലറ്റ് രംഗത്തെ സ്വാധീനശക്തി.. ഈ ഐ പാഡിന്റെ സ്‌ക്രീന്‍ പ്രതലത്തിലേക്ക് വര്‍ത്തമാന പത്രത്തെ ഇരുപ്പുറപ്പിക്കാനുള്ള ശ്രമമാണ് റൂപര്‍ട്ട് മര്‍ഡോക്കിന്റെ അധ്യക്ഷതയിലുള്ള ന്യൂസ് കോര്‍പ്പറേഷന്‍ നടത്തിയത്. ഐ പാഡില്‍ മാത്രം കിട്ടുന്ന ഒരു പത്രത്തിന്റെ പിറവി. ‘ദി ഡെയ്‌ലി’ എന്ന് പേരിട്ടിരിക്കുന്ന ഈ പത്രം സൌജന്യമല്ല., വെബ്സൈറ്റ് പതിപ്പുമില്ല. അതായത് സാധാരണ പത്രത്തെ പോലെ ആഴ്ച/വാര്‍ഷിക വരിസംഖ്യ എല്ലാം ഒടുക്കണം. ദിനം തോറും വാര്‍ത്തയും ചിത്രങ്ങളും ഒക്കെയായി പ്രഭാതത്തില്‍ പത്രം സ്‌ക്രീനില്‍ പുതുക്കിയ പേജായി എത്തും. ഇ-വായനയെ എറെ മുന്നോട്ട് കൊണ്ട് പോകാന്‍ സാധ്യതയുള്ള ഒരു നീക്കമാണ് ന്യൂസ് കോര്‍പ്പറേഷന്റെ ‘ദി ഡെയ്‌ലി’ എന്ന ഡിജിറ്റല്‍ പ്രസിദ്ധീകരണം..

അ(ച്ചടി ) വായനയില്‍ നിന്ന് ഇ(ലക്‍ട്രോണിക് ) വായനയിലേക്കുള്ള മാറ്റം.

കേവലം ഓണ്‍‌ലൈന്‍ പത്രമായല്ല ഇത് കൂടുമാറുന്നത്. മറിച്ച് മള്‍ട്ടിമീഡിയ പകര്‍ന്നു നല്‍കുന്ന എല്ലാ സാധ്യതകളും പരമാവധി ഉപയോഗിക്കുന്നതിനോപ്പം തന്നെ പരമ്പരാഗത പത്രത്തിന്റെ തനിമ വിടാതെ അവതരിപ്പിക്കുകയും ചെയ്യുന്നു. അതാത് സെക്കന്റില്‍ അപ്‌ഡേറ്റ് ചെയ്യുന്ന ഓണ്‍‌ലൈന്‍ സൈറ്റുകള്‍ ഈ മാധ്യമ വമ്പന്റെ കൂടയില്‍ ഉണ്ട് അപ്പോഴാണ് തികച്ചും നൂതനമായ രീതിയില്‍ ആണ് ടാബ്‌ലറ്റ് പത്രം അണിയിച്ചൊരുക്കാന്‍ ശ്രമിച്ചിരിക്കുന്നത്.. കാണാന്‍ പത്രത്തെ പോലെ തന്നെ, എത്തുന്ന സമയവും രീതിയും അതേ പോലെ. പുറത്തിറക്കിക്കൊണ്ട് കമ്പനി പറഞ്ഞത് ‘നവകാലം നവജേണലിസം ആവശ്യപ്പെടുന്നു’ എന്നാണ്. അതായത് കേവലം വാര്‍ത്തയും ചിത്രവും മാത്രമല്ല, ഒപ്പം ഇന്‍ഫോഗ്രാഫിക്‍സ് ശൈലിയിലുള്ള ഇന്ററാക്‍ടിവ് ഫീച്ചറുകളും ഉണ്ടാകും. എന്താണ് ഇതിന്റെ മെച്ചം .അവതരിപ്പിക്കനുദ്ദേശിക്കുന്ന വാര്‍ത്ത ഒരു ആനിമേഷന്‍ (പൂര്‍ണമായ അര്‍ത്ഥത്തില്‍ അല്ല എങ്കിലും) പശ്ചാത്തലത്തില്‍ എത്തും . ഒരു വിമാനാപകടം നടന്നാലോ അല്ലെങ്കില്‍ ആഴമേറിയ ഖനിക്കുള്ളില്‍ അകപ്പെട്ട തൊഴിലാളികളുടെ ദൈന്യതയുടെ വാര്‍ത്തയോ എത്തുന്നത് അതിന്റെ വിശദമായ ഇന്ററാക്‍ടീവ് സാധ്യതകളുമായി ആകും. ഇത് സാധിക്കണമെങ്കില്‍ പത്രത്തിലെ എഴുത്ത്,,ചിത്രമെടുപ്പ്,വരപ്പ്,പേജ് രൂപകല്പന,ആനിമേഷന്‍ എന്നീ സംഘങ്ങളിലെ കുറച്ച് പേര്‍ ഒത്തു ചേര്‍ന്ന് പ്രവര്‍ത്തിക്കണം. കാരണം ഇന്‍ഫോഗ്രാഫിക് നല്‍കുന്നത് സമഗ്രമായ അറിവാണ്.

ആപ്പിള്‍ കൃത്യം ഒരു വര്‍ഷം മുന്‍‌പ് വിപണിയിലെത്തിച്ച ഐ‌പാഡ് അത്ഭുതകരമായ രിതിയില്‍ വിപണി കീഴടക്കുന്നതിന്റെ തെളിവാണ് ഈ ടാബ് പത്രം. നിലവില്‍ കിന്‍‌ഡില്‍ പൊലെയുള്ള ഇ ബുക്കുകളും ടാബ് ആപ്ലിക്കേഷനുകള്‍ തയാറാക്കിക്കഴിഞ്ഞു. ചുരുക്കത്തില്‍ സമ്പൂര്‍ണ വായനാ വിപ്ലവം ആണ് ടാബുകളിലൂടെ നടന്നുകൊണ്ടിരിക്കുന്നത്. ആപ്പിള്‍ ഐപാഡിനെ അനുകരിച്ചോ അല്ലാതെയോ വിപണിയില്‍ അനവധി ഉപകരണങ്ങള്‍ എത്തിക്കഴിഞ്ഞു. ഇവയില്‍ ഏറിയപങ്കും ഗൂഗിള്‍ ആന്‍‌ഡ്രോയ്‌ഡ് എന്ന പ്ലാറ്റ്ഫോമിലാണ് നിലകൊള്ളുന്നത്. വളരുന്ന ടാബ് വിപണിയുടെ സ്‌പന്ദനം ഉള്‍ക്കൊണ്ട് ഗൂഗിള്‍ പുതിയ പതിപ്പ് ആന്‍‌ഡ്രോയ്ഡ് ഹണികോമ്പ് എന്ന വാണിജ്യനാമത്തില്‍ ഇപ്പോള്‍ എത്തിച്ചു. സാംസങ്ങ്, എല്‍ ജി, മൊട്ടോറോള എന്നിവര്‍ ടാബ് ഉപകരണങ്ങളുടെ വലിയ നിരതന്നെ അണിയറയില്‍ തയാറാക്കുന്നു. ഒപ്പം ഇന്ത്യയില്‍ നിന്ന് ആദം എന്ന വിസ്‌മയവും.

നിലവിലെ ഐ പാഡ് പത്രം മര്‍ഡോക്ക് ഇറക്കിയതും ആപ്പിള്‍ ഐ പാഡ് ഇന്ത്യയില്‍ ഐദ്യോഗികമായി എത്തിയതും എതാണ്ട് ഒരേ ആഴ്ചയില്‍ തന്നെ എന്നത് കേവലം യാദൃശ്ചികമാണോ ?

ഇന്ത്യന്‍ സാഹചര്യത്തില്‍ ആന്‍ഡ്രോയ്ഡ് ആപ്ലിക്കേഷന്‍ വഴിയെത്തുന്ന ടാബ് പത്രങ്ങളാകും സമീപ ഭാവിയില്‍ വെന്നിക്കൊടി പാറിക്കാന്‍ സാധ്യത കാണുന്നത്. 1995 ന്റെ പകുതിയില്‍ ഇന്ത്യയിലെത്തിയ ഇന്റര്‍നെറ്റിന്റെ ചുവടുപിടിച്ച് എതാണ്ട് അഞ്ചു വര്‍ഷത്തിനുള്ളില്‍ തന്നെ ചെറുതും വലുതുമായ മിക്ക ഇന്ത്യന്‍ പത്രങ്ങളും ഓണ്‍‌ലൈന്‍ പത്രങ്ങള്‍ നെറ്റില്‍ എത്തിച്ചു എന്നത് ചരിത്രം. ഇതില്‍ ചിലതെല്ലാം അച്ചടി പതിപ്പുകള്‍ പോലെ സാമ്പത്തികലാഭം ഉണ്ടാക്കുകയോ അതിനെക്കാള്‍ മുന്നാക്കം പോകുകയോ ചെയ്യുന്നു. ഇപ്പോഴത്തെ ടാബ് പത്രം ഒരു തരംഗമാകുകയാണങ്കില്‍ കേവലം രണ്ട് വര്‍ഷം പോലും എടുക്കില്ല നമ്മുടെ നാട്ടിലെ പത്രങ്ങളായ പത്രങ്ങളെല്ലാം ടാബ് അവതാരവുമായി വാര്‍ത്താ വിരുന്നൊരുക്കാന്‍

കാലചക്രമുരുളും കമ്പ്യൂട്ടറും

2011-01-07T08:04:00.000-08:00

വായനയുടെ ശൈലിയെ തന്നെ കം‌പ്യൂട്ടര്‍ /മൊബീല്‍ ഫോണ്‍ മാറ്റിമറിച്ചു കൊണ്ടിരിക്കുന്നു എന്നത് പുതുമയുള്ള വാര്‍ത്തയോ വിശകലനമോ അല്ലാതായിരിക്കുന്നു.അസംഖ്യം വെബ്‌സൈറ്റുകളാണ് ഇന്ന് വിവരരാജപാതയിലേക്കുള്ള യാത്രയില്‍ നമ്മെ സഹായിക്കാനുള്ളത്. പത്രമാസികകള്‍ വെബ്‌സൈറ്റ് അല്ലെങ്കില്‍ പോര്‍ട്ടല്‍ തുടങ്ങുന്നത് നിലവിലുള്ള പ്രസിദ്ധീകരണത്തിന്റെ വെറുമൊരു ഉപശാഖ മാത്രമായിരുന്നുവെങ്കില്‍ ഇപ്പോള്‍ കഥ മാറി. വെറുമൊരു വെബ്‌സൈറ്റ് മാത്രമെന്നത് ഒരു പക്ഷെ ബാധ്യത തന്നെയായി മാറുമെന്നത് അനുഭവപാഠം. ഒരു വെബ്‌പോര്‍ട്ടല്‍ ആവശ്യപ്പെടുന്നത് അച്ചടിക്കുള്ളതിന്റെയോ അല്ലെങ്കില്‍ അച്ചടിച്ചുവന്നതിന്റെയോ ഇ-പകര്‍ത്തി വയ്‌ക്കല്‍ അല്ല മറിച്ച് ഈ നവമാധ്യമം ആവശ്യപ്പെടുന്നതലത്തില്‍ വിവരക്കലവറ(ഡാറ്റാബേസ്)യെ മാറ്റിയെടുക്കുകയാണ്. ബ്ലോഗ്,ട്വിറ്റര്‍ ,ഫേസ് ബുക്ക് എന്നിവ ഈ കാഴ്ചപ്പാട് വച്ച് നോക്കുമ്പോള്‍ മടിപിടിച്ച സ്ഥാപനങ്ങള്‍ക്ക് അവസരമല്ല മറിച്ച് വായനക്കാരുടെ പരാതിപറച്ചിലുകള്‍ക്കോ അല്ലെങ്കില്‍ കുറ്റപ്പെടുത്തലുകള്‍ക്കോ ഉള്ള എളുപ്പവഴി ഉണ്ടാക്കിക്കൊടുക്കലാണ്. ഉദാഹരണത്തിന് നമ്മള്‍ വായിക്കുന്ന പുതിയ ഒരു പുസ്തകം പൌലോ കൊയ്‌ലോ അല്ലെങ്കില്‍ ചേതന്‍ ഭഗത്തിന്റെതാണന്ന് വിചാരിക്കുക. ഈ രണ്ട് എഴുത്തുകാരും സോഷ്യല്‍ നെറ്റ്‌വര്‍ക്കിംഗ് സൈറ്റുകളില്‍ അപ്പപ്പോള്‍ വിവരവിനിമയം നടത്തുന്നവരാണന്നതിനാല്‍ പറയുന്നു അത്രമാത്രം. പ്രസ്തുത പരിഭാഷ വായനയെ മുന്നോട്ട് നയിക്കാത്ത വിധത്തില്‍ കല്ലുകടി ഉള്ളതാണങ്കില്‍ നിങ്ങള്‍ എന്തുചെയ്യും. അവരുടെ പേരിലേക്ക് ഒരു ട്വിറ്റര്‍ /ഫേസ്ബുക്ക് സന്ദേശം ഇടും. സോഷ്യല്‍ നെറ്റ്വര്‍ക്കിംഗ് കാലത്തെ സന്ദേശത്തിന് ഇമെയില്‍ കാലഘട്ടത്തിനെക്കാള്‍ ഉള്ള മറ്റൊരു പ്രത്യേകത, ഇത് എഴുതുന്ന ആളും വായിക്കുന്ന ആളും തമ്മില്‍ മാത്രമുള്ള അന്യോന്യ സംസാരമല്ല, ഒപ്പം നമ്മുടെ കൂട്ടുകാര്‍ക്കും ഇത് വായിക്കാമെന്നതാണ്. കഴമ്പും കാമ്പുമുള്ള സന്ദേശമാണങ്കില്‍ അവര്‍ വീണ്ടും ഇത് പകര്‍ത്തി വച്ച് ചങ്ങലക്കണ്ണിപോലെ മണിക്കൂറുകള്‍ക്കുള്ളില്‍ വ്യാപിക്കും. എന്തായിരിക്കും ഫലം. രണ്ട് സാധ്യതകള്‍ ഇതാണ് ഒന്ന്, മൂലകൃതി എഴുതിയ ആള്‍ തര്‍ജമ ചെയ്‌ത ആളിനെയോ അല്ലെങ്കില്‍ സ്ഥാപനത്തെയോ സമീപിക്കും പരാതിപ്പെടും ചിലപ്പോള്‍ പിണങ്ങും എന്നാല്‍ രണ്ടാമത്തെ സാധ്യത അല്‍പ്പം അപകടം പിടിച്ചതാണ് കാരണം പുസ്തകം വാങ്ങാം എന്ന് കരുതുന്നവര്‍ ഒരു പക്ഷെ ഒരു രണ്ടാമതൊന്ന് ചിന്തിക്കാം, പുസ്തകക്കടയില്‍ ചെന്ന് നല്ല പോലെ പരിശോധിച്ച ശേഷമേ വാങ്ങൂ. ചുരുക്കത്തില്‍ സോഷ്യല്‍ നെറ്റ്‌വര്‍ക്കിംഗ് കാലത്ത് വായനക്കാരന്‍ /ഉപഭോക്താവ് പതിയെ യഥാര്‍ത്ഥ രാജാവ് ആയിക്കൊണ്ടിരിക്കുന്നു. അതേ സമയം തന്നെ പ്രസ്തുത പുസ്തകം ഉന്നതമായ വായനാനുഭവം നല്‍കിയെങ്കില്‍ അത് ഉടനടി നേരത്തെ പറഞ്ഞ അതേ രീതിയില്‍ പ്രചരിപ്പിക്കപ്പെടുകയും എഴുതിയ/പരിഭാഷപ്പെടുത്തിയ ആള്‍ക്ക് സന്തോഷവും മുദ്രണാലയത്തിന് കൂടുതല്‍ പ്രതി വിറ്റഴിക്കാനുള്ള സാധ്യതകള്‍ തുറക്കപ്പെടുകയും ചെയ്യും. ഈ പറഞ്ഞ കാര്യം ഉപഭോക്‍തൃ ഉല്പന്നങ്ങള്‍ക്കെല്ലാം ബാധകമാണ് എങ്കിലും വായനയുമായി ബന്ധപ്പെട്ട് കൂടുതല്‍ ഗൌരവമുള്ളതിനാല്‍ സൂചിപ്പിച്ചെന്നേയുള്ളൂ.

വാര്‍ത്തയുമായി ബന്ധപ്പെട്ട ഇ-വായനയുടെ മറ്റൊരു ശ്രദ്ധേയ സാഹചര്യം ആക്ടിവിസത്തിന്റെ പുതിയ രീതിയാണ്. ബിനായക് സെന്നിനെതിരെയുള്ള വിധി വന്ന് ക്ഷണനേരം കൊണ്ട് ആയിരക്കണക്കിന് ട്വിറ്റുകളും ഫേസ്‌ബുക്ക്/ഇ-മെയില്‍ സന്ദേശങ്ങളും പ്രവഹിക്കപ്പെട്ടു. പലതും കേവലം അമര്‍ഷം/വിയോജിപ്പ് മാത്രമല്ല പഴയവാര്‍ത്തകളും വിശദമായ വിശകലനവും ഉള്ള പേജുകളിലേക്ക് കണ്ണികളാക്കുന്നവയായിരുന്നു. ഓണ്‍‌ലൈന്‍ പരാതി ഒപ്പിടല്‍ സര്‍വകാല റെക്കോഡിലേക്കെത്തി. അതായത് മാധ്യമങ്ങള്‍ ഇന്റര്‍നെറ്റ് പൂര്‍വകാലത്ത് വഹിച്ചിരുന്ന ഇടപെടല്‍ ഇന്ന് സമര്‍ത്ഥമായി നടത്തുന്നത് സോഷ്യല്‍ നെറ്റ്‌വര്‍ക്കിംഗ് സൈറ്റുകളാണ്. ദിനപത്രങ്ങളിലെ തെറ്റും അല്ലെങ്കില്‍ എതെങ്കിലും ഒരു മാധ്യമം ഒഴിവാക്കുന്ന/ഒതുക്കുന്ന/വളച്ചൊടിക്കുന്ന വാര്‍ത്തയെപ്പറ്റിയ അന്തമില്ലാത്ത ഗൂഗിള്‍ ബസ് ചര്‍ച്ചയും കണ്ടാല്‍ മാധ്യമവിമര്‍ശനത്തിന്റെ താക്കോലാണ് സോഷ്യല്‍ നെറ്റ്വര്‍‌ക്കിംഗ് ഇടങ്ങള്‍ എന്ന് തോന്നിപ്പിക്കും. പരമ്പരാഗത മാധ്യമവിമര്‍ശനം നടത്തിയിരുന്നത് പ്രത്യേകസിദ്ധിയുള്ള ചിലരായിരുന്നെങ്കില്‍ ഇന്ന് ഇളമുറക്കാരായവരോ അല്ലെങ്കില്‍ കാര്യമായ വായന ഇല്ലാത്ത സാധാരണക്കാരോ വരെയാണ് വിമര്‍ശനത്തിന്റെ പോര്‍മുന മിനുക്കുന്നത്. ഈയടുത്ത കാലത്ത് ഒരു എഴുത്തുകാരന്‍ അല്‍‌പം സങ്കടത്തോടെ പറഞ്ഞത് ഇങ്ങനെയാണ് “എന്നെ/പുസ്തകത്തെ പറ്റി എന്തോ ചര്‍ച്ചകള്‍ ഇവിടെ നടക്കുന്നുവെന്നറിഞ്ഞ് എത്തിയതാണ്. വന്നപ്പോഴല്ലേ ഇത്രമേല്‍ രസകരമായ ഒരിടം ഇല്ല എന്ന് മനസിലായത്” .അതെ സോഷ്യല്‍ നെറ്റ്‌വര്‍ക്കിംഗിലെ പരിഹാസമോ എതിര്‍പ്പോ മാന്യതയുടെയോ സഭ്യതയുടെയോ സീമകള്‍ ലംഘിക്കുന്നതായിരിക്കും. എന്നാല്‍ അച്ചടി മാധ്യമത്തിലെ ലേഖനസംവാദമോ ടെലിവിഷനുകളിലെ ന്യൂസ് റൂം ഡിസ്‌കഷനോ മിക്കപ്പോഴും അതാത് സ്ഥാപനത്തിന്റെ സഭ്യതാവരമ്പിനകത്ത് നിന്നായിരിക്കും. അതായത് എഴുത്തുകാരന്‍ മിക്കപ്പോഴും സുരക്ഷിതന്‍ എന്നാല്‍ ഇന്റര്‍നെറ്റ് ലോകത്ത് എഴുത്തുകാരനും വായനക്കാരും തമ്മില്‍ സംവദിക്കുന്നത് ഇത്തരം സംരക്ഷണഭിത്തികളുടെ കവചം ഇല്ലാതെയാണ്.

അ-വായനയില്‍ നിന്ന് ഇ-വായനയിലേക്ക്

അച്ചടി വായനയില്‍ നിന്ന് ഇലക്ട്രോണിക് വായനയിലേക്ക് എന്ന് വാമനരൂപം(short form) മാറ്റി പറയാം! നേരത്തേ സൂചിപ്പിച്ച സോഷ്യല്‍ നെറ്റ്‌വര്‍ക്കിംഗ് സൈറ്റുകള്‍ എങ്ങനെ എവിടെ വച്ച് ഉപയോഗിക്കുന്നു എന്ന് കൂടി അറിഞ്ഞാല്‍ വരാന്‍ പോകുന്ന മാറ്റത്തിന്റെ ആഴം ബോധ്യമാകും. പേഴ്‌സണല്‍ കമ്പ്യൂട്ടറും അതിലേക്ക് ബന്ധപ്പെടുത്തിയ ടെലഫോണ്‍ കമ്പികളുടെയും ഇന്റര്‍നെറ്റ് മണ്ണിലല്ല ഇന്ന് സോഷ്യല്‍ നെറ്റ്‌വര്‍ക്കിംഗ് സൈറ്റുകള്‍ വേരൂന്നി നില്‍ക്കുന്നത്. കൈയില്‍ കൊണ്ട് നടക്കാവുന്ന ഉപകരണങ്ങളില്‍ നിന്ന് അപ്പപ്പോള്‍ തന്നെ തങ്ങള്‍ക്ക് തോന്നിയത് വിളിച്ചുപറയുന്ന നെറ്റിസണ്‍‌മാരുടെ (ഇന്റര്‍നെറ്റില്‍ സക്രീയരായ സിറ്റിസണ്‍ /പൌരന്‍ ) എണ്ണം വന്‍‌വളര്‍ച്ചാനിരക്കാണ് രേഖപ്പെടുത്തുന്നത്. ഒറ്റനിറം മാത്രം ഡിസ്‌പ്ലേ ചെയ്തിരുന്നതും വിളിക്കപ്പുറം എസ് എം എസ് ന്റെ മാത്രം ഔദാര്യം അനുഭവിച്ചിരുന്ന സമയത്തില്‍ നിന്നും എങ്ങനെയാണോ ഇന്ന് നമ്മുടെ കയ്യിലിരിക്കുന്ന ബഹുവര്‍ണ/ബഹു‌ഉപയോഗ സാധ്യതകള്‍ ഉള്ള ഫോണിലേക്ക് മാറ്റപ്പെട്ടത് അതിലും വേഗത്തില്‍ നമ്മള്‍ സ്‌മാര്‍ട്ട് ഫോണിലേക്കും ടാബ്‌ലറ്റ് കമ്പ്യൂട്ടറിലേക്കും വഴിമാറും എന്ന് എതാണ്ട് ഉറപ്പായിക്കഴിഞ്ഞു. സാങ്കേതികവിദ്യയുടെ ചരിത്രം അങ്ങനെയാണ് ചിലത് വരുമ്പോള്‍ മറ്റ് ചിലത് തുടച്ച് മാറ്റപ്പെടും. എതാനും മാസം മുന്നെയാണ് സോണി അവരുടെ അതിപ്രശസ്‌തമായ വാക്ക്‍മാന്‍ നിര്‍മ്മാണം നിര്‍ത്തിവച്ച വാര്‍ത്ത പുറത്തു വന്നത്. മുപ്പത് വര്‍ഷത്തിനിടെ 20 കോടി വാക്ക്‍മാനാണ് ലോകമാകമാനം വിറ്റഴിച്ചത്. എന്നാല്‍ ആപ്പിള്‍ ഐ പോഡിന്റെയും സമാനമായ മറ്റ് സംഗീത ഉപകരണങ്ങളുടെയും വഴി വാക്ക്‍മാന്റെ മാഞ്ഞുപോകലിന് വഴി‌വച്ചു. ഇന്നിന്റെ പകുതി മൊബൈല്‍ ഫോണുകളും ലാപ്‌ടോപ്പും ഒരു പക്ഷെ സ്‌മാര്‍ട്ട് ഫോണിനും ടാബ്‌ലറ്റിനും വഴി മാറുമെന്ന് എതാണ്ട് ഉറപ്പായിക്കഴിഞ്ഞു. നോക്കണം മറ്റൊരു കാര്യം, സാധാരണ കാസറ്റിന് പകരക്കാരനായി സിഡി റോം ഉള്ള ഡിസ്‌ക്‍മാന്‍ സോണി ഇറക്കിയത് ഒരു പക്ഷെ തുടര്‍ച്ചയെന്നോണം ഉള്ള മാര്‍ക്കറ്റിനെ കൈപ്പിടിയിലാക്കാം എന്ന ചിന്തയാകും. പക്‍ഷെ വിപണി ആവശ്യപ്പെടുന്നത് കേവല തുടര്‍ച്ചയല്ല മറിച്ച് നൂതനമായ ആശയങ്ങളും അതിന്റെ സാക്ഷാത്‌കാരവുമാണന്ന് സോണി പോലും മനസിലാക്കിയില്ല എന്നത് ചരിത്രം. എന്നാല്‍ മക്കിന്‍‌ഡോഷ് കമ്പ്യൂട്ടര്‍ ,ഐ പോഡ് ,ഐ ഫോണ്‍ എന്നിവയില്‍ തുടങ്ങി ഐ പാഡ് വരെ ആപ്പിളിന് ഇതു വരെ തെറ്റിയിട്ടില്ല. ഒരു പക്ഷെ സോണിയെ വെട്ടി ആപ്പിള്‍ എത്തിയ പോലെ നാളെ ആപ്പിളിനെ മുറിച്ച് വിപണിയുടെ സിംഹഭാഗം എടുക്കാന്‍ മറ്റൊരു സ്റ്റാര്‍ട്ടപ്പ് കമ്പനി വരുമായിരിക്കില്ലെന്നും എങ്ങെനെ പറയാനാകും.

ഐ ഫോണ്‍ ,ബ്ലാക്ക്ബെറി എന്നീ മുന്തിയ ഉത്പന്നങ്ങളും ആന്‍‌ഡ്രോയ്ഡ് പ്രവര്‍ത്തകസംവിധാനം ഉള്ള 5000 രൂപ മുതല്‍ മുകളിലേക്ക് വിലയുള്ളവയും അടങ്ങുന്ന ശ്രേണിയാണ് സ്‌മാര്‍ട്ട് ഫോണ്‍ ഇത് ഇന്ന് ഇന്ത്യയിലടക്കം കുതിപ്പിന് തയ്യാറെടുക്കുന്നു. ഇതിന്റെ കൂടെ വായിക്കേണ്ട മറ്റൊരു വര്‍ത്തമാനം ടാബ്‌ലറ്റ് കമ്പ്യൂട്ടറുകളുടെതാണ്. എന്താണ് ഈ ടാബ്‌ലറ്റ് ? ആപ്പിള്‍ എന്ന ഇലക്ട്രോണിക് വ്യവസായ ഭീമന്റെ ഐ പാഡിന്റെ വരവാണ് മറ്റ് സ്ഥാപനങ്ങളെ ടാബ്‌ലറ്റ് കമ്പ്യൂട്ടറിന്റെ ലോകത്ത് ശ്രദ്ധയൂന്നാ‍ന്‍ അത്രമേല്‍ പ്രേരിപ്പിച്ചത്. കമ്പ്യൂട്ടിംഗിന്റെ ഒരു ഘട്ടത്തിന് വിരാമമിടും ടാ‍‌ബ്‌ലറ്റ് എന്ന് പറഞ്ഞാലും ഒരു തെറ്റുമില്ലാത്തവിധമാണ് ഇത് പ്രചുരപ്രചാരം നേടുന്നത്. അഥവാ പേഴ്സണല്‍ കമ്പ്യൂട്ടിംഗിന്റെ ദിശതന്നെ മാറ്റുന്ന നിലയിലാണ് ഇന്ന് ടാബ്‌ലറ്റ് കമ്പ്യൂട്ടറുകള്‍ വളര്‍ച്ച രേഖപ്പെടുത്തുന്നത്. ടാബ്‌ലറ്റുകള്‍ കമ്പ്യൂട്ടറിന്റെയോ മൊബൈല്‍ ഫോണിന്റെയോ ഇടയില്‍ ഒരു സ്ഥലം സൃഷ്ടിച്ചെടുക്കുകയല്ല ഇവയെക്കൂടി വിഴുങ്ങുകയാണന്ന് പറയേണ്ടിയിരിക്കുന്നു. പ്രീയ വായനക്കാരാ ! ടാബ്‌ലറ്റ് എന്തെന്ന് പറയാന്‍ മറന്നു പോയി അല്ലേ? നമ്മുടെ പഴയകാല സ്ലേറ്റിന്റെ അതേ രൂപമാണ് ഇവയ്‌ക്ക്. ശരാശരി എഴ് ഇഞ്ച് വലിപ്പം ഉള്ള ഉപകരണത്തില്‍ തൊട്ടെഴുതുന്ന രീതി -ടച്ച് സ്ക്രീന്‍ - ആണ് വിവരാലേഖനത്തിന് ഉപയോഗിക്കുന്നത്. ഉള്ളം കൈയ്യില്‍ ഒതുങ്ങുന്ന ഏറെ നേരം ബാറ്ററി ആയുസുള്ള ഇതില്‍ മാസവരി നൂറുരൂപയില്‍ താഴെ ചിലവു വരുന്ന രീതിയില്‍ തന്നെ ഇന്റര്‍നെറ്റ് ലഭ്യമാക്കാം.

പേരുകേട്ട വിദേശ മാധ്യമങ്ങള്‍ മിക്കതും വെബ്സൈറ്റിനെ അടിമുടി തന്നെ മാറ്റുകയും ടാബ്‌ലറ്റ് (ഐ പാഡ്/ആന്‍ഡ്രോയ്ഡ് ആപ്ലിക്കേഷനുകള്‍ ) പതിപ്പുകളുമിറക്കി തങ്ങളുടെ ഡാറ്റാബേസിനെ പരിവര്‍ത്തനം ചെയ്യുന്ന തിരക്കിലാണിപ്പോള്‍ അച്ചടിമാധ്യമങ്ങളുടെ ഭാവി ടാബ്‌ലറ്റ് വായനയിലൂടെയാകും എന്ന് പ്രവചിക്കുന്നവരാണ് ഫ്യൂച്ചറിസ്റ്റുകളില്‍ അധികവും. മാധ്യമങ്ങളെ, പുസ്തകത്തെ, കമ്പ്യൂട്ടിങിനെ ഒക്കെ ഒരേ സമയം ലക്ഷ്യംവെച്ചുള്ളതാണ് വിവിധ കമ്പനിയുടെ ടാബ്‌ലറ്റുകള്‍ . അച്ചടിമാധ്യമങ്ങള്‍ക്ക് ഡിജിറ്റല്‍ ലോകത്തേക്കുള്ള പുതിയ അവതാരം സാധ്യമാകുക ഇത് വഴിയാകുമെന്ന് പലരും കരുതുന്നു.

അടുത്ത സുഹൃത്തുക്കളിലൊരാള്‍ കഴിഞ്ഞ് ദിവസം പറഞ്ഞത് പത്രം വായിക്കുന്നത് ഇപ്പോള്‍ തന്റെ ആന്‍ഡ്രോയ്ഡ് ഫോണിലെന്നാണ്, എന്നാല്‍ വായിക്കാനെടുത്ത സമയമാണ് രസകരം കൊച്ചിയിലെ ട്രാഫിക് ബ്ലോക്കില്‍ പെട്ട് കിടക്കുന്ന സമയം! ശരാശരി ഇന്ത്യാക്കാരന്റെ ജീവിതസമയത്തില്‍ നല്ലൊരു പങ്ക് ഹോമിക്കപ്പെടുന്നത് ട്രാഫിക്ക് കുരുക്കുകളിലാകും എന്ന് വായിച്ചതോര്‍ക്കുന്നു. അതെ ഒരു പ്രയോജനം ഇല്ലെന്ന് കരുതിയ സമയത്ത് ഓഫീസ് ഇ-മെയിലും പത്രവും വായിച്ച് പ്രയോജനപ്രദമാക്കുന്നു അല്ലെങ്കില്‍ യൂട്യൂബ് വീഡിയോ പര്യടനം നടത്തി വിനോദിക്കുന്നു. അമേരിക്കയിലേയും ബ്രിട്ടനിലേയും പ്രൌഡപാരമ്പര്യമുള്ള പത്രമാസികകള്‍ കേവലം ഒരു തൊടല്‍ (ടച്ച് സ്ക്രീന്‍ ) മാത്രം അകലെ. ത്രീ ജി സേവനങ്ങളുടെ വരവോടെ കൂടുതല്‍ വ്യക്തതയോടെയുള്ള വീഡിയോ ചിത്രങ്ങളും ഉടനടി ലഭിക്കും. അതായത് പത്രങ്ങള്‍ മാത്രമല്ല ടെലിവിഷന്‍ ചാനലുകളും യൂട്യൂബ് അടക്കമുള്ള വീഡിയോപുരകളും ഇനി ഇത്തിരിപോന്ന മൊബൈലിലോ ടാബ്‌ലറ്റിലോ കൊണ്ട് നടക്കാം.

നേരത്തേ തുടങ്ങിവച്ച സോഷ്യല്‍ നെറ്റ്‌വര്‍ക്കിംഗിലേക്ക് വരാം. കൊണ്ട് നടക്കാവുന്ന ഇന്റര്‍നെറ്റ് ഉപകരണങ്ങളില്‍ ട്വിറ്ററും ഫേസ്‌ബുക്കും ഒക്കെ നോക്കുന്നത് വെബ്‌ബ്രൌസറില്‍ പരമ്പരാഗത രീതിയില്‍ വിലാസം ടൈപ്പ് ചെയ്ത് അല്ല, മറിച്ച് ഒരോന്നിനും വേണ്ട ആപ്ലിക്കേഷനുകള്‍ ഇന്‍സ്റ്റാള്‍ ചെയ്തിട്ടുണ്ട്. മിക്ക ടാബ്‌ലറ്റ്/മൊബൈല്‍ ഫോണുകള്‍ വാങ്ങുമ്പോള്‍ തന്നെ ഇത്തരം ആപ്ലിക്കേഷനുകള്‍ മുന്‍‌കൂര്‍ ഉള്‍പ്പെടുത്തിയിട്ടുണ്ടാകും. ഇമെയിലും ട്വിറ്റര്‍ ഓര്‍മ്മപ്പെടുത്തലുകളുമെല്ലാം എസ് എം എസ് വരുന്നതുപോലെ അറിഞ്ഞുകൊണ്ടേയിരിക്കാം. നിരത്തില്‍ കാണുന്ന ഒരു ദൃശ്യം അതേ മാത്രയില്‍ തന്നെ സോഷ്യല്‍ നെറ്റ്വര്‍ക്കിംഗ് വഴി തത്സമയം പങ്കുവയ്‌ക്കാം. ഇത് കൌതുകകരമായ ഒരു ചിത്രമോ അതുമല്ലങ്കില്‍ നിരത്തുവക്കില്‍ വാഹനപരിശോധന നടത്തുന്ന ഉദ്യോഗസ്ഥന്‍ കൈക്കൂലിവാങ്ങുന്നതാകാം. ഒക്കെ പോകട്ടെ അഴിമതിക്കും പോലിസ് പീഡനത്തിന് നേരേ പിടിച്ച കാമറക്കണ്ണുകള്‍ ദൃശ്യങ്ങള്‍ അതേ സമയം തന്നെ പൊതുശ്രദ്ധയിലേക്ക് എത്തിക്കുന്നത് സ്വകാര്യത ഇല്ലായ്‌മയിലേക്കല്ല മറിച്ച് ഔദ്യോഗിക ഗൂഡാലോചനയുടെ വല്ലായ്‌മയിലേക്കാണ് വിരല്‍ ചൂണ്ടുന്നത്. ഇതു തന്നെയല്ലേ 2010 ന്റെ അവസാനമാസങ്ങളില്‍ ജൂലിയന്‍ അസാന്‍‌ജെ വീക്കീലീക്ക്സ് വഴി തുറന്നുവച്ചതും. വരും കാലം ഇന്റര്‍നെറ്റ് ഇനിയും വളരും. നടന്നുനീങ്ങുന്ന ഒരോരുത്തരുടെ പക്കലുമുള്ള ഉപകരണങ്ങള്‍ക്ക് ശബ്‌ദ വിനിമയമല്ല കേവല ഉപയോഗം, അതിലുമേറേ ചെയ്യാനുള്ള കരുത്തും പ്രാപ്‌തിയുള്ളവയാണന്ന് നാം തിരിച്ചറിയാന്‍ തുടങ്ങിയിരിക്കുന്നു.

ടാബ്‌ലറ്റ് കമ്പ്യൂട്ടറുകളുടെ മറ്റൊരു ഉപയോഗം ഇതിന്റെ ഇ-ബുക്ക് റീഡര്‍ എന്ന പരകായ പ്രവേശം ആണ്. അച്ചടിയില്‍ ഇന്ന് ഇച്ചടിയിലേക്ക് കടക്കുന്ന കാലത്ത് പുസ്തകങ്ങള്‍ മിക്കതും ഇ-കോപ്പിയായി ഇറക്കാന്‍ പ്രസാധകര്‍ ഇന്ന് മടിക്കുന്നില്ല. ആമസോണ്‍ കിന്‍‌ഡില്‍ പോലെയുള്ള ഉപകരണങ്ങള്‍ വഴി പുസ്തകങ്ങള്‍ ഇലക്‍ട്രോണിക് രീതിയില്‍ വായിക്കുന്നത് ഇന്ന് അമേരിക്കയില്‍ പുതുമയേയല്ല, നമ്മുടെ നാട്ടിലും വിങ്ക് എന്ന പേരില്‍ സമാനമായ ഉപകരണം അവതരിപ്പിച്ചു കഴിഞ്ഞു. എന്നാല്‍ ചുരുക്കം ചില ഉപയോക്താക്കളെങ്കിലും ടാബ്‌ലറ്റ് കമ്പ്യൂട്ടര്‍ തന്നെ ഇ-ബുക്ക് റീഡര്‍ ആയി ഉപയോഗിക്കാന്‍ തുടങ്ങിക്കഴിഞ്ഞു. കിന്‍ഡിലിലും വിങ്കിലും ഒക്കെ ഇ-ഇങ്ക് എന്ന സങ്കേതമാണ് കണ്ണിന് ആയാസ രഹിതമായ വായന സാധ്യമാക്കുന്നത് എന്നാല്‍ ടാബ്‌ലറ്റിലെ കളര്‍ ഡിസ്‌പ്ലെയും തെളിച്ചവും ബഹുവര്‍ണ പേജ് വായനക്ക് സഹായിക്കും. അച്ചടി പത്ര മാസികകളെല്ലാം തന്നെ കിന്‍ഡില്‍ പതിപ്പിന് ഇന്ന് ഉത്സാഹിക്കുന്നത് ധനാഗമമാര്‍ഗം കൂടി മുന്നില്‍ കണ്ടുകൊണ്ടാണ്. ടാബ്‌ലറ്റില്‍ കിന്‍ഡില്‍ ആപ്ലിക്കേഷന്‍ ഇന്‍സ്റ്റാള്‍ ചെയ്താല്‍ ഉപകരണത്തെ എളുപ്പമാര്‍ഗത്തില്‍ കിന്‍‌ഡില്‍ പോലെയാക്കാം, ഒരു വ്യത്യാസവുമില്ലാതെ തന്നെ. ഇങ്ങനെയുള്ള പകര്‍ന്നാട്ട മെയ്‌വഴക്കമാണ് ടാബ്‌ലറ്റിനെ ഭാവിയുടെ ഉപകരണമാക്കുന്നത്. ആപ്പിളിന്റെ ഐ പാഡിനെ പിന്‍ പറ്റി ഒട്ടേറെ താരങ്ങള്‍ അരങ്ങിലെത്തിക്കഴിഞ്ഞു. സാംസങ്ങിന്റെ ഗാലക്‍സി ടാബ് കൂട്ടത്തില്‍ ശ്രദ്ധേയന്‍ ,വിലക്കുറവ് മാത്രമല്ല ആന്‍ഡ്രോയ്ഡ് മേന്മ കൊണ്ടും. ഇതിനൊക്കെ ചൂ‍ടുപകരാനെന്നവണ്ണം ഗൂഗിള്‍ മൂന്ന് ദശലക്ഷം പുസ്തകങ്ങള്‍ ആര്‍ക്കും ഉപയോഗിക്കാന്‍ സാധിക്കുന്ന രീതിയില്‍ നെറ്റില്‍ എത്തിച്ച് ഇ-ബുക്ക് സ്റ്റോര്‍ ആരംഭിച്ചു കഴിഞ്ഞു. വളരുന്ന ടാബ്‌ലറ്റ് ബുക്ക് വിപണിയില്‍ മത്സരം ഉഷാറാകുമെന്ന് എതായാലും ഗൂഗിള്‍ നീക്കത്തില്‍ നിന്ന് അനുമാനിക്കാം.

ഒരു യുവവ്യവസായി ഇങ്ങനെയൊക്ക പട്ടുപോകാം

2011-01-05T18:18:00.000-08:00

ഒരു കല്‍പിത കഥയായി എടുത്തോളൂ. ഒരേ എഞ്ചിനീയറിംഗ് കോളെജില്‍ ഒരു ബഞ്ചില്‍ ഇരുന്ന് പഠിച്ച രണ്ട് കൂട്ടുകാരെ അന്ന് പഠിപ്പിച്ചിരുന്ന പ്രൊഫസര്‍ പത്തു വര്‍ഷം കഴിഞ്ഞ് ഒരു സായാഹ്നസവാരിക്കിടെ കണ്ടുമുട്ടുന്നു. പതിവ് സുഖാന്വേഷണത്തിനിടെ ഇരുവരുടേയും ജോലിക്കാര്യം അന്വേഷിക്കുന്നു.

ആദ്യത്തെയാള്‍ പറഞ്ഞു ‘സര്‍ ഞാന്‍ സ്റ്റേറ്റ് ബാങ്കിലാണ് ഇപ്പോള്‍ കോഴിക്കോട് മെയിന്‍ ശാഖയില്‍ സീനിയര്‍ മാനേജര്‍ ’ സര്‍ സന്തോഷാഭിമാനത്തോടെ പറഞ്ഞു ‘ഗുഡ് ’ .

താനെന്തു ചെയ്യുന്നു ചോദ്യമുന അടുത്തയാളിലേക്ക് നീങ്ങി

“ഞാന്‍ ഇവിടെ കൊല്ലത്തെ സിഡ്കോ പാര്‍ക്കില്‍ ഒരു വ്യവസായ യൂണിറ്റ് നടത്തുന്നു. മറ്റോരു യൂ‍ണിറ്റിന് വായ്പ തരപ്പെടുത്തുന്നത് ഞങ്ങള്‍ സംസാരിച്ചു നില്‍ക്കുകയായിരുന്നു”

സര്‍ ഉടനെ “അപ്പോ ജോലി ഒന്നും കിട്ടിയില്ല ‍അല്ലേ? ”

......

നോക്കണേ ഇതേ പ്രോഫസര്‍ അവസാന സെമസ്റ്ററുകളില്‍ ആവേശത്തോടെ പഠിപ്പിച്ച മെഷീന്‍ ഡിസൈന്‍ പേപ്പറിന്റെ അതേ മേഖലയില്‍ സ്വന്തം കാലില്‍ നിന്ന് വ്യവസായം നടത്തുകയും രണ്ടുഡസന്‍ പേര്‍ക്ക് തൊഴിലവസരം ലഭ്യമാക്കുകയും മാത്രമല്ല പത്തുവര്‍ഷത്തിനകം തന്നെ രണ്ടാമത്തെ യൂണിറ്റിനെ പറ്റി ആലോചിച്ച് തുടങ്ങിയ ഒരു യുവ‌എഞ്ചിനീയര്‍ സാറിന്റെ കണ്ണില്‍ ജീവിത വിജയം നേടാത്ത രണ്ടാം തരം പൌരന്‍ . എന്നാല്‍ പഠിച്ചതുമായി ഒരു ബന്ധവും ഇല്ലാത്തതും എതൊരു ബിരുദധാരിക്കും സാമാന്യമായി ചെയ്യാവുന്ന ഒരു ജോലി ചെയ്യുന്ന ആള്‍ മിടുക്കനുമാകുന്ന സാമൂഹികാന്തരീക്ഷം.

എഞ്ചിനീയറിംഗ് കോളെജിലോ മാനേജ്മെന്റ് ഇന്‍സ്റ്റിട്യൂട്ടിലോ ചേര്‍ന്നാല്‍ തുടങ്ങും നാട്ടുകാരുടേയും വീട്ടുകാരുടേയും ചോദ്യം “കാമ്പസ് ഇന്റര്‍വ്യൂ ആയോ ഇന്‍ഫൊസിസ് വന്നോ വിപ്രോ എന്ന് വരും മട്ടില്‍ ” അതേ സമയം ഒരു നാരായണമൂര്‍ത്തിയോ അസിം പ്രേംജിയോ കാമ്പസില്‍ നിന്ന് ഉയര്‍ന്ന് വരാന്‍ ഇവര്‍ സമ്മതിക്കുകയുമില്ല. ഇത് മാറേണ്ടേ. വിദേശ രാജ്യങ്ങളിലും എന്തിന് ഇന്ത്യയില്‍ തന്നെ . നമ്മുടെ ഇന്‍ഫോസിസ് സ്ഥാപകര്‍ തന്നെ ഉദാഹരണം. വയസിന്റെ ഇരുപതുകളില്‍ ഉത്സാഹികളും മിടുക്കരുമായ സംരംഭകര്‍ തുടങ്ങുന്ന സ്ഥാപനം ലോകത്ത് അതാത് മേഖലകളില്‍ അജയ്യമായി മുന്നേറുന്ന ഉദാഹരണം ഇക്കഴിഞ്ഞ മൂന്ന് പതിറ്റാണ്ടിനിടെ അനവധി.

23 വയസില്‍ സ്റ്റാന്‍ഫഡില്‍ വിദ്യാര്‍ത്ഥികളായിരിക്കെ സെര്‍ജി ബ്രിന്‍ ,ലാറി പേജ് എന്നിവര്‍ ചേര്‍ന്ന് തുടങ്ങിയ ഗൂഗിള്‍ എന്ന കമ്പനിയുടെ പേര് കേള്‍ക്കാത്തവര്‍ എത്രപേരുണ്ടാകും. ഇന്ന് ഗൂഗിളിന്റെ ആസ്തി എതാണ്ട് നമ്മുടെ റിലയന്‍സ് സാമ്രാജ്യത്തിനൊപ്പം വരും. നേക്കണേ, നാല്പതാണ്ടുകള്‍ക്ക് മുന്നെ തുടങ്ങിയ റിലയന്‍സ് ഇന്ന് രണ്ടാം തലമുറയിലെ നേതൃത്വമാണ് നയിക്കുന്നത്. ഗൂഗിള്‍ ആകട്ടെ 14 വയസിന്റെ ചെറുപ്പത്തിലും.

ഇതിലും രസകരമാണ് പോയ വാരം ടൈം മാഗസിന്‍ ‘ഈ വര്‍ഷത്തെ (2010) ശ്രദ്ധേയ വ്യക്തിത്വം’ ആയി തിരഞ്ഞെറ്റുത്ത മാര്‍ക്ക് സുക്കര്‍ബര്‍ഗിന്റെ സംരംഭകത്വ വഴി. 1984 ല്‍ ജനിച്ച ഈ പയ്യന്‍സ് ഹര്‍വാഡില്‍ വിദ്യാര്‍ത്ഥിയായിരിക്കെ 2004 ല്‍ ഫേസ്‌ബുക്ക് എന്ന സോഷ്യല്‍ നെറ്റ്‌വര്‍ക്കിംഗ് സൈറ്റ് കൂട്ടുകാരുമായി ചേര്‍ന്ന് ആരംഭിച്ചു. ഇന്ന് 50 കോടി ഉപയോക്താക്കള്‍ ഈ സംരംഭത്തിന് കീഴില്‍ ഉണ്ട്. മറ്റൊരു തരത്തില്‍ പറഞ്ഞാല്‍ ലോകത്തിലെ എറ്റവും വലിയ മൂന്നാമത്തെ രാജ്യമെന്ന് പോലും ഫേസ്ബുക്ക് ജനസംഖ്യയെ വിളിക്കാം! ആകെ ഒരു ജോലിയേ മാര്‍ക്ക് ഇന്നേ വരെ ചെയ്തിട്ടുള്ളൂ, മറ്റുള്ളവര്‍ക്ക് തൊഴില്‍ കൊടുക്കുന്നു. ലോകത്തിലെ എറ്റവും പ്രായം കുറഞ്ഞ ശതകോടീശ്വരന്‍ ആണ് ഇന്ന് മാര്‍ക്ക് സുക്കര്‍ ബര്‍ഗ് എന്ന ഇരുപത്തിയാറുകാരന്‍ . നാല് വര്‍ഷം മുന്നെ യാഹൂ എന്ന സര്‍ച്ച് എഞ്ചിന്‍ സ്ഥാപനം ഫേസ്ബുക്കിന് പറഞ്ഞ വില 4500 കോടി രൂപയാണ്. ഈ വാഗ്ദാനം നിഷ്‌ക്കരുണം തള്ളിക്കളഞ്ഞങ്കിലും 2007 ല്‍ കേവലം ഒന്നര ശതമാനം ഓഹരി മൈക്രോസോഫ്ട് വാങ്ങിയത് ആയിരം കോടി രൂപയ്‌ക്കാണ്.

എന്തുകൊണ്ട് നമ്മുടെ നാട്ടില്‍ നിന്ന് ഇത്തരത്തില്‍ വലുത് അല്ലെങ്കിലും സാമാന്യം തരക്കേടില്ലാത്ത സംരംഭകകഥ കാമ്പസുകളില്‍ നിന്ന് കേള്‍ക്കുന്നില്ല. സമൂഹത്തിനും ഇക്കാര്യത്തില്‍ ചെറുതല്ലാത്ത റോളുണ്ട്. യുവവ്യവസായികളോട് മുഖം തിരിഞ്ഞു നില്‍ക്കുന്ന മനോഭാവം തന്നെ വില്ലന്‍ .

ഇതു മാത്രമല്ല വിവാഹാലോചന സമയത്താണ് ഇതിലും രസം. സര്‍ക്കാര്‍ ഓഫീസിലെ ശിപായിക്ക് പോലും നല്ല പരിഗണന കിട്ടും. എന്നാല്‍ സംരംഭകനാണന്ന് പറഞ്ഞാല്‍ . ഇവന് എന്തോ കുഴപ്പമുണ്ടന്ന് മട്ടിലാകും പെണ്‍കുട്ടിയുടെ മാതാപിതാക്കള്‍ . അതൊക്കെ പോകട്ടെ നമ്മുടെ മോഹന്‍ലാലും മമ്മൂട്ടിയും വരെ ശരാശരി മലയാളിയുടെ സാമ്പത്തിക സുരക്ഷാക്കണ്ണിലൂടെ നോക്കിയാല്‍ സ്ഥിര വരുമാനം ഇല്ലാത്തവര്‍ എന്നാല്‍ സര്‍ക്കാര്‍ ഓഫീസിലെ വരുമാനം കൊണ്ട് അരിഷ്ടിച്ച് ജീവിതം തള്ളിനീക്കുന്ന ശരാശരിക്കാരന്‍ സാമ്പത്തിക സുരക്ഷിതത്വം ഉള്ള ജോലി ചെയ്യുന്നവന്‍ .

ഇനി നേരത്തേ പറഞ്ഞ ചോദ്യം ഒന്ന് തിരിച്ച് വയ്‌ക്കുന്നു. പെണ്‍കുട്ടി സംരംഭകയാകാന്‍ തീരുമാനിക്കുന്നു എന്ന് കരുതുക. പിന്നത്തെ പുകില്‍ പറയുകയും വേണ്ട. അവള്‍ അഹങ്കാരിയാണ്, തോന്നിയതുപോലെ പ്രവര്‍ത്തിക്കുകയാണ്. പതിയെ വ്യവസായം ഒക്കെ മെച്ചമാക്കിയാല്‍ പിന്നെ സുധാ മൂര്‍ത്തി (ഇന്‍ഫോസിസ്), ബീനാ കണ്ണന്‍ (ശീമാട്ടി) യുടെ പിന്‍‌തലമുറക്കാരി എന്ന് പറഞ്ഞ് ഉയര്‍ത്തും. അവള്‍ക്ക് നിര്‍ണായക പിന്തുണ വേണ്ടുന്ന സമയത്ത് മുഖം തിരിച്ചവരാണ് പിന്നീട് മുഖസ്തുതി പാടാനെത്തുന്നത്.

അല്‍‌പം തമാശയോടെ കാണാവുന്ന മറ്റൊരു കാര്യം .ഇത് നടന്ന കഥയണെന്ന് തോന്നുന്നു . പറഞ്ഞ് കേട്ടതാണ്. ഒരിക്കല്‍ ഒരു കമ്പനി നടത്തുന്ന ചെറുപ്പക്കാരന്റെ വിവാഹാലോചന ലഭിച്ച പെണ്‍കുട്ടിയുടെ അച്ഛന്‍ എല്ലാ അനുബന്ധവിവരങ്ങളും കൃത്യമായി തിരക്കി. ആകെ ഒരു കുഴപ്പം. അവന്‍ ഒരു കമ്പനി നടത്തുന്നു. തൊഴില്‍ സുരക്ഷിതത്വവും ഇല്ലന്ന് ഉടനെ വിധിച്ചു. താമസിച്ചില്ല അതുകൊണ്ട് തന്നെ ആലോചന ഉപേക്ഷിച്ചു. ആറുമാസം കഴിഞ്ഞു. തന്റെ കാബിനിലേക്ക് അടുത്തിടെ കമ്പനിയില്‍ ചേര്‍ന്ന ഒരു ചെറുപ്പക്കാരന്‍ സന്തോഷത്തോടെ കയറി വന്ന് വിവാഹ ക്ഷണക്കത്ത് നല്‍കി. ആശംസകള്‍ ഒക്കെ പറഞ്ഞ് ആ കത്ത് വായിച്ചു നോക്കിയ യുവവ്യവസായി അത്ഭൂതപ്പെടാതിരുന്നില്ല, അന്ന് തനിക്ക് വിവാഹാലോചന വന്ന അതേ പെണ്‍കുട്ടിയാണ് വധു. കാര്യം ഇത്രമാത്രം. ഇപ്പോഴത്തെ പയ്യന്‍ സുരക്ഷിതത്വം ഉള്ള തൊഴിലാണ് ചെയ്യുന്നത്, അവനെ പോലെ പത്തോളം ആള്‍ക്കാര്‍ക്ക് തൊഴില്‍ കൊടുക്കുകയും സാമാന്യം നല്ല നിലയില്‍ സമ്പാദിക്കുകയും ചെയ്യുന്ന സംരംഭകന്‍ ഒട്ടും തൊഴില്‍ സുരക്ഷിതനല്ലത്രേ!!!! ഇത് മാറാതെ മലയാളിയുടെ വ്യവസായ സംരംഭങ്ങള്‍ മുന്നോട്ട് വരില്ല

സംരംഭകത്വബോധം ഇല്ലാത്തതിന് മറ്റ് ചില കാരണങ്ങളും ഉണ്ട്.
എഞ്ചിനീയറിംഗ് ബിരുദത്തിനായി എകദേശം അന്‍പത്തിയഞ്ചിലേറേ പേപ്പറുകള്‍ പഠിച്ച് പരീക്ഷ എഴുതി പാസാവുന്ന ഒരാള്‍ക്ക് ‘എന്‍‌ട്രപ്രണര്‍ഷിപ്പ്’ ന്റെ ഒരു പേപ്പറെങ്കിലും നിര്‍ബന്ധിത വിഷയമായി പഠിക്കാനുണ്ടോ? മറ്റൊരു ജോലിയും കിട്ടാതെ അവസാന അത്താണിയായി കരുതേണ്ടതല്ല സംരംഭ്കത്വം . മികച്ചവര്‍ തന്നെ (അക്കാദമിക് മികവോ പ്രോഫഷണല്‍ തികവോ, നൂതന ചിന്തയോ ) സംരംഭകരാകാന്‍ എത്തണം. നാരായണമൂര്‍ത്തി, നന്ദന്‍ നിലേകാനി, കിരണ്‍ മസുംദാര്‍ഷാ (ബയോകോണ്‍ ) എന്നിവരില്‍ തുടങ്ങി സ്റ്റീവ് ജോബ്സ് (ആപ്പിള്‍ ), ബില്‍ ഗേറ്റ്സ്, സെര്‍ജി ബ്രിന്‍ -ലാറി പേജ്, മാര്‍ക്ക് സുക്കര്‍ബര്‍ഗ് എന്നിവരെല്ലാം മിടുക്കര്‍ തന്നെയാണ് സംരംഭകര്‍ എന്ന പട്ടം അഴിച്ചുവച്ചാലും.

എതായാലും പത്തുവര്‍ഷത്തിന് മുന്നത്തെ അവസ്ഥയില്‍ നിന്ന് കേരളത്തിലെ കാമ്പസുകള്‍ ഇന്ന് മാറ്റത്തിന്റെ വക്കിലാണന്നതിന് സമീപകാലത്തായി ടെക്‍നോപാര്‍ക്കിലെ ഇന്‍‌കുബേഷന്‍ കേന്ദ്രത്തില്‍ വിരിഞ്ഞു തുടങ്ങിയ നവസംരംഭങ്ങള്‍ തന്നെ സാക്ഷി. ഇത് വര്‍ധിതവീര്യത്തോടെ മുന്നോട്ട് കൊണ്ട് പോകാന്‍ നമ്മുടെ യുവാക്കള്‍ക്കാകണം. ഭാവി ഗൂഗിളും ഫേസ്ബുക്കും ഇന്‍ഫോസിസും ബയോകോണും ഒക്കെ ആകട്ടെ ഇന്ന് ക്ലാസ് മുറികളിലിരുന്ന് പഠിക്കുന്നത്. അത് കണ്ട് സമൂഹവും ബിരുദധാരികളോട് ചോദിക്കട്ടെ എന്താ തനിക്ക് കമ്പനി തുടങ്ങാനായില്ലേ!
പണത്തിന്റെ കാര്യം ആലോചിച്ച് ഇന്ന് യുവാക്കള്‍ വിഷമിക്കേണ്ട ആവശ്യമില്ല, വാണിജ്യ സാധ്യതയുള്ള ആശയം കമ്പനിയാക്കി വിജയം കൊയ്യാന്‍ ഒരു കോടി രൂപ വരെ ജാമ്യരഹിതമായി മൂലധനം ലഭിക്കുന്നതിന് ഇന്ന് എല്ലാ ബാങ്കുകള്‍ക്കും പദ്ധതിയുണ്ട്. കേന്ദ്രസര്‍ക്കാരിന്റെ ഈ പദ്ധതിയെക്കുറിച്ചറിയാന്‍ http://www.cgtmse.in/ സന്ദര്‍ശിക്കുക .അര്‍ഹിക്കുന്നവര്‍ക്ക് ഇത്തരം ജാമ്യരഹിത വായ്പ ലഭ്യമാക്കി സര്‍ക്കാര്‍ ലക്ഷ്യമിടുന്നത് താഴേ തട്ടില്‍ അതുണ്ടാക്കുന്ന വന്‍‌തൊഴിലവസരങ്ങള്‍ കൂടിയാണ്. ബാങ്കില്‍ പോകാന്‍ താത്പര്യമില്ലാത്തവര്‍ക്കായി മാലാഖ നിക്ഷേപകര്‍ ഉണ്ട്. നിങ്ങളുടെ ആശയത്തെ തേടി പണവുമായി വന്നുകൊള്ളും.

വാല്‍കഷണം : എന്‍ എസ് എസ് /എന്‍ സി സി/കോളെജ് യൂണിയന്‍ /സര്‍വകലാശാലാ യുവജനോത്‌സവം / അത്‌ലറ്റിക് മീറ്റ് എന്ന് വേണ്ട ക്രിക്കറ്റ് കളി കാണാന്‍ പോയാലോ അല്ലെങ്കില്‍ കാമ്പസ് റിയാലിറ്റി ഷോയില്‍ പങ്കെടുക്കാന്‍ പോയാല്‍ പോലും ഡ്യൂട്ടി ലീവോ അഥവാ ഇന്റേണല്‍ മാര്‍ക്കില്‍ ആനുപാതികമായ സഹായമോ കിട്ടും. എന്നാല്‍ ഒരു കാമ്പസ് കമ്പനി തുടങ്ങാന്‍ പോകുന്ന വഴിക്ക് ചില ദിവസങ്ങള്‍ കട്ട് ചെയ്യേണ്ടി വന്നാല്‍ ഈ വകുപ്പില്‍ ഒന്നും അര ദിവസത്തെ അവധികിട്ടില്ല. ഇത് മാറ്റാന്‍ എന്തു ചെയ്യാനാകും. ആലോചിക്കൂ സംരംഭകരേ!

പണികൊടുക്കാന്‍ പഠിക്കാം!

2011-01-04T08:22:00.000-08:00

സംരംഭകരാകാന്‍ പഠിക്കേണ്ടതുണ്ടോ എന്ന ചോദ്യം പ്രസക്‍തമാണെങ്കിലും ഒരു വ്യവസായം തുടങ്ങുന്നതിന് അറിഞ്ഞിരിക്കേണ്ട ചില അടിസ്ഥാനപാഠങ്ങള്‍ സിലബസിലില്ലാതെ പോകുന്നതിന്റെ കുറവ് ഇന്ന് കാണാനുണ്ട്. ലോക പ്രസിദ്ധരായ കുറെയേറെ സംരംഭകര്‍ ഒരു പക്ഷെ കോളെജ് പഠനം പാതിവഴിയില്‍ ഉപേക്ഷിച്ചവരാണ് അല്ലെങ്കില്‍ കലാലയത്തിന്റെ പടി പോലും കാണാത്തവരാണ്. എന്നാല്‍ ഒരു കാര്യം മറന്ന് പോകരുത് അന്നത്തെ കാലമല്ല, ഇന്ന് എതൊരാള്‍ക്കും അത്രയ്‌ക്ക് പണച്ചിലവില്ലാതെ ബിരുദം നേടാന്‍ ഇപ്പോള്‍ ഒരു പ്രയാസവുമില്ല. അപ്പോള്‍ സംരംഭകത്വം പ്രത്യേക വിഷയമായി എടുത്ത് ബിരുദാനന്തരബിരുദം നേടുന്നത് ജോലി കിട്ടാന്‍ അല്ല ജോലി കൊടുക്കാനാണ് എറെ ഉപകരിക്കുന്നത്. നമ്മുടെ നാട്ടില്‍ സ്വകാര്യ സംരംഭങ്ങള്‍ക്ക് തിളക്കം കിട്ടാതിരുന്നതിന് സാമൂഹികവും അല്ലാത്തതുമായ ഒരുപാട് കാരണങ്ങളുണ്ടാകാം. എന്നാല്‍ ഐ ടി/ബയോ ടെക് കമ്പനികളുടെ വരവോടെ ഈ അവസ്ഥ നേരേ തിരിച്ചായിക്കൊണ്ടിരിക്കുന്നു. നാരായണമൂര്‍ത്തിയും അസിം‌പ്രേംജിയും ഇന്ന് ആദരവ് നേടുന്നത് അവരുടെ സംരംഭകത്വഗുണത്തിന്റെ മാത്രം പേരിലാണ്. സൃഷ്ടിക്കപ്പെട്ട തൊഴിലുകളുടെ എണ്ണമോ പടുത്തുയര്‍ത്തിയ പ്രൌഡമായ കെട്ടിട സമുച്ചയങ്ങളെക്കാളും അവര്‍ രാജ്യത്ത് സൃഷ്ടിച്ച സമ്പത്തും അഭിവൃദ്ധിയും ഇന്ന് ആരെയും അഭിമാനിതരാക്കുന്നു. അതുകൊണ്ടാകണം ഇപ്പോള്‍ സംരംഭം തുടങ്ങാനായിവരുന്നവര്‍ക്ക് അല്‍‌പം വീരപരിവേഷവും കിട്ടുന്നുണ്ട് എന്നത് മറക്കേണ്ട. തിരുവനന്തപുരത്തെ ടെക്‍നോപ്പാര്‍ക്കിലെ ഇന്‍‌കുബേഷന്‍ സെന്ററില്‍ കമ്പനികള്‍ തുടങ്ങിയിട്ടുള്ള ചെറുപ്പക്കാര്‍ കാമ്പസ് ഇന്റര്‍വ്യൂ വഴിയല്ല അവിടെയെത്തിയത് മറിച്ച് അടുത്ത എതാനും വര്‍ഷങ്ങള്‍ക്കുള്ളില്‍ തന്നെ ചിലര്‍ക്ക് അഭിമുഖപരീക്ഷയിലൂടെ ആളിനെയെടുക്കാന്‍ നേരത്തേ പഠിച്ചിരുന്ന കലാലയത്തിലേക്ക് അഭിമാനപൂര്‍വം കടന്നു ചെല്ലാം .

എന്താണ് സംരംഭകത്വം ?

കൃത്യമായ നിര്‍വചനത്തില്‍ ഒതുക്കാനാകില്ലെങ്കിലും ‘പുതുമയുള്ള ആശയങ്ങളില്‍ പണം ഇറക്കി വാണിജ്യമായി വിജയിക്കാന്‍ പറ്റുന്നതരത്തില്‍ അതിനെ മാറ്റിയെടുത്ത് കൂടുതല്‍ മൂല്യമുണ്ടാക്കുന്നു’ എന്ന് പറയാം. വികസിച്ചു വരുന്ന സമ്പദ്‌വ്യവസ്ഥയില്‍ സംരംഭകര്‍ക്ക് സീമാതീതമായ സാധ്യതകളാണുള്ളത്. ഏറെ തൊഴിലുകള്‍ സൃഷ്ടിക്കുന്നതിനാല്‍ ഇന്ന് സര്‍ക്കാരും ഒട്ടനവധി അനുകൂലമായ നയപരിപാടികളുമായി ഇവരെ സഹായിക്കാനുണ്ട്. ഒരു പത്തു വര്‍ഷം മുന്നെ സംരംഭകനാകുക എന്നാല്‍ അത്രമേല്‍ ‘റിസ്‌ക്’ ഉള്ള എടുത്തുചാട്ടമായിരുന്നെങ്കില്‍ ഇന്ന് ഒരാളിന് കീഴില്‍ പണിയെടുക്കുന്ന ജോലി സുരക്ഷിതത്വത്തിനെക്കാളും എളുപ്പമായി ഒട്ടേറെ ചെറുപ്പക്കാര്‍ സ്വന്തം കാലില്‍ ഒരു സ്ഥാപനം തുടങ്ങുന്നതിനെ കാണുന്നു. ഫേസ്‌ബുക്ക്, ഗൂഗിള്‍ ,യാഹൂ എന്നീ ആഗോള സ്ഥാപനങ്ങളെല്ലാം തന്നെ ഈയടുത്ത കാലത്തെ കാമ്പസില്‍ നിന്നും പിറവിയെടുത്തതാണന്നത് പ്രത്യേകം ശ്രദ്ധിക്കുക. ഇവയുണ്ടാക്കിയ സമ്പത്ത് ഒരു പക്ഷെ ഇന്ത്യയിലെ എറ്റവും പ്രശസ്തമായ കമ്പനികള്‍ ഇക്കഴിഞ്ഞ മൂന്നോ നാലോ പതിറ്റാണ്ടുകള്‍ കൊണ്ട് സൃഷ്ടിച്ചെടുത്ത ആസ്തിയെക്കാളും അധികം വരും.

എവിടെ പഠിക്കാം :

ചെറുപ്പക്കാരായ സംരംഭകര്‍ക്ക് സ്ഥാപനങ്ങള്‍ കെട്ടിപ്പടുക്കുന്നതിന്റെ അടിസ്ഥാന വിഷയങ്ങളിലൂന്നിയ പഠന പദ്ധതികള്‍ ചിട്ടപ്പെടുത്താന്‍ രാജ്യത്തെയും വിദേശത്തെയും അക്കാദമിക് പെരുമ ഉള്ള സ്ഥാപനങ്ങള്‍ ഇന്ന് ശ്രദ്ധാലുക്കളാണ്. ഒപ്പം കുടും‌ബ ബിസിനസില്‍ വിജയം വരിച്ചവരും തങ്ങളുടെ മക്കളെ ‘എന്‍‌ട്രപ്രണര്‍ഷിപ്പ്’ പഠിപ്പിക്കാന്‍ അയക്കുന്നുണ്ട്. ഇങ്ങനെ പഠനാനന്തരം തിരിച്ചെത്തി പരമ്പരാഗതമായി നടത്തി വന്ന ബിസിനസിന്റെ ജാതകക്കുറി തന്നെ തിരുത്തിയെഴുതിയ കഥകള്‍ ധാരാളം. National Institute for Entrepreneurship and Small Business Development, Entrepreneurship Development Institute of India എന്നിവ വിവിധ പഠനപദ്ധതികള്‍ നടത്തുന്നുണ്ട്. ഹൃസ്വകാല രീതിയിലാണ് ഇവയില്‍ അധികവും. ഒരു സംരംഭകന്റെ പൊതുവെയുള്ള സംശയങ്ങള്‍ ദൂരികരിക്കുക, ധനസ്രോതസ് സംഘടിപ്പിക്കുന്നതെങ്ങനെ,സാങ്കേതിക സഹായം ലഭ്യമാക്കുന്നത് ഒക്കെയാണ് ഇത്തരം ചെറു കോഴ്സുകളുടെ ഘടന. എന്നാല്‍ എതാനും ദിവസത്തേക്ക് അല്ലെങ്കില്‍ ആഴ്ചകളില്‍ മാത്രം നീളുന്ന പഠനത്തിന് എറെ പരിമിതികളുണ്ട്. ഡോ. ആര്‍‌ വി ജി മേനോന്റെ അഭിപ്രായത്തില്‍ “വ്യവസായ സംരംഭകത്വത്തിന്റെ പരിശീലനം എന്നു കേള്‍ക്കുമ്പോഴൊക്കെ കൌതുകം തോന്നുന്ന ഒരു കാര്യം അതില്‍ ക്ലാസ് എടുക്കുന്നവര്‍ മിക്കവരും ശമ്പളം ഉള്ള സുരക്ഷിതമായ ഉദ്യോഗം ഉള്ളവര്‍ ആണെന്നതാണ്. വ്യവസായം തുടങ്ങാന്‍ അവശ്യം വേണ്ടത് രണ്ട് കാര്യങ്ങളാണല്ലോ: ഒന്ന് ബന്ധപ്പെട്ട മേഖലയെ പറ്റിയുള്ള ആഴത്തിലുള്ള അറിവ്. രണ്ട്, റിസ്‌ക് എടുക്കാനുള്ള സ്പിരിറ്റ്. രണ്ടും പരിശീലനത്തിലൂടെ കിട്ടാവുന്നതല്ല. വാസ്തവത്തില്‍ അവരെ സഹായിക്കാന്‍ ചെയ്യാവുന്നത്, ബന്ധപ്പെട്ട മേഖലയിലെ സംരംഭകരുമായി ഇടപഴകുന്നതിനുള്ള അവസരം ഉണ്ടാക്കി കൊടുക്കുകയാണ്. പിന്നെ വേണ്ടത്, ബാങ്ക്, സര്‍ക്കാര്‍ മുതലായ സ്രോതസ്സുകളില്‍ നിന്ന്‌ കിട്ടാവുന്ന സഹായങ്ങളെ പറ്റിയുള്ള വിവരങ്ങള്‍ ലഭ്യമാക്കുകയാണ്. ബാക്കിയൊക്ക നീന്തല്‍ പഠിക്കും പോലെ സ്വയം ചെയ്യേണ്ട കാര്യങ്ങള്‍ ആണ്‌ ”

ഈ വിടവ് നികത്താനാണ് ഐ.ഐ.ടി ,ഐ.ഐ.എം പോലുള്ള അതിപ്രശസ്ത കാമ്പസുകള്‍ സംരംഭകത്വത്തില്‍ ഊന്നല്‍ കൊടുത്തുകൊണ്ടുള്ള പഠന പദ്ധതികള്‍ മികച്ച രീതിയില്‍ തുടങ്ങിയിട്ടുള്ളതും. ഇക്കൂട്ടത്തില്‍ എടുത്ത് പറയേണ്ടത് ബാംഗ്ലൂര്‍ ഐ.ഐ.എം ലെ NS Raghavan center for Entrepreneurial learning ആണ് . ഇന്‍ഫോസിസ് സ്ഥപകരിലൊരാളാണ് എന്‍ എസ് രാഘവന്‍ . ഈ കേന്ദ്രത്തില്‍ 52 ആഴ്ച നീളുന്ന Management Programme for Entrepreneurs and Family Businesses (MPEFB) പ്രോഗ്രാം ഉണ്ട്.

എന്‍‌ട്രപ്രണര്‍ഷിപ്പ് ഡവലപ്‌മെന്റ് ഇന്‍സ്റ്റിട്യൂട്ട് ഓഫ് ഇന്ത്യ നടത്തുന്ന Post Graduate Diploma in Management-Business Entrepreneurship(PGDM – BE) , NIRMA യൂണിവേഴ്സിറ്റി യുടെ (http://www.imnu.ac.in) ഇന്‍സ്റ്റിട്യൂട്ട് ഓഫ് മാനേജ്മെന്റ് നടത്തുന്ന MBA- Family Business & Entrepreneurship എന്നിവ മറ്റ് രണ്ട് ശ്രദ്ധേയ പഠനപദ്ധതികള്‍ .

എങ്ങനെ തുടങ്ങാം സ്ഥാപനം :

സ്വന്തമായി കമ്പനി ആരംഭിക്കുന്നതിനുള്ള തീപ്പൊരിയാണല്ലോ ഇങ്ങനെയൊരു പഠനം തിരഞ്ഞെടുത്തതിന് പിന്നില്‍ തന്നെ .അടുത്തതായി വേണ്ടത് തീപ്പൊരി ആളിക്കത്തിക്കാനുള്ള മുതല്‍ മുടക്കാണ്. ഇത് എവിടെ നിന്ന് ലഭിക്കുമെന്നത് നിലവില്‍ ഒരു പ്രശ്‌നമേയല്ല വെഞ്ചര്‍ ക്യാപ്പിറ്റല്‍ സ്ഥാപനങ്ങള്‍ /മാലാഖ നിക്ഷേപകര്‍ മികച്ച ആശയങ്ങളെ തേടി വന്നുകൊള്ളും. ഇനി പരമ്പരാഗതമായ രീതിയില്‍ ബാങ്കിനെ സാമ്പത്തിക സഹായം ലഭ്യമാക്കാന്‍ സമീ‍പിക്കുന്നതാണ് മനസിന് പിടിക്കുന്നതെങ്കില്‍ ഇന്ന് അതും എളുപ്പമാണ്. ഒരു കോടി രൂപ വരെ ജാമ്യമില്ലാ വായ്പ ലഭ്യമാക്കാന്‍ കേന്ദ്രസര്‍ക്കാര്‍ സ്‌കീം തന്നെ എല്ലാ പ്രമുഖ ബാങ്കുകളും നല്‍കി വരുന്നു. കൂടുതല്‍ വിവരങ്ങള്‍ക്ക് http://www.cgtmse.com

ജോലിയും കിട്ടും !

ഇനി സ്വന്തം സംരംഭം തുടങ്ങാനായില്ലെങ്കിലും ആശയങ്ങളുടെ ഫാക്‍ടറി മനസിലുണ്ടെങ്കില്‍ നിങ്ങള്‍ക്ക് സ്വകാര്യ സ്ഥാപനങ്ങളില്‍ കൈ നിറയെ അവസരങ്ങളുണ്ടാകും. ഈയടുത്ത കാലത്തായി Intrapreneurship (entrepreneurship within a large organization) എന്ന രീതിയില്‍ സ്ഥാപനത്തിനകത്ത് തന്നെ സ്ഥിരമായ ശമ്പളം നല്‍കി സംരംഭകത്വം പ്രോല്‍‌സാഹിപ്പിക്കുന്ന സംവിധാനവും ഉണ്ട്. എന്തിന് പൊതു മേഖലാ -സര്‍ക്കാര്‍ സ്ഥാപനത്തില്‍ സുരക്ഷിത ജോലിയില്‍ പ്രവേശിച്ചാലും ഉള്ളിലെ സംരംഭകനെ ഊതിക്കാച്ചിയെടുക്കാം. അമുല്‍ കുര്യന്‍ , മെട്രോ റെയില്‍വെ ഇ.ശ്രീധരന്‍ , മാരുതി കാറിന്റെ ആര്‍‌‌ .സി ഭാര്‍ഗവ എന്നിവരെ പോലെ അനവധി പേര്‍ മുന്‍‌ഗാമികളായുണ്ട്.

മാറ്റത്തിന്റെ പതാകവാഹകര്‍ :

സംരംഭകത്വത്തെ പ്രോല്‍‌സാഹിപ്പിക്കുക, അത് ഊതിക്കെടുത്തരുത് എന്നതാകണം സമൂഹം എറ്റെടുക്കേണ്ട മുദ്രാവാക്യം. ഇതോടോപ്പം കാമ്പസ് ഇന്റര്‍വ്യൂ പോലെ തന്നെ അതീവ ശ്രദ്ധയുള്ള ഒരു എര്‍പ്പാടായി കാമ്പസില്‍ നിന്ന് സ്വന്തം കമ്പനിയിലേക്ക് എന്ന ദൌത്യത്തെയും നമ്മുടെ കൊളെജുകളും വിദ്യാര്‍ത്ഥികളും ഒപ്പം രക്ഷകര്‍ത്താക്കളും കാണണം.

അധികവിവരം : സംരംഭകരാന്‍ കൊതിക്കുന്ന ചെറുപ്പക്കാരെ തിളക്കമുള്ളവരാക്കാനായും അവസരങ്ങള്‍ കാട്ടാനുമായി ടാറ്റാ ജാഗ്രിതി യാത്ര എന്ന രാജ്യമെങ്ങും ചുറ്റിയടിച്ച് ഇന്ത്യയെ തൊട്ടറിയാനുള്ള തീവണ്ടി യാത്ര പ്രസിദ്ധമാണ്

(ഇന്നത്തെ മലയാള മനോരമ കരിയര്‍ഗുരു പേജില്‍ പ്രസിദ്ധീകരിച്ചതാണ് ഈ ലേഖനം)

ഐ ടി @ 2010

2011-01-03T09:01:00.000-08:00

പോയ വര്‍ഷം വിവര വിനിമയ സാങ്കേതികവിദ്യ ഒട്ടേറെ പ്രാവശ്യം വാര്‍ത്തകളില്‍ പലതരത്തിലും വിധത്തിലും സ്ഥാനം പിടിച്ചിരുന്നു. വിക്കിലീക്ക്സ് പോലെയുള്ള സമര്‍ത്ഥമായ ഇടപെടലുകള്‍ അമേരിക്ക അടക്കമുള്ള പ്രബലകേന്ദ്രങ്ങളുടെ നിഗൂഡമായ അധികാര ഇടനാഴികളിലേക്ക് വെബ്‌മാധ്യമത്തിന്റെ കരുത്തും അനിവാര്യമായ മാറ്റത്തിന്റെയും കാഹളം മുഴക്കുന്നതായിരുന്നു. സിറ്റിസണ്‍ ജേണലിസമെന്നോ അല്ലെങ്കില്‍ ജനജാഗ്രതയോ എന്ന് വിളിക്കാവുന്ന പുതിയ വെളിപ്പെടുത്തലുകള്‍ വെബ് മാധ്യമത്തിന്റെ കരുത്തുകാട്ടിയിരുന്നു. ഇന്ന് സാങ്കേതികവിദ്യയെ പ്രത്യേകിച്ച് ഇന്റര്‍നെറ്റ് അധിഷ്ഠിതവിദ്യകളെ പേടിക്കുന്ന തരത്തില്‍ ഉദ്യോഗസ്ഥ ഭരണ വൃന്ദം മാറിക്കഴിഞ്ഞു. അതേ സമയം തന്നെ വിവരവിനിമയ സങ്കേതികവിദ്യയുടെ തലം ലോകം കണ്ട എറ്റവും വലിയ അഴിമതിക്കും -സ്‌പെക്‍ട്രം ഇടപാട്- വഴിവെച്ചു. ഇന്‍ഫോ കൈരളിയുടെ വായനക്കാര്‍ക്കായി പോയ വര്‍ഷത്തെ ഐ ടി മേഖലയുമായി നേരിട്ട് ബന്ധമുള്ള സംഭവവികാസങ്ങള്‍ നാല് മേഖലകളായി അവതരിപ്പിക്കുന്നു. വാര്‍ത്താസംഭവങ്ങള്‍ , സാങ്കേതികവിദ്യ, വ്യക്തികള്‍ , പുസ്തകങ്ങള്‍ എന്നിങ്ങനെ ഓരോന്നിലും അഞ്ച് പ്രാധാന്യമേറിയ കാര്യങ്ങള്‍ .കൃത്യമായ വിശകലനത്തില്‍ ഇത് തുടങ്ങിയത് ചരിത്രത്തിന്റെ കണിശമായ കണ്ണില്‍ 2010 ല്‍ അല്ലാത്തവ ഉണ്ടാകും എന്നാല്‍ പോയ വര്‍ഷം നിര്‍ണായകമായ രീതിയില്‍ ഇവ ശക്‍തിപ്രാപിച്ചതിനാല്‍ ഉള്‍പ്പെടുത്തുന്നു. ഒരു പത്തു വര്‍ഷം മുന്നെ പോയവര്‍ഷ കണക്കെടുപ്പുകളില്‍ ഐ ടി യോ വിനിമയ സാങ്കേതികതയോ അത്ര കണ്ട് സാന്നിദ്ധ്യം ചെലുത്തിയിരുന്നില്ല എന്നാല്‍ ഇന്ന് അതല്ല സ്ഥിതി. സാധാരണക്കാരെയാണ് വിവര സാങ്കേതികവിദ്യ ശാക്തീകരിക്കുന്നത് ഇ ഗവണന്‍സ് ജനങ്ങളെയും സര്‍ക്കാരിനേയും കമ്പ്യൂട്ടറിന്റെ സമ്പര്‍ക്കമുഖം വഴി എളുപ്പമാര്‍ഗത്തില്‍ വൈവിധ്യമായ് സേവനങ്ങള്‍ ഉപയോഗിക്കാന്‍ അനുവദിക്കുമ്പോള്‍ വിഡിയോ ചാറ്റും സോഷ്യല്‍ നെറ്റ്‌വര്‍ക്കിംഗ് സൈറ്റുകളും അനേകകോടി ജനങ്ങളെ പരസ്പരം സംവേദിക്കാനും ആശയരൂപീകരണം നടത്തുവാനും മുമ്പങ്ങുമില്ലാത്തവിധം അനുവദിക്കുന്നു, അതും തുശ്ചമായ പണച്ചിലവില്‍ . ബ്ലോഗും ഇന്റര്‍നെറ്റ് പത്രങ്ങളും പരമ്പരാഗത അച്ചടി പത്രമാസികകള്‍ക്ക് വെല്ലുവിളിയുയര്‍ത്തുന്നത് ഇന്ന് ഒരു വാര്‍ത്തയേ അല്ലാതായിരിക്കുന്നു. നാല് മേഖലകളിലായ് അഞ്ച് എണ്ണം വീതം അവതരിപ്പിക്കുന്നത് കേവലം ഒരു ചൂണ്ടുപലകയായി മാത്രമാണ്. ഇതിലുമേറെയുണ്ടാകാം

സാങ്കേതികവിദ്യ

കമ്പ്യൂട്ടര്‍ ഹാര്‍ഡ്‌വെയര്‍ സോഫ്ട്‌വെയര്‍ രംഗത്തെ ഒന്നായി എടുത്ത് വിശകലനം ചെയ്താല്‍ ഇവയൊക്കെയാകാം 2010 ലെ താരങ്ങള്‍

ഐ പാഡ് - പൊതു പേരായി ടാബ്‌ലറ്റ് കമ്പ്യൂട്ടര്‍ എന്ന് പറയാം എങ്കിലും ആപ്പിളിന്റെ ഐ പാഡിനെ തന്നെ പേരില്‍ ചേര്‍ത്തു കാരണം, ഐ പാഡിന്റെ വരവാണ് മറ്റ് സ്ഥാപനങ്ങളെ ടാബ്‌ലറ്റ് കമ്പ്യൂട്ടറിന്റെ ലോകത്ത് ശ്രദ്ധയൂന്നാ‍ന്‍ അത്രമേല്‍ പ്രേരിപ്പിച്ചത്. കമ്പ്യൂട്ടിംഗിന്റെ ഒരു ഘട്ടത്തിന് വിരാമമിടും ഐ പാഡ് എന്ന് പറഞ്ഞാലും അതിശയോക്തിയാകില്ല. പേഴ്സണല്‍ കമ്പ്യൂട്ടിംഗിന്റെ ദിശതന്നെ മാറ്റുന്ന നിലയിലാണ് ഇന്ന് ടാബ്‌ലറ്റ് കമ്പ്യൂട്ടറുകള്‍ പ്രചുര പ്രചാരം നേടുന്നത്. ടാബ്‌ലറ്റുകള്‍ കമ്പ്യൂട്ടറിനെയോ മൊബൈല്‍ ഫോണിനെയോ മാത്രം ലക്ഷ്യമിട്ട് ഒരു പുത്തന്‍ നിര ഉപകരണ സ്‌പെയ്സ് മാത്രമല്ല സൃഷ്ടിച്ചെടുക്കുന്നത്. മാധ്യമങ്ങളെ അടിമുടി തന്നെ മാറ്റാനോ അല്ലെങ്കില്‍ മാധ്യമങ്ങള്‍ ടാബ്‌ലറ്റ് (ഐ പാഡ്/ആന്‍ഡ്രോയ്ഡ് ആപ്ലിക്കേഷനുകള്‍ ) പതിപ്പുകളിറക്കി തങ്ങളുടെ ഡാറ്റാബേസിനെ തന്നെ ടാബ്‌ലറ്റ് രീതിയിലേക്ക് മാറ്റാനോ ഉള്ള ഉത്രാടപാച്ചിലിലാണ് ഇപ്പോള്‍ ! അച്ചടിമാധ്യമങ്ങളുടെ ഭാവി ടാബ്‌ലറ്റ് വായനയിലൂടെയാകും എന്ന് കരുതുന്നവരാണ് ഫ്യൂച്ചറിസ്റ്റുകളില്‍ അധികവും. ആപ്പിളിന്റെ ഒരോ ഉപകരണവും കണ്‍സ്യൂമര്‍ ഇലക്‍ട്രോണിക്‍സ് വിപണിയുടെ വര്‍ത്തമാനം തന്നെ മാറ്റിയിട്ടുണ്ടന്നതിന് മക്കിന്റോഷ്, ഐ പോഡ്,ഐ ഫോണ്‍ എന്നിവ തന്നെ ഉദാഹരണം ഇപ്പോള്‍ ഐ പാഡും.
ഭാരതസര്‍ക്കാരിന്റെ ലാപ്ടോപ്പ് : ആയിരത്തിയഞ്ഞൂറ് രൂപ മാത്രം വിലയിട്ട് കേന്ദ്രസര്‍ക്കാരിന്റെ ശാസ്ത്രസാങ്കേതികവകുപ്പ് കുഞ്ഞു കമ്പ്യൂട്ടറിന് മേഖലയിലെ സ്ഥാനം ഔദ്യോഗികമായി അറിയിച്ചത് വന്‍‌തോതിലാണ് പ്രാധാന്യം നേടിയത്. വിലക്കുറവ് മാത്രമല്ല സര്‍ക്കാര്‍ തന്നെ അത്യന്തം വിപണി വല്‍ക്കരിക്കപ്പെട്ട കമ്പ്യൂട്ടര്‍ രംഗത്തേക്കെത്തിയത് അതും വിലക്കുറവില്‍ മത്സരിച്ച്, സ്വകാര്യ സ്ഥാപനങ്ങളെ പോലും ഞെട്ടിച്ചു. ഐ ഐ ടികള്‍ ഐ ഐ എസ് സി എന്നിവയുടെ ഗവേഷണ മികവിലാണ് ഇത് സാക്ഷാത്കരിക്കപ്പെടുന്നത്. അഞ്ചുവര്‍ഷം മുന്നെ സുദീപ് ബാനര്‍ജിയെന്ന സിവില്‍ സര്‍വീസ് ഓഫീസറുടെ ആ‍ശയമാണ് സാക്ഷാത്കരിക്കപ്പെടുന്നത്.
ആന്‍ഡ്രോയ്ഡ് - ആന്‍‌ഡ്രോയ്ഡ് എന്ന സ്ഥാപനം വികസിപ്പിച്ചു തുടങ്ങിയ മൊബൈല്‍ ഫോണ്‍ ഓപ്പറേറ്റിംഗ് സിസ്റ്റം അഞ്ചുവര്‍ഷം മുന്നെ തന്നെ ഈ സ്ഥാപനത്തില്‍ നിന്ന് ഇന്റര്‍നെറ്റ് സര്‍ച്ച് എഞ്ചിന്‍ സ്ഥാപനമായ ഗൂഗിള്‍ സ്വന്തമാക്കി. ഗൂഗിളിന്റെ നേതൃത്വത്തില്‍ ഒരു സംഘം സ്ഥാപനങ്ങളാണ് ആന്‍ഡ്രോയ്ഡ് വികസിപ്പിക്കുന്നതും പരിഷ്‌കരിച്ചവ ലഭ്യമാക്കുന്നതും. ഇത് കൂടാതെ ആന്‍ഡ്രോയ്ഡില്‍ പ്രവര്‍ത്തിക്കുന്ന വൈവിധ്യമായ ആപ്ലിക്കേഷനുകള്‍ എഴുതിയുണ്ടാക്കുന്ന ഡവലപ്പര്‍മാരുടെ വലിയ ഒരു നിര തന്നെ ആന്‍ഡ്രോയ്ഡിന് ഒപ്പമുണ്ട്. 2010 ല്‍ ഫ്രോയോ, ജിഞ്ചര്‍ബ്രെഡ് എന്നീ രണ്ട് പതിപ്പുകള്‍ ഇറക്കി എന്ന് മാത്രമല്ല പാ‍ദവര്‍ഷ വളര്‍ച്ച വച്ച് നോക്കിയാല്‍ മറ്റെല്ലാ മൊബൈല്‍ ഓ എസിനെയും നിഷ്‌പ്രഭമാക്കി ആന്‍ഡ്രോയ്ഡ് വളരുകയാണ്. ഒരു പക്ഷെ ഗൂഗിളിന്റെ മാത്രമല്ല മൊബൈല്‍ ഫോണുകളുടെ ചരിത്രത്തിലും ഒരു പ്രധാന അധ്യായം തന്നെ എഴുതിചേര്‍ത്താണ് 2010 ലെ ആന്‍ഡ്രോയ്ഡ് ജൈത്രയാത്ര
സോഷ്യല്‍ നെറ്റ്വര്‍ക്കിംഗ് സൈറ്റുകള്‍ : ആശയവിനിമയത്തിന്റെ തുറസ്സിനെ ഇത്രമേല്‍ ജനാധിപത്യവല്‍ക്കരിച്ച ഇന്റര്‍നെറ്റ് ആപ്ലിക്കേഷന്‍ ഇല്ല എന്ന് പറയാം. ഫേസ്ബുക്കില്‍ 50 കോടി ,ട്വിറ്ററില്‍ 10 കോടി എന്നീ നാഴികകല്ലുകള്‍ പിന്നിട്ടത് മാത്രമല്ല. ഇന്ന് ഗൌരവമായ പല ചര്‍ച്ചകള്‍ക്കും വേദിയാകുന്നത് ഇവ തന്നെ. വിക്കിലീക്ക്സിനെ അമര്‍ത്തി കൊല്ലാന്‍ ഭരണകൂടം ശ്രമിച്ചപ്പോഴും മാറിയ വെബ്‌വിലാസങ്ങളും അപ്ഡേറ്റുകളും അപ്പപ്പോള്‍ ജനസഞ്ചയത്തിലേക്കെത്തിക്കാന്‍ സോഷ്യല്‍ നെറ്റ്വര്‍ക്കിംഗ് വഹിച്ച പങ്ക് ചെറുതല്ല. ചിലര്‍ക്ക് മന്ത്രികസേര പോകാന്‍ പോലും ട്വിറ്റര്‍ മൊഴിയമ്പുകള്‍ കാരണമായി എന്നത് മറക്കുമോ രാഷ്ട്രീയ ഭൂമിക. കവി സച്ചിദാനന്ദനും ബാലചന്ദ്രന്‍ ചുള്ളിക്കാടും മുതല്‍ സാഹിത്യത്തിലെ പുതുനാമ്പുകളും ഫേസ്ബുക്ക് ചര്‍ച്ചകളില്‍ സജീവ ചര്‍ച്ചകളില്‍ ഇടം പിടിക്കുന്നത് ഫേസ്ബുക്ക് സമൂഹത്തിന്റെ സമസ്ഥമേഖലകളിലെ ചര്‍ച്ചയിലും എത്തുന്നതിന്റെ ഉദാഹരണം
സ്വതന്ത്ര മലയാളം കമ്പ്യൂട്ടിംഗ് - "എന്റെ കമ്പ്യൂട്ടറിനു് എന്റെ ഭാഷ" എന്ന മുദ്രാവാക്യവുമായി സ്വതന്ത്ര സോഫ്റ്റ്‌വെയറുകള്‍ അടിസ്ഥാനമാക്കി കമ്പ്യൂട്ടറില്‍ മലയാളം ഉപയോഗിക്കാന്‍ എല്ലാവരെയും പ്രാപ്തരാക്കുന്നതിനായി പ്രവര്‍ത്തിയ്ക്കുന്ന സന്നദ്ധപ്രവര്‍ത്തകരുടെ കൂട്ടായ്മാണു് സ്വതന്ത്ര മലയാളം കമ്പ്യൂട്ടിങ്ങ്. ഒരു സംഘം മലയാളഭാഷാ സ്നേഹികളായ കമ്പ്യൂട്ടര്‍ വിദഗ്ദരുടെ കൂട്ടായ പ്രയത്നം മലയാളി സമൂഹത്തിന് നല്‍കിയ നിസ്തുലമായ സേവനം വേണ്ടവിധത്തില്‍ അധികാരകേന്ദ്രങ്ങളും മാധ്യമങ്ങളും അംഗീകരിച്ചുവോ എന്ന സംശയം ഇല്ലാതില്ല, എന്നിരുന്നാലും ഈ അര്‍പണബോധമുള്ള പ്രവര്‍ത്തകരുടെ മൂല്യബോധത്തോടെയുള്ള സേവനം എക്കാലവും സ്‌മരിക്കേണ്ടത് നമ്മുടെ കടമയാണ്. ഒപ്പം ഈ സംഘത്തോടോപ്പം ചേരുകയുമാകാം. കൂടുതല്‍ ഭാഷാ കമ്പ്യൂട്ടിംഗ് വിവരങ്ങള്‍ക്ക് ഈ ലിങ്ക് സന്ദര്‍ശിക്കുക

വാര്‍ത്താ സംഭവങ്ങള്‍

വിക്കിലീക്ക്സ് : ഇന്റര്‍നെറ്റിന്റെ കരുത്തും എവിടെയും കടന്നെത്തി ജനോപകാരമായ തലത്തില്‍ തന്നെ ഭരണകൂടത്തെയും മറ്റും മാധ്യമതുറസ്സിലേക്ക് വലിച്ചിടാനുള്ള സാധ്യതയും ഇത്രയധികം വ്യക്തമായ സംഭവം ചരിത്രത്തിലില്ല. അന്താരാഷ്ട്ര നയതന്ത്രത്തിന്റെ പൊള്ളത്തരങ്ങളും കള്ളക്കളികളും അമേരീക്ക അടക്കമുള്ള പ്രബലരെ അലോസരപ്പെടുത്തിയെന്നതിന് 2010 സാക്ഷ്യം വഹിച്ചു, ഇതിന്റെ സഹസ്ഥാപകരിലൊരാള്‍ ഓപ്പണ്‍ ലീക്ക്സ് എന്ന സമാനമായ മറ്റൊന്ന് കൂടി തുടങ്ങുമെന്ന് പ്രഖ്യാപിച്ചതും പോയ വര്‍ഷമായിരുന്നു. ഇനിയും എത്രയോ വിവരം വിക്കിലീക്ക്സില്‍ നിന്നും വരാനിരിക്കുന്നു എന്നതിനേക്കാള്‍ ശ്രദ്ധേയം പരമ്പരാഗത മാധ്യമങ്ങള്‍ക്ക് ഒരു പക്ഷെ അറിയാമായിരുന്ന അല്ലെങ്കില്‍ അവര്‍ക്ക് ചെന്നെത്തപ്പെടാന്‍ ദുര്‍ഗ്രാഹ്യമായിരുന്ന നിഗൂഡസ്ഥലങ്ങളിലേക്കാണ് വീക്കിലീക്ക്സിന്റെ വാര്‍ത്താമുന ചെന്നെത്തിയത്. ഇത് സാധാരണാക്കാരായ പൌരന്മാരെ പോലും ആത്മവിശ്വാസമുള്ളവരാക്കും കാരണം പരമ്പരാഗത മാധ്യമങ്ങളും ആഭ്യന്തര-രാജ്യാന്തര അന്വേഷണ എജന്‍സികള്‍ പോലും പരിശോധിക്കാന്‍ മടിക്കുന്ന പലവിവരങ്ങളും പൊതുജനമധ്യത്തിലേക്കെത്തിച്ച് അവരെ തുറന്ന് കാട്ടാമല്ലോ.
ത്രീ ജി സ്പെക്ട്രം അഴിമതി : വിവര വിനിമയ സങ്കേതികവിദ്യയുമായി ബന്ധപ്പെട്ട അഴിമതി എന്നത് മാത്രമല്ല പ്രബലരായ മാധ്യമ പ്രവര്‍ത്തകലാല്‍ വരെ അടിച്ചൊതുക്കപ്പെട്ട ഈ വാര്‍ത്ത ജനസമക്ഷം എത്താന്‍ ഇന്റര്‍നെറ്റ് വഹിച്ച പങ്ക് ചെറുതല്ല. ബര്‍ഖാഗേറ്റ് എന്നും സ്പെക്ട്രം സ്‌കാം എന്നും ടാഗ് ചെയ്യപ്പെട്ട എത്ര ലക്ഷം കുറിപ്പുകളുമാണ് ഒരോ ദിനവും സോഷ്യല്‍ നെറ്റ് വര്‍ക്കിംഗ് സൈറ്റുകളില്‍ പറന്നു നടന്നത്. സംഭാഷണങ്ങളുടെ ഒരു പങ്ക് ഓപ്പണ്‍ മാഗസിന്‍ അവരുടെ വെബ് സൈറ്റ് വഴിയാണ് പുറത്തെത്തിയത്. താമസിയാതെ സിറ്റിസണ്‍ ജേണലിസറ്റുകള്‍ അവസരത്തിനൊത്ത് ഉയര്‍ന്നു. ഒരു പക്ഷെ നവമാധ്യമ സാന്നിദ്ധ്യം ഇല്ലായിരുന്നെങ്കില്‍ ഇത് ഇത്രകണ്ട് ചര്‍ച്ചചെയ്യപ്പെടുമോ എന്ന സന്ദേഹം ബാക്കി.
ബ്ലാക്ക് ബെറി നിരോധനം : ഒരു നിയന്ത്രണവുമില്ലാതെ വിവരകൈമാറ്റം ആഭ്യന്തരസുരക്ഷയെ പ്രതിക്കൂലമായി ബാധിക്കുമെന്ന റിപ്പോര്‍ട്ടുകളെ തുടര്‍ന്ന് ഇന്ത്യയടക്കമുള്ള വിദേശരാജ്യങ്ങള്‍ ബ്ലാക്ക്ബെറി ഫോണ്‍ നിര്‍മ്മാതക്കളോട് വിശദീകരണം ആവശ്യപ്പെട്ടിരിക്കുന്നു, മറുപടി തൃപ്തികരമാകാത്തതിനെ തുടര്‍ന്ന് നിരോധനം എന്ന അവസാനായുധവും എടുത്തുപയോഗിക്കാന്‍ ഒരുമ്പെടുന്നു. ബ്ലാക്‍ബെറി ഒഴിച്ചുള്ള ഫോണുകളെല്ലാം ഇന്റര്‍നെറ്റ് വിനിമയം സാധ്യമാക്കുന്ന സേവനം നല്‍കാനുള്ള ചുമതല ഒരോ നാട്ടിലെയും മൊബീല്‍ സേവന ദാതാക്കള്‍ക്ക് വീട്ടുകൊടുത്തിരിക്കുന്നു. ഇവരെല്ലാം നാട്ടില്‍ തന്നെ സ്ഥാപിച്ചിരിക്കുന്ന സെര്‍വര്‍ വഴിയോ ഇല്ലെങ്കില്‍ നാട്ടിലെ ആഭ്യന്തരസുരക്ഷാ എജന്‍സികള്‍ക്ക് നിരീക്ഷിക്കാവുന്ന തരത്തിലാണ് വിവരവിനിമയം സാധ്യമാക്കുന്നത്. എന്നാല്‍ ബ്ലാക്ക്ബെറികള്‍ തമ്മിലുള്ള ആശയവിനിമയം തദ്ദേശിയമായ പാതയിലൂടെയാണ് നീങ്ങുന്നതെങ്കില്‍ പോലും അത് നിരിക്ഷിക്കാനാവില്ല. ഇതാണ് 2010 ല്‍ ബ്ലാക്ക്‍ബെറിയെ വാര്‍ത്തയില്‍ നിറഞ്ഞു നിര്‍ത്തിയത്
നമ്പര്‍ പോര്‍ട്ടബിലിറ്റി : ഇനി നിങ്ങളുടെ മൊബീല്‍ നമ്പര്‍ നിങ്ങള്‍ക്ക് സ്വന്തം എന്ന അശയവുമായി എത്തിയ ടെലകോം അനുഗ്രഹമാണ് നമ്പര്‍ പോര്‍ട്ടബിലിറ്റി. അതായത് ഒരു പ്രാവശ്യം ഒരു ഫോണ്‍ നമ്പര്‍ കിട്ടിയാല്‍ അതു തന്നെ തുടര്‍ന്ന് എത് കമ്പനിയുടെ സേവനവും ഉപയോക്താക്കളുടെ ആവശ്യാനുസരണം ഉപയോഗിക്കാം. ഒരു കമ്പനിയുടെ സേവനത്തിലേക്ക് തളച്ചിടപ്പെടുന്നില്ല. അതായത് ഇനി കമ്പനികള്‍ക്ക് മത്സരിക്കാനാകുന്നത് സേവനനിലവാരം മെച്ചപ്പെടുത്തി മാത്രമാകും അല്ലെങ്കില്‍ നിരക്കിലെ ചിലവ് കുറയ്‌ക്കാം. ഇക്കഴിഞ്ഞ നാലു വര്‍ഷങ്ങളിലായി പലവുരു മാറ്റിവയ്‌ക്കപ്പെട്ട സംവിധാനമാണ് 2010 ന്റെ അവസാന പകുതിയില്‍ നടപ്പാക്കി തുടങ്ങാന്‍ സര്‍ക്കാരും ട്രായ് യും നിര്‍ബന്ധിതമായത്. 2011 അവസാനിക്കുന്നതിന് മുന്നെ തന്നെ ഘട്ടം ഘട്ടമായി രാജ്യം മുഴുവന്‍ ഈ സംവിധാനം നിലവില്‍ വരും.
സൈബര്‍ വാര്‍ : കമ്പ്യൂട്ടര്‍ വൈറസ് ആക്രമണമോ, നെറ്റ്വര്‍ക്കിലേക്കുള്ള നുഴഞ്ഞുകയറ്റമോ ഇന്ന് സാധാരണക്കാര്‍ക്ക് പോലും അറിവുള്ള വിഷയമാണ് എന്നാല്‍ ഇറാനില്‍ നിന്നും ചൈനയില്‍ നിന്നും വര്‍ഷാവസാനം ഇന്ത്യയില്‍ നിന്നും കേള്‍ക്കുന്ന വാര്‍ത്തകള്‍ വരും കാലത്തെ യുദ്ധതന്ത്രങ്ങളുടെ ഭാഗമാണോ എന്ന് സന്ദേഹിച്ചാലും തെറ്റ് പറയാനാകില്ല. സ്റ്റക്‍സ്‌നെറ്റ് ( Stuxnet Computer worm) ആണ് 2010 ജൂണ്‍ മുതല്‍ പ്രത്യക്ഷപ്പെട്ടു തുടങ്ങിയ പുതിയ സൈബര്‍ യുദ്ധമുന . കുഞ്ഞ് കമ്പ്യൂട്ടര്‍ വ്യൂഹങ്ങളെ സ്റ്റക്‍സ്നെറ്റ് ലക്ഷ്യമിടുന്നില്ല, മറിച്ച് ആണവവൈദ്യുത നിലയങ്ങള്‍ ,മെട്രോ നഗരങ്ങളിലെ സങ്കീര്‍ണമായ ജലവിതരണ സംവിധാനം , എണ്ണശുദ്ധീകരണ ശാല, വന്‍ എഞ്ചിനീയറിംഗ് വ്യവസായ കേന്ദ്രങ്ങള്‍ എന്നിവയുടെ കമ്പ്യൂട്ടര്‍ ശൃംഖലകളെയാണ് ഇത് ലക്ഷ്യമിടുന്നത്. ആണവ വൈദ്യുത നിലയത്തിന്റെ നിയന്ത്രണം ഒരു സെക്കന്റിന്റെ നൂറിലൊരംശം സമയം കൈവിട്ടുപോയാലുണ്ടാകുന്ന ദുരന്തം പ്രവചിക്കാനാകാത്തതാകും. ഭൌതികമായി ആണവറിയാക്‍ടറിന്റെ കേന്ദ്രസ്ഥാനത്ത് ബോംബിട്ട് തകര്‍ക്കുന്നതിലും കൃത്യമായും എളുപ്പത്തിലും ഇത് സാധിക്കുന്നു. എന്നാല്‍ ലോകത്തിലെ ആദ്യത്തെ സൈബര്‍ മഹായുധം എന്ന് തന്നെ വിളിക്കപ്പെട്ടു കഴിഞ്ഞു സ്റ്റക്‍സ്‌നെറ്റ്. സിമാന്റെക് (Symantec) നിരീക്ഷണവിഭാഗം പറയുന്നത് വിശ്വാസത്തിലെടുത്താല്‍ ഈ മാല്‍‌വെയര്‍ ആ‍ക്രമണത്തിന് വിധേയമായ കമ്പ്യൂട്ടറില്‍ അറുപത് ശതമാനം ഇറാനിലും പതിനെട്ട് ശതമാനം ഇന്ത്യോനേഷ്യയിലും ആണ്. എന്നാല്‍ വന്‍‌തോതില്‍ കൂറ്റന്‍ കമ്പ്യൂട്ടര്‍ വ്യൂഹങ്ങളാല്‍ പരിപാലിക്കപ്പെടുന്ന എഞ്ചിനീയറിംഗ് ശാലകള്‍ ഉള്ള അമേരിക്കയില്‍ കേവലം രണ്ട് ശതമാനം മാത്രമേ ഈ ആക്രമണം എത്തിയുള്ളൂ എന്നതില്‍ അപ്രഖ്യാപിത യുദ്ധ നീക്കമാണോ എന്ന് സംശയിക്കുന്നവര്‍ ധാരാളം. ഇറാനിലെ ആണവനിലയത്തിലെ സൈബര്‍ ആക്രമണം ഔദ്യോഗിക വാര്‍ത്താ എജന്‍സി തന്നെ സ്ഥിരീകരിച്ചു കഴിഞ്ഞു. അമേരിക്ക കഴിഞ്ഞ മറ്റ് രാജ്യങ്ങളുടെ സഹായത്താലും അല്ലാതെയും ഇറാനുമേല്‍ ആണവ പരിപാടികളില്‍ നിന്ന് പിന്‍‌തിരിയാനുള്ള സമ്മര്‍ദ്ദതന്ത്രങ്ങള്‍ സാമ്പത്തിക ഉപരോധം അടക്കം പ്രയോഗിച്ചിട്ടും നിര്‍ദ്ദിഷ്ഠ പരിപാടികളുമായി ഇറാന്‍ തെല്ലും കൂസാതെ മുന്നോട്ട് പോകുന്നതിനിടെയാണ് ഈ നടുക്കുന്ന വര്‍ത്തമാനം പുറത്തു വരുന്നത്.

പ്രബലര്‍ പ്രമുഖര്‍

മാര്‍ക്ക് സക്കര്‍ബര്‍ഗ് : 26 വയസ് മാത്രമുള്ള മാര്‍ക്ക് സക്കര്‍ബര്‍ഗ് എന്ന ഇന്റര്‍നെറ്റ് സംരംഭകന്‍ ഇന്ന് സാങ്കേതികലോകത്തെ യുവരാജാവാണ്. ഫേസ്ബുക്ക് എന്ന സോഷ്യല്‍ നെറ്റ്‌വര്‍ക്കിംഗ് സൈറ്റിന്റെ സ്ഥാപകരിലൊരാളായ ഇദ്ദേഹം എറ്റവും പ്രായം കുറഞ്ഞ ശതകോടിശ്വരന്മാരില്‍ ഒരാളാണ്. മൈക്രോസോഫ്ട് ,ഗൂഗിള്‍ എന്നീ ഇന്റര്‍നെറ്റ് സ്ഥാപനങ്ങളുമായി താരതമ്യപ്പെടുത്തിനോക്കുകയാണങ്കില്‍ പോലും ശരവേഗത്തിലാണ് ഫേസ്‌ബുക്കിന്റെ വളര്‍ച്ച. ഇതുകൊണ്ടാകണം 2010 ലെ പേഴ്സണ്‍ ഓഫ് ദ ഇയര്‍ ആയി ടൈം മാസിക ഇദ്ദേഹത്തെ തിരഞ്ഞെടുത്തത്. 2004 ല്‍ നിലവില്‍ വന്ന ഫേസ്‌ബുക്ക് ഇതിനിടെ തന്നെ 50 കോടി ഉപയോക്താക്കളെ ആകര്‍ഷിച്ചു കഴിഞ്ഞു, 2012 ല്‍ 100 കോടി കടക്കുമെന്ന് അനുമാനിക്കുന്നു. അതായത് ഭാരതത്തിലെ ജനസംഖ്യയിലധികം. ഹര്‍വാഡില്‍ വിദ്യാര്‍ത്ഥിയായിരിക്കെ തുടങ്ങിയ സംരംഭം നിരന്തരം പലമാറ്റങ്ങള്‍ക്കും വിധേയമാകാറുമുണ്ട്. പോയ വര്‍ഷം അവസാന പാദത്തിലാണ് ഇമെയില്‍ സമാനമായ സേവനം തുടങ്ങുമെന്ന് പ്രഖ്യാപിച്ച് ടെക്‍സ്നേഹികളെ ആകര്‍ഷിച്ചത്. ബ്രട്ടീഷ് രാജ്ഞിയും അമേരിക്കന്‍ പ്രസിഡന്റ് ബരാക്ക് ഒബാമയും മാത്രമല്ല രാഷ്ട്രീയ-സാമ്പത്തിക-സാഹിത്യ-ചലചിത്ര മേഖലകളിലെ ചെറുതും വലുതുമായ താരങ്ങളും മാര്‍ക്ക് സക്കര്‍ബര്‍ഗിന്റെ സേവനം ഉപയോഗിക്കുന്നവരാണന്നത് വിജയചിഹ്നമായെടുക്കാം.
ജൂലിയന്‍ അസാന്‍‌ജെ : വാര്‍ത്തകളില്‍ നിറഞ്ഞു നിന്നത് വിക്കിലീക്ക്സ് സ്ഥാപകന്‍ എന്നതുപോലെ തന്നെ ഭരണകൂടങ്ങളാല്‍ വേട്ടയാടപ്പെട്ടതു കൂടി കൊണ്ടാണ്. ലൈംഗികാരോപണം മുതല്‍ ദേശസുരക്ഷക്ക് എതിരുനില്‍ക്കുന്ന വകുപ്പിലുള്ള കേസുവരെ ചാര്‍ജ് ചെയ്യപ്പെട്ടു. ഒരു പക്ഷെ ജീവന്‍ പോലും അപായപ്പെടാന്‍ സാധ്യതയുണ്ടന്ന് ഭയന്നു, എന്നിരുന്നാലും താന്‍ തുടങ്ങി വച്ച വെളിപ്പെടുത്തലുകള്‍ വിരാമമില്ലാതെ തുടരുമെന്ന് പറഞ്ഞ പോരാളി. ടൈം മാസികയുടെ പട്ടികയില്‍ മൂന്നാം സ്ഥാനത്ത് എത്തിയത് ഇദ്ദേഹം സൃഷ്ടിച്ച മാറ്റങ്ങള്‍ അധികാരകേന്ദ്രങ്ങളെ പിടിച്ചു കുലുക്കി എന്നതിന് തെളിവ്.
ഫിറോസ് അബൗഖാദിജെ : വെറും 19 വയസ് മാത്രമുള്ള സ്റ്റാന്‍ഫഡ് വിദ്യാര്‍ഥി പട്ടികയില്‍ ഇടം പിടിക്കുന്നത് സ്ഥാപനം കെട്ടിപ്പടുത്തതോ അല്ലെങ്കില്‍ വിപ്ലവകാരിയായതോ കൊണ്ടല്ല. ഇദ്ദേഹം വരും കാല ചരിത്രത്തില്‍ ആരുമല്ല. നമ്മെ പോലെ ശരാശരിക്കാരന്‍ . ഇന്റര്‍നെറ്റ് സര്‍ച്ച് എഞ്ചിന്‍ ഭീമനായ ഗൂഗിളിനെ വിസ്‌മയിപ്പിച്ച ഈ പ്രോഗ്രാമര്‍ക്ക് ഉടനടി തന്നെ ഗൂഗിളില്‍ ജോലി ഓഫര്‍ കിട്ടിയതിലൂടെ വാര്‍ത്താമൂല്യം നേടി. ഫിറോസിനെ ഈ പട്ടികയില്‍ ഉള്‍പ്പെടുത്തുന്നത് മികവിന്റെ പര്യായമായവര്‍ എത് സാഹചര്യങ്ങളില്‍ നിന്ന് വന്നാലും അര്‍ഹിച്ചത് കിട്ടും എന്നതിന്റെ ബലത്തിലാണ്. അതായത് വായനക്കാരായ നിങ്ങളുടെ പ്രതിനിധി. സെര്‍ച്ചിങിലെ പുത്തന്‍ ഫീച്ചറായി 2010 ല്‍ ഇന്‍സ്റ്റന്റ് എന്ന സംവിധാനം ഗൂഗിള്‍ അവതരിപ്പിച്ചതിന് പിന്നാലെ യൂ ട്യൂബ് ഇന്‍സ്റ്റന്റ് അവതരിപ്പിക്കുക മാത്രമല്‍ ആ വിവരം സന്ദേശമായി ട്വിറ്ററില്‍ ഇടുകയും ചെയ്തു. നോക്കണം എത്രയോ നാളത്തെ കഠിനാധ്വാനം കൊണ്ട് ഗൂഗിള്‍ സാങ്കേതികവിദഗ്ദര്‍ തയാറാക്കിയ അതേ സൌകര്യമാണ് കേവലം മണിക്കൂറുകള്‍ കൊണ്ട് ഫിറോസ് അതേ മികവോടെ മറ്റൊരാവശ്യത്തിന് -യൂ ട്യൂബ്- എഴുതിയുണ്ടാക്കിയത്. യുടൂബിന്റെ മേധാവി ചാഡ് ഹര്‍ലിയുടെ മെയില്‍ ഉടനെ എത്തി “യൂ ട്യൂബ് ഇന്‍സ്റ്റന്റ് ഇഷ്ടമായി. കൂടെ കൂടുന്നോ, ജോലി നല്‍കാം” അമേരിക്കന്‍ ദിനപത്രങ്ങള്‍ അടക്കം ഈ യുവാവിനെ പ്രകീര്‍ത്തിച്ചു. വരും കാലത്ത് ഫിറോസ് ആരും ആകുമായിരിക്കാം ഇല്ലായിരിക്കാം എങ്കിലും നൂതനമായ ഒരു ആശയം ഉണ്ടെങ്കില്‍ പ്രശസ്തിയുടെ നെറുകയില്‍ എത്താന്‍ മറ്റൊന്നും ആവശ്യമില്ലന്ന് ബോധ്യപ്പെടുത്തുന്ന 2010 ന്റെ ഐ ടി സാന്നിദ്ധ്യമായി ഇദ്ദേഹം മാറി.
നന്ദന്‍ നിലേകാനി : കേന്ദ്ര സര്‍ക്കാരിന്റെ പതാകവാഹക പദ്ധതിയായ യൂണീക് ഐഡന്റിഫിക്കേഷന്‍ അതോറിറ്റിയുടെ അമരക്കാരനായാണ് നന്ദന്‍ നിലേകാനി 2010 ല്‍ വാര്‍ത്തകളില്‍ എത്തിയത്. കേന്ദ്ര സര്‍ക്കാരിലെ കാബിനറ്റ് മന്ത്രിയുടെ റാങ്ക് നല്‍കിയാണ് പദ്ധതി നിര്‍വഹണത്തിനായി നിലേകാനിയെ നിയോഗിച്ചത്. വിവിധ മേഖലകളിലെ വിദഗ്ദരായ ഒരു സംഘം ആളുകളുമായി യുഐഡി പ്രവര്‍ത്തനം തുടങ്ങുകയും ആദ്യ നമ്പര്‍ 2010 ല്‍ നല്‍കി ‘ആധാര്‍ ‘ ന് തുടക്കം കുറിച്ചു. വന്‍‌തോതിലുള്ള മാറ്റമായിരിക്കും ഇത് കൊണ്ട് വരികയെന്ന് നിലേകാനി വാദിക്കുന്നു. അതേ സമയം തന്നെ സ്വകാര്യതയുമായി ബന്ധപ്പെട്ട് വ്യക്തിസ്വാതന്ത്ര്യത്തില്‍ സാങ്കേതികവിദ്യ കടന്നു കയറുന്നു എന്ന ആരോപണത്തിന് പ്രവര്‍ത്തനത്തിലൂടെ നിലേകാനി മറുപടി പറയേണ്ടതുണ്ട്. എതായാലും തികച്ചും സ്വകാര്യമായ ഒരു വമ്പന്‍ സ്ഥാപനത്തിന്റെ പ്രതിനിധി ഒരു സര്‍ക്കാര്‍ സംരംഭത്തില്‍ പങ്കാളിയായെത്തിയത് മാറ്റത്തിന്റെ ശുഭസൂചനയാണ്. ഇന്‍ഫോസിസ് തുടങ്ങിയ ആദ്യവര്‍ഷം മുതല്‍ നിരന്തരം വാര്‍ത്താ മാധ്യമങ്ങളില്‍ നിറഞ്ഞു നിന്ന നിലേകാനിയുടെ പ്രതിഭയുടെ മാറ്റുരച്ചു തുടങ്ങിയ വര്‍ഷമാണ് 2010. ഇനി കാത്തീരുന്ന് കാണാം.
ടിം ബെര്‍ണേഴ്സ് ലീ : WWWകണ്ടുപിടിച്ചതിലൂടെ ഇന്റര്‍നെറ്റിന്റെ വളര്‍ച്ചയ്‌ക്ക് നിസ്‌തുല സംഭാവന നല്‍കിയ വ്യക്തിത്വം. വേള്‍ഡ് വൈഡ് വെബ് കണ്‍സോര്‍ഷ്യത്തിന്റെ (W3C) അമരക്കാരനായിരുന്ന് ഈ മേഖലയുടെ വളര്‍ച്ചയില്‍ പ്രമുഖ പങ്ക് വഹിക്കുന്നു. 1991 ആഗസ്റ്റില്‍ CERN ല്‍ ഉണ്ടാക്കിയ ആദ്യ വെബ്സൈറ്റിന്റെ ഇരുപതാം വാര്‍ഷികം ഈ വര്‍ഷം ആഘോഷിക്കുമെന്നത് മാത്രമല്ല ഇന്റര്‍നെറ്റ് ഉള്ള എക്കാലവും ഇദ്ദേഹം സ്‌മരിക്കപ്പെടും. മുഖ്യകൃതി: Weaving the Web: The Past, Present and Future of the World Wide Web by its Inventor

പുസ്തകങ്ങള്‍

ഇതില്‍ മിക്കപുസ്‌തകങ്ങളും 2010 ല്‍ എഴുതിയത് അല്ലെങ്കിലും പോയ വര്‍ഷം കൂടുതല്‍ വായനക്കും വിശകലനത്തിനും വിധേയമായി എന്നതിനാല്‍ ഉള്‍പ്പെടുത്തുന്നു. നിലവില്‍ ഐ ടി സംരംഭം നടത്തുന്നവര്‍ക്കും പുതുതായി എത്താന്‍ താത്പര്യമുള്ളവര്‍ക്കും ഇന്റര്‍നെറ്റിന്റെ ചരിത്രത്തിലും രേഖപ്പെടുത്തലിലും എര്‍പ്പെടുന്നവര്‍ക്ക് ഉപകാരമായ 5 പുസ്‌തകങ്ങള്‍

txtng – the gr8 db8

by David Crystal
Imagining India – Nandan Nilekani
Connect the DOTS -Rasmi Bansal
E-Habits – What you must optimise your professional digital presence

by Elizabeth Charnock
BPO Sutra – True Stories from India's BPO and Call centers

Compiled and Edited by Sudhindra Mokhasi

(ഈ ലേഖനം ഇന്‍ഫോ കൈരളി മാസികയില്‍ പുതിയ ലക്കം പ്രസിദ്ധീരിച്ചതാണ്)

പത്രസ്വാതന്ത്ര്യത്തിനായി അണിചേരുക.

2010-12-01T07:47:00.000-08:00

പത്ര/മാധ്യമ പ്രവര്‍ത്തകയായ കെ കെ ഷാഹിനയുടെ തൊഴില്‍ പരമായ ഒരു പ്രതിസന്ധി അവരുടേത് മാത്രമല്ല, മൊത്തം പത്രസ്വാതന്ത്ര്യത്തിന് നേരെയുള്ള ഭരണകൂട കടന്നു കയറ്റമാണ്.
ഇതുമായി ചേര്‍ന്ന് ഒരു ചര്‍ച്ച ഒരു സംഘം മാധ്യമ സ്‌നേഹികള്‍ ഗൂഗിള്‍ ഗ്രൂപ്പില്‍ നടത്തിയ ചര്‍ച്ചയുടെ ഭാഗമായി ഡോ.ആര്‍ വി ജി മേനോന്‍ തയാറാക്കിയ പത്രക്കുറിപ്പ് ഇവിടെ പകര്‍ത്തുന്നു.
താങ്കളുടെ പിന്തുണയും പ്രതീക്ഷിക്കുന്നു. നിങ്ങളുടെ ബ്ലോഗിലും ഇത് പകര്‍ത്തിയിടുക.

*ഇത് പത്ര സ്വാതന്ത്ര്യത്തിന്‍മേലുള്ള പോലീസ് ടെററിസം*

ബാംഗ്ലൂര്‍ സ്ഫോടന കേസ് സംബന്ധിച്ച് അറസ്റ്റു ചെയ്യപ്പെട്ട മദനിയെ ആ
സംഭവവുമായി
ബന്ധിപ്പിക്കുന്നത് എന്ന്‌ കര്‍ണാടക പോലീസ് അവകാശപ്പെടുന്ന പ്രധാന കണ്ണി
മദനിയുടെ കുടക് യാത്രയാണ്. മദനിയെ കുടകില്‍ കണ്ടു എന്ന്‌ ‌ കര്‍ണാടക
പോലീസ്
പറയുന്ന സാക്ഷികളോട് നേരിട്ട് അന്വേഷിച്ചു കാര്യങ്ങള്‍ റിപ്പോര്‍ട്ട്
ചെയ്യാന്‍ മുതിര്‍ന്ന ടെഹെല്കയുടെ റിപ്പോര്ടരായ ഷാഹിനയെ, സാക്ഷികളെ
ഭീഷണിപ്പെടുത്തി സ്വാധീനിക്കാന്‍ ശ്രമിച്ചു എന്ന്‌ ആരോപിച്ചു കേസില്‍
കുടുക്കാനുള്ള കര്‍ണാടക പോലീസിന്റെ ശ്രമം അത്യന്തം അപലപനീയമാണ്. ഇത് പത്ര
സ്വാതന്ത്ര്യത്തിന്റെ മേലുള്ള ആക്രമണം ആണെന്ന് ഞങ്ങള്‍ കരുതുന്നു. പൊതു
താത്പര്യമുള്ള കേസുകളില്‍ പോലീസുകാര്‍ നല്‍കുന്ന വിവരങ്ങള്‍ അപ്പടി
പകര്‍ത്തുകയല്ല ഉത്തരവാദിത്വമുള്ള റിപ്പോര്ട്ടരുടെ ധര്‍മം. അതിന്റെ
സത്യാവസ്ഥ
സ്വയം അന്വേഷിച്ചു ബോധ്യപ്പെടുക എന്നത് പത്ര പ്രവര്‍ത്തകരുടെ ചുമതലയാണ്.
അത്
നിര്‍വഹിക്കാന്‍ ശ്രമിച്ച ഷാഹിനയെ ഭീഷണിപ്പെടുത്തുന്നതും കേസില്‍
കുടുക്കാന്‍
ശ്രമിക്കുന്നതും സ്വതന്ത്രമായ പത്രപ്രവര്തനത്തെ ഭയപ്പെടുന്ന ഫാസിസ്റ്റു
രീതികളാണ്. ഇത്തരം പ്രവണതകളെ മുളയിലെ നുള്ളി കളഞ്ഞില്ലെങ്കില്‍ അത്
ജനാധിപത്യത്തിന് തന്നെ ഭീഷണിയാകും എന്ന്‌ ഞങ്ങള്‍ ഭയപ്പെടുന്നു.
അതുകൊണ്ട്
ഇതിനെ കേവലം ഷാഹിനയുടെയോ ടെഹെല്‍കയുടെയോ പ്രശ്നം എന്നതിലുപരി പത്ര
സ്വാതന്ത്ര്യത്തിന്റെ പ്രശ്നം എന്ന നിലയില്‍ കണ്ട് ജനാധിപത്യത്തെ
മാനിക്കുന്ന
സര്‍വരും ഈ നീക്കത്തിനെതിരെ പ്രതിഷേധിക്കണം എന്ന്‌ ഞങ്ങള്‍
അഭ്യര്‍ത്ഥിക്കുന്നു.

(ഫോര്‍ത്ത് എസ്റ്റേറ്റ് ക്രിട്ടിക് എന്ന ഗൂഗിള്‍ സംഘ ചര്‍ച്ചാ വേദിയിലെ അംഗങ്ങള്‍ തയാറാകിയത്)

ഗ്രാമീണ (ടെലകോം) ഇന്ത്യ

2010-10-08T10:36:00.000-07:00

ടെലകോം രംഗത്തെ സ്‌ഥിതിവിവരക്കണക്കുകള്‍ വച്ച് ഒരു അനുമാനത്തിലെത്താന്‍ ഇന്ന് വിഷമമാണ്. കാരണം ഭാരതത്തെ പോലെ വിവിധസാമൂഹിക, സാമ്പത്തിക രീതിയില്‍ കൂടിക്കലര്‍ന്ന് കിടക്കുന്ന സാഹചര്യത്തില്‍ പ്രത്യേകിച്ചും. ഉദാഹരണത്തിന് 2010 ആഗസ്റ്റ് 31 ന് ശേഖരിച്ച കണക്കുപ്രകാരം നമ്മുടെ രാജ്യത്ത് 70.63 കോടി ടെലകോം വരിക്കാരുണ്ട്, ഇതില്‍ മുഖ്യപങ്കും (67.06 കോടി) മൊബീല്‍ ടെലഫോണുകള്‍ ആണ്. അതായത് നമ്മുടെ ടെലകോം സാന്ദ്രത 59.63 വരും. ഇതാകട്ടെ ആഗോള ശരാശരിയുമായി ഒപ്പത്തിനൊപ്പം . പ്രത്യക്ഷത്തില്‍ അഭിമാനമുണ്ടാക്കുന്ന ഈ കണക്ക് ഇഴപിരിച്ച് പരിശോധിക്കുന്നത് അഭികാമ്യമാ‍യിരിക്കും, ഗ്രാമ നഗര വ്യത്യാസം ഇല്ലാതെ തുല്യനീതി ഉറപ്പാക്കുന്ന സമകാലീന ചര്‍ച്ചാപരിസരത്തില്‍ പ്രത്യേകിച്ചും. എഴുപതു ശതമാനം ആളുകളും വസിക്കുന്ന തനിഗ്രാമങ്ങളെ മാത്രം കണക്കിലെടുത്താല്‍ ടെലിസാന്ദ്രത ഇന്നും ഒറ്റ അക്കത്തില്‍ ആണെന്ന് കാണാം. 2006 ലെ കണക്ക് പ്രകാരം ഗ്രാമീണ ഇന്ത്യയില്‍ ടെലകോം എത്തപ്പെടല്‍ വെറും 2% വും നാ‍ഗരിക‌ഇന്ത്യയില്‍ ഇത് 35 %, മെട്രോ നഗരങ്ങളിലാകട്ടെ ഇത് അന്‍പതിലേറെയും. ഇതേ സമയം തന്നെ രാജ്യത്തെ അടിസ്ഥാന ടെലഫോണ്‍ (ഫിക്സഡ് ലൈന്‍ /ലാന്‍ഡ് ലൈന്‍ ) കേവലം മൂന്ന് ശതമാനം മാത്രവും, ഇതിലാകട്ടെ പൊതുമേഖലാ സ്ഥാപനങ്ങളായ ബി‌എസ്‌എന്‍‌എല്‍‌ /എം‌ടി‌എന്‍‌എല്‍ ആണ് 83.68 ശതമാനം കണക്‍ഷനും നല്‍കിയിരിക്കുന്നത്. കണക്കുകളുടെ പെരുക്കം അവിടെ നില്‍ക്കട്ടെ, ഇതില്‍ നിന്നും അനുമാനിക്കാവുന്ന വിവരം ഇവയാണ്: ഒന്ന് ടെലകോം വളര്‍ച്ച പറയുമ്പോള്‍ ഗ്രാമ നഗര വേര്‍തിരിവ് ഉണ്ടാകണം. ഗ്രാമക്കണക്കിന്റെ മെച്ചം രാജ്യത്ത് നഗര ഗ്രാമ സന്തുലിതമായ വളര്‍ച്ച വിലയിരുത്താനുള്ള സാധ്യത ലഭിക്കും എന്നതും വികസനം എത്താത്ത ഇടങ്ങളിലേക്ക് അടിസ്ഥാന സൌകര്യം ഉറപ്പാക്കാനുള്ള യത്നത്തില്‍ രാഷ്ട്രീയ /ഭരണ നേതൃത്വത്തിലുള്ളവരെ നിര്‍ബന്ധിക്കാന്‍ വോട്ടര്‍‌മാര്‍ക്ക് ആകും എന്നത്. രണ്ട്: സ്വകാര്യ ടെലകോം സേവന ദാതാക്കള്‍ വിപണിമൂല്യമുള്ള നഗരങ്ങളില്‍ കവറേജ് ഉറപ്പാക്കുമ്പോള്‍ പൊതുമേഖലാ സ്ഥാപനങ്ങള്‍ അത്രയ്‌ക്ക് ലാഭസാധ്യതയില്ലാത്തതും എന്നാല്‍ വന്‍‌തോതില്‍ മൂലധനാവശ്യം വരുന്നതുമായ ലാന്‍‌ഡ്‌ലൈന്‍ മുന്നൊരുക്ക/പരിപാലന സൌകര്യങ്ങള്‍ കൊണ്ട്‌ വരാന്‍ നിര്‍ബന്ധിതരാകുന്നു എന്നതുമാണ്.

1948 ല്‍ രാജ്യത്തെ ടെലഫോണ്‍ സാന്ദ്രത കേവലം 0.02 ശതമാനം മാത്രമായിരുന്നു. ഇന്ന് പടിപടിയായുള്ള പൊതുമൂലധന നിക്ഷേപത്തിന്റെ ഭാഗമായി ബി എസ് എന്‍ എല്‍ ന്റെ ആസ്തി (ഭൂമി,കെട്ടിടം,കേബിള്‍ ,പ്ലാന്റ് ) 54352 കോടി, വന്‍‌നഗരങ്ങളീല്‍ മാത്രം നോക്കിയാല്‍ 2.5 ദശലക്ഷം ചതുരശ്ര മീറ്റര്‍ ഭൂമി, 38,302 എക്‍സ്‌‌ചേഞ്ചുകള്‍ ,46,565 മൊബീല്‍ ഫോണ്‍ ടവറുകള്‍ ,614755 റൂട്ട് കിലോമീറ്റര്‍ ഓപ്ടിക്കല്‍ ഫൈബര്‍ ശൃംഖല. ഇത്രയും ബൃഹത്തായ അടിസ്ഥാന സൌകര്യങ്ങള്‍ ഉണ്ടായിട്ടും അതിന് ആനുപാതികമായ ലാഭം ഉണ്ടാക്കാനാകുന്നില്ല എന്ന് കുറ്റപ്പെടുത്താനാകില്ല, കാരണം പൊതു മേഖലാ സ്ഥാപനങ്ങളുടെ സൌകര്യം പങ്കിട്ടെടുത്താണ് സ്വകാര്യ ഓപ്പറേറ്റര്‍‌മാര്‍ സേവനം നല്‍കുന്നത്. എന്നാല്‍ താരതമ്യപ്പെടുത്തുമ്പോഴുള്ള പരിമിതമായ നിക്ഷേപം കൊണ്ട് ഇവര്‍ കനത്ത തോതില്‍ ലാഭം ഉണ്ടാക്കുന്നുണ്ട് എന്നത് ബാലന്‍സ് ഷീറ്റിലും ഓഹരി വിപണിയിലെ കയറ്റത്തിലും കാണാനാകുന്ന വസ്‌തുത. അതേ സമയം ഈ സ്വകാര്യ സംരംഭകരെ എങ്ങനെയെല്ലാം ഗ്രാമീണ ടെല‌കോം ഇന്‍‌ഫ്രാ‌സ്ട്രക്‍ചര്‍ മെച്ചപ്പെടുത്താന്‍ ആകര്‍ഷിക്കാം എന്നതാകണം ഇനി നമ്മുടെ രാജ്യത്തെ ഈ മേഖലയിലെ വികസനത്തിന് ചെയ്യാനാകുന്നത്. നഗര ഇന്ത്യ എകദേശം വളര്‍ച്ചാമുറ്റലില്‍ (സ്റ്റാഗ്‌നേഷന്‍ ) എത്തിയ അവസ്ഥയില്‍ സ്വഭാവികമായും ഇവര്‍ അടുത്ത ചെറുപട്ടണങ്ങള്‍ ലക്ഷ്യമിട്ട് ഗ്രാമപ്രദേശങ്ങളില്‍ വരെ എത്തും എന്നത് തീര്‍ച്ചയാണ്. എന്നാല്‍ സര്‍ക്കാരിന് ഇവിടെ രാസത്വരകമായി പ്രവര്‍ത്തിക്കാനായാല്‍ മറ്റ് മേഖലകളിലെ പുരോഗതിക്കും ഊര്‍ജമേകും.

എന്തൊക്കെയാണ് ഗ്രാമീണതലത്തില്‍ ശ്രദ്ധപതിപ്പിക്കാവുന്ന നേട്ടങ്ങള്‍ :

1.കാര്‍ഷിക വിപണിയില്‍ ഇടനിലക്കാരെ ഒഴിവാക്കി, അപ്പപ്പോള്‍ നഗരത്തിലെ വിവരം നല്‍കി വിലയിടിയുന്ന ഘട്ടത്തില്‍ പോലും ഇടനിലക്കാരുടെ ചൂഷണത്തില്‍ നിന്നും കര്‍ഷകരെ സഹായിക്കാം. ഇത് കൂടാതെ ചരക്ക് നീക്കം കാര്യക്ഷമമാക്കാം.

വ്യക്തികളുടെ കാര്യക്ഷമത വര്‍ദ്ധിക്കും , ഇത് വഴി സാമ്പത്തിക രംഗം സുസ്ഥിര വളര്‍ച്ചയിലെത്തിക്കാം.
പൊതുസേവനങ്ങളായ വിദ്യാഭ്യാസം , ആരോഗ്യം, ധാന്യങ്ങളുടെയും ആഹാര സാധനങ്ങളുടെയും വിതരണം (റേഷന്‍ ) എന്നിവ കാര്യക്ഷമമാക്കാം
പുതിയ തൊഴിലവസരങ്ങള്‍ സൃഷ്‌ടിക്കാനായി ഗ്രാമീണ സൂക്‍ഷ്മ ചെറുകിട സംരംഭങ്ങള്‍ ( Micro Small and Medium level Enterprises) പരിമിതമായ തോതിലെങ്കിലും ആരംഭിക്കാം. റൂറല്‍ ബി പി ഓ തമിഴ്‌നാട്ടില്‍ ആരംഭിച്ചതും വിജയകരമായി മുന്നോട്ട് പോകുന്നതും ഉദാഹരണം.
വാര്‍ത്താ മാധ്യമങ്ങള്‍ അനുബന്ധമായി എത്തും , ഇന്റര്‍നെറ്റ് കിയോസ്‌ക്കുകളും

ഇതിനായി എന്തു ചെയ്യാനാകും : നഗരപ്രദേശത്ത് അഞ്ച് എക്‍സേഞ്ചിന് /ടവറിന് ഒന്ന് എന്ന കണക്കിലെങ്കിലും അതി വിദൂര ഗ്രാമത്തില്‍ സേവനം തുടങ്ങാന്‍ സ്വകാര്യ സേവന ദാതാക്കളെ നിര്‍ബന്ധിക്കാം, ഇതിനായി ഇപ്പോള്‍ തന്നെ ഒരു ഘടനാ സംവിധാനം ഉണ്ടെങ്കിലും അതിന്റെ പോരായ്‌മയാണല്ലോ ഗ്രാമ-നഗര വിടവ് ഇത്രമേല്‍ രൂക്ഷമാക്കിയത്. പ്രത്യേക നിരക്കുകള്‍ ഉള്ള താരിഫ് ഘടന, ചിലവ് കുറഞ്ഞ അടിസ്ഥാന സൌകര്യ ഉപകരണങ്ങള്‍ എന്നിവ വ്യാപകമാക്കണം. ചെന്നൈ ഐ ഐ ടി കോര്‍ഡെക്‍ട് (corDECT)എന്ന പേരില്‍ ഇത്തരം ഗ്രാമ കേന്ദീകൃത ഉപകര്‍ണങ്ങള്‍ വികസിപ്പിച്ച് വിന്യസിപ്പിക്കുന്നുണ്ട്, ഇത് വലുതാക്കാന്‍ (സ്‌കെയില്‍ അപ്പ്) ഉള്ള അടിയന്തിര നടപടികള്‍ ഉണ്ടാകണം. ഗ്രാമ പ്രദേശത്തെ ആളുകളുടെ കുറഞ്ഞ ക്രയശേഷിയും അവിടെ കവറേജ് ഉറപ്പാക്കാന്‍ ഉള്ള ഭൂമിശാസ്ത്ര പ്രശ്‌നങ്ങള്‍ എന്നിവ നിര്‍ദ്ധാരണം ചെയ്യാന്‍ സ്വകാര്യ സ്ഥാപനങ്ങളുടെ മത്സരപരമല്ലാത്ത സഹകരണവും തേടാം.

ഗാന്ധിജി സ്വപ്‌നം കണ്ടതുപോലെ സ്വയപര്യാപ്തമായ ഗ്രാമം ഉറപ്പാക്കാന്‍ ടെലകോം അടിസ്ഥാന സൌകര്യത്തിന് നിര്‍ണായകമായ പങ്കുണ്ട്. വൈദ്യുതി എത്താത്ത ഗ്രാമങ്ങളില്‍ പോലും സോളാര്‍ പാനലിന്റെ വെളിച്ചത്തില്‍ ടെലകോം സൌകര്യങ്ങള്‍ എത്തി എന്നതും , ഇന്ന് ലോകത്തിലെ എറ്റവും ചിലവ് കുറഞ്ഞ ടെലഫോണ്‍ നിരക്ക് നമ്മുടെ രാജ്യത്തേതാണന്നതും അനുകൂല ഘടകങ്ങളാണ്. വേണ്ടത് അനൂകൂല ഘടകങ്ങളെ കൂടുതല്‍ അനുകൂലമാക്കാനും പ്രതികൂല സാഹചര്യങ്ങളെ പരമാവധി കുറച്ച് കൊണ്ട് വരാനും ഉള്ള ആശയങ്ങളും അതിന്റെ പ്രയോഗവത്‌കരണവുമാണ്.

ഇറാന്റെ ആണവ വൈദ്യുത നിലയത്തെ ലക്ഷ്യമിട്ട് സൈബര്‍ ആ‍ക്രമണം

2010-10-05T20:48:00.000-07:00

സാധാരണയായി കമ്പ്യൂട്ടര്‍ വൈറസ് ആക്രമണമോ, നെറ്റ്വര്‍ക്കിലേക്കുള്ള നുഴഞ്ഞുകയറ്റമോ അത്ര വ്യാപകമായി ചര്‍ച്ചചെയ്യാറില്ല, ഉടനടി ആന്റിവൈറസ് സംവിധാനം ഒരുക്കി ആക്രമണകാരിയെ മെരുക്കിയെടുത്ത് എറിയുകയോ അല്ലെങ്കില്‍ മറ്റിടങ്ങളിലേക്ക് പടരാതെ നോക്കുകയോ ഒക്കെ ചെയ്യും. എന്നാല്‍ ഇറാനില്‍ നിന്നും ചൈനയില്‍ നിന്നും കേള്‍ക്കുന്ന വാര്‍ത്തകള്‍ വരും കാലത്തെ യുദ്ധതന്ത്രങ്ങളുടെ ഭാഗമാണോ എന്ന് സന്ദേഹിച്ചാലും തെറ്റ് പറയാനാകില്ല. സ്റ്റക്‍സ്‌നെറ്റ് ( Stuxnet Computer worm) ആണ് ഇക്കഴിഞ്ഞ ജൂണ്‍ മുതല്‍ പ്രത്യക്ഷപ്പെട്ടു തുടങ്ങിയ പുതിയ കുതന്ത്രക്കാരന്‍ . ചെറിയതോ അല്ലെങ്കില്‍ അത്രമേല്‍ കാര്യമല്ലാത്ത പ്രവര്‍ത്തനങ്ങള്‍ നടത്തുകയോ ചെയ്യുന്ന കമ്പ്യൂട്ടര്‍ വ്യൂഹങ്ങളെ സ്റ്റക്‍സ്നെറ്റ് ലക്ഷ്യമിടുന്നില്ല, മറിച്ച് ആണവവൈദ്യുത നിലയങ്ങള്‍ ,മെട്രോ നഗരങ്ങളിലെ സങ്കീര്‍ണമായ ജലവിതരണ സംവിധാനം , എണ്ണപ്പാടവും എണ്ണശുദ്ധീകരണ ശാലയും ബൃഹത്തായ എഞ്ചിനീയറിംഗ് വ്യവസായശാലകള്‍ എന്നിവയുടെ കമ്പ്യൂട്ടര്‍ ശൃംഖലകളെയാണ് ഇത് ലക്ഷ്യമിടുന്നത്. അതായത് ഇത്തരം വ്യവസായശാലകളിലെ പമ്പ്, മോട്ടോറുകള്‍ ,വാല്‍‌വ് , അലാറം ,വൈദുത മാനേജ്മെന്റ് എന്നിവയുടെ നിയന്ത്രണം മുഴുവനായോ ഭാഗികമായോ അല്ലെങ്കില്‍ അല്പനേരത്തേക്കോ ഇത് കൈക്കലാക്കും. ഒരു ആണവ വൈദ്യുത നിലയത്തിന്റെ നിയന്ത്രണം ഒരു സെക്കന്റിന്റെ നൂറിലൊരംശം സമയം കൈവിട്ടുപോയാലുണ്ടാകുന്ന ദുരന്തം പ്രവചിക്കാനാകാത്തതാകും. ഭൌതികമായി ആണവറിയാക്‍ടറിന്റെ കേന്ദ്രസ്ഥാനത്ത് ബോംബിട്ട് തകര്‍ക്കുന്നതിലും കൃത്യമായും എളുപ്പത്തിലും ഇത് സാധിക്കുന്നു എന്ന് മാത്രമല്ല ആര്‍ക്കും ഒരു സംശയത്തിനും ഇടനല്‍കുന്നുമില്ല. ഒരു വന്‍‌രാസ വ്യവസായശാലയിലെ വാതകം / ആസിഡ് വഹിച്ചുകൊണ്ട് പോകുന്ന കുഴലിലെ വാല്‍‌വില്‍ അല്ലെങ്കില്‍ ബോയിലറിലോ വിദൂര നിയന്ത്രിത സോഫ്‌ട്‌വെയറിന്റെ സഹായത്താല്‍ വരുത്തുന്ന മാറ്റം ഉണ്ടാക്കുന്ന അപകടം ഭാവി ഭോപ്പാലുകളെയാകും സൃഷ്ടിക്കുക.

എന്നാല്‍ ലോകത്തിലെ ആദ്യത്തെ സൈബര്‍ മഹായുധം എന്ന് തന്നെ വിളിക്കപ്പെട്ട് തുടങ്ങിയ സ്റ്റക്‍സ്‌നെറ്റ് ഒരു രാജ്യാന്തര ഗൂഡാലോചനയുടെ മണവും നല്‍കിയെന്നത് നയതന്ത്രതലത്തിലും ചര്‍ച്ചകള്‍ക്ക് തുടക്കമിട്ട് കഴിഞ്ഞു. എന്താണ് ഗൂഡാലോചന ? സിമാന്റെക് (Symantec) നിരീക്ഷണവിഭാഗം പറയുന്നത് വിശ്വാസത്തിലെടുത്താല്‍ ഈ മാല്‍‌വെയര്‍ ആ‍ക്രമണത്തിന് വിധേയമായ കമ്പ്യൂട്ടറില്‍ അറുപത് ശതമാനം ഇറാനിലും പതിനെട്ട് ശതമാനം ഇന്ത്യോനേഷ്യയിലും ആണ്. ചൈനയിലും വന്‍‌തോതില്‍ ശൃംഖലകളെ താറുമാറാക്കിയെന്ന് ഔദ്യോഗികമായി സ്ഥിതീകരിക്കാത്ത റിപ്പോര്‍ട്ടുകള്‍ ഉണ്ട്. എന്നാല്‍ വന്‍‌തോതില്‍ കൂറ്റന്‍ കമ്പ്യൂട്ടര്‍ വ്യൂഹങ്ങളാല്‍ പരിപാലിക്കപ്പെടുന്ന എഞ്ചിനീയറിംഗ് ശാലകള്‍ ഉള്ള അമേരിക്കയില്‍ കേവലം രണ്ട് ശതമാനം മാത്രമേ ഈ ആക്രമണപ്പങ്ക് എത്തിയുള്ളൂ എന്നതില്‍ ആശ്ചര്യത്തിനപ്പുറം കരുതിക്കൂട്ടിയുള്ള ഒരു നീക്കമാണോ എന്ന് സംശയിക്കുന്നവര്‍ ധാരാളം. ഇറാനിലെ ആണവനിലയത്തിലെ സൈബര്‍ ആക്രമണം ഔദ്യോഗിക വാര്‍ത്താ എജന്‍സി തന്നെ സ്ഥിരീകരിച്ചു കഴിഞ്ഞു. അമേരിക്ക കഴിഞ്ഞ കുറെ മാസങ്ങളായി മറ്റ് രാജ്യങ്ങളുടെ സഹായത്താലും അല്ലാതെയും ഇറാനുമേല്‍ ആണവ പരിപാടികളില്‍ നിന്ന് പിന്‍‌തിരിയാനുള്ള സമ്മര്‍ദ്ദതന്ത്രങ്ങള്‍ സാമ്പത്തിക ഉപരോധം അടക്കം പ്രയോഗിച്ചിട്ടും നിര്‍ദ്ദിഷ്ഠ പരിപാടികളുമായി തെഹ്‌റാന്‍ തെല്ലും കൂസാതെ മുന്നോട്ട് പോകുന്നതിനിടെയാണ് ഈ നടുക്കുന്ന വര്‍ത്തമാനം പുറത്തു വരുന്നത്.

സ്റ്റക്‍സ്‌നെറ്റ് എന്ന ഈ ദുരുദ്ദേശ പ്രോഗ്രാം സാധാരണയായി പടരാറുള്ള ഒരു സൈബര്‍ ആക്രമണമായി കാണാനാകില്ല, ഒന്നുകില്‍ പത്തോ ഇരുപതോ പേരടങ്ങുന്ന അതിവിദഗ്ദമാരായ ഒരു ശാസ്ത്ര/സാങ്കേതിക സംഘത്തെക്കൊണ്ട് ഒരു കോര്‍പ്പറേറ്റ് സ്ഥാപനം വളരെ കൃത്യമായ (ദുരു)ഉദ്ദേശത്തോടെ രൂപസംവിധാനം ചെയ്‌തെടുത്തത്, അല്ലെങ്കില്‍ എതോ ഒരു രാജ്യത്തിന്റെ ഒളിയജണ്ടക്ക് അനുസരിച്ച് കൃത്യമായി തയ്യാറാക്കിയത്. കാരണം ഈ സൈബര്‍ ആക്രമണം ആദ്യം ചെന്നുപതിച്ചത് തന്നെ ഇറാന്റെ മേല്‍ അതും അവരുടെ ആണവ പദ്ധതിയുടെ മേല്‍ ആശങ്കയുണര്‍ത്തിക്കൊണ്ട്. ലോകമാകമാനം കുറഞ്ഞത് 45,000 കോര്‍പ്പറേറ്റ് കമ്പ്യൂട്ടറുകളെയെങ്കിലും ഇത് ബാധിച്ചിട്ടുണ്ടെന്നാണ് ആ‍ദ്യാനുമാനം.

ജര്‍മ്മന്‍ സ്ഥാപനമായ സീമെന്‍സ് (sIEMENS) എന്ന ബഹുരാഷ്ട്ര ഭീമന്‍ സ്ഥാപിച്ച നിയന്ത്രണ സംവിധാനത്തിന്റെ പഴുതിലൂടെയാണ് സ്റ്റക്‍സ്‌നെറ്റ് ഇഴഞ്ഞുകയറിയത്. സീമെന്‍സ് ആകട്ടെ ലോകത്തിലെ ഇത്തരത്തിലെ തന്ത്രപ്രധാന കൂറ്റന്‍ എഞ്ചിനീയറിംഗ് വ്യവസായശാലകളുടെ നിയന്ത്രണ സംവിധാനം പരിപാലിക്കുന്ന ജോലി വളരെക്കാലമായി ചെയ്തു വരുന്നുമുണ്ട്. Siemens supervisory Control And Data -SCADA- Systems എന്ന സംവിധാനത്തെയാണ് സ്റ്റക്‍സ്നെറ്റ് ഭേദിച്ചത്

ഇത് ഉയര്‍ത്തുന്ന ചിലചോദ്യങ്ങള്‍ നമ്മുടെ രാജ്യത്തിനും പൊതുമേഖലാ, സഹകരണ സ്ഥാപനങ്ങള്‍ക്കും എന്തിന് സ്വകാര്യ സ്ഥപനങ്ങള്‍ക്കും പാഠം ആകണം. മറ്റൊരു സോഫ്ട്‌വെയര്‍ നമ്മുടെ ആന്തരിക കമ്പ്യൂട്ടര്‍ സംവിധാനത്തില്‍ ഉള്‍‌പെടുത്തുന്നതിന് മുന്‍പ് വ്യക്തവും വിശദവുമായ സൈബര്‍ സെക്ക്യൂരിറ്റി ഓഡിറ്റിന് വിധേയമാക്കണം. ഇത് സ്വകാര്യ സ്ഥപനങ്ങളുടെ വ്യവസായശാല ആണെന്ന് കരുതി അവരുടെ കാര്യം എന്ന മട്ടില്‍ ഉദാസീനമായി കൈകാര്യം ചെയ്യരുത്. കാരണം റിലയന്‍സിന്റെ ജാംനഗറിലുള്ള എണ്ണശുദ്ധീകരണ ശാ‍ലയില്‍ ഒരു സൈബര്‍ അട്ടിമറി നടന്നാലും മൊത്തത്തിലുള്ള നഷ്‌ടം രാജ്യത്തിനുകൂടിയാണ്.

ബ്ലോഗ് എങ്ങനെ: പുസ്തകം പ്രസിദ്ധീകരിച്ചു

2010-07-01T08:46:00.001-07:00

എന്റെ ഒരു പുസ്തകം- എന്താണ് ബ്ലോഗ്? ബ്ലോഗിങ്ങ് എങ്ങനെ തുടങ്ങാം)- പുറത്തിറങ്ങി. തൃശൂര്‍ കറന്റ് ബുക്‍സ് ആണ് പ്രസാധകര്‍. മാതൃഭൂമി ആഴ്ചപ്പതിപ്പില്‍ നേരത്തേ രണ്ട് ലക്കങ്ങളായി പ്രസിദ്ധീകരിച്ചവയാണ് ( താഴെ ലിങ്ക് ആയി ഇട്ടിരിക്കുന്ന) പുസ്തകത്തിന്റെ ഉള്ളടക്കം. കുറിഞ്ഞി ഓണ്‍ലൈന്‍, ആദ്യാക്ഷരി, സര്‍ക്കാര്‍ കാര്യം മുറപോലെ, സൈബര്‍ ലോകം എന്നീ ബ്ലോഗുകളെയും ട്വിറ്ററിനെയും പരിചയപ്പെടുത്താനും ശ്രമിച്ചിട്ടുണ്ട്.

ബ്ലോഗ് ഭൂമി - e lekhanangal: ബ്ലോഗിംഗ്‌ - മാധ്യമ പ്രവര്‍ത്തനത്തിന്റെ വിപ്‌ളവ വഴിയിലൂടെ

ബ്ലോഗ് ഭൂമി - e lekhanangal: വീഡിയോ ക്ലിപ്പിംഗുകള് : ദൃശ്യശേഖരണത്തിന്റെ തലം ഏറെ ജന

ഇലക്‍ട്രോണിക് മാലിന്യത്തില്‍ മൊബീല്‍ ഫോണ്‍ തലവേദനയാകുന്നുവോ ?

2010-04-30T20:19:00.000-07:00

ഇലക്ട്രോണിക് മാലിന്യത്തിന്റെ കാര്യത്തില്‍ ഇന്ന് സാമാന്യജനങ്ങള്‍ക്കിടയില്‍ പൊതുവിലും കോര്‍പ്പറേറ്റ് സ്ഥാപനങ്ങള്‍ക്കിടയില്‍ പ്രത്യേകിച്ചും ബോധവല്‍ക്കരണം നടന്നുവരുന്നു എന്നത് ആശ്വാസകരമായ വര്‍ത്തമാനമാണ്.

ഉപേക്ഷിക്കപ്പെടുന്ന ടെലിവിഷനും കമ്പ്യൂട്ടറുമാണ് ഇലക്ട്രോണിക് ഉച്ചിഷ്ഠക്കൂമ്പാരത്തിലെ മുന്‍‌നിരക്കാരെന്ന നിലയിലാണ് നമ്മള്‍ ബദല്‍ പ്രവര്‍ത്തനങ്ങള്‍ ആവിഷ്‌കരിക്കുന്നത്. ഒരു സാധാരണ ടെലിവിഷനില്‍ എകദേശം രണ്ട് കിലോഗ്രാം ലെഡ് അടങ്ങിയിരിക്കുന്നു, ഉപേക്ഷിക്കപ്പെടുമ്പോള്‍ നഗരപ്രാന്തത്തിലോ നമ്മുടെ പറമ്പിന്റെയോ ഉപരിതലത്തില്‍ എത്തുന്നത് ലെഡ് ഉള്‍പ്പടെയുള്ള അപകടകരമായ വിഷപദാര്‍ത്ഥങ്ങളാണ്. ഒരു ടെലിവിഷന്റെ ശരാശരി ആയുസ് പത്തുവര്‍ഷവും കമ്പ്യൂട്ടറിന്റെത് ആറു വര്‍ഷമായി കണക്കാക്കിയാല്‍ തന്നെ ഇ-മാലിന്യത്തോത് എത്രയധികമാണന്ന് ഊഹിക്കാവുന്നതേയുള്ളൂ. വരും കാലത്ത് ഈ നിരക്ക് കൂടുമെന്ന കാര്യത്തില്‍ തര്‍ക്കമില്ല.

നിലവില്‍ നമ്മുടെ നാട്ടില്‍ മൂന്ന് തരത്തിലാണ് ഇ മാലിന്യം പുറത്തുകളയുന്നത്. ഒന്നാമതായി പഴകിയ സാധനങ്ങള്‍ ശേഖരിക്കുന്നവര്‍ വഴി, ഇലക്‍ട്രോണിക് ഉപകരണങ്ങള്‍ /കമ്പ്യൂട്ടര്‍ റിപ്പയറിംഗ് ഷോപ്പില്‍ നിന്നും വഴിവക്കില്‍ നിന്നും ആണ് ഇക്കൂട്ടരുടെ പക്കല്‍ ഉപയോഗശൂന്യമായ ഇ-വസ്തുക്കള്‍ എത്തുന്നത്. രണ്ടാമത്തെ രീതി, പറമ്പില്‍ ഉപേക്ഷിക്കുകയാണ്. ഗ്രാമ പ്രദേശങ്ങളിലാണ് ഇത് കൂടുതല്‍ കാണുന്നത്, വര്‍ഷങ്ങളോളം അവിടെ കിടന്ന് മഴയും വെയിലുമേറ്റ് അപകരമായ മാലിന്യങ്ങള്‍ മേല്‍മണ്ണിനെ തന്നെ വിഷലിപ്തമാക്കും. മറ്റോരു കൂട്ടരാകട്ടെ നഗരത്തിലെ മാലിന്യം വിതരണസംവിധാനത്തിലേക്ക് എത്തിക്കും, ചില അവസരങ്ങളിലെങ്കിലും ഇത് കൂട്ടിയിട്ട് കത്തിക്കുന്നതാണ് നമ്മുടെ മാലിന്യ (അ)സംസ്‌കരണം! കത്തുമ്പോള്‍ അന്തരീക്ഷത്തിലേക്കെത്തുന്ന പുക സാധാരണമാലിന്യപ്പുകയെ അപേക്ഷിച്ച് നൂറുമടങ്ങോളം അപകടകരമാണ് എന്നോര്‍ക്കാറില്ല.

ലഭ്യമാകുന്ന വസ്തുതകളും ചിത്രങ്ങളും ചേര്‍ത്തു വച്ചാല്‍ ഇത് ശരിയാണന്ന് ബോധ്യമാകും. സാധാരണ ഇലക്‍ട്രോണിക് ഉപകരണങ്ങളുടെ കാര്യത്തില്‍ തീരെ അറ്റകുറ്റപ്പണി നടത്താനാകാത്ത അവസരത്തില്‍ മനസില്ലാമനസോടെയാണ് നാം ഉപേക്ഷിക്കാന്‍ നിര്‍ബന്ധിതരാകുന്നത് (ആദ്യം ഉപേക്ഷിക്കില്ല നമ്മളില്‍ പലരും, വീട്ടിലെ സ്റ്റോറിലോ പിന്നാമ്പുറത്തോ ഇടും, വലിയ വില കൊടുത്ത് വാങ്ങിയ ടിവിയല്ലേ ഉപേക്ഷിക്കാന്‍ ഒരു മനപ്രയാസം ! അടുത്ത തവണ ചുമരിന് ചായം തേയ്‌ക്കാന്‍ ആളെത്തുമ്പോഴോ, വീട് ശരിക്കൊന്ന് അടിച്ചുവാരുമ്പോഴോ ആണ് ഇത് ശരിക്കും പുറത്താവുന്നത്, അല്ലേ). എന്നാല്‍ മൊബീല്‍ ഫോണ്‍ അങ്ങനെയല്ല. പ്രവര്‍ത്തിച്ചു കൊണ്ടിരിക്കുന്നവ തന്നെ ഉപേക്ഷിക്കുന്നത് അഭിമാനമായി കാണുന്നവരുണ്ടെന്ന് പറയുന്നത് അതിശയോക്തിയാകില്ല.

മറ്റ് ചിലപ്പോഴാകട്ടെ സാങ്കേതികവിദ്യയിലെ അത്ഭുതകരമായ മാറ്റം ആരേയും പുതിയ മോഡലിലേക്ക് മാറാന്‍ നിര്‍ബന്ധിതരാക്കും. തൊണ്ണൂറുകളുടെ അവസാനപാദത്തിലാണ് നമ്മുടെ നാട്ടില്‍ കൊണ്ട് നടക്കാവുന്ന ഫോണിന്റെ രംഗപ്രവേശം. ആദ്യ കാലത്ത് വന്ന ഫോണുകള്‍ക്ക് ഒരു ചെറിയ ഇഷ്ടികയുടെ വലിപ്പവും ഭാരവും സാമാന്യം കനത്ത വിലയുമുണ്ടായിരുന്നു എന്നത് വസ്തുത. ആ ഫോണുകള്‍ സാങ്കേതികമായി ഇപ്പോഴും ഉപയോഗിക്കാനാകും എങ്കിലും ആരും ഉപയോഗിക്കാറില്ല. ഇത്തരം ഉപേക്ഷിക്കലുകള്‍ അനിവാര്യമാകും. എന്നാല്‍ പത്തുമാസത്തിനിടെ മോഡലുകള്‍ മാറുന്നത് ഈ വീക്ഷണകോണിലൂടെ കാണുന്നത് അംഗീകരിക്കാനാകില്ല. ഇന്ത്യയില്‍ 18 മാസമാണ് ഒരു ഫോണ്‍ മാറുന്നതിന്റെ ശരാശരി സമയദൈര്‍ഘ്യം. പോയ വര്‍ഷം 130 ദശലക്ഷം ഹാന്‍ഡ്സെറ്റുകള്‍ വിപണിയിലൂടെ എത്തി അതായത് ഇതില്‍ മൂന്നിലൊന്നും പുതിയ ഉപയോക്താക്കളിലേക്കല്ല എത്തുന്നത് എന്ന സത്യം കൂടിയുണ്ട്. രണ്ടോ അതിലധികമോ തവണ മാറ്റിയെടുക്കന്നവരാണ് ഫോണ്‍ മാര്‍ക്കറ്റില്‍ തിരക്കുകൂട്ടുന്നത്.

ഇതോടോപ്പം ചേര്‍ത്ത് വായിക്കാവുന്ന മറ്റൊരു കണക്ക് മാലിന്യമാകുന്ന ഫോണിന്റെ എണ്ണമാണ് 35 ദശലക്ഷം എണ്ണം ചവറ്റുകുട്ടയിലേക്ക് എത്തുന്നു, ഒപ്പം ഇത്ര തന്നെ അനുബന്ധ ഘടകങ്ങളും. ചാര്‍ജറുകള്‍ കേടാകുന്നതും ഉപേക്ഷിക്കുന്നതും ഇന്ന് നിത്യസംഭവമാണ്, ഒപ്പം ഇതിന്റെ പുറം ചട്ട, പ്ലാസ്റ്റിക്കും അല്ലാത്തതുമായ ഫോണ്‍ കുപ്പായങ്ങള്‍ എന്നിവയെല്ലാം മാലിന്യസംസ്‌കരണത്തില്‍ വന്‍‌നഗരങ്ങളിലെന്ന പോലെ ചെറുപട്ടണങ്ങളില്‍ വരെ കീറാമുട്ടിയായി തുടരുന്നു.

ഒരു വര്‍ഷം അയ്യായിരം ടണ്‍ ഇലക്ട്രോണിക് ഉച്ചിഷ്ഠം ഇന്ത്യയില്‍ എത്തുന്നു. മൊബീല്‍ ഫോണ്‍ സാന്ദ്രത എറെ വര്‍ധിച്ച കേരളം പോലെയുള്ള സംസ്ഥാനങ്ങളാകും ഇതിന്റെ ഗുരുതരമായ ഭവിഷ്യത്ത് ആദ്യം നേരിടാന്‍ പോകുന്നത്. ഫോണ്‍ സാന്ദ്രതയും ജനസാന്ദ്രതയും ഒരേ പോലെ കൂടുതലെന്നതും, ഫോണ്‍ അടിയ്‌ക്കടി മാറുന്നവരുടെ എണ്ണം എറെയുള്ളതും നമ്മുടെ നാട്ടിലാണന്ന് കണക്കുകള്‍ സൂചിപ്പിക്കുന്നു. ലെഡ്, കാഡ്മിയം, മെര്‍ക്കുറി പൊലെയുള്ള അപകടകരമായ മൂലകങ്ങളുടെ സംയുക്തങ്ങള്‍ എറിയും കുറഞ്ഞും മിക്ക മോഡലിലും ഉണ്ട്. ഇതു വരെ നാം ഫോണ്‍ മാറിയിരുന്നത് പ്രത്യേകിച്ച് ഒരു കാരണം ഇല്ലാതെയായിരുന്നുവെങ്കില്‍ സാങ്കേതികവിദ്യയുടെ മുന്നേറ്റത്തിന്റെ ഭാഗമായെത്തുന്ന ത്രീ ജി സേവനങ്ങള്‍ അടുത്ത രണ്ടു വര്‍ഷത്തിനുള്ളില്‍ ടണ്‍ കണക്കിന് ഇ-മാലിന്യം അധികമായി ഉണ്ടാക്കും. നിലവില്‍ രണ്ടു ശതമാനം ഹാന്‍ഡ്സെറ്റുകളോ അതില്‍ കുറവോ ആണ് ത്രീ ജി സംവിധാനം ഉപയോഗിക്കാന്‍ പിന്തുണയ്‌ക്കുന്നത്. 35000 കോടി രൂപ ലക്ഷ്യമിട്ട ത്രീ ജി ലേലം ഇപ്പോള്‍ തന്നെ 50,000 കോടി കടക്കുമെന്ന് ഉറപ്പായിക്കഴിഞ്ഞു. വന്‍‌തുകയ്‌ക്ക് സ്പെക്ട്രം ലേലം കൊള്ളുന്ന സ്ഥാപനങ്ങള്‍ എല്ലാ ഉപയോക്താക്കളെയും മൂന്നാം തലമുറ സേവനങ്ങളിലേക്കെത്തിക്കാന്‍ പതിനെട്ടടവും എടുക്കും. അപ്പോള്‍ കേരളത്തില്‍ മാത്രം ഇപ്പോഴുള്ള രണ്ട് കോടിയോളം മൊബീല്‍ ഫോണുകള്‍ പഴഞ്ചനാകും. നേരത്തെ സൂചിപ്പിച്ച ഇഷ്ടിക വലിപ്പ-ഭാരമുള്ളവ പോലെ.

നമുക്കെന്തു ചെയ്യാനാകും :
ഉപയോഗിക്കേണ്ട അല്ലെങ്കില്‍ പുതിയ മോഡലിലേക്ക് മാറേണ്ട എന്ന് ഉപദേശിക്കുന്നത് ഒരു തരത്തിലും ശരിയല്ല. എന്നാല്‍ എങ്ങനെ കാര്യക്ഷമമായി ഉപയോഗിക്കാം, ഉപയോഗാനന്തരം കൈകാര്യം ചെയ്യാം എന്ന് ചിന്തിക്കാം.

ഹാന്‍ഡ്‌സെറ്റ് ഉപകരണ നിര്‍മ്മാതാക്കള്‍ തന്നെ ഇത് പ്രവര്‍ത്തനകാലം കഴിഞ്ഞോ അറ്റകുറ്റപ്പണിക്ക് സാധ്യമാകാത്ത സമയത്തോ തിരിച്ചെടുക്കണം. ഇത് (EPR -Extended Producer Responsibility)യൂറോപ്യന്‍ യൂണിയനിലും മറ്റ് ചില രാജ്യങ്ങളിലും കര്‍ശനമായി നടപ്പാക്കിവരുന്നു. ഇങ്ങനെ ശേഖരിക്കുന്ന പാഴ് ഉപകരണങ്ങള്‍ ശാസ്ത്രീയമായി വേര്‍തിരിക്കാനാകും. ചില ഘടകങ്ങള്‍ വീണ്ടും ഉപയോഗിക്കാനാകും.

ശാസ്ത്രീയമായി ഇ-മാലിന്യം ശേഖരിച്ച് സംസ്‌കരിക്കുന്ന സ്ഥാപനങ്ങളെ പിന്തുണയ്‌ക്കുക. ഫോണ്‍ വാങ്ങുന്ന വേളയില്‍ ഒരു ചെറുതുക ഈ ഫണ്ടിലേക്ക് സ്വരുക്കൂട്ടി ഇതിനായുള്ള സംവിധാനത്തിനും പ്രചരണത്തിനും ഉപയോഗിക്കാം.

നമ്മുടെ നാട്ടില്‍ എവിടെ തിരിഞ്ഞൊന്ന് നോക്കിയാലും മൊബീല്‍ സേവന ദാതാക്കളുടെ ഓഫീസ് കാണാം. ഇവര്‍ക്കും തിരിച്ചെടുക്കല്‍ ചങ്ങലയില്‍ കണ്ണികളാകാം.

നിലവിലുള്ള മാലിന്യ മാനേജ്‌മെന്റ് നീയമവും നയവും ഇ-മാലിന്യത്തിന്റെ വെളിച്ചത്തില്‍ പരിഷ്‌കരിച്ച് നടപ്പാക്കാം.

ഉപകരണ നിര്‍മാതാക്കള്‍ക്കോ പ്രാദേശിക ടെക്നീഷ്യനോ തുറന്ന് അറ്റകുറ്റപ്പണി നടത്താനാകുന്ന രീതിയില്‍ മാത്രം ചട്ടക്കൂടുകള്‍ രൂപകല്‍‌പന നടത്തിയാല്‍ മതിയെന്ന് കര്‍ശനമായി നിര്‍ദ്ദേശിക്കാം. ഉദാഹരണത്തിന് മൊബീല്‍ ഫോണിന്റെ/ലാപ്പ് ടോപ്പിന്റെ ചാര്‍ജര്‍ തുറന്ന് നന്നാക്കാന്‍ സാധിക്കുന്ന തരത്തിലല്ല നിര്‍മ്മിച്ചിരിക്കുന്നത്. അതായത് കേവലം 50 പൈസ വിലയുള്ള ഒരു റെസിസ്റ്ററിന്റെ കുഴപ്പം ചിലപ്പോള്‍ ഉപകരണത്തിന്റെ മൊത്തത്തിലുള്ള ചരമക്കുറിപ്പെഴുതും ! ഇത് പ്രോത്സാഹിപ്പിക്കാനാകില്ല. മാത്രമല്ല ഒരു നിര്‍മ്മാതാവ് തന്നെ പല മോഡലുകള്‍ക്കും പല തരത്തിലുള്ള ചാര്‍ജര്‍ അഗ്രങ്ങള്‍ (പിന്‍ ) ആണ് വിപണിയിലെത്തിക്കുന്നത്. എന്തുകൊണ്ട് ഒരേ ശൈലിയിലുള്ളവ ആയിക്കൂടാ. ഇക്കാര്യത്തില്‍ ഒരു മാനനീകരണം (Standardisation) അനിവാര്യമാണ്.

ഭാവികാലം ടാബ്‌ലറ്റ് കമ്പ്യൂട്ടറുകളുടേത്

2010-04-18T07:56:00.000-07:00

കയ്യില്‍ കൊണ്ടുനടക്കാവുന്നതും വളരെയെളുപ്പം ഇന്റര്‍നെറ്റ് തിരയലിനും ഇ-പുസ്തകങ്ങള്‍ വായിക്കാവുന്നതുമായ സ്ലേറ്റ് പോലയുള്ള ഉപകരണങ്ങളാണ് ടാബ്‌ലറ്റ് കമ്പ്യൂട്ടറുകള്‍ .വളരെ വര്‍ഷങ്ങളായി ഒരു കൌതുകമെന്നപോലെയോ ശാസ്ത്രസാങ്കേതിക രംഗത്തെ വിസ്മയമായോ പറഞ്ഞുകേട്ടുകൊണ്ടിരിക്കുന്ന ഈ കുട്ടി കമ്പ്യൂട്ടറിന്റെ വിപണി ഉഷാറായത് ഈ വര്‍ഷം ആദ്യം ആപ്പിള്‍ ഐ പാഡിന്റെ കടന്നു വരവോടെയാണ്. മൊബീല്‍ ഫോണിനും ലാപ്ടോപ്പിനും മധ്യേയിടം പിടിക്കാവുന്നതാണ് ടാബ്‌ലറ്റ് വകഭേദമെങ്കിലും വിപണി ശക്തിയാര്‍ജിക്കുന്നതും വിലകുറയുന്നതും സംഭവിക്കുമ്പോള്‍ ആളുകള്‍ കൂട്ടത്തോടെ പേഴ്സണല്‍ കമ്പ്യൂട്ടറും ലാപ്ടോപ്പും വെടിഞ്ഞ് ടാബ്‌ലറ്റിന്റെ ആരാധകരാകും. ഐ പാഡ് വില്പനയ്ക്കെത്തിയ ആദ്യ ദിനം തന്നെ മൂന്ന് ലക്ഷം പേര്‍ പുത്തന്‍ കൌതുകത്തെ സ്വന്തമാക്കി. ഇതു തന്നെ ടാബ്‌ലറ്റുകളുടെ ഭാവി ശോഭനമാണന്നത് തെളിയിക്കുന്നു.

ആപ്പിളിന്റെ ഒട്ടുമിക്ക അവതാരങ്ങള്‍ക്കും ഉപഭോക്തൃ ഇലക്‍ട്രോണിക്സ് വിപണിയുടെ ചരിത്രത്തില്‍ ഇടം നേടാന്‍ ആയിട്ടുണ്ട്, എന്നതിനാല്‍ തന്നെ എതിര്‍ഭാഗത്തു നിലയുറപ്പിച്ചിട്ടുള്ള സ്ഥാപനങ്ങളും ആപ്പിളിന്റെ ചെറുനീക്കങ്ങളെ പോലും ജാഗ്രതയോടെ നിരീക്ഷിക്കും. കൊണ്ടുനടക്കാവുന്ന സംഗീതത്തിന്റെ കാര്യം തന്നെയെടുക്കുക, സോണി വാക്‍മാന്‍ അജയ്യമായി നിന്ന കാലത്താണ് ഡിജിറ്റല്‍ കാലമാറ്റത്തിനൊപ്പം ഐ പോഡ് എന്ന കുഞ്ഞന്‍ പാട്ടുപെട്ടി (ഒരു തീപ്പെട്ടിയുടെ അത്ര വലിപ്പവും അത്രതന്നെ ഭാരവും! ) അവതരിച്ചതും മറ്റുള്ള എല്ലാവരെയും കാതങ്ങള്‍ക്കപ്പുറം പിന്നിലാക്കി നിര്‍ണായക സ്ഥാനം നേടിയതും. സാധാരണ കാസറ്റ്‌-ടേപ്പ് റെക്കോഡറിന് നേരിട്ട തിരിച്ചടി തന്നെയാകും ഇപ്പോഴത്തെ ലാപ്‌ടോപ്പുകളെ കാത്തിരിക്കുന്നതെന്ന് കരുതുന്നവരും കുറവല്ല. ബ്ലാക്ക് ആന്‍ഡ് വൈറ്റ് ടിവി എണ്‍പതുകളുടെ ആദ്യഭാഗത്ത് വീടിന് ആഡംബരമായിരുന്നുവെങ്കില്‍ ഇന്ന് കുറച്ചിലാണ് ! പുതിയ ബ്ലാക്ക് ആന്‍ഡ് വൈറ്റ് ടിവിയാകട്ടെ കിട്ടാനുമില്ല. ഇതുപോലെയാകും വ്യക്തിഗത ഉപയോഗത്തിനുള്ള കമ്പ്യൂട്ടറുകളുടെയും വലിയ ലാപ്പ്ടോപ്പുകളുടെയും സ്ഥിതിയും. ടാബ്‌ലറ്റും നെറ്റ്ബുക്കുകളും വിപണിയുടെ സിംഹഭാഗവും കയ്യടക്കാനുള്ള സാധ്യത കൂടുതലാണ്.

ഒരു പുതിയ ഉപകരണത്തിന്റെ വിജയതോത് തീരുമാനിക്കുന്നത് അത് ഹിറ്റാകുന്ന മാനദണ്ഡം മാത്രം വിശകലനം ചെയ്തല്ല, മറ്റുള്ള ഉത്പാദകര്‍ ഈ ഗണത്തിലേക്ക് എത്തുന്നുണ്ടോ എന്നതും നിര്‍ണായകമാണ്. എച്‌പി, നോക്കിയ, ഡെല്‍ ,തോഷിബ എന്നീ വമ്പന്മാരെല്ലാം ടാബ്‌ലറ്റ് അങ്കം കുറിക്കാന്‍ തയാറെടുത്തു കഴിഞ്ഞുവെങ്കിലും കഴിഞ്ഞ ആഴ്ച വന്ന പുതിയ വാര്‍ത്തയാണ് ടാബ്‌ലറ്റ് മത്സരത്തിന്റെ തീവൃത വെളിവാക്കിയത്, മറ്റാരുമല്ല ഗൂഗിള്‍ തന്നെയാണ് ഈ രംഗത്തേക്ക് എത്തുന്നത്. ഗൂഗിളിന്റെ എതുനീക്കവും സംസാരമാകുന്ന ഗൂഗിളീകരണകാലത്ത് ഇതും ആരാധകര്‍ ആവേശത്തോടെയാണ് സ്വീകരിച്ചത്. ട്വിറ്ററിലും ബസിലും (ഗൂഗിള്‍ ബസ് ആണേ) ബ്ലോഗുകളിലും ഗൂഗിള്‍ ടാബ്‌ലറ്റിന്റെ വരവില്‍ സന്തോഷവും കൌതുകവും പ്രകടിപ്പിച്ചു കൊണ്ടുള്ള കുറിപ്പുകള്‍ എത്തി. ഗൂഗിള്‍ ടാബ്‌ലറ്റിനായുള്ള പത്രസമ്മേളനത്തിലോ ഔദ്യോഗിക വിശദീകരത്തോടെയോ അല്ല ഈ വിവരം വാര്‍ത്താലോകത്തെത്തിയത് എങ്കിലും ഇത് സ്ഥിരീകരിച്ചിട്ടുണ്ട്. കമ്പ്യൂട്ടര്‍ പോലെ പ്രവര്‍ത്തിക്കുന്ന ഒരു ഇ-ബുക്ക് റീഡര്‍ എന്നാണ് ഗൂഗിളിന്റെ മേധാവി അഭിപ്രായപ്പെട്ടത്. ഈ വര്‍ഷം ആദ്യം നെക്സസ് വണ്‍ എന്ന മോബീല്‍ ഫോണ്‍ ഗൂഗിള്‍ അവതരിപ്പിച്ചത് ഹാര്‍ഡ്‌വെയര്‍ രംഗത്തെ പ്രമുഖസാന്നിദ്ധ്യമായ എച്‌.ടിസി യുമായി സഹകരിച്ചാണ്, ടാബ്‌ലറ്റ് കമ്പ്യൂട്ടറിന്റെയും ഉപകരണപ്പങ്കാളി എച്‌ടി‌സി ആയിരിക്കുമെന്നാണ് അനുമാനിക്കുന്നത്. ഐ പാഡിനോട് മത്സരിക്കാന്‍ തന്നെയാണ് തീരുമാനം എന്നുറപ്പ്. ആന്‍‌ഡ്രോയ്ഡ് എന്ന പ്രവര്‍ത്തകസംവിധാനം(ഒ എസ്) ആയിരിക്കും ടാബ്‌ലറ്റില്‍ ഉള്‍പ്പെടുത്തുക, എന്നാല്‍ എതാനും മാസങ്ങള്‍ക്കുള്ളില്‍ പുറത്തിറക്കുന്ന ക്രോം ഒ എസ് ഇതില്‍ എന്തുകൊണ്ട് ഉപയോഗിക്കുന്നില്ല എന്ന ചോദ്യം പ്രസക്തമാണ്. ചിലപ്പോള്‍ ക്രോം വകഭേദവും താമസിയാതെ എത്തുമായിരിക്കും എന്ന് കരുതാം.

ടാബ്‌ലറ്റിന്റെ പ്രധാന നേട്ടം അതിന്റെ രൂപഘടന തന്നെയാണ്. ടച്ച് സ്ക്രീന്‍ അടിസ്ഥാനമാക്കിയ വിവരാലേഖനം ആണ് ഇതില്‍ .പ്രധാന നേട്ടം ഇത് പലതരത്തില്‍ ഉപയോഗിക്കാം. കിടന്നു കൊണ്ടോ, നടക്കുമ്പോഴോ, തീവണ്ടി യാത്ര ചെയ്യുന്ന അവസരത്തിലോ കീ ബോഡിന്റെയും മൌസിന്റെയും കുരുക്കുകളില്ലാത്തത് പ്രയോജനപ്രദമാണ്. ടൈപ്പ് ചെയ്യുന്ന വേളയില്‍ സ്ക്രീനിന്റെ ഒരു ഭാഗത്ത് കീ ബോഡ് ലേ ഔട്ട് തെളിയും ഇതില്‍ വിരലമര്‍ത്തിയാല്‍ മതി. ഇപ്പോള്‍ തന്നെ മൊബീല്‍ ഫോണില്‍ വളരെ വിജയകരമായി ടച്ച് സ്ക്രീന്‍ ഉണ്ടല്ലോ. ഇതിന്റെ അതേ രൂപം വലിയ അളവില്‍ പ്രയോഗിച്ചിരിക്കുന്നു. സ്റ്റൈലസ് , ഡിജിറ്റല്‍ പെന്‍ എന്നിവ ഉപയോഗിക്കാവുന്ന രീതികളും പ്രചാരത്തില്‍ ഉണ്ടെങ്കിലും വിരലമര്‍ത്തല്‍ തന്നെ അനായാസം. സാധാരണ കീബോഡിനെ അപേക്ഷിച്ച് പ്രതി മിനുട്ടില്‍ രേഖപ്പെടുത്താന്‍ സാധിക്കുന്ന വാക്കുകളുടെ എണ്ണത്തില്‍ (WPM) കുറവുണ്ടാകുമെങ്കിലും, പ്രധാന ഉപയോഗം മണിക്കൂറുകള്‍ നീളുന്ന ടൈപ്പിംഗ് അല്ലാത്തതിനാല്‍ ഇതൊരു പോരായ്മയായെടുക്കേണ്ടതില്ല. കൈയ്യക്ഷരം തിരിച്ചറിയലും (hand writing sensor) ശബ്ദാനുവര്‍ത്തി വിവരാലേഖനവും (voice recognition) കൂടി കണക്കിലെടുക്കുന്നതോടെ ടാബ്‌ലറ്റുകളുടെ കരുത്ത് വര്‍ധിക്കുന്നു. എടുത്തു പറയേണ്ട മറ്റോരു നേട്ടം, കീബോഡുകള്‍ക്ക് വരുത്താവുന്ന വേഷപ്പകര്‍ച്ചയാണ്, ഉദാഹരണത്തിന് മലയാളം പോലുള്ള പ്രാദേശിക ഭാഷ ടൈപ്പ് ചെയ്യുമ്പോള്‍ കീ ബോഡിലെ ബട്ടണുകള്‍ക്ക് മുകളില്‍ എഴുതിയിരിക്കുന്നതും അതേ അക്ഷരമായിരിക്കും. നിലവില്‍ മലയാളം അക്ഷരങ്ങള്‍ ഉള്ള കീ ബോഡ് മുഖ്യധാരാ വിപണിയില്‍ ഇല്ല എന്നു കൂടി ഓര്‍ക്കുക. അടുത്ത മാത്രയില്‍ നിങ്ങളുടെ കര്‍ണാടകക്കാരന്‍ ചങ്ങാതിയ്ക്ക് കന്നട ടൈപ്പ് ചെയ്യണമെങ്കില്‍ അതിനും ടാബ്‌ലറ്റ് കമ്പ്യൂട്ടര്‍ തയാര്‍ ,ക്രമീകരണത്തിലെ ചെറിയ മാറ്റം കൊണ്ട് ലോകത്തിലെ എത് ഭാഷയിലേക്കും കീ ബോഡ് പകര്‍ന്നാട്ടം നടത്തും.

Sci-Fi ബൈറ്റ്സ്: മലയാളിയായ നാനോ‌ടെക്‍നോളജി വിദഗ്ദന്‍ ഡോ.പുളിക്കല്‍ അജയനും സംഘവും ചുരുട്ടിയെടുക്കാവുന്ന ബാറ്ററി കണ്ടെത്തിയിട്ടുണ്ട്. ഇതേ പോലെ എളുപ്പത്തില്‍ വളയ്ക്കാവുന്ന സ്ക്രീനും പരീക്ഷണശാലയില്‍ നിന്ന് ഫാക്‍ടറിയിലേക്കുള്ള യാത്രയിലാണ്. ടാബ്‌ലറ്റ് കമ്പ്യൂട്ടര്‍ ആശയം ഇതുമായി കൂട്ടിയിണക്കിയാല്‍ സമീപഭാവിയില്‍ തന്നെ കീശയിലേക്ക് ചുരുട്ടിയോ മടക്കിയോ വയ്ക്കാവുന്ന കമ്പ്യൂട്ടര്‍ വരുമെന്നത് ശാസ്ത്രകല്പിത കഥയല്ല മറിച്ച് സാങ്കേതികവിദ്യാ രംഗത്തെ ഒരു സാധ്യതയാണ്. അതിനെ കടലാസ് കമ്പ്യൂട്ടര്‍ എന്നോ കീശ കമ്പ്യൂട്ടര്‍ എന്നോ വിളിക്കാമോ !